عوضني بيك

#عوضني_بيك

الحلقة 10

رهف: كانت احلى ليله في حياتي اول مرة نرقد وبالي متريح بعد موتت باتي نرقد في حضن حد ايخاف عليا وايحبني قعدت انفكر لين حسيت بخالد ايخرخش في خشمي ضحكت ورفعت راسي
خالد: وين راح الحلو❤❤
رهف: رندة شن كانت تبي منك
خالد: هههههههههه ماهو كان جونا سمح توا
رهف: ههههههه اتقولي انقولك شن كان يبي منير😌😌😌
خالد: هههههههه نضت قعدت اندغدغ فيها وحدة بوحدة يعني قولي 😂😂😂
رهف: اييييييييي ههههههههه لالا وراس امك لا خلاص خلاص ماعاد نبي نعرف وووووووووه
خالد: تعالي هنا كريتها في حضني....... بنسألك
رهف: اسأل حبيبي
خالد: الله محلاها منك 😍😍عاوديها شنو
رهف:حبيبي وعمري وكل شي
خالد:ربي ايخليك ليا ياقلبي
رهف:امين..قول شن بتسأل
خالد: ريت امارات حرق فيك💔💔
رهف: الضحكة قعدت تختفي تدريجياً خالد لاحظ عليا طول
خالد: خيرك حبيبي لي هالدرجة الموضوع خطير
رهف: مرت عمي حرقتني بعد كنت صغيرة وخنقتني العبرة😢😢😢
خالد: اول ماعرفت السبب زدت دخلتها في حضني كان لقيت دخلتها في قلبي بيش مايوصل فيها حد😔😔 لي هالدرجة عاشة طفولة بشعة
رهف: عارف ياخالد
خالد: ياعيون خالد
رهف: انحس ربي دزك ليا بيش تشفي جروحي وتملى النقص يلي في حياتي خليك ديما جنبي
خالد: ربي مايفرقنا ان شاءالله وانجيبو 10عويل ههههه
رهف: هههههههه لاااا
خالد: هههههههههه
رهف: نشكر ربي لان #عوضني_بيك ...... هذرزنا وشكينا وفضفضنا وبعدها نوووووم😴😴😴😴

~~~~

سمر: رندة خيرك امبدري لونك مخطوف شن صار بينك وبين خالد
رندة: عادي لا مخطوف لا شي وماصار شي بينا خيرك انتي شادتيها في جرتي😠😠
سمر: مانيش عيلة اني اتفوتي عليا في الطروح ريت بعيني شن يلي صار وطلعت
رندة: حي كان مايخبر فيا خوتي خالد 😢😢😢 خلي ايخبر اني ضروري ماندير شي ايفرق بينهم خلي انكلم جمال انشوفه بالك يلقالي حل😉😉😉

~~~~
تاني يوم☀☀

رهف: نضت الصبح لقيت خالد نايض وايتفرج عليا وايحرك في يده ع خدي صباح الورد
خالد: مش امصدق يلي صار اول مانضت نسحاب روحي نحلم بعدها ريت رهف جنبي فرحت قعدت انتأمل فيها ملامحها بريئة ماتستاهل يلي صار فيها قعدت انحول في شعرها ع وجها عطيت وعد لي روحي انعوضها ع يلي فات كله قعدت تفتح في عيونها.... صباح الفل والياسمين وحضنتها بكل قوتي كأني انقوللها اني جنبك ويلي صار مش حلم... هيا غسلي كملي امورك خلينا نفطرو برا
رهف: هيييييي حقا
خالد: بشوي يامجنونة هههههههههههههه
نضنا كملنا امورنا وطلعنا فطرنا واتدهورنا كان خالد فرحااااااان والضحكة مافارقت وجه زاد سماحه ايهببببببل... خليك ديما تضحك
خالد: ليش😂😂😂😂
رهف: احلى من وجهك وانت امعصب😁😁😁
خالد: هههههههههههه هيا خلينا انروحو قبل لا يبان الوجه التاني
رهف: لالالا كل شي الا الوجه التاني
خالد: معناها هيا لشقة 😁😁😁
رهف: لاليش حبيبي الجو ايهبببل
خالد: ماهو في الشقة الجو احلى😉😉😉
رهف: ههههههههههههههه
خالد: اسسسسس الناس اتشوفلك😠😠😠
رهف: ها🙊🙊🙊 سكتت ضروري اتخربها😁😁
روحنا طووووول ع دار النوم🙈🙈🙈🙈🙈 تغدينا وكملت حوستي خطرت عليا رانيا حييييي انسيت انكلمها ونضت
خالد: خيرك خلعتيني
رهف: انكلم فيه واني في الدار انسيت انكلم رانيا ايييوه
رانيا: هلا هوفي شن جوك
رهف: تمام انتي كيف دايره وكيف حال هلك
رانيا: الحمدلله
رهف: قتلك هذا غير طلعتي امشفشفة ودرتي هكي كان بارمه ع روحك كيف درتي 😂😂😂😂😂😂
رانيا: شنوووو
رهف: منير شكله طاح ع زومته😂😂😂
رانيا: حييييييي حقا🙈🙈🙈
رهف: قالي عجبتني كان ماعندها حد في بالها نبيها حب من اول نظرة😁😁😁
رانيا: ياامي ياامي قصدك الجمال يلي ريته كله ليااا 😍😍😍😍
رهف: مجنووونة وحق ربي هيا قولي شن انرد عليه
رانيا: قوليله قاتلك موافقة تم تم😁😁
رهف: هههههههههه اتقلي بلا خفه اسمعيني انقوله ماعندها حد وع اساس اني نقترح عليه ايكلم ونعطيه رقمك بدون ماانتي تندري تم
رانيا: يلي بتديريه ديريه المهم قربي راسين بالحلال😂😂😂😂
رهف: 😂😂😂😂عطك السلامة هيا سلام بعدين انتكالمو تلامحت الباب تحرك عرفت خالد يسمع فيا صكرت من رانيا وطلعت شن كنت اتدير
خالد: ماندير في شي
رهف: وباب الدار من كان حداه يصنت🤔🤔
خالد: ههههههههههههههه
رهف: شن الحركات هذين ياخالد
خالد: ماهو قلبي وعمري عارف الموضوع وراه منير وانتي ماتبيش اتخبريني قلت خليني نعرف بطريقتي وهيا واقفه فوق راسي وحاطه يديها في نصها كريتها طيحتها عليا ههههههه
رهف: لااا ياصامط هههههههههههه فات الوقت عادي تعشينا وهذرزنا ونووووووووم 😴😴😴😴

~~~~
الصبح
رهف: نضت ع صوت تلفوني يرن رفعت انشوف من لقيتها رانيا والساعة9 خيرها مش عادتها اترن في الوقت هذا
خالد: من وعيونه امغمضات
رهف: رانيا ان شاءالله خير اييوه
رانيا: ايوه صباح الخير
رهف: شن في شن صاير ع الصبح
رانيا: عمك مفتاح طاح عليهم رفعوه للمستشفي قالو في العناية
رهف: اول ماسمعت الخبر طوول قعمزت هو صح مش داير فيا خير لكن من صنت باتي مانرضاش اتصير فيه حاجة ع كل شي داره فيا عمري مادعيت عليه طول دموعي نزلاً والله امتي في اي مستشفي
رانيا: في مستشفي..........
رهف: صكرت منها قعدت نبكي خالد مخلوع من شن صاير شن في خبرته و درتله بكاوات قتله تو ترفعني قالي نوضي نرفعك عدينا للمستشفي..
خالد: جي للاستعلامات في حالة جابوها الصبح اسمه مفتاح......
الاستعلامات: في الدور التاني في العناية
خالد: صحيت هيا تعالي نرقو
رهف: نرقا مع الدروج وانقول ان شاءالله مايصيرله شي ان شاءالله اينوض حاله باهي اول ماشفتهم قدام العناية مشيت نجري جتني بدرية هيا الاولى حضنتها وقعدت تبكي طلقتها وجيت لي ع احلام حسيتها مكسورة قعمزت حداها ع الكرسي وحضنتني كأنها اتقولي سامحيني.... انجو لليوم يلي قبل مايمرض عمي
ع احلام: بدرية بدور الباب ايخبط
بدرية: تو نفتح ياامي من
الشرطي: افتحي احني الشرطة جاينه امر بالقبض ع احمد مفتاح
بدرية: جت تجري حي ياامي الشرطة يبو خوي احمد
ع احلام: وووك عليا خيره شن داير ياهمي وينه خوك هو
بدرية: جي امبدري كيف المخلوع خدي دبشه طلع حتي الكلام مابي ايكلمني
ع مفتاح: خيركم دايرين دوشه وخيره احمد
ع احلام: حي علينا يامفتاح ولدك ابصر شن داير الشرطة اتدور فيه قريب ايقلعو الباب
ع مفتاح: ولدك مايجيب غير المصايب طلع فتح الباب سلم عليهم وقاللهم خير ولدي شن تهمته
الشرطي: ولدك داير مشكلة وضارب واحد بي موس هو في حالة سكر وفي مكان مشبوه ومطلوب القبض عليه
ع مفتاح: حط يده ع قلبه ولدي مش قاعد وكان لقيتوه اقتلوه وصكر الباب وخش
ع احلام: خيره ولدك شن داير وخيره وجهك هكي
ع مفتاح: ماتقوليش ولدك اني ماعنديش ولد وقعمز قعد ايخبر فيهم شن داير
ع احلام: اتخبط في خدودها حي علي حي علي ياحشمتي قدام الناس كيف الراي توا
ع مفتاح: يلي بيديروه ايديروه عييت واني انلم وراه اني متبري منه اني خاش بنرقد
ع احلام: خشت عليه لقاته ايتقلب وحاط يده ع قلبه خيرك اتحس في شي
ع مفتاح: هذين عمايلنا في بنت خوي ردن علينا
ع احلام: 😔😔😔
ع مفتاح: ان شاءالله غير اتسامحنا بس انحس في قلبي كان ربي ياخد امانته وهي زعلانه مني...
ع احلام:قصت عليه بعيد السو عليك
ع مفتاح: القصة ماهي زعل بس اني واخد فلوسها يلي امعقبهلها باتها وصرفتهن ع ولدك الصايع الضايع اااااه
ع احلام: خلاص يامفتاح الله غالب ان شاءالله اتسامحنا هيا نوض نرفعوك المستشفي نطمنو عليك
ع مفتاح: لالا طفي علي الضي وخليني بنرقد رقد لعند الصبح لما جت ع احلام بتنوضه لقاته غايب ع الوعي سعفوه بين الحياة والموت....

****

يتبع

#الكاتبة_موني_موني