#عوضني_بيك
الحلقة2
رهف: كملت صلاتي درت غداي وغديتهم واني نغسل في لماعين كل مرة خاشه وحدة مرة اتقول اغسلي اغسلي قريب نفتكو من وجهك وحدة اتقول شن بيفوتهن هالاسبوعين واني خانقتني العبرة خش عليا عمي..
ع مفتاح: اسمعي يابنت عطيت لي عمتك احلام الفين دينار في العشية يرفعكن احمد خودي يلي ناقصك
رهف: حاضر😔😔 خشت ع احلام
ع احلام: كملي حوستك ووتي روحك بيش اتعدي انتي وبدرية وطلعت وهيا اتكشخ😏😏😏
رهف: خشيت انوتي في روحي جتني بدرية
بدرية: ها شنو واتية
رهف: اي خلاص هاني طالعة وطلعت
~~~~
خالد: وصلت للقهوة لقيت نوري ايراجي فيا خيير
نوري: اوووووو خير ياعريس
خالد: بالله فوتني ماعندي جو لبصارتك طلعت دخاني وقعدت اندخن
نوري: خلاص ياراجل شن صار في موضوعك
خالد: والله انحس في روحي بنطربق مش عارف منين جت هالمصيبة زبكوني واني ماعنديش جو لوجيج النسوان.. انتكلم واني امعصب وعروقي قريب ينفجرن والدخان يطلع مع خشمي
نوري: غير فكر ياخالد مرات خيرتك فيها
خالد: شنوووو اتقووول انتتت خيييرتي فيي شنووو انيي مانبيييش خيييركم ماااتفهممووش مش مسستعددد عندي مشاريع فيي رااسي بنووسع شغلي ونبي انسااافر الشركة طالبتنيي ماتفهموش انتم
نوري: غير هدي ياراجل وشوف روحك
خالد: مانبييييش وكااان جييي الوقتتت ونبي نزوج بنختاار بروووحي مش يغصبوني.. انتكلم وانخبط ع الطاولة يلي في القهوة كلهم ايشوفولي
نوري: ياراجل هدي شوف الناس كلهم ايشوفولك
خالد: خليهم ايشوفو ماني خايف من حد قربعت الطاولة ونضت لحقني نوري
نوري: راجي راجي انت عقلك مش عليك تو تقلب السيارة هات المفتاح عنك
خالد: ماعنديش جو انتكلم عطيته المفتاح وركبت قعدت امسهم وانفكر لين لقيت روحي واقفين ع البحر هذا المكان الوحيد يلي نهدى فيه ونوري عارفني..
~~~~
بدرية: شوفي هذا محلاه 😍😍
رهف: اي حلوو
بدرية: شنو ناخدوه خلاص اصلا شبه كملنا مازال حاجات بسيطة بس
رهف: لالا شنو تاخديه مانقدر نلبسه.. اصلا من وصلنا وبدرية هيا يلي تاخد واني مش معاها مش عارفه شنو يلي خداته
بدرية: شنو ماتقدري تلبسيه احني خدينا احرف من هكي هيا خليني انخلص بيش انشوفوا المكياج
رهف: ماشي هيا طلعنا وخدتني الذاكرة لي وقت قبل مايموت باتي..
رهف: بابا شوف قفطاني حلوو بنلبسه في حفلة خالتي لولو عجبك صح😍😍😍
ماما: خلي باتك يشرب القهوة وانتي من وصلتك من المحلات ماسكتي بكل
بابا: خليها حبيبة باتها اي حلو ان شاءالله انشوفك لابستيه في حفلتك ونفرح بيك
ماما: ان شاءالله بطولة عمرك
رهف: حيييييي قصدك حتي اني بتديرلي حفلة كيف خالتي لولو تو انخبر صاحباتي ونعزمهن😍😍
بابا: تعالي هنا يافصعونه مش توا بعد تكبري😂😂😂
ماما: ههههههه مجنون وبتجنن عليا البنت
بابا: هههههههههه
رهف: حسيت بيد بدرية ع كتفي ردتني للواقع المر هااا خيرك بدرية
بدرية: ليا ساعة انكلم فيك نبيك تختاري معاي احترت شن ناخدلك من المكياج
رهف: خودي يلي يعجبك وهيا خلينا انخلصو تعبت اني ع خشت احمد
احمد: هااا شنو كملتو وراي مية حاجة
بدرية: اي اي خلاص وطلعنا روحنا
رهف: اول ماروحنا طوووول لي داري انحس في روحي متضايقة طلعت صورة باتي الصورة الوحيدة يلي عندي شكيتله شوي و دكيت راسي في المخدة افكار ايقلن وافكار ايجيبن وبدرية اتوري فيهن في الحاجات مانندري ع روحي لين نعست...
~~~~
خالد: قعدنا شوي ع البحر حسيت روحي هديت ونوري قنعني بكلامه حسيت روحي زوتها بعصبيتي اني هكي حاجة ماعجبتنيش مانعرفش انساير
نوري: هاا شنو فكرت
خالد: شهرين بس اكتر من هكي لا
نوري: خلاص دير رايك وقبل ماتسرع احسبها زييين وخفف من هالعصبية ومن الدخان وانت من الصبح اتنبغ يوم من الايام بيقتلنك
خالد: ان شاءالله ايصير خير شنو انحطك حدا سيارتك والا كيف
نوري: تم تم
خالد: طلعنا حطيت نوري حدا سيارته وروحت واني مقتنع بلي بنديره خشيت لقيتهم مجتمعين وايخططو سلام
الكل: سلام
ع سالمة: وينك ياوليدي من طلعتك الصبح ماعاد ريتك
خالد: اهو قاعد كنت مع الشباب خير في شي
ع سالمة: لا خلوده غير انشغلت بس
اختي رويده: مبرووك عليك ان شاءالله انشوفو عويلتك
خالد: رديت عليها بلا نية ان شاءالله
اختي بسمة: وانردولهم يلي درته فينا 😂😂😂
الكل: هههههههههه
خالد:😡😡 واني عروق رقبتي بيطلعن كلهم ركزو فيا سكتو...
ع سالم: شنو قررت وين بتسكن
خوي عيسى: شوف اجار مشي فيها لين تبدا تبني في قطعتك بشوي عليك
خالد: تو انشوف نوري ايدورلي تصبحو ع خير خشيت داري وخليتهم حس هذرزتهم ودوشتهم وجعتلي راسي اخخخخ اخ يالولا امي بس هيا يلي امخليتني ساكت ومتحمل ليش اتوافق ع واحد لاراته ولا راها في سبب مع الوقت نعرفه قعدت غارق في الافكار لين رقدت😴😴
~~~~
رهف: نضت ع تقربيع بدور حايسة بتمشي للكلية اتدير فيها قصد بيش اتنوضني مش اول مرة اتديرها خشيت للحمام وصليت ووتيت الفطور خطرت عليا امي خيرها ماكلمتني ولاجتني زعما عندها علم بيا بنزوج بالله هيا امتي دورتني والا نشدت عليا غير من عيد لعيد حتي نقال كيف البنات ماعندي انشوف لي بدرية وبدور بنقالاتهاً الا اني اه اه نزلت دمعتي مسحتها وخديت وعد ماعاد انخلي شي ايبكيني ولهيت في حوستي...
~~~~
ع سالمة: شنو يارويدة كلمتي صاحبة الحلويات وعطيتيها موعد ماعاد في وقت خلاص
رويدة: اي كلمتها ان شاءالله اتكمل ع موعدها
ع سالمة: ان شاءالله وانتي يابسمة الموالح شن صار فيهن
بسمة: ياامي خيرك امغششه روحك قتلك اتفقت اني وياها كم نوع وع موعدها ان شاءالله هفت يافرخ خلي المنديل اني انطبق وانت اتفك
خالد: نضت ع صوت هالهمج وفروخهن مش عارف خيرهن مايعرفنش ايديرن الحاجة بلا صوت طلعت واني فاصل..
****
يتبع
