عوضني بيك

#عوضني_بيك

الحلقة 3

خالد: ماتقولنش في بهيم راقد انوطو صوتنا والا هالمفرخ ماتعرفنش اتسكتنهم عليك معيشة حرفه طلعت وقربعت الباب انحس لما انقربع الباب ايخفف عليا
ع سالمة: هالولد غششني انحس فيه بيحشمني مع العرب وبيظلم البنت معاه😔😔
بسمة: حي حي
رويدة: غير انتي ماترخيله ديري روحك مريضة ومانك راضية عليه تو ايخاف هو ماوافق لين انتي زنيتي عليه
ع سالمة: يستر الله هيا ماعاد في وقت
ع سالم: شن اتديرو حايسين
ع سالمة: جيت وجابك ربي كنت جاياتك بننشدك ع فلوس العرب رفعتهاً ليهم بالك العروس مستحقه شي
ع سالم: هني روحك ياعزوز عطيتهاً وكل شي تمام
~~~~
خالد: عديت لشركة ليا يومين غياب عندي شوي ملفات انكمل فيهاً مع خشت اروى حطيت ايدي ع وجهي ياعليك نهار مبروك كملت
اروى: هاااي
خالد: وعليكم السلام انكلم فيها وداك راسي في الملفات
اروى: هههههههه مبروك عليك قالو خطبت
خالد: في عقلي خطبه عوجة لكن والله ماني ساكتلك نبقى حارق دمك زابطها من قبل حاطه عينها عليا..رفعت راسي اي والله ربي ايبارك فيك ان شاءالله مع ابتسامه خليتها اتخش في بعضها هيا سامعه طراطيش كلام لكن تبتلها العكس
اروى: اها باهي كويس هيا نستأذاً وطلعت
خالد: يابنت الكلب هكي تبي مش عارف هالنسوان شن طينتهاً بس اخخخخ اخ بس مع خشت نوري
نوري: اووووووووو الشركة امنورة😍😍
خالد: امنوره بيك
نوري: انقولك حاجة اتصدقني
خالد: قول شنو مش فاضيلك وراي مية موال
نوري: عرفت بنلقاك في المكتب من وجوه الموظفات يلي واقفه عالمرايا اتمكيج ويلي اتساوي في لبستها ويلي شاده الباب اتراجي😂😂😂
خالد: ههههههههههه والله ماعندي جو نضحك يادراه
نوري: والله جديات شن دايرلهاً لين طايحات ع وجوهاً😁😁😁
خالد: سر😎😎
نوري: خف علينا ياااا كمل كمل كان خليتك متعقد خير😂😂😂
خالد: خديت القلم ضربته بيه نوض اخطاني ناض وهو يضحك
~~~~~
رهف: كملت حوست المطبخ خشيت لدار مع الساعة 4:00 انفتح باب الدار رفعت راسي لقيتها اختي وصاحبتي يلي اتخفف عليا في همي بنت جيرانه بنية اتهبببل رانيا هيا الوحيدة يلي اتجيني ونمشيلها نضت خديتها بالاحضان..
رانيا: شن جوك يازومة وينك امغطسة لاعين لاجرة
رهف: اهو شوفت عينك وانتي عارفة نظامي😔😔 انتي قولي شن جوك وكيف دايره ليك اسبوعين عند جدودك قلت اكيد نستني
رانيا: تمام كسااااد ننسى روحي وماننساك يابقرة انتي شن دايره
رهف: سمعتي اخر خبر😢😢
رانيا: لا شنووو
رهف: بيزوحوني وعرسي بعد اسبوعين وخنقتني العبرة لكن اتذكرت اني عاطية وعد لي روحي ماعاد نبكي ابتسمت ابتسامة مزيفة
رانيا: 😱😱😱كذابة وخيرك تضحكي قصدك تبي انتي ومن هو طايح السعد
رهف: مانبي لكن مرات خير من هالحبس اتصدقي مانعرف عنه شي لا اسم لا عمر يلي نعرفها ومتأكده منها امه يلي جتنا بس
رانيا: حبيبتي عارفه جاني احساس انها القصة في صالحك
رهف: هههههههههه منين جاك الاحساس ياام الاحاسيس
رانيا: 😂😂😂تتسهوكي قولي ماقاتها رنوو المهم كيف دايرات معاك هالعقارب فات الوقت ضحك وسهوكة ورنو ماينمل منها قريب المغرب روحت واني نضت درت العشي..
~~~~
خالد: كملنا شغلنا وطلعت اني ونوري تغدينا برا وكسدنا شوي مع الساعة4:30 طلعنا اندورو في شقة للاجار حصلت شقة قريبة من حوشنا وحسيت نوري متحمس اكتر مني تبي شوي تنظيف جابلها عمال نظفوها وكملوها قريب العشي كل واحد روح لي حوشه واني حسيت روحي هديت عن قبل..
لقيت امي اتراجي فيا وفي فمها كلام مسحت يدي ع وجهي ربي ايجيبك ياطولة البال خير ياامي
ع سالمة: خيرخير تعال قعمز حداي نبيك شوي
خالد: والله ياامي ماعندي جهد مش تبيني انعرس اهو درت كيف ماتبي غير ارضي بس اجرت حتي شقة ونظفتها ناقصها غير اثاث بس وبكرا ماشي اني ونوري بنختارو الفرش انتكلم واني ضاغط ع سنوني من العصبية
ع سالمة: باهي عروستك ماتبي تشوفها با...
خالد: قصيت عليها خيرك شاورتيني بعد كلمتيهم وخديتي منهم موعد اه اني مانبي نشبح حد انتي عجباتك خلاص هيا تصبحي ع خير خشيت لداري واني نحرق خيرها بنصور حداها كلهن شهرين وتنتلف عن وجهي قاتلك شوفها ههي غيرت وكملت باقي باكو الدخان ورقدت طووول من التعب...
~~~
رهف: اسبوعين عدن واني انوتي ونجري بروحي العروس وين يقرب عرسها تقعد تهتم بروحها وبحاجتها بس واني من دون البنات العرس كان ماوقفتش ودرت حاجتي ماتلقي حد ايديرها😔😔😔
الوحيدة يلي اتعاون فيا رانيا ماخلتني اني وياها يد بيد امي كلمتني بالتلفون وقاتلي مانقدرش انجي لان راجلها عمل مابوش يعطوه اجازه ههه مش عذر تقدر اتكلم حد من خوتها تقدر تلقى اي طريقة اتجي اتشارك بنتها فرحتها المزيفة😢😢😢 المهم اني متعوده ع احلام دايره واجبها قدام الناس بس كتر خيرها...
~~~~
خالد: اسبوعين عدن كان نلقاهن مزاااال نشبح في امي والبنات حايسات ايوتن كل ما تنقص حاجة يطلعن للمحلات ايجبنها حتي حوسة الشقة كملناها اني ونوري كتر خيره ماخلاني بكل هو يخدم اكتر مني تفصيلة الشقة اول ماتخش اتجيك مربوعة ع اليمين ومقابلها حمام وبعدها صالة يفتح فيها المطبخ ويفتح فيها ممر فيه دارين امقابلات وبينهن حمام..
اليوم قالو ماشيين دايره حفله وبيحنوها وبيروحوو نبي اندير قصة نبي انفش غلي في شي ماعرفتش شنو ليااسبوعين ساكت خطرت عليا الحنه خشيت نجري..
خالد: امي امييييي
ع سالمة: نعم خيرك اتعيط قدام العرب حشمت بينا
خالد: شنو حسكم قلتو بتحنوهااا
ع سالمة: اي خيرك شن جاك
خالد: ردو بالكم اتجيبوها امحنية😡😡😡
ع سالمة: كيييف عروس بلاحنه😠😠
خالد: اني مانعرفش اتجي امحنية اترد مع جرتها ديري رايك طلعت وخليتها...
ع سالمة: اتحك في خدودها حي عليا حي عليا جتها بنتها رويده
رويده: خيرك ياامي شن في شن صاير وهيا مخلوعة
ع سالمة: خوك بيحشمني قدام الناس قالي العروس اتجي امحنية اترد مع جرتها حي ياحشمتي شن بنقوللها بس
رويده: غير هدي روحك تو نلقو حل اسكتي وخشي عماتي وخالاتي تو ايلاحظن حاجة والعروس تو اني انقوللها..

****

يتبع

#الكاتبة_موني_موني