أنا بشاربك يا علي

الحلقة -23-

البارت الثالث والعشرون(23)
((أنا بشاربك ياعلي))
بقلمي :-فراقد حسن علي
..............،،،،،،،.............

حجي عمران /هااااا من ليش ،،هسه اسولفلك ،،من يجهبهم أبو محمد واكيد مراح يمشي وحده ألهم

والوادم تشوف هاي العمايم الخيره يطبون لبيتهم يصرلهم فخر والله بيت ابو فلان جهبوهم اليوم الساده والشيوخ واكيد راح يطش عدهم الخبر همه شنو ومنين فيتفاخرون بكلام الناس ،،ويعوفون كلام الله وره ظهورهم من ظلموا البت

بغض النظر عن الموضوع مهما كان راح يخجلون يردون هيج وجوه خيره وكتلك هناك فقره عدهم عيب وفشل يردون السيد ويعتبرون اذا زعل منهم تحل بيهم لعنة فعتبر الموضوع منتهي باذن الله

علي/والله ياعمي أقتنعت بحجيك ،،وماجنت مفكر بهيج حل ولا انطرق على بالي

حجي عمران /يلا بويه أمشينه لبيته هو منتظرنه انا انطيته علم بجيتنه 

رحت ويه حجي عمران لبيت السيد أبو محمد،،واستقبلنه،، رحب وهلا بينه تكول وكعنه عليه من السماء ،،بعد السلام والكلام والضيافه

ألسيد/اي بويه سولفلي كلشي من بادئ الامر

علي/سيدنا اني بيوم قررت ازور اهلي للمگبره وطلعت الفجر .......سولفت كل سالفه اله لحد وصولي لبيته هسه وهو يستمع بدقه

السيد/أول شي :-بارك الله بيك أبني وجعل الله عملك هذا بميزان حسناتك

بويه أول ألامر حرام شرعاً أنت والبت تنجمعون بيت واحد لان يسموها بالدين(( خلوه ))يعني بس انتوا ألاثنين وثالثكم الشيطان وماكو اي صيغه شرعيه حلال تجمع بينكم اقصد ((عقد الزواج الشرعي))

وثاني شي :-إذا تمّ الطلاق قبل الخلوة الشّرعية فلا يكون للمرأة عدّة،، بدليل قوله تعالى:((يَا أَيُّهَا الَّذِينَ آمَنُوا إِذَا نَكَحْتُمُ الْمُؤْمِنَاتِ ثُمَّ طَلَّقْتُمُوهُنَّ مِنْ قَبْلِ أَنْ تَمَسُّوهُنَّ فَمَا لَكُمْ عَلَيْهِنَّ مِنْ عِدَّةٍ تَعْتَدُّونَهَا فَمَتِّعُوهُنَّ وَسَرِّحُوهُنَّ سَرَاحاً جَمِيلاً))
حيث يحلّ لها أن تخطب وتتزوّج بعد الطلاق مباشرةً.

**أمّا في حال تمّ الطلاق بعد الخلوة الشّرعية، فإنَّ لذلك أحكاماً خاصّةً،

**إذا كانت المرأة حاملاً، فإنّ عدّتها تكون حتى تضع حملها،،حتّى وإن كانت في شهرها التّاسع، فإذا طلقت وكانت حاملاً، ثمّ أنجبت المولود بعد الطلاق بيوم واحد تكون قد انتهت مدّة عدّتها.

**إذا كانت المرأة من ذوات الحيض وهي غير حامل،،فإنّ عدّتها تكون ثلاث حيضات كاملات.

**إذا كانت المرأة لا تحيض لكبر سنها أو لصغرها، فإنَّ عدّتها تكون ثلاثة أشهر.

خلي اشرحها الك بلهجتنا ،،من كلام البت وكثره حلفانها وقسمها بتبرئه نفسها ،،وان الرجل ماتقرب ألها ،،كأي رجل يدخل على زوجته من باب الحلال الي حلله الله سبحانه وتعالى أله ،،ولم تحصل الدخله الشرعيه كامله يعني ((لم يدخل بها وهي بعدها باكر ))ليس عليها واجب من العده الي تنوجب على أي مطلقه يعني نكدر نكول ((بحكم المخطوبه بعدها))