أنا بشاربك يا علي

الحلقة -4-

البارت ألرابع (4)
((أنا بشاربك يا علي ))
بقلمي :-فراقد حسن علي
...............،،،،،..............

كمت اعيط واصيح وابجي واكمز ومااعرف شحجي اروح منا ،،وارجع منا ،، واكمش ايد هذا ،،واجلب بيد ذاك ،،،،بس كولولي ماكو واحد بيهم عايش ماشفتوا واحد بعد بي نفس ....

وأسمع هذا الي يكول الله يرحمهم ،،وهذا يكول الله يصبرك ،،وهذاك يكول الله يعوضهم الجنه ،،سمعت جميع كلام التعزيه والتصبير بهذني الثواني القليله ،، احس كل الموجودين يحجون سويه

بس واحد منهم كالي كلام خبلني ،،أستغفر ربك أبني ،،وأنت مصابك جبير شد حيلك ،،وروح شوف اهلك وين بيأمستشفى ،،وقوم بواجبهم وأحسن دفنهم أكرام الميت دفنه أوليدي

أني سمعت هيج كال وكل احساسي وسمعي ركز بكل كلمه كالها من صدمه كلماته وعبالك بديت استوعب أهلي بعد ميرجعون

عطت بصوت عالي احس حنجرتي تشككت بووووووووووووووويه ،،،،بدون وعي وحركه لا اراديه هلست شعري وشكيت التشيرت عليه

وماأحس غير راشدي شال نص وجهي جان كسر أعظام فجوجي واحس جهه وجهي خدرت

فكيت عيوني من اتجاه الضربه واشوف رجال معكل وضخم ولابس دشداشه وعبايه وغتره سوده وبيده محابس أثنين وايده الثانيه شايل سبحه ووجهه مدور ابيض وسمح

عاط بيه ،،شبيك تخبلت ،،كافي عاد ،،عيب عليك شخليت للنسوان اذا تمزك هدومك

بيويه ادري مصابك جبير ،،والله يلوم الي يلومك ،،بس تذكر مصاب ألنبي وأل بيته تهون عليك مصيبتك ،،

أنت أحسن من هواي ناس ،،راح تكض بيدك جثث وتدفنها ،،وتصيرلهم گبور،،ومن يضيك صدرك تروحلهم وتندلهم وتقرالهم فاتحه

ولك أنا هل كدامك راحولي أثنين اولاد واخوي ثالثهم أنا مربي هستوه شب ثلاثتهم راحوا مني بالأنفجار بيوم واحد ،،وبساعه وحده

ماوكفت عليهم ،،ولا لكيتلهم جثه ،،ولك لو محصلي منهم وذره والعباس يرتاح قلبي ،،سوتلهم كبور رمزيه ،،بس ااااخ شسوي

هذا حكم ربك واني راضي بي ،،وألف الحمد والشكر لله ،،ومثل ماأني وغيري راضين وقانعين باأمر ربك ،،أنت هم لازم ترضى وتقنع ولا تعترض على أمر ربك

أني من سطرت الراشدي وكلامه اليه عبالك صحيت على روحي ،،هديت وبقيت جامد بمكاني ،،بس دموعي تصب ،وقلبي تسعر بيه النار

ألله يخليكم ساعدوني ،،دلوني دربي ووصلوني للمستشفى ،،بعد مابيه حيل ،،بعد مااشوف طريقي من بيكم يفزعلي

والله كل ألموجودين انتخولي ودكوا صدورهم لمساعدتي ..

عاد هذا الرجال المعكل كال أنا أمشي وياك وتكفل بكلشي،، وتشكر من الموجودين واخذنه تكسي ورحنه للمستشفى ..