#بعد_ما_تلاقينا
الجزء التاني
الحلقه 12
مشيت المهم نجري لي شنطه ماما فتحتها وطلعت منها الورقه
طلعت زرف ابيض مش ورقه بس بانلي من بعيد ورقه مطبقه
المهم فتحت الزرف لقيت فيه ورقه ومعاها سلسله
السلسله فيها تعليقه كنت شايفتها من قبل عالفيس ان التعليقه هدي فيها كلمه نحبك ب هلبا لغات استغربت من بيبعتلي تعليقه فيها نحبك
فتحت الورقه لقيت مكتوب فيها
لو ماتبيش تلبسيها علقيها في مرايه السياره والا خليها محطوطه في مكان يكون ديمه قدام عيونك وحنكون ممتن ليك
مع حبي
ومافيش ولا حرف زياده مفهمتش شي انا دخت قعدت مقعمزا في مكاني زعمه من بيكون العاشق السري هدا معاش معجب هدا عاشق لان التعليقه مكتوب فيها نحبك هكي كبرها
علي جيت ماما لقتني نتفرج علي الرساله
اميره : شن فيها شن طلع
انا مديتلها الورقه : مفهمت شي
اميره : وينها التعليقه ترا
مديتهالها اميره : التعليقه مش فضه راه
انا : عارفتها بتكون فالصو يعني شن بتكون
اميره : وجه فقر ،، التعليقه الماس
انا : شن هوااااااااااا
اميره : وراسك
انا : كيف عرفتيها اللطف
اميره : واحنا مروحين تو نخطموها وشوفي شن تطلع ترا هاتي الزرف بالك معاها كرت
خدت ماما فتشت الزرف وطلعت كرت وحق طلعت التعليقه الماس
اميره : مش قلتلك وشكلها خدمه خاصه راه طلبيه واضح ان مش لاي حد
انا : ومن اللي بيهديني الالماس هدا غباره
اميره : مدامه قالك نحبك هدا يهدي اللي قدامه و وراه
قعدت ساكته معاش عرفت شن بنقول شن الهم هدا من هو الي حاطلي حاجه زي هدي حتى وكان السفاح راهو بعتلي مسج ع تليفوني مش رساله هني
نزلت لي ايه بنحكيلها شن صار لقيتها مقعمزا مصدومه حتى هيا
انا : خيرك سارحه
ايه : محمد
انا : خيره
ايه : حسن
انا : خيرهم
ايه مدتلي التليفون ورتني صوره حسن واخد سلفي مع محمد
انا : وين لقو بعض هدو
ايه : منعرفش شن عرفني
انا : خيرك نسبهتي انت باه ايه فيقي هييييييي
ايه : انا خيرني
انا : نكلم فيك
قعدت نخبط فيها علي وجهها قاعده مسبوها جديات نصدمت ومعاش تكلمت مشيت جبت مياه وخلعتها بيها عيطت عيطه تطرش الودن
انا : اسسسس اسسسس ياحماره
ايه : حيييييي عليا حيييييييي غبارتي السودااااااا طيحتي علي ركاااااابييييي وووووووووه
انا. : ت اسكتي ياحماره ،،، بتفضحينا
جت ماما وخالتي يجرو لما سمعو ايه عيطت
اميره : خيرها اختك خيرها شن في ؟؟
انا : انا خلعتها بزعت عليها مياه بس
خالتي : تخلعي فيها تبي ادروشيها غبارتك عام خلايع ولعب هو
اميره : ايه خيره لونك اصفر شكلها ركباتك الصفير
انا : مافيها شي ياودي ايه تكلمي
حضنت ايه ماما وقعدت تبكي
اميره : اسم الله اسم الله خيرك ايوته نخلعتي بنتي اعود بالله من للشيطان الرجيم هدي المنجوها ضرباتك بي عين نجاة عندك وشق ؟!
خالتي : اي عندي تو نجيب من امي هي
اميره : بتقولولي الحق والا شن توا متفوتوشي عليا شن صاير
انا : مصاير شي زي ماقلتلك يا ماما خيرك
اميره : فوتيه علي الموشمه تو يبان بعدين ساهل
جت خالتي تجري بالوشق والبخاره وتلود علي ايه وتعاود وجايا وراها اميما
اميما : هدا كله من هديكا طربقتها بي عين الله لا تربحها هاتي شويه ملح نلود عليها
مشيت جبت ملح لي ميما وبدت عاد تلود علي ايه وايه تبكي يحسابوها حق عين وهيا تبكي من الهم الي فيها كملنا العرس الي صاير وخش كل واحد لي مكانه خشينا انا وايه بنرقدو رقدت ايه وقعدت انا نخمم في الي صار بنخمم في روحي والا في ايه والا في الي طلع هدا مش عارفه منو معاش فهمت شي
جي وقت العشيه المهم وفقنا ودرنا القهوه والشاهي ولقيت بسبوسه
انا : من دارها البسبوسه
اميره : ماهو انت درتيها وخديتي بخاطري
انا : مه عارفه شن صار عاد توا خلاص
خالتي : انا درتها كولي وسمي بالله هي ،، نعطيك شاهي والا قهوه
انا : لالا تو ناخد بروحي صحيتي
خالتي : والله مانمددلكً كان انا اللطف زعميتك ديمه عندنا ،، ايوته. غزالتي شن نمدلك
ايه : لالا صحيتي مخاطريش
خالتي : العفو والله تشربي قهوه تو تعدلك راسك اغير خودي هيا
مدتلي خالتي انا وايه وماما قهوه وبسبوسه وميما مابتش تاخد
هناء ومرت خالي قعدو يفنصو ششبحتلهم
هناء : العفو مدي يدك ومدي لي امك
مرت خالي : وخيرنا مينمدلناش احنا العفو
خالتي : مش برانيه انتو متبوش عزومه
اميره : تو نمدلك انا متزعليش روحك
فنصت فيها اميما : اختك قالتلهم ماكمش برانيه تو يمدو بروحهم
قعمزت ماما وسلمت امرها لله
شربنا شاهينا وهدرزنا وكملنا نص اليوم غادي وماما قالت هيا بنروحو
خالتي : غير اقعدو باتو اللطف
اميره : لالا والله عماد لا غدي لاعشي والله مانقدر مره تانيه
خالتي : اقعدو اروى وايه باتو باهي
انا : والله مانقذر نبي نروح وراي هلبا حاجات مدرتهمش
خالتي : وانت ايه شن ؟
ايه : تعرفي انا ف راسي مليون حاجه تو نحكيلك وغدوا جايا بايته اصلا بدون عزومه
خالتي : خلاص نستنا فيك والا تو نجي نجيبك انا
ايه : خلاص بيناتنا الو
روحنا وطول الطريق التلاته ساكتتين انا نخمم في قصه السلسله وايه في همها مع حسن وماما تخمم علاش ايه هكي صايرلها
خشينا المغرب لي الحوش وكل وحده مشت لي دارها
خديت تليفوني واتصلت بي انس لقيته مش فاضي ولقيته مخليلي مسجات وراد عليا علي الي صار امس وكانبلي انا اسف وسامحيني المهم حطيت التعليقه قدامي وقعدت نتفرج عليها علي خشت ماما
اميره : قاعده تخممي فيها ؟!
انا ؛ اي واسي واقفمن يدير حاجه زي هدي
اميره : شوفي روحك علي من مخلطه
انا : تعرفيني مش بتاع الدوه هدي
اميره : ونهار نوتي تبدي بتاع الدوه هدي شنقتيلي روحك مع واحد مخالف
انا : انس مش مخالف حرام عليك
اميره : لوقت جي مخالف عندك الحق ،، قوليلي اختك خيرها
انا : منعرفش
اميره : بتقولي والا كيف
انا : بريلها هيا تهدرزلك
اميره : تعالي بري معاي
انا : نوضي هي
مشينا لي دار ايه ولقيناها مقعمزا تبكي
اميره : خيرك شن في خيرك
ايه : تعبت تعبت عييييييت
شذتها ماما وحضنتها وقعدت تمسحلها علي شعرها
اميره : بعيد السو عليك شن في احكيلي انا امك انا بيرك وانا سرك
ايه : مانقدرش نحكي شي نحس في روحي بنموووت نبي نطلع نتنفس خلاااااص
ايه قعدت تعيط وتقول نبي هوا نبي نتنفس طلعوني لبسنا وجينا طالعين شافنا بابا
عماد: وين علي خير الساعه 10 راه
اميره : بنمشو ناخدو حاجه تو نجو تو نقولك بعدين
عماد : نرفعكم انا
اميره : منبوش نتعبوك غير خلينا توا
طلعنا المهم ورفعنا ايه لي البحر قعدت تعيط وانا وماما نبكو ماما مش فاهمه شي لكن منظر ايه كان يقطع القلب
ايه : انا علاش حظي هكييييييي علاش ياربيييييييييي
اميره : استغفري ربك وتعودي من الشيطان
قعمزنا عالبحر شويه عيطت ايه وكملت بكاها وكيف بنركبو السياره طاحت ايه داخت بعدت نقيم فيها انا وماما وركبناها لي السياره ورفعناها طووول لي العياده خشينا من الباب طول نجرو عالطواريء
اميره : جيبولي كروووسه وين الكروووسه
صدفه واحد خاطم جابلها كروسه وجي قام معانا ايه دخلناها لي الطواريء طول دخلوها وعلقولها تغذيه و وقفنا عالدكتور اللي كشف عليها
اميره : شن يا دكتور خيرها بنتي
الدكتور : لي توا مافيها شي فاقت وتجاوبت مع التغديه في شويه تحاليل مديروهم وان شاء الله خير
اميره : امتى التحاليل نديروهم توا ؟
الدكتور : لالا تمام سحبو منها الدم وشويه ويطلع التحليل
قعمزنا نستنو انا وماما وقت تليفوني لقيت بابا متصل وحسن وانس يتصلو بيا ودنيا متقربعه
انا : هاك خودي بابا
اميره : الووو ،، ايه بنتك طاحت علينا جبناها لي العياده احنا في العياده الي جنبنا تعالى تلقانا في اذطواريء
سكرت ماما الخط وقعدت تدعي لي ايه ىمشيت من جنبها كلمت انس
انا : الو ايوه
انس : ها وينك مترديش
انا : في العياده انا تو نروح نكلمك
انس : شن في خيرك
انا : ايه طاحت علينا داخت
انس : شن فيها خيرها
انا : مطلعوش التحاليل مازال غير تو نكلمك انا باي
سكرت من انس انصلت بي حسن
انا : ايوه
حسن: وين اختك
انا : اختي مريضه في العياده
حسن؛: اما عياده تتسهوكي
انا : بنفاول عليها بالمرض ؟
حسن : وين انتم
انا : منقدرش نقولك لان معاي ماما وبابا
حسن : ماشي ماشي باي
سكرت علي حسن نمشي لي ماما نلقاها حتى هيا دايخه عالكرسي
حييييييي عليا
نخبط فيها علي وجهها : ماما ماما ،، متردش عليا ،،، دكتووووووور وينك دكتووووور وينكم بالله عليكم حد يجيني
جوني يتجارو خيرك خيرك
انا : ماما ماما داخت ياربييييييييي ،،،، ياحلييييليييييي مش نااااقصه ياربيييييي كون معااااااااي ياربيييييييي ارحمنيييييييي
قاموها وحطوها حتى هيا حاله طواريء
جي ادكتور كشف عليها وجيت وقفت عليه وانا منهاره خلاص معاش فيا عظم صحيح
انا : شن في دكتور خيرها ماما بالله عليك
الدكتور : متخافيش عليها ماما مرا حامل وطبيعي من الاجهاد اللي صارله ميتحملش جسمها امشيلها تلقيها فايقه
مشيت نجري لي ماما ونبكي ومافياش عقل
انا : ماما حبيبتي ماما فقتي ياروحي
ماما تهز بي راسها وعيونها دموع
انا نبكي : ياريته فيا ولا فيك ياغاليه ،، حبيبتي شن تحسي
اميره : مافيا شي متبكيش ياعمري حالي باهي ،، وين ايه
انا : خليك في روحك توا ايه مافيها شي انت شني تحسي سامحينا وراسك
انصل بيا بابا
انا : اهو تو نطلعلك عالباب
طلعت لي بابا عللباب وحكيتله شن صار جي يجري لقي ماما صايخه
عماد : اميرتي ،، اميره حياتي خيرك ياغاليه شن فيك
اميره : مافيا شي يا غالي متخافش ،،، امشو خلوكم مع ايه وشوفوها
انا : تو نمشيلها انا ايه بابا خليك مع ماما
عماد : لا بنمشي نطمن عليها وينها
انا : تعالى باهي هي
مشيت انا وبابا لي ايه لقيناها فايقه
انا : غزالي فاق
ايه : ياريتني مافقت ،،، وخنقتها العبرا وبدت تبكي
عماد : خيرها شن في شن قالت ؟
انا : قاعده دايخه تبكي عاارفه متحبش اليباري
تليفوني يشرين حسن مبطلش مكالمات ونفصل عليه طلع بابا من جنبنا وجيت لي ايه
انا : ايه حسن من بكري يتصل يبي يجي
ايه بدت تعيط : منبيش نشوف وجهه هالحيوااان ان شاء الله يموووووت
علي خشت حسن
حسن : من هو الي ان شاء الله يموت ؟!
انا نخلعت قريب موتت
ايه : اطلع براااااا اطلع من حياااااتي درق وجهك علياااااااا
جي بابا يجري وقت سمع عياط ايه لكن حسن طلع قبل مايجي بابا
عماد : ايه بنتي خيرك تعيطي شن فيك ايه تسمعي فيا
ايه : نبي نمووووت يابابا نبي نموووووت
عماد : بعيد السو عليك ياغاليه متقوليش هكي خيرك شن فيك شن تحسي شن يوجع فيك ،،،، يادكتووور تعالي جيبلنا مسكن والا شوفها
جت ماما وهيا مش قادره تقيم روحها
اميره : ايه خيرك تعيطي شن في بنيتي ؟؟
انا : شن نوضك يا ماما من مكانك خيرك جيتي
ايه : ماما ماما
جت ماما لي ايه وشدتها وهيا تبكي
اميره : ها ياعيون ماما ها ياقلب ماما خيرها بنتي بعيد السو علي قلبها
ايه : ماما خليك معاي ياماما راني بنموووت
اميره : يومي قبل يومك ياغاليه متقوليش هكي راك تقطعيلي في كبدي معاش تعاوديها
ايه : ياماما انا معاش قاذره خلاص ياماما راني صغيره علي الهم ياماما تعبوني
اميره : يباعد الله عليك الهم ياقره عيني وياخذ فيهم الحق ادعي بس وربي يريح قلبك
قعدنا مقعمزين في العياده انا وبابا برا و ايه وماما في الدار مع بعض علي خشت محمد صاحب ايه شبحني عرفني نصدم وقعد واقف
انا معاي فهمت شي هدا شن الي جابه ومن الي قاله
انا : بابا بنمشي الحمام تو نجي
عماد : بري ومتعطليش
انا : باهي تبي نجيبلك حاجه من الكافيتريا ؟
عماد : لالا منبيش انت كان تبي نعطيك فلوس تاخدي ؟!
انا : اي نحس في روحي دايخه نبي ناخد حاجه
مشيت من جنب بابا واتصلت بي محمذ قتله : الحقني ،، وسكرت عليه لحقني محمد
انا : شن دير هني انت ؟!
محمد : مش انتي بعتيلي مسج ؟!
انا : مبعتش امتى بعتت ؟!
محمد : جتني مسج منك شوفي اهيا
وراني مسج من رقم مش رقمي مكتوب فيها
الكبيذه بتاعك في العياده الي جنب حوشنا تعالي توا ضرروري انا اروى
انا : حيييي علينا كمين هدا
محمد : كمين شن شني تقولي انت
انا : روح اجري يامحمد بالله عليك
محمد : ت خيرك ترفسي نبي انا توا ايه شن فيها ؟؟ خيرها ؟؟
انا : مش عامها ايه توا يامحمد خود نصيحتي وروح بالله عليك روح وراس امك روح
محمد : منروحش قبل ماتقولي ايه خيرها شن جاها
انا : ايه تعبت شويه وجبناها تاخذ يبره تغديه بس روح قتلك روووووح
محمد : وين هيا باهي نشوفها بس
انا : مش حتقدر
محمد : حتى من بعيد نطمن عليها اروى وراسك نهبل راني
انا : باهي انزل توا من الدروج هدو وين ماقعمز بابا كمل مع الممر تلقا الطواريء خش تلقاها تاني وحذه هيا
محمد : باهي منوره
انا : متعطلش ومتخليش بابا يشوفك وبالله عليك تروح وراس ميمتك
محمد : باهي وانت تلزي هيا باي
مشي محمد وخلاني واقفه زي المسبوها بروحي نفكر في البلي اللي بيجي لي محمد من ورا حسن كان شاف محمد هني لان هو الي باعت المسج باش يجيبه ويتاكد من الدوه وانا قاعذه نخمم في المصيبه اللي صايره نسمع صوت من وراي يكلم فيا
: صار زي ماتوقعت
تلفتت نلقاه حسن
انا : شن تقول انت خيرك
حسن : مكبد العسول
انا : شن توفس عسول من ومكبد من
حسن : تفوتو فيه عالقياااااااده ،، بلاد نحركها انا
انا : خليه في حاله بالله عليك
حسن : الفاتوره غاليه ولزم نخلص ،،، وطبيعي مش حنخلي ايه تخلصها لاني مكبد حتى انا صايرلي زي العسول معناها مافيش الا العسول يخلص
انا : حسن الولد مش حملك لا يقدر عليك ماشي في حاله ويقول يالله
حسن : حظه وكتبته ماعندي مندير هي باي ياعسوله
مشي حسن وانا نلحق فيه ونتجدا فيه لان كان محمذ تصيرله حاجه ايه اختي تهبل نزلت نجري نبي نلحق علي محمد قبل ميروح
خشيت علي ايه لقيتها راقده مشي سالت ماما
انا : جي حد هني ؟
اميره : اي جي محمد وطلع لقاها راقده ولقاني معاها تحشم
انا : وانت كيف تعرفيه ؟!
اميره : نعرفه وخلاص
طلعت وخليتهم اتصلت بي محمد يضبح ميردش قلبي طاح
نتتصل ونعاود نتصل ونعاود مردش خلاص دماغي وقف
مشيت قعمزت جنب بابا وانا عقلي متفجر من التفكير لين يشرين تليفوني حسن يتصل 😨
نضت من جنب بابا ورديت عليه
انا : الو ايوه ،،، رد عليا الصوت صوت محمد
محمد : اها ايوه يا اروى
انا : خيرك متردش ورقم من هدا
محمد : تليفوني تسكر شحن ،، خديت كلمتك من رقم الولد الي جابني
انا : وين انت
محمد : كيف مروح لي الحوش
انا : اول ما توصل لي الحوش كلمني ضروووري
محمد : ايه فيها حاجه خيرك شن في ؟!
انا في خاطري اما ايه الي تخمم فيها خمم في عمرك الي راكب مع قتللك وانت متندريش عليه
انا : لا مافيها شي غير كلمني
محمد : تم تم هي ماشي سلام
سكرعليا محمد الخط ونار ركبت فيا الحيوان حسن قاري الدنيا وكلها وقاعذ يبي يزيد يتاكد جتني مسج فتحتها
حسن : مش قلتلك انا القياده ،، متخافيش عليه العسول بنوصله لي حوشهم مش انا الي نديرها بي خونه
سكرت المسج وطمنت اقل شي مش حيديرله شي مشيت لي ماما وايه لقيت ايه فايقه
انا : ها ياروحي شن حالك توا ؟
ايه : باهيا
انا : سالت الدكتور وقالي كان فاقت تقدرو تطلعو شني نروحو ؟!
ايه : اي نبي نروح انا نخنقت من ريحه العياده
شرين تليفوني محمد يتصل
انا : الو ايوه محمد وصلت ؟!
محمد ؛ اي وصلت
انا : اهي ايه معاك
محمد : الو غزالي
ايه : ايوه وبدت تبكي
محمد : خيرا غزالي يبكي تحسي في حاجه بيبي
ايه : لالا حالي باهي متخافش عليا انت وين
محمد : انا كيف روحت اهو خشيت لي الحوش
ايه : اهو انا كيف بنروح نوصل الحوش نكلمك
محمد : تم تم سلامات
سكرت ايه علي محمد الخط وطلعنا روحنا ركبت معاي ماما وايه ركبت مع بابا
اميره : كان نعرف خيرها بس
انا : تو غدوا نحكيلك كل شي توا ماعنديش جهد لي شي الا لي دوش وفراش
اميره : مفهمتش امتى بنرتاح انا وبترتاحو انتم والله الا عين ضربتنا بيها هديكا الحقوده
انا : تعودي من الشيطان ياماما شن عين ، انت ريحلي روحك وريحيلي ذماغك توا في معاك روح راه حقها عليك مش بروحك انت
اميره : والله مامسخفني كان هالعيل اللي بيجي انا من نهار درته في بطني وهو في الرعايش
انا : الله غالب حكمت ربي ،، احمدي ربي وخلاص
اميره : الحمدلله وخلاص
وصلنا لي الحوش دخلنا السيارات حطيت ايه في دارها وبابا ذخل ماما لي دارها
ايه : متخلينيش بروحي ارقدي جنبي
انا : حاضر من عيوني ،، نجيب حوايجي بس
مشيت خديت دوش وبدلت وجيت جنب ايه
انا : نديرلك شن تاكلي ؟!
ايه : مخاطريش في شي
انا : انا جعانه عندي شكلاطه نجيبلك
ايه : والله مخاطري
انا : غير نمشي نجيبها ونجي استني
مشيت لي داري لقيت التعليقه محطوطه تفكرت ان مهدرزتش لي ايه عليها قمتها معاي وجبت الشكلاطه ومشيتلها
انا : تصدقي ان مهدرزتكش شن صار وشن طلع الزرف
ايه : ااايييييي حق شن هو
وريتلهل التعليقه ومديتلها الورقه وحطيت الشكلاطه وقعدت نحكيلها كيف صار وسن قالتلي ماما
ايه : السفاح هدا
انا : سفاح عينك
ايه : والله الا هو ،، بكن شكله كبد تصدقي
انا : كيف عرفتي
ايه : علي قذ ماعرفته ديمه يقولي منحبش نقول كلمه نحبك كدب وحق ميقولش فيها
انا : مسرع حبني
ايه : حبك ماهو لقاك حامضه عليه ،، ماعمره صعبت عليه حاجه هدا علاش حبك
انا : موضوع يوقف الراس
شرين تليفوني اتصل بيا انس
انا : هدا انس خلي نرد عليه مهدرزناش اليوم بكل
ايه : خلي حتى انا نكلم محمد
انا : اسمعي الشكلاطه وين ؟!
ايه : منعرفش
انا : زي اللي تمت وانا كليت طرف واحد بس 😀
ايه : كنت منسجمه نسمع فيك نحدف ومنندريش
انا : هدا غيرمخاطركش 😂
ايه : حيوانه تو نجيبلك
انا : صحتين ياكلبه نتسهوك هي خلي نعاود لي انس
رديت عاودت علي انس ميردش مره تنين ميردش بعتلي مسج تو نكلمك شويه بس فوت شويه واتصل بيا فتحت الخط نقول الوالو ماحذ يرد نسمع في صوت دوشه وعراك
انس : انا قلتلك معاش نبي نشوفه وجهك والا شن تبي جايا
المرا : انا مرتك وام بنتك متنجمش تقولي الكلام هذا
انس : تي بري تربحي فكيني منك ومن سريبك كرهتتتتتك انا مرتي انت طلقتيييييي
المرا : حلو والله تقولي كرهتك ومن بعد وقت تضايق تجي لي فرنسا وتقعد في حضني
انس : معاش حنجيك وانا كلي كان مازال جيتك
المرا : من قبل شهرين كنت عندي وقبلها كنت مقايل نفس الكلام
انس : شن تبي انت توا
المرا : ارجعلي وارجع لبنتك وتعالى معاي فرنسا
سكرت الخط وانا نرعش مفهمتش شي مقدرتش نهدرز لي ايه لان كانت تتكلم قعدت نخمم بروحي ساعه كامله لين اتصل بيا انس
انا : الو
انس : ها بييبي شن الجو روحت ايه ؟
انا : اي روحت،، من بكري نتصل بيك خيرك متردش
انس : كنت مع الشيخ يابيبي
انا : وبعدين ؟؟
انس.: من العشيه معاه لين توا حطيته في الفندق بتاعه ؟!
انا :متاكد انس ؟!
انس : ت خيرك ؟؟
#يتبع
