إمبراطورية الأسود

البارت 132

جمعات اللوازم لي غاتحتاج فالحمام و هبطات لقات البنات واجدين و كايتسناوها عطاو للكارد صيكانهم حطهم فالكوفر و ركبو .. دازت ساعة و نص عاد وصلو لواحد الحمام مغربي كان هو الوحيد فديك المنطقة لي مشاو لها او بالاحرى الوحيد فتل ابيب .. دخلو و ستقبلوهم و نيت شدوهم فركوهم مزياااان و خصوصا منين عرفو ريماس عروسة تهلاو فيها بالوصفات بالمزيان فيييين يبان الحمام لي دارو لها فالقصر ماطلقوهم حتى خرجوهم كايضويو خلصوهم و رجعو شدو الطريق للقصر
جوليانا : تيقيني لا قلت لك عمرني ماعرفت بلي كاين حمام بحال هدا عندنا فتل ابيب
ريناد : حنا فالمغرب فينما مشيتي تلقايهم ولكن ماكناش كانمشيو لهم بزاف
جوليانا : حسيت بذاتي خفافت عليا بزاااف
ريماس : دابا عاد حسيت براسي دوشت نييت
ريناد : هههههههه الوسخ هداك ا ختي .. دخلو للقصر كايضحكو لقاو ارسلان واقف هو و مالك و ابراهام مشغول معاهم .. شوية هز عينو فيها
أرسلان : فين كنتي
ريماس : مشينا للحمام المغربي .. لاحظ بشرتها لي زادت صفات كتر و كتر .. مشا بالو انه فالحمام المغربي كاينين الرجال لي كايديرو مساج و التنقية...الخ ... زفر بغضب و يلاه كان غادي يقرب لجهتها حتى عيط عليه إيتان ...

جوليانا : هاد الجو غير ديال شي قهوة فالجردة اللورانية ولكن خسارة مانقدروش نجلسو فيها دابا
ريماس : ياك مزال مازينوها
جوليانا : خويا ارسلان حط عليها الحراسة باش مايوصل حد ليها
ريماس : و علاش؟
جوليانا : على ما اظن غير احتياط و صافي على ود العرس
ريماس : هانيا المهم شوفي وحدة من الجردات و صافي
جوليانا : المهم ها حنا غاديين
ريماس : سبقوني حتى نجي
جوليانا : صافي غانهضر مع الخدامة توجد لينا الكوطي تما .. مشات جوليانا و ريناد فإتجاه المطبخ بينما ريماس كانت غادا لبيتها و المورال طايح لها .. العرس بقاو لو غير ساعات معدودة و أرسلان مزال ما سلم خطتها لي كانت متوقعة بلي غاتستفزو .. من مور موت اصلان تخربقات بالمزيان اصلا خططها كلهم تخربقو من مور ما مات .. كانت ناوية تمشي لعند داك لي زرع القنابل فالطريق لي كانت غاتسلك و كانت غادي تكدب عليه بأنها ولات هي الدراع الايمن ديال ارسلان و خصوصا منين كان عندها الخاتم ديال اصلان كان غايتيق و هاكا كانت غاتضغط عليه باش يعتارف باش زعما يعرف ارسلان شنو دار جدو ولكن اصلان مات و هاد الخطة مابقا عندها حتى شي فايدة .. حتى من الخطة ديال انها تثير غيرة ارسلان بأسوار ماغاتنجحش و مابغاتش ديرها تراجعات عليها حيت لاحظات نظرات اسوار لمرتو داكشي لاش دارت بناقص .. كانو عندها عدة خطط ولكن كاتحس بيهم كلهم فشلو لها يعني فشلات فشل ذريع .. وقفات كاتشوف فالقصر .. ارسلان عائلتو كلها حاضرة من صغيرها لكبيرها ولكن عائلتها هي لا ماشي كلشي حاضر اهم الناس ماحاضرينش .. عاودات طلعات المورال ببلان فكرات ديرو كأخر محاولة قبل العرس .. هي ماشي خايفة منو يدخل عليها قبل مايسلم حيت اصلا امبوستاحيل تخليه ولكن مابغاتش تتزوج بيه و هو باقي صهيوني .. يلاه بغات تمشي لعند ريناد و جوليانا و هي تتحط يد فالحيط وقفاتها .. وقف قدامها و حقق فحوايجها لي كعادتهم مزيرين
أرسلان : تحممتي مزيان
ريماس : وي على الاقل كانحس بعضامي خفافو دابا
أرسلان : كاتحسي بعضامك هما هادوك دابا
ريماس : ( خشات يديها فالجيوب اللورانية ) كانحس براسي هي هاديك دابا
أرسلان : ( خشا يدو فجيبو ) دارو لك المساج مزيان!! تهلاو فيك
ريماس : نكدب عليك ايلا قلت لك عمر شي حد كسلني بحال التكسيلة ديال هاد النهار .. خاصك تجرب الحمام المغربي حتى نتا .. جرها من دراعها و قرب وجهو لوجهها غمض عينيه بنفاذ صبر و عاود حلهم و هضر بنبرة هادئة
أرسلان : شحال من واحد كان تما
ريماس : ( هزات حاجب ) واش مشيت نتحمم ولا مشيت نحسب عباد الله لي كايتحممو
أرسلان : ماتستغبينيش ا ريماس
ريماس : وا هادي جديدة .. راه مشيت ندوش ماشي نبركك
أرسلان : شنو سمية الحمام؟!! .. شكون دار لك المساج فيه .. نطرات يديها من يديه و بقات كاتحركها باش يدوز فيها الدم مع دوك القبضات عندو غير الله يستر
ريماس : غير تهنا من هاد الناحية مايصلاحش ليك .. داك الحمام غير ديال العيالات يعني ممنوع تدخل تتحمم فيه .. شاف فيها مطولا
أرسلان : شكون دار لك المساج؟!
ريماس : اينا مساج؟؟؟ .. دخلت كسلوني العيالات لي تما و دارو لي شي وصفات و شي تخربيق
أرسلان : شوفي فيا
ريماس : ( خرجات عينيها ) هاااه .. ماتاقش حتى فنبرة صوتها داكشي لاش بغا يقرا عينيها
أرسلان : شكون مول داك الحمام
ريماس : مولاتو ماشي مولاه و زايدون اش هاد الأسئلة؟؟؟ واش ضروري فينما مشيت نبركك .. شافت فيه بتعجب و مشات بينما هو سيفط مالك يتأكد من الحمام واش فيه الرجال ولا لا .. وصلات للجردة لي من الجهة لي كايجلسو فيها النسا لقاتهم جالسين و معاهم اديرة
اديرة : بالصحة الحمام ا بنتي نور لك وجهك
ريماس : كون غير مشيتي حتى نتي معانا
اديرة : باراكا تمشيو غير نتوما
جوليانا : بابا مايخليهاش تمشي هههههه
ريماس : ياك غير للحمام
اديرة : هاكاك طبعو ا بنتي
جوليانا : واش لاغوب ديالك مزال ماوصلات؟؟
اديرة : راه وصلو قبيلا فاش كنتو فالحمام و طلعوها لبيت ريماس
جوليانا : متشوقة نشوفها اكيد غاتكون شي حاجة زوينة بزاااف
ريناد : ذوق ختي و انا كانعرفو مستحيل تلبس شي حاجة ناقصة و دابا منين كاين عرسها يعني ضروري غاتلبس شي حاجة قمة الأناقة
ريماس : قمة الاناقة نيت .. كان هادشي غايكون كون ختاريتها انا
جوليانا : علاش شكون ختارها؟؟
ريماس : أرسلان
جوليانا : امممم ماكنتش عارفة خويا رومانسي لهاد الدرجة
اديرة : هاديك الغيرة ا بنتي
ريناد : كانتيق حتى فدوق نسيبي يعني غاتكون شي حاجة رااائعة
ريماس : ماتتأمليش بزاف .. انا متأكدة غايكون وصاهم يفصلو لي خنشة ديال بطاطة
اديرة : فهادي كانوافقك الرأي
جوليانا : لا لا مايمكنش راه واخا هاكاك خويا ذوقو خطير
ريناد : خليونا نطلعو نشوفو
ريماس : مابغيتش نبات بلا نعاس بسبب الصدمة خليو حتى لغدا نتصدم صدمة وحدة
جوليانا : وا زيدي مالكي متشائمة شكون عرف اش غايكون
ريماس : عارفة اش كاين ولكن غاندير لكم خاطركم .. طلعو ب4 بيهم لبيتها و هما متشوقين يشوفو لاغوب لي ختارها ارسلان لريماس بيان سيغ كانو كلهم متشوقين ما عدا ريماس ...