إمبراطورية الأسود

البارت 103

رجعات تعوم قاصدة البر و مخلية أرسلان موراها لي طلع ليه المورال .. ماكاتمشيش بالخاطر و ماكاتمشيش بالضرب .. كاتمشي بالحيلة و هادشي لي خدم معاها باش يتهنا من الغوات و الدفيع و لسانها .. غاص من تحت الما و تبعها ، خرجو من البحر قد قد و عاود جرها لعندو عنقها من اللور جامع ليها يديها
ريماس : تهدنتي دابا ياك و باغي تندمني انا لي قلت لك البحر .. خشا وجهو فعنقها كايدغدغها بقبلاتو الخفيفة
أرسلان : ( بصوت خافت ) ماكايتشبعش منك ... جاتها الضحكة بدغدغاتو و حاولات تهضر بلا ماضحك
ريماس : أرسلان حبس .. وا صافي حبس .. بدات كاتكمش فعنقها و هو غير ماكايزيد .. حتى تقلبات ضحك و بقات كاتتكمش ليه فيديه .. طاحت فالرملة و طاح معاها هاز ثقلو عليها .. كمل تقبيلو ليها فالعنق و بقات فالرملة حتى ولات كلها رملة .. عض لها نيفها عضيضة خفيفة و ناض مد لها يدو باش تنوض .. نظراتو ليها كانو مختالفين على نظراتو قبل مايدخلو للبحر .. لبسها الفيستا ديالو و هزو حوايحهم .. ركبو فاللوطو و توجهو للقصر بجوجهم طالع لهم المورال .. وصلو للقصر و نزلو من اللوطو دار يديه مور ضهرها و دخلو .. مع الدخلة لقاو الأعمام مجموعين .. بقاو كايشوفو فيهم بإستغراب و من حالة ريماس لي عامرة رملة
إيلام : أرسلان بغيت نهض..
أرسلان : ماشي دابا ... طلعو الفوق خلاها دخل لبيتها و مشا هو دخل للجناح ديالو دار اتصال مع عائلة روكفلير باش يجيو العشية و دخل يدوش
♜ وصلات العشية و الخدم فالكوزينة قايمين بالواجب باش يستقبلو عائلة روكفلير بطريقة زوينة ... و هادو من مميزات عائلة روتشيلد .. إكرام الضيف من غير ريماس لي ماكان عندها زهر معاهم .. اصلان معاه 2 رجال من رجال ارسلان كايعاونوه فاللبس باش يكون انيق .. أرسلان لتحت مع العائلة .. خوت ريماس مندامجين مع ولاد و بنات العائلة اما ريماس كانت مع جوليانا ... وصلات عائلة روكفلير او بالأحرى غير 4 افراد منهم ... الام و الاب و الولد و البنت اما باقي العائلة كانو غير مدعوون .. جلسو ارسلان و اصلان مع كبير عائلة ركفلير و بنتو و ولدو
بنجامين ( الأب ) : نهار كبير هذا باش نتجمعو بغير مناسبة
أرسلان : حاجة عادية بين الحلفاء
بنجامين : كانظن راكم كاتعرفو الخلفاء ديالي لي كانتيق فيهم .. ولدي ميكائيل و بنتي فيوليت
أرسلان : كانعرفك نتا
سي أصلان : كبرو دغيا .. و وصلو لسن الزواج .. علاش مزال مازوجتيهم؟
ميكائيل : فالوقت الحالي خاوي راسي من دوك الافكار ا سي أصلان
فيوليت : ( كاتشوف فأرسلان ) عندي الأهم نوصل لأهدافي هو اللول
سي أصلان : ( غمز بنجامين ) فنظري خاصك من دابا تفكري ديري دارك ولا لا ا بنجامين
بنجامين : متافق معاك 100% ولكن راك عارف ماكانلوحش ولادي حتى كانلقا لي يستاهلهم
سي أصلان : موجود لي يستاهلهم .. كيف كاتشوف حفيدي ارس..
أرسلان : حفادك ا جدي .. شاف فأرسلان لي كان كايبان فيه جدي
سي أصلان : المهم ماشي وقت هاد الموضوع دابا .. تبغيو تتعشاو دابا
بنجامين : عندنا بحال بحال ... ناضو من تما و جاو رجال ارسلان كايجريو جلسو اصلان فكرسي متحرك باش يديوه للطبلة ديال العشا .. جلس أرسلان مترأس طبلة و فجنبو ليمن هاد المرة كاين جدو حيت مايمكنش يجلس فكرسي اخر و فجنب جدو جالس بنجامين و مرتو .. اما الكرسي ديال اسوار كان خاوي .. جلس ميكائيل فالكرسي لي فجنبو و جلسات حداه فيوليت .. ماعيطوش على ريماس تهبط تتعشا ماشي نساوها مي باش مايوقعوش مشاكل فحضور روكفلير و سبحان الله حتى هي عندها داكشي بالعكس .. البلاصة و الوقيتة لي كاتكون فيها المشاكل هي فين كاتلقاها .. هبطات لتحت طالقة شعرها و توجهات لجهة طبلة ديال العشا تحت انظار افراد العائلة .. شافت فالكرسي لي جلسات فيه الصباح لقاتو عامر داكشي لاش مشات لداك لي كان جالس فيه اسوار .. هز ارسلان عينو فيها و زير على الفورشيط لي فيديه كايقولها جمعيه بحالا كايقولها طلقيه مابغاش يهضر قدام جدو و عائلة روكفلير .. شافها اصلان و تزير على البلاصة لي جلسات فيها ولكن مايقدرش يهضر بسبب الضيوف .. مع الهزة ديال الراس لي غايهزها ميكائيل ماعاودش حدر عينيه .. جلسات حداه دارت رجل على رجل و رجعات شعرها اللور ...