إمبراطورية الأسود

البارت 65

من مور المؤتمر مشات للفيلا و اول حاجة دارتها هي راجعات دوك السجلات لي لقات فيهم اختلاسات بأموال طائلة فصباح اليوم التالي ماعطلاتش سهام نهائيا .. سيفطاتها زيارة طوييلة لعند مرات سمير بإعتبارها تا هي كانت مشاركة فهادشي ... داز من مور هادشي 6 شهور و فغضون هاد 6 شهور قدرات ريماس تثبت راسها و تفرض راسها فمجال الأعمال بإعتبارها أصغر سيدة أعمال داخل مجال التسويق الإتجاري .. شركة كانت على حافة الإفلاس بفضلها و بفضل سي راضي طلعات و وقفات على رجليها .. بفضل ريماس حيت بالرغم من صغر سنها ولكن دراستها للإدارة نفعاتها و بفضل سي راضي حيت هو لي كان كايقنع معارفو باش يتعاملو مع شركة ريماس و فعلا فاش تعاملو معاها ماخابش ظنهم و من تما ولا واحد كايوصي لاخر حتى تشهر اسم ريماس و تعرفات بجديتها و صرامتها فالخدمة ... رجعات لنشاطها و حيويتها ولكن تزادت صفة خرا فشخصيتها و هي الصرامة لي كتاسباتها من دوك التداريب لي دازو عليها و العذاب لي دوزاتو فديك المدة .. ولكن بطبيعة الحال باقا حنينة مع خوتها و سي راضي و عائلتو .. رجعات لأعمالها الخيرية ، كانو أيامها غاديين هاكا حتى لواحد النهار لي وقع فيه واحد التغيير داك النهار كان الويكاند و شتا خيط من السما .. خوتها كانو عند سي راضي بقات غير هي فالفيلا كانت يلاه دوشات لبسات بيجامة مقطنة سخوونة و دارت طربوش على شعرها الفازك هزات مانطة و طيلي و ليكيت و شي وراق خاصين بالخدمة خاصها تراجعهم .. حطاتهم فالفوتوي لي قدام المدفئة قادات بلاصتها و تخشات باش تدفي راسها من البرد ديال هاد شتا ... فيديها كاس ديال اتاي بلويزة و البيسي محطوط فوق ركابيها كاتشوف اخر الاخبار ... سمعات دقان فالباب و ستغربات شكون غايجي عندها فهاد الجو الخداما عطاتهم عطلة و خوتها ماشي هادي وقتهم يكون زعما سي راضي ... ناضت من بلاصتها تشوف شكون .. مشات لجهة الباب حلاتو بقات مستغربة هدا اش كايدير؟ كان اخر شخص توقعات انه يجي رجعو لها دوك ذكريات الزينة لي عاشتهم فديك بلاد النحس كيف كاتسميها هي .. تا قالت تهنات من كمامرهم و هما يبانو تاني فحياتها
ريماس : (بإستغراب ) اش كادير هنا؟؟؟
اسوار : غاتخليني فالباب حيدي خليني ندخل
ريماس : بلاتي بلاتي فين داخل سيبة فالبلاد؟
اسوار : شوفي طريق لي ضربت فاللخر نرجع تاني؟
ريماس : ماقلتش لك اجي جيتي راسك و اصلا كي درتي حتى عرفتي داري؟؟؟؟ واش هاد الباج ماغانطويوهاش؟؟؟ مابغاتش تسالا خلاص بففف رجع الله يخليك منين جيتي ... سدات الباب فوجهو و رجعات تخشات فبلاصتها كاتقلب فالبيسي اما اسوار جلس قدام الباب ... كايوصل حتى لعندها و كاتحدهم ليه ويينها هيبتو مع الاخرين .. شتا خيط من سما فزكاتو كامل و البرد كايصرفق بنادم و كايدخل بين العضام ... بقات جالسة و كاتخربق فالبيسي و تفكيرها غير فهاد خونا لي عاود بان فحياتها حتى قالت و اخييرا تهنات منهم نفضات أفكارها و كملات اش كانت كادير .. دازت نص ساعة حطات البيسي و مشات جلسات حدا شرجم كاتفرج فقطرات الشتاء كايعجبها بزااف هاد الجو و فنفس الوقت كايضرها حيت كايفكرها بلي كاينين فقراء بلاصة مايكونو حتى هما عندهم مأوى يدفيهم راهم دابا من تحت شتا البرد داير فيهم ما بغا ... شوية بان ليها شي واحد جالس حدا شجرة لي قدام الفيلا و كلو فازك .. مشات لبسات المونطو ديالها و ميني بوط خرجات حتى وصلات لعندو ... ضربات ضريبات خفاف فكتفو باش يضور لعندها
ريماس : سير رجع لبلادك ولا سير لشي أوطيل دابا يضربك البرد ...
اسوار : هي لاخليتيني ندخل للدار طوموبيل ماجبتهاش
ريماس : ماعندي ماندير لك ... ماجاوباتوش خلاتو و دخلات ... ماقدرش يفهمها نهائيا علاش هي قاصحة تال هاد درجة؟ تبدلات بالرغم من ان الرقاقة تحيدات ليها ... علاش مزال كايفكر فيها؟؟؟ علاش ماقادرش ينسا داك البريق لي فعينيها تفكر نهار اللول فاش شافها يلاه جات و كانت بشعرها لي كان طوييل و فايت المؤخرة ديالها كان واصل لفوق ركبة شوية .. نباهر بجمالها و فوقما كان شي قائد كايبغي يهضر عليها كايضور فيه .. فاش قطع لها شعرها ماشي قطعو غير على ود القوانين مي قطعو حيت اصلا شعرها كايثير الإنتباه بزاااف هدا ثاني سبب من مور السبب الرئيسي لي هو طلب أرسلان انه يقطع لهل شعرها .
ريماس : نوض دخل لداخل البرد عليك هنا ... هز عينو فيها ترسمات ضحكة فوجهو و ناض تبعها
ريماس : بلاتي بلاتي ناوي دخل لعندي بصباطك؟؟؟؟ .. حيد صباط و دخل
أسوار : ( كايضور عينيه فالفيلا ) دارك أنيقة بحالك
ريماس : علاش جيتي؟

( الحوار بالإنجليزية )
أسوار : بغيت نشوفك و بغيت نشوف كيف راك
ريماس : ها نتا شفتيني .. تقدر ترجع لبلادك دابا؟؟؟ شوف الله يرحم باك ماناقصني مشاكل ماناقصني صداع الراس خوك يلاااه تهنيت منو و تهنيت من داك العذاااب لي دوز عليا واش ا عباد الله تابعيني حتى لهنا؟؟؟؟؟
أسوار : غير سمعيني ا ريماس
ريماس : ماعندي مانسمع لي عندي قلتوو عطيوني التيساع و خليوني نعيش حياتي ياك كانت حرب بيناتنا و سالات؟ اش باقي باغيين عندي؟ مزال ماتسرطاتش لكم؟؟؟
أسوار : مابغيت والو توحشتك و بغيت نشوفك لا غير و ماناويش نأذيك اتشييي ( عطس )
ريماس : سير جلس لهيه غانجيب لك شي حاجة دفيك ... ماخلاتوش يجاوبها مشات للمطبخ وجدات ليه كاس ديال اللويزة و رجعات لعندو عطاتو ليه
أسوار : شكرا .. جلسات مقابلة معاه
ريماس : منين عرفتي فين كانسكن؟؟
أسوار : ماشي شي حاجة صعيبة و نتي اخبارك مالية الجرائد ديال المغرب
ريماس : علاش نتا بعدا كاتعرف للدارجة؟
أسوار : حاجة طبيعية حيت قبل مانعلنو عداوتنا مع اي دولة كانتعلمو لغتهم
ريماس : و متبع خبار المغرب من الفوق ستغربت
أسوار : متبعهم غير باش نوصل لخبارك
ريماس : و شكون نتا باش تراقبني؟؟؟؟
أسوار : ماتفهمينيش غلط
ريماس : لحد الساعة مافهمتش غلط ولكن لي عارفة هو هاد المجية لي جيتي باقي غايجيني موراها صداع الراس اصلا هادشي لي تابعني من موراكم من نهار عرفتكم غير المشاكل و صداع الراس و نهار قلت صافي تهنيت عاودتي جيتي من جديد
أسوار : ( بجدية ) ريماس خاصك تردي البال لراسك
ريماس : هاااااا لي قلنا من دابا بدينا ... مزال حتى ما سخنتي بلاصتك و بديتي كاتهدد نوض تحرك خرج عليا و رجع منين جيتي
أسوار : من ديما متسرعة سمعيني انا مايمكنش نأذيك ولكن غيري يقدرو يأذيوك انا غانسيفط رجالي يردو لك البال
ريماس : والله يا خويا ماشكيت عليك البليزير لي غادير فيا هو فاش تحبس الشتا رجع فيحالاتك و نساني عليك
أسوار : العقل يقدر ينسا ولكن القلب صعيب ا ريماس
ريماس : ( هازة حاجب ) مابقاش نافع التهديد و قلبتيها للشعر؟
أسوار : الصمت
ريماس : على العموم تحبس الشتا خرج حيت خوتي مابقا لهم والو و يرجعو مابغيتش يديو عليا نظرة خايبة
أسوار : مافهمتش علاش تبدلتي و وليتي كاتعاملي معايا هاكا .. مافهمتش علاش ماكانقدرش نقول شي كلمة تجرحك ولا ندير شي تصرف يأذيك .. رجعات لبلاصتها و خشات راسها بين الوراق و عقلها كايفكر غير فالمصايب لي غايجيو من مور هاد المجية
ريماس : الشتا حبسات تقدر تمشي دابا
أسوار : شكرا على استضافتك ليا و فرحان حيت شفتك مرة خرا
ريماس : العفو و هادشي باش معروفين حنا المسلمين حسن الضيافة ... حط الكاس من تما و خرج تبعاتو باش سدات الباب ... و مع خرج جبد طيلي دوز نمرة واحد الشخص
أسوار : سيفط لي 4 ديال الرجال للمغرب لهاد العنوان ************** ... وي مهمتهم يردو البال للناس لي ساكنين تما و اي حاجة وقعات يعلموني بيها ... قطع و كمل طريقو شد طاكسي للمطار باش يرجع لبلادو و هاكا دازو الأيام و الشهور من مور داك النهار ماعاودش رجع لعندها ولكن كان حاط أشخاص يحميوها هي و فادي و ريناد خبارها كانت كاتوصلو بالتفصيل و مافخباروش بلي دوك الرجال لي حاطهم يحضيوها كاينين رجال اخرين مراقبينهم و مراقبينها حتى هي .. فهاد الشهور زادت ريماس كبرات شركتها شوية ماغانقولش بزاااف حيت يد وحدة ماكاتصفقش و فديك الشركة ماكاينش معاها شركاء .

خرجات من الشركة لقات الشيفور كايتسناها طلعات و وصلها للفيلا
ريناد : على سلامتك ا ختي غاتكوني عيانة بزاف
فادي : هانيا ا ختي مابقاش ليا بزاف و نولي راشد و نعاونك فالمسؤولية
ريناد : باقي لك عااااامين باش يلاه تكمل 18 سنة
فادي : و نتي باقي لك 3 سنييين
ريماس : غاتعاونوني بجوج ان شاء الله ولكن دابا ديوها غير فقرايتكم هي الأهم ... يتبع