عشق ليليان 💥💕

😍64😍

- كامي تتخنزر فعادل : خلصت ؟ ..
- مهدي : سكتونا درك و هيا نروحو نفطرو و احكيولي كلش من نهار جيت
عادل و كاميليا اصدقاء مهدي من نهار راح مهدي لامريكا تعرف عليهم .. اصلهم من الجزائر قراو و عاشو مع بعضهم و كل واحد كون روحو ... عادل و كامي قراو ادارة اعمال و مهدي هندسة .. اسسو عملهم الخاص و كبروه ولاو شركاء فواحدة من الشركات المعروفة فامريكة ... كامي تهتم بالعلاقات العامة و امور الموظفين ... عادل بالادارة المالية هو المسؤول على التسيير المالي تاع الشركة ... اما مهدي كان مهندس و صاحب الافكار و الابداع يعني بلا بيه ما يكون والو .... ليليان بعد ما خرجت راحت لريسطورون قدام الشركة يروحو ليها موظفين كامل .. طلبت وش تاكل و جابولها تاكل وتخمم فالموقف اللي تحطت فيه ... حبت تعرف شكون هادي كاميليا و عادل وش يكونو بالنسبة لمهدي اكيد مقربين بزاف ... تخمم كفاش بقا يشوف و هي تبهدل فيها .. بقات تلعب مالماكلة
- فالليل يبوسك و يعيشك فالاحلام و فالنهار يحتاقرك و ما يخممش فيك
هزت تيليفون تحكي مع اسامة
- اسامة : الو
- ليليان : وي اسامة اك مليح ؟
- اسامة : مليح و نتي
- ليليان : مليحة ... ستنيتك تعيطلي بش تحكيلي وش ندير وش ناوي نديرو
- اسامة : كنت راح نحكي معاك .. حكيت مع سالم و اوهمتو اللي نتي ما تعرفينيش .. نتي عليك تبينيلو بلي ما تعرفينيش
- ليليان : كفاش ؟
- اسامة : ساهلة كملي اتعاملي معاه كيما قبل .. و درك نتي لازمك تكوني مع مهدي فاي حاجة ... لازمك تجيبيلي ليدوسي تاع المشاريع الي رايح يديرها و شكون العملاء الجدد
- ليليان : يعني نكون جاسوسة و نسرقولهم خدمتهم
- اسامة : ايه هاديك هي
- ليليان : علاه نديرو هكا وش دخل هادي فسالم و انتقامنا
-اسامة : ليلي تعرفي سالم نقطة ضعفو الدراهم يعني لازم نخسروه فالشركة و لازمها تفلس
- ليليان : اهههم اوكي .. ندير لي نقدر عليه ... بصح لازم تصبر شوي صعيبة مهدي ما يامنش مش ساهل نتجسس عيله
- اسامة : ندير فيك كونفيونص و تقدريلها .. ايا نخليك كشما تحتاجي عيطيلي باي
- اوكي