لهفة عشك

البارت ١

.......لهفة عشك.......

لكاتبة (zainab) عطر الورد

.....البارت ١......

الكاظمية ...الساعة ٧ الصبح ...
كعدت من النوم واني اعرف اليوم اخر يوم النا بهذا البيت اختي بعدها نايمة كمت من فراشي واني اباوع ع الغرفة كلشي مابيها لان كلها شلناها بقت بس المراية رحت واني اباوع عليها دمعت عيني لان بعد
ما نرجع الهنا مسحت دموعي واني اتلمس وجهي هاي صارت عندي عادة اول ما اكعد اباوع ع المراية واشوف النمش بوجهي اخذت نفس ضليت افتر بغرفة وكل زاوية بيها عندي بيها ذكريات ...

اسمع امي اصحيني من جوة...
ولج يمه شمس اكعدي ..وكعدي اختج ورانه طريق
راح نتاخر ....
شمس:اي يمه اني كاعدة هسة  اكعد أديان...
ولج أديان يلا كومي ..اتكول امي نحضر نفسنه
اديان:هفف خليني شوي انام لج بارحة متاخرة نمت
شمس:اكعدي ونامي بسيارة ..
اديان:اشلون واحد ما ينام ..كعدت بس روحي عن وجهي ...

تركتها ..ونزلت ...شفت امي ترتب باقي الغراض اخواني كاعدين يتريكون
صباح الخير
الام ..صباح النور يلا تعالي اكلي وين اختج
شمس..كعدتها اتكول بعدني ما شبعانه نوم ..
الام ..هسة هي تكعد خاف بقة شي ما ماخذيه
شمس ..لا كله خليته بكارتونات حتى ملابسنه
ماما اني ما اريد اروح لغير مكان اريد ابقى هنا
صديقاتي كلهن هنا ما اكدر اتركهن..
الام...يا يمه هي بيدي قابل ..ما شوفين ابوج يوميه مهددينه طلع مو شغل عليه وهو خايف عليكم ما نكدر بعد نبقى هنا يومية صاير اغتيال لضباط والوضع يخوف مو مال واحد يأمن يبقى ..
شمس..بس ما متعودة اشلون راح افارك صديقاتي
الام..تتعودين يمه هناك همين راح يصير عندج صديقات...

نزلت أديان...
صباح الخير ...لعد بابا وين
الام ..ابوج راح ع بيت جدج كال حظرو نفسكم يلا تعالي اكلي ع ما يجي...
أديان ما اشتهي اروح اصعد ابدل ...
اني كملت ريوك امي ضلت ترتب بكارتونات خلينه كل شغلاتنه ماراح ناخذ اي جهاز لو شي بس ملابس والشغلات الضرورية ..

صعدت ابدل واني افكر مستحيل اكدر اتاقلم وي الوضع اشلون راح افارك نور صديقتي ..
دمعت عيوني واني اذكرها سمعت صوتها جوه نزلت ركض ع الدرج ..
شفتها كاعدة يم امها اول ما شافتني اجتي وحظنتني وضلت تبجي ..

نور .اشلون راح اكدر افاركج.

شمس ..اني همين ما اكدر افاركج بعد ويامن اقرا واطلع لمدرسه..

ام نور..خية ام اديان والله جورتكم حلوه وخطية نور من البارحة تبجي ع شمس تعرفيهن من هنه زغار وسوه..

ام أديان.. والله يا ام نور اشوفين الوضع اشلونه وأبو أديان يوميه تهديد جايه بعد مانكدر نبقى بغداد الوضع كلش موزين ..

ام نور..صحيح هسة ابن عم ابو نور همين ضابط متقاعد وهمين يهددوه وباع بيته وشال..

ام أديان...هو العراق كله هيج بعد الله كريم الحافظ الله ..