In Other Words, I Love You

Chapter 5

NAISIPAN ni Chrissa na i-search kung ano ang nangyari noong April 01, 2009 dahil hindi siya mapakali. Hindi rin niya kayang ipaliwanag kung bakit siya kinakabahan. Nagbuga siya ng hangin at saka nag-type sa Google.

Isang news article ang una niyang natanawan nang i-search sa Google ang petsa. "Paglubog ng MV Salvieja, 25 Dead, 13 Missing," basa niya sa title ng article. Hindi siya aware sa pangyayaring o kung nabalitaan man niya ay nakalimutan na niya. Ganoon naman ang mga tao, hindi ba? Kung walang kinalaman sa buhay ang isang bagay o pangyayari ay ipinagwawalang-bahala lang.

Nag-scroll down siya para mabasa ang buong artikulo. Bigla siyang natigilan nang nabasa ang pangalang Elaine Yapit sa missing list ng naturang lumubog na barko. Siya ba at ang Elaine na kausap ng kung sinumang may-ari ng file ay iisa?

Isinara niya artikulo. Hindi siya pakialamera at lalong hindi siya tsismosa pero ano itong ginagawa niya? Daig pa niya ang isang bayarang detective kung mag-research samantalang noong nag-aaral pa siya ay halos buhatin niya ang katawan para mag-research para sa term paper niya.

Napatingin si Chrissa sa digital clock na nasa mesa niya. Mag-a-alas nuebe na ng gabi. Alas tres ng hapon nang umalis si Cider. May aasikasuhin daw ito, siyempre ay hindi naman siya nag-usisa. Hinayaan niya lang ito. Mabuti na nga rin sigurong wala ito shop dahil baka hindi mapigilang magtanong ng tsismosa niyang bibig.

Wala na rin namang customer kaya magsasara na siya. Iyon naman ang bilin ni Cider, kapag medyo late na at wala ng tao ay magsara na siya. Itetext na lamang niya ito para hindi na ito magtungo sa shop kung sakaling tapos na ang inaasikaso nito.

Sinigurado niyang naiayos niya lahat bago siya tuluyang lumabas ng shop. Inila-lock niya na iyon nang may marinig siyang tumawag sa pangalan niya. Si Ate Vodka ang nalingunan niya.

"Nagsasara ka na pala," anito paglapit sa kanya.

"May kailangan ka, ate?" nakangiting tanong niya rito.

"Tsinetsek ko lang kung nandito si Cider," anito saka nagbuntong-hininga.

"Kaninang alas-tres pa siya umalis, may aasikasuhin daw," sabi naman niya.

"Malamang ay nagpapakalango na naman iyong mag-isa. Pwede mo ba akong samahan?"

"Saan?" nagtatakang tanong niya rito.

"Sa kabilang kalsada lang. Sisilipin ko si Cider. Baka mamaya nagpapatiwakal na ang isang iyon," ani Ate Vodka na mas mukhang nag-aalala kaysa nagbibiro.

"Bakit naman iyon magpapatiwakal iyon, ate? Ikaw talaga," kunwa'y natatawang sabi na lang niya kahit ang totoo ay bigla rin siyang nag-alala.

"Birthday ngayon ni Elaine at kapag ganitong araw ay nagpapakalunod si Cider sa alak. Gitlfriend nya si Elaine na limang taon ng missing in action. Walang nakakaalam kung buhay pa siya o ano. Ang nakakalungkot lang, tangay-tangay niya ang puso at buhay ng kapatid ko," malungkot na pagkukwento ni Ate Vodka. "Naku, Chrissa, kung anu-ano na ang nasabi ko sa'yo. Huwag mong sasabihin kay Cider na naikwento ko sa'yo ang tungkol kay Elaine, ha?"

"Oo naman," aniya saka ngumiti. Magkaagapay silang naglakad patungo sa kung nasaan man si Cider at habang naglalakad ay nabanggit niya kay Ate Vodka ang tungkol sa files na nabasa niya. "Si Cider pala talaga ang gumawa niyon."

"Grabe magmahal ang kapatid ko, ano? Sa sobrang wagas nga niyang magmahal ay gusto ko na siyang ihulog sa dagat at ipapapak sa mga pating. Hay! Kung pwede ko lang kunin kahit one fourth ng sakit na dinadamdam niya."

Nakakatawa mang isipin ay naiinggit siya kay Cider dahil mahal ito ng ate nito hindi tulad niya na walang kapatid na nagmamahal. "Kahanga-hanga siya, ate. He remained faithful and loyal to Elaine for five long years. Five years na walang kasiguraduhan. Iyong iba nga kaharap pa lang ang mga syota ay nagagawa ng manggoyo."