فردوس- صعدتني نجمه فوك لبيتهم والهوسه جوه اباوع هالبيت يخبل مال اهل قبل بسيط وبنص البستان وهاديء حيل وعالمي صعدتني للبلكونه اللي تطل عالمي مخلين مرجوحه وميز
لج هاي شن المكان يخبل
بعدمكملان لو يكمل يخبل يصير بس اخويه وشل فليساته
خطيه الله يرزقه زين هناي شنو الهيكل
بيت ابو سكينه هاي جاي يبنون بي
يا ىهذا كله الكم
لاخطيه شيخ يعرف اخوي كاله خلي يزرعو كله وماريد اجر عليه بس كون مايبقه بور
بور شنو
يعني ارض بور مامزروعه وابو سكينه كيف جايب ولد اخو ويشتغلون ليل نهار شون صار يخبل دتشوفينا
اي ماشاء الله يعني انتو بس فدان
بلي بس فدان والباقي بيت شيخ عارف بس هيج تاركينه
الله يرزقهم
اروح ابدل واجيج ماجيبلج غيار
لا هسه نروح معوده شبدل
ماترتاحين بيها
لا شعدي مرتاحه خليني اتفرج عالشط
تفرجي اخذي راحتج
بقيت اتفرج باوعت اكو غرفه بصف غرفه نجمه البلكونه بيها باب لخ اذاافتحهازتطلع هاي الغرفه مشيت فتحت الباب علكيف راسن انفتحت غرفه صاج. جديده تخبل ناعمه مو ضخمه والغرفه مساحتها جبيره معلك عالتعلاكه بدله مال جيش عرفتها غرفته باوعت للفراش مخربط الغطا كزبر حلدي احس بردت مشيت على كيفي باوعت بمرايه ميزه صوره عائليه قديمه مشط وعطر بسيط فتحت الجرار على كيفي اول واحد كله اسلحه وسبطانات بعلبهن مرتبه واحد بصف اللخ سديته فتحت الثاني ملابس داخليه فانيلات بيضه سديته وتلفتت بلازما صغيره عالميز يمها لاب توب تلمسته باوعت شحاطه بباب الغرفه منزوعه بطريقه بسيطه ومرتبه طلعت من الغرفه جلبت الدكمه بالبرده لان كيبور مخرم عتيتها وطلعت بالبلكون توني اسد الباب باوعت من الجامه شفته فات للغرفه رفع راسه باوعلي فاك عينه واني جمدت من وره الجام اباوعله تقدم واني رجعت وكفت يم المحجر مال بلكون فتح الباب وكلبي راد يوكف طلع بهدوء اخاف اباوع لصفحته توترت حيل وارتبكت بقه ساكت وكف بموازاتي ببعد كم متر يباوع من السياج رد افوت لغرفه نجمه داانزل كطع طريقي وبعد ه يباوع عالشط.
وكفت بمكاني خايفه شبي ميريدني انزل رجعت لمكاني التفتت باوعتله ميباوعلي بس مضيك عينه. يباوع عالمي ولازم المحجر بايده الاثنين
باوعلي رافع حاجبه وعيونه مضيقها بقيت اباوعله اليوم مانزل عيني داشوف ليوين يوصل. بقيت اباوع بعينه ذبلت عيني بنضرته وعيونه ذبلت وجهه عركان ونفسه يرفع صدره ويخفضه دقيقه دقيقه ونص احس العرك كام ينكط مني نصيت راسي احس ذبت كلي بقه ععينه بعيني يتحداني واتحداه اخرتها نصيت راسي جر نفس بغمج عفته ونزلت ركض جوه صارت بوجهي نجمه
عذريني تاخرت عليج والله نزلت وي عمتي ونسيتج يله تعالي نساعدهم لزمت ايدي
هاي شبيج ترجفين يولي خاف مريضه
لالا ااجوعانه
يا يموت الجوع كون تعاي
