سيدرا-لثاني يوم سمعته الصبح كعد وسمعته طكطكه بالمطبخ عرفته ديتريك بس ردته يطلع وفعلا طلع انسدت باب الحديد وراح خفه وراحه كمت من غرفه زين طبيت الهول لملمت الهوسه شفت مسويله بيض وجاي باوعت عالباب قافلها. يعني سبوع حتى ندى ماشوفها شكد حقير يووو ام زين اذا جتي شون هذا غير مخبل يا الله. اوي شسويله يطبك طوب كضيت يومين وجتي ندى بثالث يوم صعدت كتلها ولج الباب مقفوله كعدت بالباب وبقينا نسولف
شفتي لاحمد
اي البارحه جان ديقره بالحديقه الوره البيت
اي سوده عليه بلكن ينجح
وانتي دتقرين
اي والله مكطعه روحي شبي وياج خالو
ندى هاي امل وحده حقيره. --- حجيتلها الكالت عليه لاخوها بقت صافنه
عاي شبيها خالتي تدرين متعاركه وي عيالها ذيج العركه المرتبه وطلعت من البيت ومتقبل ترجع وعمو اوس اجه علمودها ويوميه اسمعهم يتعاركون من ابات. بيت جدو تكوله اهلك مينعاش وياهم والفهمته انه هي متعاركه وي اخته وضاربتها ومتعاركه وي امه هم وابو طاردها من البيت
عزه بعينها محد سلم منها
سكتي وخليها وخطيه عمو اوس ايس منها ولعبت روحه فاجه هنا علمود بنته ويحبها تره يموت عليها
شعليه منهم بس ليش تلفق حجي اصلا الولد محترم ليش تكوله لاخوها هيج وهذا چنه خروف النذر
هههه والله لو يسمعج
اي هاهي اكولج تشربين عصير مسويه كوكتيل لزيون وصار هواي بس كلش طيب
وشون اشربه منين تطلعي الكلاص بله
امدلج الكصبه هههههه واشفطي
خرب يومج سيدرا. خرب ببليسك خالو جان بتت يمج
افرشي بباب الترك
هههه قيس مسواها لليلى
ندى راحت ومرت اربع ايام وخابرتني الحجيه كالت. يمه ام زين جتي
حجيه الباب مقفول
كتلها كالت بس اصعد اشوفه احاجي وانزل
خل تصعد عادي
شوي وصعدت وكفت زين يم الباب باوعتلي امه ابتسمت نصيت راسي خجلانه
شونج سيدرا
هلو عيني ام زين. زين كول هلاو
زين بس ساكت خجلان
حبيبي فدوه لكلبك
بقت تحاجي من وره الباب من الشباك الصغير اللي بالباب لزمت ايده جايبتله تلوين واصباغ كيف بيها زين وبقت تحجي وياه ساعه عفتهم شوي وصاحت
سيدرا بس ممكن كلمه
نعم تفضلي
طبعا مشكوررره كلش والله يدري شكد ادعيلج وفعلا الام التربي مو التخلف بس خليني ولو عالهامش الله يبارك بيج ويهدي رجلج عليج
