صرخة عار(مكتملة)

الحلقة 27

صــــرخة عــــار
الحلقة 27

كنت نسمع في إهانات إسراء لي وأنا ساكته ودموعي ينزلن ومش قادره نرد ولا نقول شئ...

فعلا أني نستحق نستحق اكثر من هكي،وفعلاً زي ما وصفتني أني خاينه لأني خنت هلي وخنت صديقتي الوحيدة وجارتي يلي كانت تجري وتسعى وراء سعادتي..

المواقف يلي دارتهن لي إسراء ووقفتها معايا حتى الأخت ما ديرهش لأختها...

ما كان لازم نعترف لـ حافظ بس صار واعترفت مهما كان ماهر قريبهم ونسيبهم مستحيل السر حيبقى محفوظ طول العمر...

اكيد لو ما اعترفت كان حيجي يوم و يسألني حافظ وأنا زوجته ووقتها موقفي يكون أسوء من هك و أفضح من هك...

كل هالحديث دار بيني وبين نفسي في الوقت يلي كانت إسراء منهاره وتهين في...

إسراء:-لو كنت عارفه هكي من الأول ما كنت استقبلتك في حوش هلي بكل رحابة صدر كان لازم نخليك ادوري في الشوارع زي الكلاب.
مع أن حتى وصفك بالكلب كبير عليك الكلب وفي وأنتي خاينه....  

تحاول إسراء تقرب مني تبي تضربني او تقتلني وحافظ واقف بينا ويهدي فيها..

إسراء:-مفروض سلمتك لخوتك خليتهم يقتلوك ،،،بس توا نقتلك بروحي...

إسراء كانت تبكي وتصرخ وتعيط،،،،وأنا حلقي ناشف وريقي ناشف ماقدرتش نحكي حاسه روحي في كابوس...

هو فعلاً كابوس بس كابوس حقيقي....

من صوت صراخ إسراء انفتح الباب وخش حد الـحد هذا ياما تمنيت نشوفه قبل هكي بس توا......
توا لا.....دخل ماهر يلي كان يستنى في حافظ برا بيش يمشوا ع بعضهم يقروا فاتحتي......

يقروا  فاتحتي مع شعيب يلي توا قاعد في الجامع يستنى مع بعض من رجال وشباب عايلتنا...
                                                                          

انفضحتي يا حواااااء حتى يلي ما كان عالم حيعلم....
يوم فاتحة حواء عريسها ما جاء....

ااااه

خش ماهر يجرررري وما جاب عقله أن انفضح:-كنكم؟؟؟؟
شنو في؟؟؟؟؟
ليش اصواتكم طالعه؟؟؟؟
كنك يا إسراء؟؟؟؟
كنك يا حافظ؟؟؟؟؟

كان يحكي معاهم ويبحتلهم وأنا ولا كأني قاعده...

إسراء:-أنت كلب
أنت خاين
أنت حقير
وواطي واطي
كنت شاكه أنك تخون فيا وعارفه
عارفه أن عيونك ما يملاهن ألا التراب.
بس مع هذي!!!!!!!
هذي يلي مصاحبتها ودايرتها أخت.
تفوووو تفووو عليك أنت واياها خاينين كلاب.
كلاب تستاهلوا القتل تستاهلوا الحرق....

حافظ سحب إسراء بالقوة لأنها الباين أنها انجنت أو فقدت اعصابها وخذاها جوا الدار....