صرخة عار(مكتملة)

الحلقة 8

صرخـة عــار
الحلقة 8

مرن أيام على هذاك اليوم و أنا بالرغم من التعب والمسؤليات فرحانه وسعيده..

وتكرر الموضوع اكثر من مره وتعذرت بإسراء وطلعت مع نزار..

في يوم من الأيام جتنا إسراء في الحوش.

استقبلتها والحوش كان فاضي إلا أمي راقده.

إسراء:-شنو أخبارك وأخبار صاحبك؟؟
أنا:-الحمدلله في أحسن حال.
والله وضعي معاه فوق الريح.
وأنتي شن أخبار راجلك؟؟؟؟

إسراء:-كويس.
بس نحس فيه يلعب بذيله مش عارفه ليش؟؟؟؟

أنا:-هههههههههه لالا غير اسكتي اسكتي.
مستحييييييل تقعدي أنتي مراته كامله مكمله ويبحت لغيرك.

إسراء:-بس يا حواء عيونهم ما يملاها ألا التراب.
بعدين أنا احساسي ما عمره خاب.

أنا:-توا غير جيبله شئ بنت ولا ولد وشوفي كيف يتغير.
والله صارت مع خوتي في بداية أول ما تزوجوا ما يقعدوا في الحوش بكل ألا في الليل بس بعد هكي وحقربي 24 ملصقين فيهن غير يأمرن بس.

إسراء:-على حسابك عد!!!!!

أنا:-اكييييييد على حسابي.
خدامه من غير راتب.

إسراء:-هههههههههههههه عطك الخير يا حواء والله والله شاغلني حالك.
شن رأيك نخطبك لخوي.
أ
نا:-ههههههههههههههههههه.

إسراء:-بلا اهبال وضحك والله خيرلك متزوج صح وعنده عيال بس يبي وحده اخره وحوشك بروحك.
مترديش العريس.

أنا:-أنا يا إسراء مشكلتي مش في أني ما يجوني عرسان ،،مشكلتي بوي ما يبش.

توا لو تزوجت أمي من يبي يمسكها.

إسراء:-يا سلام!!!!!!!
زيكم زي أي عائلة أمها مريضه .
يوم انتي تجيها يومين على خواتك لخراتك.                                               

أنا:-بس بوي ما بش.
بوي شايف أني أنا سبب في مرض أمي.

إسراء:-ليييييييييش؟؟؟؟؟
أنا:-هك شايفني ملزومه نعاني امي ونعانيه ونعاني الحوش وخواتي وخوتي والصبايا والعيال.
بس اهو الحمدلله من اول ما تعرفت على نزار تغيرت حياتي شوي.

إسراء:-اسمه نزار؟؟؟؟؟؟؟
أنا بكل غباء وبراده:-اها ويسكن في عمارتكم على فكره.
ٱسراء:-والله؟؟؟؟؟؟؟؟؟؟؟؟؟؟؟؟
أي شقه؟؟؟؟؟
أنا:-مش عارفه؟؟؟؟؟
إسراء:-ما سمعتش بالاسم هذا بكل لا من جاراتي ولا ماهر.
أنا:-هو جاي جديد.
إسراء:-ااااااها.
المهم ديري بالك منه ،ره الرجاله ما لهم أمان.
أنا:-لالالالالا مستحيل الا نزار يحبني موت.
إسراء:-باه ربي يهنيك.
توا عد نبي نمشي عندي دراسه اسمحيلي.

ووقفت ووقفت معاها وصلتها للباب.
إسراء:-حاولي تخففي من طلعاتك يا حواء وقوليله لو صح يبيك يخطبك.
وافطني ثم افطني ثم افطني..

أنا:-ما عليييييك.

مشت إسراء وخشيت أنا قعدت شوي على تلفزيون بعدها خشيت الدار فتحت الدولاب وقعدت نفتش في أكياس يلي عطاهن ليا حبيبي نزار..

لقيتهن تجهيزات عرايس وكان طبعاً عقلي دوبي نحساب يجهزلي عشان نتزوجوا فرحت.
ومشيت جبت الموبايل واتصلت بيه.

أنا:-توا بس شفتهن الأكياس.
نزار:-لي فتره نقولك شوفيهن تقولي ما نفضى معقوله؟؟؟؟؟؟؟
أنا:-يهبلن توا نحافظ عليهن جوا قلبي لعند ما نتزوجوا.
نزار:-عطك عصيده وخلاص.
بعد نتزوحوا يحلها الحلال نحنا في توا. أنا:-كيف يعني؟؟؟؟؟؟
نزار:-يعني الاكياس جيبيهن دسيهن في دولابك يلي في شقتك عندي بش ما حد يشوفهن عندك.
أنا:-باه لما نجيك حاضر.

مع خشت لمياء سكرت الموبايل ودسيته.

لمياء:-عهههههههههههههههههههههه عطك دعوه يا حواء .
يعني تطمري على اساس مش شايفته من قبل وعارفه ان عندك موبايل.
في من كنتي تكلمي؟؟؟؟؟؟؟
اعتررررررررفي.

أنا:-مش شورك.
لمياء شهقت:-هيييييييييييييييييي.
شنو هذا؟؟؟؟؟؟؟؟

أنا شفت المكان يلي تبحت فيه حي علي الدبش يلي من نزار.

أنا وقفت نجري لميته وحطيته في
الدولاب وقفلته.
وطلعت بسرعه.

صراحه خفت من لمياء توا مرات تحكي لبوي ولا تقعد تهدد في بيها.....

في نفس اليوم لكن في الليل بكل كانت عندنا صالحه قاعده مع لمياء في الدار،، وانا مع أمي في الدار..

طبعاً دار هالحديث بين لمياء وصالحه.

لمياء:-ما لاحظتيش أي تغيير؟؟؟؟
صالحه:-في شنو؟؟؟؟
فيك؟
لمياء:-لالا في حواء.
صالحه:-كنها حواء؟؟؟؟؟
لمياء:-سبحان الله ما كانت تطلع من الحوش توا كل يومين بعدها تطلع تسوق مع جارتنا الجديده هذي.
صالحه:-أنا شايفه أن حواء مفروض ما
تطلعش بككككل ،،ماما مريضه وحالتها مش مستقره مفروض ما تسيبهش وتقعد في خدمتها كل الوقت.
لمياء:-اووووووووف منك
أنا في وادي وأنتي في وادي.
مش هذا قصدي.
القصد أنا مش مطمنه لطلعاتها بككككككككل.
يعني تتسوق بالخمس ساعات وتجي معاها كيس ولا كيسين وما لاحظت أي تغيير في دبشها.

صالحه:-هههههههههههههه                        
قصدك علاقه.
والنبي اسكتي.
لمياء:-ليييييييش لا؟؟؟
صالحه:-كذا اسكتي.
اولا حواء ايش عرفها للحاجات هذين بعدين الراجل منين يا حسرة وهي عارفه أن الزواج مش يلاها بكل.

لمياء:-أنا شفت عندها أرواب عرايس وبجامات وحاجات يفجعن يا صالحه.
صالحه:-ههههههههههههههههههههههه
تحلم الدجاجه.
كذا نادي عليها .

لمياء:-لالا .
اطلعي احكي معاها غادي احسن ما تسيب ماما ويسود بابا ليلتنا وليلتها.

صالحه:-باه تمام.

كنت امسكره باب الدار ونبعبش في الموبايل من ريحه الغالي هذا ما نرقد ألا وهو على قلبي.

خشن لمياء وصالحه دسيته بسرعه.

صالحه:- ههههههههههههههههههه
عطك اوجاع موبايل مره وحده.

أنا:-ناقصني اوجاع أنا

وجن قعمزن،،،أنا تقعدت.
صالحه:-احكي شنو قصتك أنتي؟؟؟؟
أنا:-قصه ايش؟؟؟؟؟؟؟؟؟..........
يتبع………………
فـــوت ⭐
تعليـق 💬