صرخة عار
الحلقة 2
خليني نكمللكم حكاياتي عن وضعي،،،،اساسا مهما حكيت مش حنوصللكم حجم المعاناة.
لما خشت اختي صالحه للجامعه وقرات أول سنه قعدت نوفرلها في الراحه بش اتخرج وتعطيني فرصه نقرأ بصدق مزال عندي أمل......
بس صالحه ما لحقت تتخرج لأن وهي مزالت طالبه خطبها ولد عمي وازوجها وحطم حلمي..
بس لأني هبله قلت معلش مش مشكله اهي لمياء توا اتخرج وانحصل فرصه شويا...
بس لمياء انخطبت بعد صالحه ...
وتحطمن احلامي وأمانيي وانسدت نيتي،،،،،وحلفت يمين غليظ أن حتى لو جتني شهادة جامعيه على طبق من ألماس ما نقربها.....
في يوم من الأيام كان يوم جمعة وصالحه عندنا.....
نضت على صوت كحه أمي شارقه نضت نجري عطيتها اميه وقعدت احذاها لعند ما رقدت....
صبيت طفيت الضي خشيت مرقدي سمعت حد خش ثوااااااني بعدها سمعت صوت شعيب:-حواء.
يا حواء.
اللهم لا حول ولا قوة ألا بالله توا مراته مندفسه جوا وينادي عليا أنا...
أنا:-هااااااا
شعيب:-ديريلي فطور نبي نطلع للسوق نجيب لوازم الغداء....
أنا:-شويا بس...
مشيت للحمام غسلت وجهي وجيت جهزتله الفطور ...
كنت ناعسه حتى الطريق منشوفش فيها كويس ومشيت قلت نأخذ غفوة مزال بدري..
خشيت لدار لقيت أمي واعيه.
أنا:-كنك؟؟؟؟
ليش ما رقدتي؟؟؟
أمي:-لما نرقد ينقطع نفسي ما قدرت نرقد..
أنا يا مفرج الكروب ياربي تلطف بحالي ولا خذني والله الموت ياربي الموت..
قعدت حذاها وكل شويا وجي يطيح لأني ناعسه وأمي توعيني.
أمي:-هيا نبي نصلي.
أنا:-باه.
خذيتها للحمام وطبعاً أمي كانت تحب تدوش في صبح الجمعه ادوشت وسيبتها تصلي ومشيت جهزتلها الفطور وعطيتها الدواء وفطرنا أنا وهي....
بعدها خذيت دبشها بنغسلها لقيت غرفة الغسيل امعرمه دبش من خوتي وخواتي وعيال خوتي وبنت صالحه وحتى دبش صبايا خوتي غسلته كله وقعدت نضم هكي وهك....
لعند ما جاء شعيب بديت أنا نجهز في الغداء وشعيب خش صبح على أمي وقعد معاها....
بعدها قعد كل مره ينوض حد من خوتي
وباتي وطلعوا للجامع.....
بعد روحوا كان الغداء جاهز طلعن العرايس من الديار وتغدينا....
خشيت نغسل في العوايز،،،بعدها رفعت الفرشه يلي كنا نأكلوا عليها لأنها بدد عليها ولد الصابر طبيخه....
أنت تقرأ
صرخة عار(مكتملة)
Mystery / Thrillerرواية باللهجة الليبية تـحكـي عـن بنـت في الثلاثينات عـاشـت حياتـهـا ظلـم وقهـر من خوتهـا ونساوينهم ويـجي يوم وتحـب شخص وتنقلب حيـاتها...هـل حـ تتحسن حياتها وتتزوج ولا اللي حبـاته كان يبي منهـا غرض معين ويرميها؟؟....كل شئ حـ تعرفوه بالحلقات...للكاتبة...
