السلام عليكم .....
اشكر كل من كتب حرف و ندد باعتزالي ...
و اشكر كل صديقة و كاتبة و متابعة دخلت للخاص حتى تطلب مني الرجوع بالقرار...
صدكوني من اتخذت القرار اني بجيت و تاذيت و حسيت وطن رح اغادره... بيت و طلعت منه ... ناس و رح افتقدهم...
بس ... مو بيدي و ما ردت دموعي ترجعني و قهري يمنعني ...
المسألة خواتي هي العلة بهالمجال ... اي نعم مجال الكتابة عالم غريب ... صعب التعايش بي مو سهلة وحدة مثلي صاحبة ضغط و قلبي تعبان و خفقان مزمن و حساسة كلش ان تجاري سكان هالعالم....
الكتابة و النشر. و خاصة عالم القصص هو عالم مفروض ترفيهي ... الكاتب الي هو صاحب الموهبة يبدي يكتب و ينشر لفئة تقرا و بالمقابل الي يقرا رح يبدي رأيه...
الكتابة شي مو سهل ابد ... ان كانت فكرياً و شلون رح تنظم القصة و تميز السرد و الحوار و تضمن القصة تتخللها مشاهد و مشاعر و ايصال فكرة او هدف ... هذا كله من غير التعب و الجهد النفسي بتوفير الوقت ... و المكان الهادىء ... و عدة طقوس تتغير من كاتب لكاتب اخر ...
فما بالكم انسانة مرتبط بعائلة .. موظفة.. و مخلصة بوظيفتها جداً... مريضة... و اطفالها طلاب و متفوقين ... و الزوج عراقي ٢٤ ساعة ضايج و مزعوج ...
كل هذه الامور و هي حريصة ان تكتب و تكتب باخلاص و تراعي كل نقاط قوتها بباقي قصصها ان تتواجد بالقصة البيدها ... و تراعي الوقت بالنشر و ما تتاخر حتى لو كانت النفسية مو شي... لازم تقنع نفسها ان تكتب حتى لا تتاخر بالتنزيل و لا تكون مقصرة بحق نفسها و بحق متابعيها...
اتذكر من بديت اكتب جنت بعمر متوسطة ... و جنت متفوقة بدراستي ... بس الكتابة شي لطيف من افرغ و اشوف بداخلي كلام افرغه ع ورقة... كبرت و تزوجت التهيت و تركت ... و ما فكرت ارجع ابد ... لان اطفالي بعدهم صغار و الكتابة خفت تاخذني منهم...
لكن من سقطت طفلي الثالث .. دخلت بحالة نفسية تعبت ... اريد انفس عن الي بداخلي... اجهاد جسدي و تفكير و قهر ... كلها التمت و خلتني هالحالة ابدي اكتب ... و كدرت الگة نفسي و راحتها و واصلت هالشي الحمدلله ... استرجعت نفسي و هواياتها و صقلتها و صارت شي ينذكر ... و ميستهان بي...
تاكدت ان الكتابة شي حلو ... و ريحني هواية...
ورة فترة دخلت بعالم القصص العامي ... و بالصدفة رغم بداياتي البسيطة كانت بالفصحى و الي يعتبر اصعب ... بس كنت جديرة بي الحمدلله...
كتبت اول قصة و لاقت استحسان الاغلب ... و كتبت الثانية و نزلت الثالثة و الحمدلله هواية منكم حبوا اعمالي و ناسبت ذائقتهم...
الى ان اجة الوقت الي لازم اكتب شي متطور و اكبر من الي كتبته ... وكانت قناع القوة ... صح بالبداية عبالي اختصرها و تكون صغيرة لكن قررت اتحدى نفسي و بالفعل احسها كانت شاملة و شي يفتخر بي ... شكد ما اكول تعبتني قليل ..
اتذكر بقناع القوة البارت الواحد ياخذ مني جهد يومين يوم تفكير و يوم تنفيذ و وسن جانت مرافقتني هواية بمسيرتي بيها ... البارت الواحد يوصل فوك٦٠٠٠ كلمة و احياناً اقل ...
تعب فكري و بصري و جسدي و تخلفت عن هواية امور اجتماعية ... عزيمة بيت اهلي ما اكدر اروح لان مرتبطة ببارت ... طلعة ما اكدر اتاخر بيها البارت شلون؟ هاي الاكلة ما اسويها لان تاخذ مني وكفة هواية و عندي بارت شلون...
و و و و .... هواية امور منعت نفسي منها في سبيل اكتب البارت ....
و الحمدلله قناع القوة ان دلت فتدل ع قوة قلمي الي وصلت الها بالاونة الاخيرة و هي رصيد الي و هالشي كلش زين اعرفه ...
لكن ... كل هالتعب و الي يتابعني يجبرني ان اطول البارت او اكتب اسرع ... ما لكيت هالمتابع يذكر قناع القوة و يتذكر شلون جانت مجهدة....
الكاتب عنده وقت من حياته جبير مستقطعه للكتابة... هذا الوقت قاصمه من وقته مع اهله و ناسه و مقدمه مجاناً لهالعالم ...
و هالعالم يقابل هالعطاء ببرود ... و لا مبالاة ...
طبعاً اني كلامي رح تكولون عليه مبالغة و انه انتو تعلقون و اني ظالمتكم او اكو فئة قليلة متقصدتها اني ....
اني من احجي احجي ع 5470 متابعة بالواتباد و هي نفسها هنا مو قصدي ع القلة الي محترمة الكاتبة و اعمالها....
لان اني دا اقدم لاكبر من هالعدد لان اكو ناس ممسوين متابعة بس يقرولي.... اخذ بدون عطاء عملية فاشلة ... ايد وحدة متصفك ...
المهم...... القرار جان موجود ببالي و جنت اريد اتخذه و وسن شاهدة كم مرة اكلها رح اترك نفسيات تعبت اجاريها بس ارجعو اكول لنفسي اكتب .... الى ان شرارة صغيرة خلتني اجبر نفسي و اتخذ هالقرار ... و الي جانت قبل يومين منشور بالكروب الي اني ادمن بي و انشر قصصي هناك و خواطري يعني مو نايمة و عايفة..... المنشور جانت صاحبته تسال ع قصة ... صدكوني هاي مو اول مرة و لا جنت اهتم لهيج مناشير حتى لو مذكروني ... عادي بس اني متحملة ع نفسي و شفت هالمنشور و الي معلقات هناك نفسهم جانوا يضغطون علية بتطويل البارت او انزل يومي و من اكلهم لا تضغطون علية يكولولي مو احنه من محبتنه لاعمالج و قلمج هيج نكول .... وتالي شحصلت بس الضغط علية و يذكرون غير قصص يعني اني مموالمتهم اذن ليش اتعب نفسي و تجهد روحي و بالمقابل الكة روحي اخر خيارات المقابل .... كرامتي متسمحلي اكمل بهالطريقة .. ماطول عطائي باخلاص .... اتمنى المقابل يعطيني باخلاص ايضاً و الا رح تكون علاقة غير متكاملة ...
اخيراً و اسفة ع الاطالة ...
اشكر كل كاتبة صديقة او زميلة و كل متابعة و كل اخت حبت تثنيني عن قراري و ترجعني ...
و اشكر البنات الي دزوا ع الخاص رسائل و كلامهم الجميل مكدرت اقراه لان تليفون من حدثته ديشكل .... اعتذر منكم قرار اتخذته و جنت ناوية اغلق الصفحة لكن بعض الصديقات اصروا ان اتواجد بينهم .. لذلك اتراجعت بقفل صفحتي و رح تظل مفتوحة...
و ارجع اشكركم و اعتذر ما رديت مناشيركم لان الكلام كثير و انتو اعزاز ع قلبي بس هذا الشي يصب بمصلحتي اولاً و مصلحة قلمي ثانياً
اختكم ديانا ام اية
أنت تقرأ
احلام ناني
Poetryفتاة تعيش حياتها كقربان لعائلتها ..تلبي احتياجاتهم ... تخدمهم ...و قد نست نفسها بين كومة الاوامرالتي تلاحقها يومياً..... لا تعرف الكسل و لا التعب.....تظن انها قد خُلقت هكذا.. و عليها ان تكمل مسيرتها هكذا... لكن هناك حلمٌ قديم ...يراودها كل ليلة...
