مخنوگ و نار جواية مستعرة ما كدرت الوي ايد هالحرباية من مدتها على اماني....
جنت برة واكف و هي نزلت من السيارة بخطوات ثگيلة و حاضنة ابن اخوها و البنية الصغيرة لازمة عبايتها و تبجي ....
دمعتها بطرف عينها ... احسها ندمانه ع فعلاها هذه ... ادري بيها غصباً عنها سوت هيج بس يجي يوم و تشكرني لان غصبتها تدوس ع مشاعرها...انفتحت باب اهل مرت اخوها و طلعت اخت مرت اخوها و دخلت جوة و نظرتلي نظرة ضعيفة و خايفة.. ازرتها برمشة من عيني و ابتسمت الها ..
دخلت و اني نزلت من السيارة انتظرها بالباب... اني اعرفهم منو و شنو ... لو ما اخوهم صديقي و داخللهم ما اخليها تدخل وحدها...
تاخرت و قلقت عليها ... صرت ادك الباب حييل لان اجة لاذني صوت صياح ....
دكيت الجرس و احس الارتباك سيطر علية...
ثواني و وكفت سيارة نزل منها رجال ..وصل ليمي و شافني رغم ليل بس عرفني....
-منو هذا يوسف... ؟؟ يا هلا يا مية هلا بريحة عمر شلونك يابة بعد ما شفناك من سنين
يوسف..: هلا عمي .. شلونك ... اخبارك
-الحمدلله ليش واكف بالباب.؟ تعال اتفضل عمي تفضل
يوسف..: والله عمي زوجتي يمكم .. و دا انتظرها
(بهالاثناء زاد العياط و صار قريب)-يا ساتر ... شكو جوة .. من رخصتك عمي اشوف شكو
يوسف..: عمي الله يخليك هذه زوجتي جوة و يمكن زوجة معن وياها... سويلي درب حتى اشوف زوجتي خاف صار عليها شي
فتح الباب ابو عمر و فات ... و اني صرت اكل الكع اكل .. بس اريد اوصل للصوت .. جانت اماني واكفة بباب
ابو عمر صار يصيح ع بناته الملتمات ع اماني و وحدة تعيط و اللخ تدفع بيها و هي سمعتها دكول لسهير حرام عليج تلفقين علية... و سهير بترس ايدها شالتها و ضربتها لاماني راشدي...
ابو عمر ..: ... سهيرررر؟؟؟؟؟؟
سهير جمدت و باوعت لابوها... اني اعرفه لابو عمر كلش اولاده يخافون منه .. و يحترموه و يهابوه .. كلمته وحده و متصير اثنين...
وصل ليمها و اني هم ... جريت اماني و خليتها وراية ... جانت غادية فد نوب من البجي و ساكتة ... اني لو بيدي هاي اماني اسويلها فد جارة و اصحيها ع زمانها ...
كتله عمي ما صايرة و لا دايرة ... بنتك تمد ايدها ع حماتها الاكبر منها ... و الي مضحية بعمرها علمود جهالها ... والله لو مو بنتك جان عرفت شأتصرف وياها و اخليها تتندم بس لخاطرك رح اطلبها منك ترد اعتبار زوجتي و هسة ...
سهير ..: يعني باله شتريد من ابوية ...؟؟ يضربني علمود وحدة تافهة مثل هاي؟؟؟؟
و سكتت و سكتها ضربة ابوها ع صفحة وجهها الي صداها اثلج گلبي...
STAI LEGGENDO
احلام ناني
Poesiaفتاة تعيش حياتها كقربان لعائلتها ..تلبي احتياجاتهم ... تخدمهم ...و قد نست نفسها بين كومة الاوامرالتي تلاحقها يومياً..... لا تعرف الكسل و لا التعب.....تظن انها قد خُلقت هكذا.. و عليها ان تكمل مسيرتها هكذا... لكن هناك حلمٌ قديم ...يراودها كل ليلة...
بارت8
Comincia dall'inizio