كأس العالم

الفصل السابع عشر والاخير.. الجزء الثاني

#كأس_العالم
الفصل السابع عشر والاخير
الجزء الثاني  
ايمن .. كنك يا احمد في حاجة مش تمام حمل زادا مش كويس والله شنو
انا.. لا الحمدلله حملها كويس وحتى دواء ماكتبتش ليها الا مقويات وڤيتامينات وطبعا فولك اسد
ايمن .. امنا كنك
انا.. امي
ايمن .. كنها
انا.. امي ماحسيتش بيها فرحت بخبر حمل زادا زي عمتي مريم والله البنات والله حتى عمتي راضية ورحمة
ايمن .. غير يتهيالك معقولة عمتي حليمة مش فرحانة ليك
انا.. اكيد فرحانة بس مش زي مامتوقع منها
ايمن .. شنو في يا احمد كنك
انا.. امي داوية مع زادا وقايلة ليها انها ادير مانع حمل عشان مرات الوحم يطلع صعب يخرب علينا ونحن عرسان
ايمن .. مرات صح كلامها
انا.. لا ايمن من امتى امهاتنا يدخلو في حاجة زي هذي ترا قولي حتى بناتهن مايدخلوش فيهن
ايمن.. صح عمري ماسمعت بامك او امي ادخلو في حاجة زي هذي حتى لما ايمان موقفة على خاطر القراية ماحد كلمها حتى لما سند جاء بيكلمها عمتي حليمة قالت لا ماتكملهاش هذي حاجة بينها وبين راجلها وطالما متفقين هما احرار
انا.. اه شفت ليش مستغرب وليش نقولك فرحتها ناقصة مش زي مامتوقع
ووصلت عند امي والحمدلله لقيتها بروحها في الحوش وقلت لايمن يخليني بروحي معاها نبي نفهم امي كنها بعد السلام 
انا.. كنك يا امي تقولي مش فرحانة ليا
امي .. لا فرحانة من قال
انا.. لما فرحة عمتي راضية تكون اكبر من فرحتك اه نستغرب عمتي مريم زغردتلي في الفون من كثر ماهي فرحانة وفهمت فرحتها ليش لكن انتي بدل ماتكوني زيها درتي العكس تقبلتي الخبر بهدوء كانك ماكنتيش متمنيتيه
امي.. غير يتهيالك بس
انا بتنهيدة .. ليش يا امي قلتي لزادا انها ادير مانع وانتي عارفة اني نموت في حاجة اسمها عيال ليش قلتي ليها وبدون ماتقولي ليها تشاورني بما انها حاجة خاصة بيني وبينها وماتقوليش وحم والكلام هذا لان نعرفك امي ماتدخليش في امور زي هذي من قبل شنو اللي جد شنو اللي خلاك تقولي هكي وماتكونيش حتى فرحانة ليا
امي بعصبية .. خايفة خايفة عليك
انا باستغراب .. من شنو
امي .. من حب زادا لولد عمها من انها مرات غير تو متعلقة بالجو الجديد وبعدين تفوق وتسيبك ولما تسيبك ليش يكون لك منها ذكرى توجعك
انا بوجع .. امي لهدرجة ماعندكش ثقة فيا
امي .. لا عندي لكن شنو دخلها في موضوعنا
انا .. لما فتحت الموضوع معاكم ولما قلتي شنو ضمنك انها تنسى وتحبك قلت ليك انا واثق حبي ليها يخليها تحبني اكثر حتى من علاء ليش يا امي ثقتك بيا ضعفت لدرجة هذي ليش يا امي مش شايفة سعادتي وسعادتها في وجوهنا لان لو كذبنا ومثلنا اننا سعداء كانت عيونا تفضحنا ليش يا امي
امي .................
انا بقهر .. تعرفي على قد مافرحان بحمل زادا على قد ماوجعتني رد فعلك لحملها اللي مفروض مايهمك شئ في الدنيا غير سعادة ولدك اللي للاسف شكلك من كثر مانك خايفة عليا ماقدرتيش تنتبهي ليها
امي..............
انا.. وعلى العموم يا امي زادا وبثقتي في نفسي قدرت في الوقت هذا نخليها تحبني صح ماقالتهاش ليا لكن حاسس بيها في عيونها في ضحكتها حتى منادتها لاسمي تقول انها تحبني الله يسامحك يا امي وبست راسها وطلعت وانا نحس في روحي موجوع وتكيت على حوش عمتي وسلمت عليهم وباركولي وفرحانين بيا وليا وخذاني خالي على تركينة
خالي عمر .. كنك يا احمد تقول الحمل مش جاي على رغبتك
انا.. ليش ياخالي تقول هكي انا سعادتي مافيش اكبر منها وندعي ربي يكملها عليا بولادتها بخير يارب
خالي .. امنا ليش مهموم
انا بتنهيدة .. امي يا خالي امي ماكنتش تبي زادا تحمل مني وحجتها ان مرات زادا تسيبني وترجع لوهمها الاول تخيل يا خالي ان امي ماقدرتش تشوف قديش انا سعيد معاها ماقدرتش تشوف الضحكة في عيوني قبل فمي ماقدرتش تشوف الراحة في وجهي معقولة يا خالي امي كانت غافلة عليا لدرجة هذي
خالي .. والله ماني عارف شنو انقولك ومانقدرش انقولك ماتلومهاش لكن مرات حليمة من كثر خوفها عليك ماشفتش هذين كلهن
انا.. وبعدين يا خالي لو زادا فكرت للحظة انها بتسيبني ماكانتش وافقت عليا وكملت معاي راه اضعف الايمان قعدت تأجل في الفرح او ماخلتنيش نقربها لتو مش سلمت ليا روحها من اول ليلة بكل نفس راضية والحمل اكبر اثبات ان زادا بتكمل وتبي تحيا من جديد
خالي .. هدي بالك يا ولدي وانا تو نتفاهم معاها امك
انا.. معاش ينفع يا خالي بعد ماكسرت فرحتي معاش ينفع
خالي .. كنك يا احمد عمرك ماكنت هكي
انا.. تعرف يا خالي فرحتي بالحمل هذا فوق ماتتخيل لاني كنت متوقع ان زادا تاخذ في منع ورغم انها سلمت روحها لي من اول ليلة قلت يمكن ضعفت قدامي ومابيتش حتى نسئلها اذا تأخذ في منع او لا لاني كنت خايف من اجابتها لكن لما كنا في روما اخر يومين قبل مانروحو كانت تجيها دوخة ومرة مرة ترجع فتمنيت انهن يكونن اعراض حمل وهذا ليش بعد روحت صبرت شوي ولما عدينا عاينا وطلعت النتيجة حتى لما قالها ليا بتاع المختبر ماصدقتش خايف نفرح وتنكسر فرحتي لكن طلعت زادا من الدكتورة والسعادة اللي على وجهها ادل على تأكيد الخبر عرفت ان زادا معاش تفكر تسيبني وفعلا تبي حياة جديدة معاي
خالي .. الحمدلله يا ولدي وربي يتمم ليها على خير وتفرح بولدك او بنتك بين ايديك
انا.. آمين يارب .. .. لكن فرحتي انكسرت لما قالت ليا زادا انهم قالولها تأخذ مانع للحمل عشان مايفسدش عرستهم عليها والدهوير والطلوع ولما سئلتها من قالتلي امي تخيل يا خالي امي تدخل في حاجة زي هذي في حياتي وياريت حتى من وراها سعادتي بالعكس كانت دمرتني
خالي .. لا حول ولاقوة الا بالله
انا بوجع وتنهيدة .. انا مابيتش نسئل زادا انها تأخذ في مانع او لا من كثر ماخايف يوجعني الرد تخيل ان زادا سمعت كلام امي شنو كان صار فيا لما نكتشف الموضوع
خالي .. اهدى يا ولدي وعدي لمرتك تو هيا اكثر وحدة محتاجة ليك وحليمة تو نتفاهم معاها
انا.. صح مرتي نسيتها بكل
خالي بضحكة .. حي عليك رد بالك تقول هكي قدامها
انا.. هي ماشي
وبست على راسه وخذيت ايمن وطلعت وحسيت روحي بعد مانفست اللي فيا ارتحت ومشيت لشقتي وتعشينا مع بعض وروح ايمن وفريال لشقتهم
زادا.. حمودي كنك تقول مش فرحان
انا .. لو فرحتي نوزعها على الناس تسعدهم كلهم  وترجعلي بالزايد
زادا .. امنا كنك
جيت وضميتها عشان مانبيهاش تشوف زعلي من امي
انا.. مافي شئ يا قلبي غير انت يتهيالك
زادا.. مع اني ماضنش لكن مانيش ضاغطة عليك واه بكرة بنعدو لحوشكم راه
انا.. كنه في حاجة
زادا.. مافي شئ غير البنات مجتمعات غادي وعشان اول زيارة لولد اسيمة الجديد اللي قرر يجي ونحن مش قاعدين
انا .. صح نسيت بكل مفروض مشينا زرناها لكن خفت اتعب روحها وعارفها لازم ادير عزومة وهيا نافس مازالت
زادا.. اه  احسن مادرنا وبكرة نرمي ليها فلوس وبعدها برواقة نطلعو للسوق ونجيبو هدية تناسب العريس الحلو
انا .. كلامك اوامر 
زادا.. ربي يخليك لي يارب
انا وضميتها من جديد ودفنت وجهي في رقبتها .. اممممم هو الدكتورة ماقالتش حاجة على الدروس اللي نعطي فيهن لك انهن ممنوعات او لا
زادا باستعباط .. اي دروس
انا ومازالت بنفس وضعي .. ابجديات الحب اللي ديمة تنسي فيهن
زادا.. صح هو اخر درس شنو كان
انا .. تمام بكل مش يقولو في الاعادة افادة وعلى غفلة طبيتها وخشينا لعشنا الجميل ليشهد على جولة جديدة من هبالنا وانا نعاودلها في الدرس 
وعدن الايام وانا ماتغيرتش على امي حشى لله رغم زعلي منها لكن حقها عليا وكل يوم نجيها زي ما متعود وحسيت بيها كأنها شاعرة بالذنب وانا مانبيهاش تعتذر لي يكفيني اهتمامها بزادا تو افضل واجمل اعتذار وطبعا زادا محصلة دلال كبير امي وعمتي مريم وامها وعمتي راضية بالذات وحمها بدى يتعب فيها وانا داير جهدي معاها لان المرا كان مالقت راجلها في وقت مرضها شنو ادير بيه في وقت صحتها لابال مرضها هذا بيكون نتيجته طفل تكون مني ومنها وعدن ثلاثة شهور على حمل زادا وسمعنا بخبر حمل فريال وفرحة ايمن كبيرة وانا فرحت ليه واجد وبعدها ازهار وزينب ولدو وسبحان الله في نفس اليوم عاشن خوات وتزوجن خوت وقعدن سلفات ويحملن في نفس الوقت ويجيبن في نفس اليوم ازهار جابت اوس وزينب جابت ليان وفرحنا بيهن واجد وزادا بدل مايخف تعبها زاد بعد ماكملت الثلاثة الشهور وتميت خايف عليها وجسمها تما ضعيف بكل وخفت من الفقد خفت نفقدها والحق قررت نغير دكتورتها نحس في روحي مش مقتنع بمعاينتها وديمة وهي تقول الامر عادي وتعبها عادي
زادا.. حمودي والله انت متوهم حتى الدكتورة هذي حتقول نفس الكلام
انا.. مش مهم تقول نفس الكلام معقولة تو مازالك اسبوع وتسكري الرابع وتعبك يزيد بدل مايقل وهي تقولي عادي وبعدين ياستي نبي نطمن عيب درت
زادا .. خلاص دير اللي يريحك
انا.. واول ماتخشي قوليلها راجلي بيخش معاي رفضت نشوفو غيرها
زادا.. احمد ماتخيلتكش موسوس هكي
انا.. شعور الفقد صعب وانا خايف نفقدك
زادا بوجع .. انت تقولي على الفقد انا اكثر وحدة جربته
انا.. ماتجوزش عليه غير الرحمة حبي
زادا.. الله يرحمه ويغفر له
تصدقو ماحسيتش بالغيرة بالعكس حسيت بالفخر بان الوفاء حتى بحبها ليا وحتى وهي تحمل نطفة مني جواها ماتحولش منها ووصلنا للدكتورة اللي حجزت عندها موعد وقالت ليها زادا اني بنخش معاها ورحبت بالعكس ما اعترضتش
الدكتورة .. اول مرة يجيني زوج مصر انه يتابع مع زوجته عادتا يكتفيو انهم يستنو برا
انا.. ممكن لانك دكتورة نسائية واكيد الكلام بيكون في الامور هذي فهم يتحنبو الخشوش عشان مايسببوش ليهم في احراج
الدكتورة بضحكة .. يعني انت ماتنحرجش 
انا.. بالعكس انتحشم وواجد اخرى لكن انا حاليا زوج خايف على زوجته ويبي يطمن عليها فاي حشم حنعزقه وراي المهم نطمن
الدكتورة .. ربي يحفظكم لبعض
انا.. امين
الممرضة .. المريضة جاهزة
وعدت الدكتورة شور السرير اللي راقدة عليه زادا بيش ادير ليها صورة تلفزيون بعد ماسئلتنا اسئلة واجدة وشافت ملفها من المصحة الاولى
الدكتورة .. تعال اقرب يا استاذ احمد
قربت منها وانا نشوف في الشاشة في حاجة تتحرك وعرفت انه جنيني اللي جوا زادا
الدكتورة .. تبو تسمعو صوت قلبهم
انا وزادا .. قلبهم
الدكتورة .. اه حامل بتوأم
انا بفرحة .. يعني حيكونو عندي اثنين مرة وحدة حنقعد زي سند الحمد والشكر ليك يارب
زادا بصوت واطي .. الحمد والشكر ليك يارب
جيت ومسكت ايد زادا والدكتورة فتحت الصوت وقعدنا نسمعو في ضجيج وصوت نبض خفيف متفاوت انا ضحكت نين عيوني دمعو وانتبهت لزادا تبكي
انا مسحت دموعها .. حبيبي من غير دموع
الدكتورة .. التعب اللي انتي فيه بسبب بس انك حامل بتوأم وجسمك ضعيف مايتحملش
انا.. في خطورة عليها يا دكتورة
الدكتورة .. لا مافيش خوف عليها غير انها تمنع من الحركة وبذل اي مجهود ويمنع التواصل بينكم لفترة ونكتب ليها مقويات والتغذية السليمة
انا.. تمام يا دكتورة ونبي نفتح الملف عندكم وان شاءالله حتولد هنا في المصحة
الدكتورة .. تمام تو الممرضة تفتح الملف وتعطيكم مواعيد المراجعة وهذا الكرت فيه رقمي الخاص لاي طوارئ
انا.. شكرا يا دكتورة وبارك الله فيك
ساعدت زادا على ترتيب دبشها وطلعنا بعد ما الممرضة جهزت الملف
زادا .. ارتحت تو
انا.. اه بيش تعرفي ان الدكتورة الاولى ماتنفع مش عارفة كيف خواتي يتباعن عندها اذا حامل بتوم كيف ماعرفتش
زادا .. مش عارفة لكن تعرف فرحانة واجد
انا.. وانا اكثر والله هي نتكو على حوشنا قبل نبلغ امي وعمتي
زادا.. اتصل بايمن قبل
انا.. به
واتصلت بايمن وفرحلي واجد طبعا بعد الكلمات اللي كنت نقول فيهن لسند رجع يقولي فيهن وخشينا لحوشنا ولقيتهم عندهم العلم بسرعة ايمن مابلغهم وطبعا التوصيات والنصائح وجاء سند ونرجس
سند بضحكة .. صار انا اللي عندي جيش امنا انت شنو بيكون عندك
انا .. وبكل فخر كتيبة
امي .. ياساتر
انا.. اه بيش ندعمو بعض مش الكتائب ديمة تدعم فالجيش
سند وجاء حضني .. مبارك ياخوي الف مبارك
انا .. الله يبارك فيك يارب
عمتي حليمة .. حتى سراج يبي مباركة جوري حامل
انا وزادا بفرحة .. الف مبارك
زادا.. والله فرحت لان جوري كانت خايفة
انا.. الحمدلله ربي طمن قلبهم
زادا.. عمتي زعمك مايأثرش حملنا على ولاء ورندا
امي .. لا يا بنتي لان ولاء  تحضر في ماستر ورندا مازالت صغيرة على هكي مسوؤلية وموقفات برادتهن فاكيد مش حيأثر عليهن
زادا.. الحمدلله
امي .. احمد كان الفترة هذي تقعدو هنا خير ليكم على الاقل انديرو بالنا من زادا لما انت تكون مش قاعد بالذات تو بعد فريال اللي تبي بروحها من يعانيها
انا.. والله ماني عارف يا امي
امي فهمت عليا اني لازم زادا تكون مرتاحة للفكرة .. احمد خوذ زادا ترتاح في دارك
وخذيت زادا لداري عشان نحكي معاها ونشوف رايها
انا.. شنو حبيبي شنو رايك باقتراح امي بالذات ان الاتصال ممنوع فمعاش في عذر ليك على خاطر هبالنا
زادا بحشم .. انا عادي احمد بس مانبيش نرقد بعيدة عليك حتى لو مافيش اتصال
انا.. هذي بس تو نلصق سرير ايمن لسريري وهكي يبدا سرير واسع يسدنا نحن الاثنين وبعدين من قالك اني نقدر نرقد بلا حضنك 
زادا.. تمام امنا نروحو لشقتنا ونجيبو دبشنا ونجو
وفعلا درنا زي ما اتفقنا وامي وعمتي حليمة اخر اهتمام بزادا غير البنات وحتى ايمن مباش يقعد في الشقة حتى هو جاء ودار زيي في داره في حوش اهله وحاليا قاعدين نمصو في الليم انا وهو لان نفس المنع اللي عندي عند ايمن ومشن الايام باهتمام وحب كبير عطاته امي لزاد واعترفت امي اخيرا ان زادا فعلا حبتني لكن زعمك يجي اليوم اللي نسمعها من فمها قديش خاطري نسمعها
ومشن الايام وجن  ايام وخش الشتاء بمطره وصقعه وزادا بطنها كبرت واجد والدكتورة قالت صعب بضعف جسمها هذا انها تجيب طبيعي فلازم عملية واحتمال ماتكملش للتاسع ممكن السابع ويطرو يولدوها وانا زاد الخوف بقلبي من الفقد وخوفي عليها وعلى صغاري طلعت امي وايمان وعائشة يوتو في دبش صغاري بالوان محايدة لاننا كنا رافضين نعرفو الجنس بتاعت البيبهات وايمان كملت الماستر واخيرا بدت تشارك فينا اكثر لان قبل واخذتها القراية واجد وحاليا حامل في شهرها الاول وفرحنا ليها واجد وراجلها بالذات كان فرحان اكثر واحد ومازال ممكن ثلاثة ايام وزادا تسكر السابع وتخش الثامن لكن زادا وصل بيها التعب حتى الحمام ماتخشاش بدون مساعدة تعبت واجد واطريت نرفعها للمصحة انا وامي وعمتي مريم ومعاي سراج لانها وقتها كان عندنا واتصلت بالدكتورة لان الوقت موخر كان والحق الدكتورة لقيناها قدامنا وبمجرد ماكشفت عليها قالت لازم نولدوها كنهدا في خطر عليها وعلى الاجنة وفعلا دخلوها حجرة العمليات وشوي كانت العيلة خالي وايمن وفريال رغم تعبها وسند واهل زادا وموسى وعمي محمد وعمتي راضية حتى عمها عطية جاء
وساعات مرن كانهن دهر وانا مش قادر نهدا رغم محاولات الجميع انهم يهدوني لكن نحس في نار والعة جوايي وجاء الفرج وطلعت الدكتورة وجيتها نجري
الدكتورة .. اطمن الحمدلله مرتك بخير وعيالك بخير غير بنحطوهم في الحضانة تو بيش نزيدو نطمنو عليهم
انا.. ومرتي امتى نقدر نشوفها
الدكتورة .. تفيق من البنج ونركبوها لجناحها بس
انا بعد فطنت .. دكتورة مرتي شنو جابت
الدكتورة .. ولد وبنت
انا.. شكرا يا دكتورة
وبعد مباركات العيلة ليا ولفت انتباهي عمي محمد وهو يبكي حسيت بيه وفهمت شعوره وجيته حضنته زين بدون اي كلام بينا وبعد بوقت كنا كلنا عند زادا في الجناح بتاعها وهي مازالت تاعبة
زادا بصوت واطي.. حبيبي عيالي وين
انا بصدمة .. شنو شنو قلتي
زادا فهمت شنو نقصد.. انت مش حبيبي والله في حد ثاني هنا
انا بصوت واطي مانبيهمش يسمعوني.. جد انا حبيبك
زادا.. انت حبيبي وروحي وقلبي واب عيالي 
انا وبست جبينها.. ربي يحفظك لي يا احلى ماما في الدنيا
وشوي خشت الممرضة وهي تجر في سريرين جيت شورهم وخذيت الولد وحطيته في ايدين عمي محمد
انا.. ماتبيش تكبر في وذن احفادك
عمي محمد بدموع .. احفادي
انا.. اه علاء و ولاء
عمي محمد رفع راسه فيا ودمعة نزلت على خذه مسحتها بايدي
انا.. شنو يا جدو ماتبيش تكبر في ودني
اذن عمي محمد في وذن علاء وعطيت نظرة لخالي بحيث انه مايزعلش مني لان المفروض كان خالي الاولى انه ياذن في ودنهم وخالي ردلي النظرة بنظرة حب وتفهم ربي يحفظه لنا وجبت ولاء بعد ماخذت عمتي راضية علاء منه واذن في وذنها وبعد مابرمو على العيلة كلهم اخير حطيتهم في حضن امهم بس مازالت شايلهم في ايديا عشان جرح العملية
زادا بحب .. متأكد حبيبي من الاسم
انا ونبوس في عيالي .. كل التأكيد حبي النظرة اللي شفتها في عيون عمي محمد تخليني متأكد اني عمري مانندم على اني سميته علاء ان شاءالله انتي بس ماتضايقيش اني سميت بدون مانرجع ليك
زادا.. حبيبي هذوم عيالك زي ماهما عيالي
انا.. ربي يحفظك يارب ويحفظهم لنا
وبعد ثلاثة ايام في المصحة طلعت زادا على حوش امي لان كلهم قالو احسن ليها بيش يديرو بالها عليها وانا مانسيبش فيها بكل وقررنا ان انديرو اسبوع وعقيقة وطهار علاء مع بعض يوم الاسبوع وفعلا التجهيزات بدن ولان حمل الجماعة ريشة كل وحدة خذت حاجة وجهزنا ودرنا عزومة كبيرة واكثر حاجة كانت ان عمي الصغير جاء وجت معاه عمتي الكبيرة غالية اكبر وحدة في عمامي وعماتي وفرحة عمتي مريم فوق مايتخيل بني ادام لانها كانت تعد فيها تقول امها وبعدها مشيت للمصحة على خاطر الطهار انا وايمن وعمي محمد وعمي علي وخالي عمر وانا خايف
خالي .. ماتخافش يا احمد ساهلة راه
انا.. مانقدرش انخش معاه
خالي .. تو نخش نا معاه اكيد
وفعلا خذاه خالي مني لما جاء دوره وسمعت عياطه ياروحي وبعدها جابه ليا خالي خذيته لحضني بالقوة وبسته وطلعنا ووصلنا للحوش وعطيته لزاد عشان ترضعه بيش يسكت شوي من الوجع كنت خايف انه صغير لكن كلهم قالولي ان بوله يخليه يصح بسرعة وسبحان الله توالت الايام وكل حاجة ماشية على احسن وعيالي طلعو زيي هاديين لما كانو صغار مايتعبوش فينا الا اذا جواعة والله عاملينها تحتهم  وربعنت  زادا وروحنا لشقتنا
انا.. اه قديش اشتقت لحوشي
زادا.. وانا احرف منك
انا .. هي طالما الحلوين راقدين انديرو حمام سمح نفرغو فيه طاقات مكبوتة من وقت طويل
زادا بضحكة .. يا استغلالي
انا ورافعها لحضني وماشي شور الحمام .. اه واكبر استغلالي اخرى
ومر الوقت بين صقع الجو و دفا حضن  زادا وعيالي وعرفنا ان فريال حامل ببنت
ايمن .. تصدق ان فريال مواعدة روحها انها تجيب بنت تسميها هانزادا
انا.. والله
ايمن .. اه
انا.. وانت شنو رايك
ايمن .. هي اللي حملت وتعبت ومازالت بتتعب في ولادتها وربايتها وانجي انا نشرط ونقول ماتسميش اكيد مستحيل
انا.. والله عندك حق مهما نساعدو في رباية عيالنا لكن مانجوش كيف امهاتهم ابدا
ايمن .. غير فكني من ولدك بس بعدين يبدا يتمسلق ليها
انا بجدية .. تعرف يا ايمن من لما فريال عرفت انها حامل ببنت خفت وبالذات تو وانت تحكيلي انها بتسميها هانزادا
ايمن باستغراب.. ليش
انا.. خايف فرضية علاء على هانزادا زي زادا الكبيرة وولد عمها بالذات بسبب علاقتي انا وياك وعلاقة فريال وزادا
شكلي وانا نحكي انتبهت زادا ليا وبدون مانندري صوتي علي
زادا.. عندك حق يا احمد انا صح حبيت علاء لكن تقدر تقول انجبرت على حبه لان مانعطتش ليا فرصة الخيار زي ماصارلي معاك انا حبيتك بقوة اكبر من علاء لاني ديمة معاك نحس في روحي انا اللي اخترت لكن علاء كان قدامي طول الوقت وكان الكلام من العيلة ان زادا لعلاء وعلاء لزادا وكبرت بيه ومافكرتش حتى نجرب اني ممكن نملك الفرصة في الاختيار فاكيد مش حنرضى لبنت ايمن يكون مصيرها زيي
ايمن باندهاش من كلام زادا لان كلامها جاء زي تحليلي نا زمان لحب زادا وعلاء ومعاها بتصريح زادا الواضح لحبها ليا انا  قدامه .. زادا انتي حبيتي احمد
زادا بضحكة .. ههههه صح النوم هذا وين تسئل انا ذايبة فيه مش نحبه بس
وطلعت زادا من حذانا
ايمن .. متأكد هذي زادا الهادية طلعها وين بدلتها امشي ردها
انا بضحكة .. هي زادا نفسها غير جنونها كان ليا بس لكن شكلها قررت تطلع برا الصندوق
ايمن بحب .. ربي يحفظكم لبعض
انا.. آمين يارب
ايمن بجدية  .. به شنو الحل يا احمد عشان مايتكررش علاء وزادا لمرة ثانية
بالذات مع الاسماء والربط لازم بيكون
انا.. انه نمنعو اي كلام بان علاء لزاد وزاد لعلاء من اي حد انكان ونوقضو العيلة كلها ونخلوهم براحتهم كبرو وحبو بعض كان بها كبرو وكل واحد اختار برضو كان بها
ايمن .. مع اني نتمنى فعلا من قلبي ان ولدك يحب بنتي والعكس
انا.. والله حتى انا لكن ماتعلمش على الوقت وقتها شنو يصير
ومشن الايام وبعد خمس شهور من عمر عيالي جابت فريال بنوتة حلوة زي امها وللاسف السجل المدني ماباش يسمي اسم هانزادا فسمها ايمن زهرة بالاسم الثاني لزادا وكبرو صغارنا وكبرنا
بعد اربع سنوات
علاء كان حنون زيي وديمة داير باله من اخته وزهرة يتعامل معاهن كانه الكبير وهنا كانن مطيعات لاي حاجة يديرها والعيلة طبعا خذت برغبتنا ومنعت اي تلميح بان علاء متعلق بزهرة رغم انه واضح لنا كلنا لكن لما يكبرو الله اعلم شنو رايد ليهم
زادا.. مش كان تفرجنا عليها في حوش خالي عمر خير
ايمن .. صح هو خير بس نبو المباراة الافتتاحية لي #كأس_العالم المرة هذي يكون ليه ذكرى خاصة بينا نحن
فريال.. ذكرى خاصة بالكورة
انا.. من اربع سنين فاتو كنت ندعي لربي ان #كأس_العالم  الجاي يكون يذكرني باحلى ذكريات مش اسوءها بالذات بعد اللي صار في المباراة النهائية
زادا وجت ضمتني .. واهو تو نتفرجو على #كأس_العالم ونحن معانا احلى الذكريات ياحبيب قلبي وعمري
وبدت المباراة وبدى الحماس
#تمت
رغم علمنا بان الموت علينا حق لكن الم الفراق هو ما لانستطيع احتماله  رحم الله اموات احببانهم بكل جوراحنا واصبحو ذكرى حلوة موجودة بذكرياتنا و لكل انسان منا الحق بتجربة جديدة مهما كانت التجربة السابقة حلوة او مرة فالحياة لاتقف على انسان الحياة تستمر ونحن نستمر معاها سوى ان احببنا او كرهنا جعل الله ايامكم وذكرياتكم كلها سعادة
#حياة