كأس العالم

الفصل الاول

#كأس_العالم
الفصل الاول
ايمن .. شفت حساب الفيس هذا
انا.. حساب بنت  شنو دخلني بيه بيش نشوفه
ايمن .. صح بنت لكن منشوراتها مش عادية وتخليك لازم تخش صفحتها كل يوم
انا.. عليش وكيف تشوف فيهن انت من اصدقائها
ايمن .. لا مش من اصدقائها لكن منشوراتها ادير فيهن بخاصية العامة
انا.. غريبة بنت وادير في منشوراتها عامة
ايمن .. ماهو عدد المتابعين اللي عندها كبير فوق الالفين
انا.. وعليش هذا كله
ايمن .. عشان منشوراتها تي فيش نغنيلك من بدري
انا.. به شنو الملفت في منشوراتها
ايمن .. كل حاجة منشوراتها العادية الحكم المعلومات العامة الفن الرياضة حتى المواقف اللي تصير معاها عشان تكتب فيهن بالعامي وبطريقتها الحلوة تخليك تنشد ليها 
انا باستفهام.. رياضة
ايمن .. اه وعلى فكرة برشولنية راه وبرازيلية عالميا زيك يعني
انا.. والله
ايمن .. شوف المنشور هذا على مباراة الافتتاحية بين السعودية وروسيا شنو كاتبة
انا بفضول .. ترا اقرا وسمعني
ايمن .. اسمع ياسيدي
(قديش نكره الانسان اللي يتباهى ويهزا على غيره بدون مايفكر في امكانياته وامكانيات الشخص اللي قدامه والسعودية هكي كانت هازية واجد على روسيا ونست ان روسيا بلد المضيف وبتحاول بجهد كبير انها ماتطلعش من الاول غير انها تلعب على ارضها فمن الغباء جدا استهزاء السعودية بروسيا وجت النتيجة على راسها بخمس اهداف مقابل شئ ولعب معاها يدره ستين الف كبد ما يايلقيش بفريق متأهل لي  #كأس_العالم  )
انا.. كلام جميل وتقريبا زي كلامي بالذات لما طلع تقسيم المجموعات وكيف كانو هازيين على مجموعتهم وانها مش قوية ومافيهاش فريق ينخاف منه الا الارجواي
ايمن .. صح وهذا ليش قلت ليك عليها على خاطر نحس فيها نفس تفكيرك واجد غير دير طلة على مناشيرها
انا.. به شنو مسمية روحها
ايمن .. مش مسمية روحها شئ كاتبة اسمها وبالعربي اخرى
انا.. نعم
ايمن .. اي والله ومرة وحدة سئلتها ان هذا اسمك الحقيقي واذا اسمك  مش  خايفة من شئ وانتي كاتبة اسمك الحقيقي في واحد من التعليقات ردت عليها وكتبت ( انا ماندير في شئ عيب وكل منشور انزل فيه اهلي يكون راضيين عليه لان العيلة كلها اصدقائي على الفيس)
انا.. بس ما اكدتش ليها انه اسمها الحقيقي
ايمن .. بس مانفتش
انا.. ممكن شنو صورتها وباستهزاء قلت والله حاطة صورتها الشخصية الحقيقية
ايمن .. لا مش لهدرجة حاطة صورة وردة بيضاء
انا بضحكة خفيفة.. بالك شينة
ايمن .. بالك
انا.. استنى نفتح الفيس واعطيني اسمها
ايمن .. اسمها زهرة موسى وبين قوسين (زهرة القلب الجميل )
انا.. زهرة حلو الاسم بس شنو دخل اللي بين القوسين
ايمن .. مش عارف وكذا واحد يسئل فيها عليه تقول عبارة تحبها وبس
انا.. غريب تحب عبارة كيف هذي ترا الصورة اللي حاطتها
ايمن .. هذي صورتها شفتها
انا.. اه لقيتها ودرت ليها متابعة
ايمن .. اقرا منشوراتها وقولي رايك
انا.. تو نكسد عليهن في فراشي لاني تو بنعدي اكيد عمتك منشغلة علي تاخرت عليها هي سلام
ايمن .. ياراجل الساعة عشرة ونص
انا .. هذاك هو عارف امي تحب ترقد بدري واذا واحد فينا مش في الحوش مستحيل ترقد والله غابي عليك طبعها تي انت حوشكم خطوتين منا وكان عطلت للساعة 11 في الليل تقولك بات هنا 
ايمن .. ربي يحفظها لكم يارب امنا هي توكل الحوش خطوتين من هنا 
انا بضحكة .. امين يارب هي سلام
روحت للحوش ومابين ماوصلت هالخطوتين لان نحن جيران  واقارب نعرفكم بيا انا احمد سالم عمري 37 باتي متوفي الله يرحمه من ونحن صغار توفى وخلانا ستة صغار اربع بنات وعيلين انا وخوي الصغار قبلنا الثلاث بنات وبيني وبين خوي بنت وربتنا امي احسن رباية وزوجت خواتي كلهن ولله الحمد احسن نسابة محصلين وامي قبل ماتتقاعد كانت مديرة مدرسة بنات ثانوي وكلنا بشهايدنا وانا خريج جامعة قسم تاريخ ومدرس في مدرسة ثانوي بنين وقاعد عازب رغم ان خوي الاصغر مني خاطب وفرحه قريب واصغر مني بسنة ونحن كلنا اصلا على روس بعض وشكلي ومعلومات اخرى تعرفوها لقدام 
انا .. السلام عليكم
امي (حليمة) .. وعليكم السلام
انا.. كان تبطلي هالعادة يا امي
امي .. نبدا طريحة فراش ومانقدر نغمض عين وواحد فيكم برا من حوش
انا.. ربي يعطيك الصحة يارب
امي .. نحطلك عشاء
انا.. لا تعشيت عند ايمن
امي .. كيف حاله هالمعفن مايقولش نشوف عمتي بكل ليه من امس ماشفته
انا.. بكرة جاي وتفاهمي معاه طلعوني من بينكم لاني نطلع انا الخاسر في الاخير
امي.. ربي يحفظكم لبعض اللي يشوفكم يقول خوك مش ولد عمتك
انا.. وانا عمري ماحسبته الا خوي واكثر وراجل عمتي كانه باتي الله يرحمه
امي .. الله يرحمه فعلا راجل عمتك صبا معاي هو وعمتك واجد عكس باقي هلها بالذات لما رفضت اني نتزوج عمك
انا.. ربي يهديهم زي هلك زي هلنا يا امي ما صبا معانا واحد منهم كل واحد فيهم كان يبيك شوره طامع في هالمحلين اللي ماجرهن باتي ويعاونن فينا على هالدنيا
امي .. امين وماتنساش عمتك وراجلها جامعين قرابة العيلتين
انابضحكة .. ديمة ننسى ان خالي عمر يقعد ولد عمك فعلا يا امي عمتي طلعت خيرت هلنا وخالي عمر طلع خيرت هلك ولانهم الاثنين الخيرة ربي جمعهم مع بعض وربي ديمة فاتحها في وجه
امي .. الطيبون للطيبات يا حبيبي
انا.. ونعم بالله هي يا امي خشي ارتاحي بكرة وراك مشوار مهم
امي .. اي والله وانت امتى تفرح قلبي يا ولدي زي اسامة
انا.. يسهل الله يا امي
امي .. معقولة مافيش بنت لفتت انتباهك
انا.. لتو يا امي وعلى حطت ايدك اللي يعجبني شكلها يطلع طبعها الله لا يروعك والله شكلها مقبول واخلاقها كويسة تطلع العيلة حدث ولاحرج وتقول سبحان الله كيف هذي بنتهم
امي .. عاد انت تبيها حمرا وجراية وماتاكلش في الشعير
انا.. والله ما الحكاية هكي بكل يا امي لكن حتى الهل لهم دور اهو انتي باتي اختارك وماعدلش على عيلتك وخوالي الله يسامحهم ويهديهم برغم فلوسهم ورزقهم طمعو في الارض اللي عليها المحلين وعادوك على خاطر مابيتيش تبيعيهن وقاطعونا ولا كانهم موجودين ماتزعليش مني يا امي  خوالي اغتنو بعد فقر وهذا اللي خلى نفوسهم تتغر وتنسى صلة الرحم و رباط الدم وولد عمك لانه من يومه ولد عز حتى لما برمت بيه الدنيا وانتكس حاله ماتغيرش ولما رجع اغنى واحسن من الاول ما اغترش ولا تبطر وبالعكس كان زمان مصبي مع باتي الله يرحمه خطوة بخطوة وحتى لما تازمت حالته المادية مافكر بكل في محلاتنا ولاقطعة الوطى بالرغم انا متاكد وواثق لو صبا عليك كنتي مستحيل تخذليه ولان نيته طيبة ربي عوضه على خسارته باحسن منها وخيره زاد وماقصرش معانا بكل حتى في زيجات خواتي مصبي معانا تقول هو باتنا بالذات بعد ماقطعونا عمامنا الله يسامحهم حتى هما انا نبي بنت كويسة وهلها كويسين حتى لو ساكنين في براكة نبي خوال لعيالي يوم يبرم بيا الزمان نلقاهم مصبين ليهم والله ربي يرفع امانته مانبقاش خايف عليهم لاني مطمن ان عند مرتي هل مستحيل يرخو بصغاري او بيها فهمتي عليا يا امي
امي بحزن .. فاهمة عليك والله يا ولدي فاهمة
انا جيت بست راسها .. ماتزعلي مني يا امي لكن مهما حاولنا ندسو هذوم هما هلنا عيبهم واضح وضوح الشمس
امي .. تصبح على خير يا ولدي
انا.. وانتي من اهل الخير
وخشيت داري غيرت دبشي وقريت شوي قرآن وتمددت على سريري وانا نفكر في خوي اللي بكرة فرحته كبيرة لان بنقرو الفاتحة ومن صبح ربي خواتي كلهم حيكونو هنا لان امي ماتحبش خواتي يباتو برا حياشهم الا لسبب قوي او راجلها يكون بايت معاها وخطر عليا حساب زهرة وبديت نصفح فيه
ولفت انتباهي منشور فهمت منها انها ماتحبش ميسي فا استغربت كيف برشلونية امنا وكتبت تحت المنشور رد ( غريبة ذاكرة انك برشلونية لكن ماتحبيش ميسي ) وكملت باقي المناشير وانا نقرا ومستمتع بجديات وفعلا زي ماقال ايمن ان منشوراتها كلهن حلوات واللي لفت انتباهي تحس البنت هذي كوكتيل من كل شئ تحب البلاي ستيشن وتحب الكورة وفي نفس الوقت تحب تصميم الازياء  وتنسيق الورود وتقريبا ان تخصص قرايتها لانها خريجة جامعة مصرية زي ما ذاكرة في بيانتها وخشيت على بيانتها بيش نشوفهن بالتفصيل والغريب ان كل البيانات دايرتهن بخاصية العامة وعرفت ان عندها ثلاثة خوت اولاد وبنتين هي وحدة منهن وحتى باتها وامها مضافين عندها وشفت تقريبا ان عندها ستة شباب بس مضافين عندها اصدقاء غير خوها وباتها وواحد منهم فهمت انه عمها لكن الاخرين ماعرفتش  ومع اني شبهت على اسم منهم لكن ما اذكرتش من وين نعرفه وبعدها رجعت للمنشورات وكل مانلقى منشور حلو واجد نلقى روحي لا شعوريا نعلق عليه نين خذاني النوم ورقدت ووعيت على آذان الفجر زي كل يوم وعيت اسامة وامي وصلينا وجيت بنرقد قلت خليني نشوفها بالك رادة عليا لكن مالقيتش رد فخشيت صفحتها لقيتها منزلة منشور جديد ليه ساعة تقريبا وعجبني المنشور واجد وتحليل منطقي وقلت في خاطري هذي لو تشتغل محلل رياضي تنجح بجدارة وتبدا مطلوبة في كل القنوات مش بعيد حتى قنوات البين سبورت يطلبوها ورجعت رقدت ومانضنتش الا على عياط ايمن هو وامي
انا .. لا اله الا الله كنكم على صبح الله
ايمن .. انت شن دخلك بيني وبين عمتي
انا.. لما صوت عياطك ينوضني اكيد دخلني
امي .. صباح الخير حمودي
انا.. صباح الورد امي شنو دارلك هالمعفن
امي .. هذا حبيب عمته بس قرصتله وذنه عشان معاش يعاود يغيب هكي
انا.. عليك هبال هذا بس قرصة وذن
ايمن يمسح في وذنه يخفف في الوجع.. جربها بس وبعدين تفولح عليا
انا بخوف مصطنع .. لا ان شاءالله مانجربها
ايمن .. لتو راقد كان مش ورانا فاتحة نقول
انا بضحكة .. على اساس بترفع الصناديق والله بتجهز الحلويات ماهو كله خواتي وخواتك من اسبوع يجهزو فيه
ايمن .. والسيارات يا فالح
انا.. هالحاجة الكبيرة
امي .. هي تعالو افطرو وكملو حكيكم على الفطور
انا.. غريبة الجيش مجاش مزال
امي .. خزيه يا معفن هن الخيرة والله
انا.. خيرة ما قلنا شئ والله لكن هنا سبعة ماشاءالله وكل وحدة بعيل واثنين وتقوليلي مش جيش غير طبعا جيش سند هذا بروحه كوم
سند.. وكنه جيش سند
انا بضحكة .. تي يا راجل ماتعرف تجيب غير بالزوج وتقولي مش جيش
امي .. قل اعوذ برب الفلق صلي على نبيك يامعفن
انا وايمن وامي .. اللهم سلم وصل عليه
سند بضحكة .. والله مش ذنبي ان جيناتي قوية وبعدين جيشي اللي مش عاجبك امنا منو اللي يتصل بيا كل يومين ويقولي جيبهم
انا بحب .. نجك لي يارب هذوم عقلي
اسيمة .. راحت علي وعلى عيالي
امال .. امغير انتي راحت علينا كلنا
انا .. انتن وعيالكن الخير والبركة بس توآم سند حاجة بروحها
ايمان.. ماهو لو كان حوشنا قريب من حوشكم راه نصيب عيالنا زي عيال سند
امي .. ربي يحفظكم كلكم يارب وسلمو وانتم خشيتو كلكم بدون سلام 
طبعا خلوني نقوللكم خواتي من وبنات وعيال عمتي من او بمعنى اصح نعرفكم على الجيش بالتفصيل
اسيمة اكبرنا كلنا وعندها عيلين ولد وبنت وحامل وايمان الثانية وعندها ولد واحد بس وموقفة عشان تكمل قرايتها تحضر في ماستر وبعدها امال عندها بنتين و ولد وبعدها ازهار وهذي مازالت حامل لان ماليهاش ستة شهور متزوجة وعندي اخ واحد بس اسامة وطبعا ازهار هي اللي بيني وبين اسامة وكلنا بحرف الالف عشان باتي الله يرحمه سمانا هكي لانه قال اول حرف في حروف الابجدية وعيال عمتي ثلاث بنات واربع عيال فاطمة عندها عيل بس ومعاش حصلت بعده وقاعدة تجري يا روحي ربي يرزقها وعائشة عندها عيلين وبنت وزينب حامل لانها تزوجت مع ازهار وفي نفس الوقت سلفات والحمدلله من كثر مايحبن بعضهن حتى الزواج والسكن حذا بعض لانهم تزوجو خوت والعيال سند هو بكري عمتي وعنده اربع عيال بنتين توم وعيلين توم وسراج تومي سند ومش متزوج  او بمعنى اصح داير اضراب على الزواج والله اعلم سببه شنو لانه انطوائي واجد مع الناس بس  لكن معانا نحن بني ادام ثاني سبحان الله وبالذات مع اطفال العيلة لدرجة البنات كلهن يحبنا عشان ديمة يشد فيهم لما تكون في مناسبة يطرن يمشن كلهن ليها وحتى مرت سند ماتتحمل فيه حاجة  و ايمن  هذا من عمري  وبعده اخر العنقود رواد دلوع العيلة كلها تقدرو اتقولو نحن وحوش عمتي وعشان خالي عمر ولد عم امي اننا حوش واحد وحتى جيران وسند يسكن حتى هو قريب منا عكس البنات  وفطرنا مع الضحك والجو الحلو وبدن التجهيزات طبعا انا وايمن وامي وعمتي مريم واسامة وسراج منقلبين روضة لان لهذا عدت للكوافيرة وقعدنا نحن شادين العيال لكن جوهم يهبل
انا .. شفت اخر منشور نزلاته زهرة
يا راجل هذي لو تشتغل محلله رياضية خير ليها وتركز واجد على المعلقين
ايمن .. لا ماشفتاش شنو كاتبة
انا.. استنى نقراه لك
( مباراة السعودية والارجواي خسرت السعودية بهدف مقابل صفر والارجواي فريق يلعب فيه سواريز وكلنا نعرفو من هو وكيف يلعب غير فريق الارجواي فريق قوي لكن على الاقل قدمت مباراة حلوة وحسينا بفريق السعودية يلعب وفعلا صدق المعلق لما قال مافيش خسارة بشرف الخسارة خسارة لكن انا نخالفه في شئ انه يقولو خسرو لكن لعبو كويس او حلو خير مايقولو خسرو لكن حتى لعب مالعبو)
ايمن .. كلام جميل فعلا ومع اني كنت ضد المعلق لما قال الكلام هذا لان خطرت عليا مباراة الجزائر ضد المانيا في كأس العالم اللي فات لما خسرت الجزائر كلنا قلنا خسرت بشرف لكن تحليلها هي اقنعني بس مش ملاحظ حاجة ماتدويش على مباريات مصر
انا.. لا منزلة عليهن مناشير بس مش واجد واحد كاتبة على اول مباراة ان نقص محمد صلاح في المعلب بان غيابه وتاثيره وفي المباراة الثانية كاتبة وتسب في المدرب بتاع مصر لان بسبب طريقة تنظيمه للفريق خسرت مصر وان خسارة مصر يتحملها المدرب اكثر واحد وان لولا اخطاء الدفاع ماقدرتش روسيا تحقق اهداف برغم ان مصر لعبت شوط اول  حلو لكن الثاني كانت السيطرة لروسيا
ايمن .. شكلك قضيت الليل كله وانت تصفح في حسابها
انا ..........
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية