كأس العالم

الفصل الثاني عشر

#كأس_العالم
الفصل الثاني عشر
ايمن بصدمة ..شنووووو
انا.. اهدى بس
وحكيت لايمن اخر الرسائل بيني وبينها
ايمن .. بس ليش معاش ردت عليك
انا.. ممكن اربكها كلامي او ممكن شكت فيا او زي العادة لما ماتلاقش شنو ترد عليا معاش ترد وثاني يوم نرجعو من جديد كإن حديث امس ماصارش فنعرف انها ماتبيش ترد
ايمن .. اه بس شنو اللي خلاك تقرر هكي
انا.. مش عارف انحس في روحي اني بديت نحرك فيها شئ
ايمن .. شنو الخطة تو
انا.. يوم مباراة كأس العالم بنبعث امي وامك لحوشهم يخطبوها ليا وفي نفس الوقت نبلغ موسى ونطلب منه لو يجبرها عليا جبر انها توافق
ايمن .. ليش
انا.. لاني متأكد معاي حتعيش وحنقدر نغير حياتها ونرجعها للحياة من جديد
ايمن .. من وين جايب الثقة
انا.. اذا هي ماتعرفش نا من وديمة نكون سبب ضحكتها وراحتها فتخيل لما تبدا الامور شخصيا
ايمن .. بس شنو اللي خلاك تتسرع في انك تخبرها وتخطبها
انا بوجع ونخبط في جيهة قلبي .. قلبي يا ايمن قلبي معاش قادر نخليها تقعد بعيدة عليا شكلي حبيتها مش بس حبيت اخلاصها لراجلها حتى بعد موته حبيتها بنظرة الحزن حبيتها حتى بضحكتها البسيطة اللي ماتوصلش لعيونها
ايمن .. مش قلت ليك تخوف وانت تحب
انا.. مش بايدي يا ايمن والله
ايمن .. به ليش بتخلي موسى يجبرها انها توافق
انا.. عشان وهي معاي ولما تكون على ذمتي حاجات واجد نقدر انديرهن تخليني نملك قلبها عكس تو وهي بعيدة عليا
ايمن .. ان شاءالله زي ماتتمنى غير بس ماتنقلبش معاك بالعكس والاجبار بدل ما يكون في صالحك يجي ضدك
انا.. ان شاءالله
ايمن.. بس بتقوللها انك بتخطبها
انا.. لا لان مباراة #كأس_العالم النهائية بتكون يوم 15/7 وبتكون العشية في المدرسة معاي وبنحاول نعطلها انها تتفرج على المباراة معانا لانها بتكون العشية هي وفريال بيحيث امي وامك وخواتنا يمشو وهي في المدرسة وبعدها كل شئ يبقى ساهل
ايمن .. يستر الله وربي ينولك مافي قلبك
وبعدين ايمن ضحك ضحكة كبيرة
انا.. اسماله الكريم كنك تضحك بروحك
ايمن بضحكة .. تخيل انت اللي كنت بتخطب بعدي واشبح اخرى لامتى بيتأجل فرحي عشان بيش تقدر على زادا وتو اهو انت بتخطب قبلي ويا خوفي فرحنا ما يكون مع الشباب
انا بضحكة .. لا مش لهدرجة مع اني نتمنى زادا تكون في حضني اليوم قبل بكرة لكن لا مش لدرجة انطلعو الفرح مع الشباب لكن مايمنعش ان حتى نحن نبدو نبرمو على شققنا
ايمن بضحكة .. تعرف نحن المنطقة هذي قريب تبدا زي العزبة من كثر مانحن شققنا احذا بعض
انا.. والله عندك حق خطر عليا الصعيد المصري والغرب لما يبدو ضنا العم والخوت حياشانهم في تركينة وحدة
ايمن .. ولا اخرى في عمارة  وحدة نحن الشباب والبنات حيشانهن في نفس المنطقة مش بعاد على العمارة حتى على رجليهن يقدرن يجن
انا.. والاغرب من هكي سند هو اللي شرا اول شقة فيها وباعها لي اسامة وشرا الحوش اللي لاصق فينا وقعدت العمارة لينا كل ما ساكن يبيع شقته يشريها خالي لواحد منا
ايمن .. احلى حاجة انا وياك مقابلين بعض
انا.. هذي اهم حاجة
ايمن .. اسكت يسمعنا اسامة يقطعنا
انا.. مقلتش ليه يفتح فمه نين الشقة اللي حذاه تنباع ومايقولش عليها كنهدا راه رواد بدل مايكون فوقه راه مقابله
ايمن .. ومعاها من بخت رواد شقته عطيبة بكل جاته
انا.. اي والله  لكن ماكسبها فينا الا سراج
ايمن بضحكة .. ابن المحظوظة  باضت ليه في القفص الدور الاول ومصينة جديد
انابضحكة .. حرام عليك تنق عليه ومعاها تو يبرم عليها بس ويجدد في الزواق على الموديل الجديد تي حتى زليج مش مزلجة كلها سيراميك
ايمن .. تي من اللي يبطل نق انا والله انت
امي .. انتم الاثنين يا معفنين
انا وايمن بفجعة .. اه
امي .. كنكم انفجعتو
انا بتوتر .. امي من امتى هنا
امي باستغراب .. من لما قلت مش مزلجة
على الشقة
انا براحة .. اه
امي بمكر .. شنو اللي كنتو تقولو فيه وخفتو اني نسمعه اكيد شور ايمن
ايمن .. عليش انا
امي بضحكة .. عدي شوف وجك في المراية تو تعرف
ايمن .. يتهيالك وبحتت في احمد بمعنى يطلعني من الموضوع
انا.. امي
امي .. نعم
انا.. بكرة انتي وعمتي مريم وخالي عمر نبيكم في موضوع
امي.. ان شاءالله خير
انا.. خير وخير الخير اخرى
امي .. خلاص بكرة بعد ماتروح من المدرسة بعد المغرب تلقاني عندهم
انا.. تمام يا امي
امي .. هي تصبحو على خير اه ايمن شريتلك فرشة جديدة تلقاها في درجك اللي حذا سريرك
ايمن .. عليش كنها فرشتي الاولى مازالت ماطقت ثلاثة شهور بيش تعزقيها 
امي بضحكة .. لقيت سيف ولد سند واخذها ويلعب بيها في الجنان
ايمن .. قليل البخت تاريتني حتى من الفرش العرم اللي في الكباية مالقاش الا فرشتي
انا بضحكة .. به اللي لعب بيها في التراب ما لعب بيها في مكان اخرى
ايمن .. زي لعب بيها في التراب او المكان اللي تقصده في كلتا الحالتين مش حنستخدمها يا فالح فمفرقتش يعني
امي .. شنو قصدك يا احمد
انا.. المرحاض حشاك يا امي
امي بضحكة .. كلا انتم وكيف فهم عليك الثاني
انا.. اسمنا رفاقة ليش كنهدا
امي .. ربي يخليكم لبعض هي تصبحو على خير
انا وايمن .. وانتي بالف خير يارب
وطلعت امي وكل واحد فينا اتكا على سريره وهو في عقله شئ شاغل باله
ومشى ثاني يوم وطبعا( روسيا خسرت قدام كرواتيا والسويد خسرت قدام انجلترا ) وجاء الاحد ومشيت للمدرسة وقعدن المراسلات بيني وبين زادا وحسيت انها بدت جافة معاي شوي في البداية لكن قدرت نرجعها زي ما كانت معاي غير الهدرزة اللي في المدرسة ونحن مع بعض وكلمت موسى باتصال وخليته يجيني وحكيت معاه وقلت ليه شنو نبي اندير وشجعني على خطوتي هذي وقالي انه حيحكي  لعمه محمد واطمنت واجد وطبعا روحت انا وايمن واجتمعت بامي وعمتي وخالي 
خالي عمر .. خير يا احمد ان شاءالله خير
انا.. نبيكم تخطبولي
عمتي مريم  بفرحة .. اخيرا من هي اللي قدرت اخيرا تحرك قلبك
امي بفرحة كبيرة .. والله يا احمد اخير بتفرح قلبي زي ايمن
انا.. اه
خالي بهدوء .. مبارك يا احمد بس بنت من ونحن نعرفو هلها او لا
ايمن .. اه تعرفوها
انا.. الله يبارك فيك يا خالي اه تعرفوها كويس اخرى بس نبيكم توسعو بالكم معاي
عمتي وامي .. من
انا.. هانزادا بن موسى
امي وعمتي .. اه
خالي عمر .. بس عارف وضعها يا احمد انت
انا.. اه عارف يا خالي كل حاجة ونبيها برغم كل شئ
عمتي مريم بشك .. وزعمك توافق
انا.. بمساعدة موسى خوها حتوافق
امي .. بس ليش يا احمد مالقيتش غير هيا
انا بتنهيدة .. حبيتها يا امي وماتسئلينيش امتى وكيف
خالي عمر.. به شنو ضمنك انها بتوافق
انا.. موسى خوها مش حترفض ليه كلمة وهو حيجبرها انها توافق عليا
عمتي مريم .. وترضى على روحك تتزوجها غصب
ايمن .. لا يا امي احمد عمره ماكان هكي لكن هو حاس بشئ عند زادا خلاه يطمن انها حتسلم ليه وبحبه ليها حيخليها ترجع زي الاول غير تمسكها بعلاء يخليها ترفض بدون ماتعطي فرصة 
خالي عمر .. وليش يا احمد مايطلع ان حبك ليها وهم
انا.. كيف يا خالي
خالي عمر .. مرات من كثر ما انت تبي تسعدها وتحول نظرة الحزن في عيونها وانك ترجعها تعيش خلاك واهم انك حبيتها
ايمن .. لا غالط يا باتي
خالي عمر .. نبي نسمع من احمد اسكت يا ايمن
انا.. تعرف يا خالي انا حتى قبل مانعرف من شنو اللي تعاني منه من اول ماخشت سجلت عندنا وهي لفتت انتباهي وتمت زي اللغز ليا ومن كثر مافكرت فيها وشغلت عقلي لقيت حتى قلبي دقاته تتغير وهي قريبة مني او نشوفها حتى من بعيد وبعد ماعرفت قصتها وحكايتها زدت تعلقت بيها وحبيتها من جد الحاجة الوحيدة اللي متأكد منها ان حبي ليها مش وهم
خالي عمر .. امتى تبيهن يمشن يخطبن
انا.. يوم مباراة كأس العالم
امي .. عليش
انا.. لرغبة ما في نفس يعقوب
عمتي مريم .. يا خوفي
ايمن .. كوني هانية يا امي
انا.. بس يا امي وعمتي ماتقولي لحد من العيلة نين تمشو تخطبو قبل وتاخذو معاكم فاطمة واسيمة وحتى هنا ماتوقضوهنش الا يوم اللي بتمشو فيه والاحسن قوليلهن انكم بتطلعو مشوار مع بعض
عمتي مريم .. عليش
انا.. عشان ترتيب في دماغي
عمتي مريم .. لكن انت عارفهم حيزعلو خصوصا ان نحن عمرنا مادسينا حاجة على بعض
انا.. تو انراضيهم وبعدين لما يفهمو اسبابي صديقيني حيفرحو ليا
عمتي وامي .. الف مبارك وربي يكمل عليك بالخير
انا.. الله يبارك فيكم يارب
وطلعت انا وايمن وانا فرحان وعدى ثاني يوم عادي وجاء يوم الثلاثاء وكانت مباراة فرنسا وبلجيكا وفازت طبعا فرنسا وطبعا فرحة اسيمة وعائشة وسند ماتتوصفش وانا مقضي معظم الوقت نتراسل مع زادا وحسيت ان في تغيير كبير بطريقة زادا معاي حسيت بيها مرتاحة معاي اكثر وسكرت معاها وشفت منشور زهرة على فوز فرنسا وكان منشور حلو تحلل فيه زي العادة اللعبة الحلوة اللي كانت في المباراة بشهادة الجميع وخصوصا ذاكرة ان متوسط اعمار الفرنسيس 26 سنة والبلجيك 28 سنة يعني الفرنسيس اكثر خفة في اللعب ورقدت بعد مادرت اعجاب لمنشورها وجاء يوم الاربعاء عادي مافيشي جديد غير امي حسيتها مش مرتاحة لقراري واني بنعذب روحي معاها لكن طمنتها وهديتها باني مانقدرش نحكي تفاصيل بس اكدت ليها ان اللي جاي احلى وعديت للمدرسة وهدرزت واجد معاها خصوصا انا وهيا امتحانات الطلبة كملت في موادنا لكن كنا نجو نتابعو مع المدرسين الاخرين وانا نهدرز معاها حسيت بيها مرتاحة معاي واجد واستذنت منها ان عادي لو اتصلت وهدرزت معاها في العطلة ففرحت من ردها لما قالت لي اتصل في اي وقت وطبعا هذاك الوقت باذن الله حتكون مراتي وروحنا تفرجنا على مباراة انجلترا وكرواتيا والصدمة كانت بفوز كرواتيا اللي فعلا نازلين للمعلب فايزين يعني فايزين وهكي تمت المباراة النهائية بين فرنسا وكرواتيا وطبعا انا حنشجع كرواتيا لان مهما كان فريق فرنسا قوي مستحيل نشجعها وطبعا المباراة النهائية حتكون يوم الاحد يوم بعتت هلي لاهل زادا وجاء الخميس والجمعة والسبت وانا كل يوم رسائلي بيني وبين زادا تاخذ وقت واجد وجاء الاحد وامي وعمتي خططو كيف يا خذو معاهن اسيمة وفاطمة بعد ما تصلت عمتي باهل زادا وخذت منهم موعد لجيتهم والحمدلله انهم طلعو فاضيين يوم الاحد وطلعت انا للمدرسة وبعد العصر اتصل بيا سند وقالي انه طالع بيهم تو وانا كنت مقمعز مع زادا في الكافي فتحت النت وحطيت على البت المباشر لان المباراة النهائية قريب تبدا وجاء نداني  ياسين عشان جايب شاشة بيش نربطوها بالابتوب بيش تكون المشاهدة اوضح ومن ذهاب شيرتي ننسى فوني فوق الطاولة
زادا
كل يوم تزيد الساعات بيني وبين الغريب في المراسلة وكل مرة شكي يزيد لكن في حاجة ماتخليش فيا نوقف خصوصا ان حلمي بعلاء زاد وتما كل يوم نحلم بيه بس ديمة مبتسم وفرحان ولما حتى مشيت لمرت عمي وحكيت ليها على احلامي قبل واحلامي تو فقالت لي بالك قبل حزين لانه ماكانش راضي على حياتك وتو بالك اديري في حاجة جديدة وهي اللي مخليته راضي وفرحان ومبتسم على طول في احلامك وسرحت بفكري بعد كلام عمتي راضية وان مافيش حاجة جدت عليا سوى صداقتي باحمد او رسائلي مع الغريب واليوم وانا مقمعزة مع احمد في الكافي نتقاشو كالعادة يا قصص التاريخ يا الكورة لانه مولوع بالكورة زيي فنادى عليه ياسين عشان يشيل معاه الشاشة بيش يعلقوها على الكمبيوتر بيش يتفرجو على المباراة النهائية لانها قريب تبدا  لان حتى في طلبة جايين على خاطر بيتفرجو عليها لانهم ماعندهمش وين يتفرجو فوعدهم احمد انه يخليهم يتفرجو عليها وياسين تبرع بانه يجيب شاشة حوشهم  ولما عدى احمد لياسين فطنت بفون احمد على الطاولة فقررت انفذ اللي شاكة فيه وبعتت رسالة للغريب واول حاجة جت رسالة لفون احمد ولما شفت جهاز احمد لقيت الرسالة معلقة في الخلفية بحكم فونه ايفون و مسجل رقمي (بحبي المنتظر) معاش عرفت شنو ردت فعلي نحزن او نفرح لكن اكثر حاجة شعرت بيها الخوف وخوف كبير وشفت احمد جاي شوري ومازال فونه في ايدي
زادا بعصبية كبيرة ومشيرة على فونه اللي بين ايدي وايدي الاخرى انبه على الرسالة .. هذا شنو ياااا غريب
انا..............
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة