كأس العالم

الفصل العاشر

#كأس_العالم
الفصل العاشر
انا.. خوها موسى
ايمن .. كيف
انا.. مانحبش انلف وندور ولو ان علاقتي بزادا طبيعية راه جيت خطبت طول لكن لان مازال قدامي طريق طويل على الاقل لازم حد من هلها يعلم وممكن يساعدني بيش مانحسش اني داير قرون لحد
فريال.. احسن راي وبالذات موسى عنده كلمة وتأثير على زادا كبير
ايمن .. طالما عنده التأثير اللي تقولي عليه كنه ما قانعهاش تتزوج وتنسى
انا.. صح ليش ماحاولش يطلعها من اللي هيا فيه
فريال.. موسى صح ليه تأثير واجد على زادا ولو طلب منها توافق على واحد من كوم العرسان اللي جوها راه وافقت بس هو ماحسش في حد فيهم انه يقدر يحتوي زادا بالذات بوضعها هذا لكن معاك متأكدة انه اخرى حيساعدك بالذات بعد ماتقوله السبب اللي خلاك تحبها
انا.. ان شاءالله يارب  وتو مهمتك انتي يا فريال
فريال .. شنو المطلوب مني
انا.. تكلمي موسى اليوم بما انكن بتعدو بدري ومافيش مباريات اليوم انه يجيني بعد المغرب يلقاني هنا نستنى فيه
فريال .. هذي ساهلة بكل خلاص تطلع زادا من حصتها ونروحو وبمجرد مانوصل طول نكلمه
ايمن .. معناها انا نروح بالعيال لانهم حرام اليوم كله قضوه لعب شوي اخرى وحيرقدو على روحهم
انا.. تمام بكل وطبعا قول لنرجس اننا وكلناهم بالك تسحابنا خلينهم من غير وكال تبدا تعلف فيهم
ايمن .. ومش اي وكال اخرى
فريال بخوف.. وكال شنو نهاركم اللي هو هذوم عيال
ايمن بضحكة .. كنك خفتي
فريال .. انتم شباب ووكلتو اطفال يعني شنو بيكون غير شبس وحلويات يعني كله حاجات ضارة
ايمن .. طيبة انتي قصدك احمد وتبيه يوكل العيال حاجة ضارة تي انتي تتخيلي ولا واحد من عيال خواتي ولا عيال سند ياكل في حلو في اي وقت الوقت المسموح ليهم قبل الساعة خمسة العشية ومش كل يوم لدرجة انهم كبرو عكس العيال كلهم مايحبوش الحلويات ولو كلو حلو يكون بيتي
فريال .. معقولة
انا.. ماهو الاطفال اللي ياكلوه هو اللي بيأثر على بنيتهم لما يكبرو وهذوم مسوؤليتنا نتحاسبو عليها قدام ربي فنعطو صح عشان ناخذو صح واكبر دليل اهم عيال فاطمة واسيمة اكبر العيال كلهم ماشاءالله سفيان ولد اسيمة عمره 14 سنة وصحته ماشاءالله عليها ومعاها يلعب في كارتيه وهو بكامل صحته لان اساسه كان صحيح
ايمن .. ومعاها مانع الاكل المعلب انهم ياكلوه ديمة يعني مرة بعد وين وين لدرجة احمد التن والجبنة ايدير فيهن في الحوش بكميات كبيرة ويوزع فيها عليهم عشان مايطروش يشرو من برا وهذا غير العصاير الطبيعية يجرب طريقة عصير واذا عجبت العيال يعطي الطريقة لامهاتهم غير الدحي كان مش عربي مستحيل يخش الحوش 
فريال .. معناها ماشاءالله فالح في التطييب
انا.. لا مش للدرجة هذي لكن تقدري اتقولي نحاول نخلي عيلتي بعيدة عن المواد الحافظة قدر المستطاع
فريال .. وهذا كله ليش مع اني مانقدرش ننكر ان ماشاءالله اجسامكم شباب او بنات حلوة ومتناسقة
ايمن .. احم احم
فريال .. كنك نقول في الحق
انا.. انتي ماتشوفيش في مناشير الفيس اللي معبية دعوات لاطفال وكبار مصابين بالسرطان الله ما احفظنا
فريال .. وبشكل غريب
انا.. عندك علم ان الانسان يولد ومعاه خلايا سرطانية وتكون الخلايا هذي خاملة في جسمه لكن بسبب سوء الغذاء واللي ندخلو فيه لجسمنا هو اللي ينشطها ويخليها تطلع في جسمنا وتحاول تقتلنا ربي يشفي جميع المرضى يارب فهذا ليش الحاجات الاطفال اللي يحبو ديمة انهم ياكلوها نحاول اني انديرها
ايمن .. حتى الشوكلا يحجز فيها من مرا عندها صفحة على الفيس بعد ما تأكد انها تجيب في الخام الطبيعي للشوكلا من سويسرا وانها تحط في مواد طبيعية ومعاها اخرى ما ياخذش منها الا الشوكلا اللي بالفواكه المجففة بعد ماعرف انها هيا من تجفف فيهن او المكسرات بس
فريال .. بجديات نحييك على حرصك هذا ومع مشاغلك هذي غير كيف تلقى في الوقت عشان ادير هذا كله
ايمن .. كان تجي تشوفي دار الخزين اللي في حوشنا وحوشهم تو تعرفي تقول مطابخ السوررين رايحات
فريال باستغراب .. كيف
انا باحراج .. اصلا انا لما نفضى اندير في كمية كبيرة وحتى المواد الحافظة اللي نستخدمها نحاول تكون طبيعية والحمدلله الواحد لما يبي يوصل لشئ شوي بحث وعزيمة واصرار يقدر ايدير اللي يبيه
فريال .. يابخت زادا بيك وانت يا ايمن ان شاءالله واخذ منه حاجة من الاهتمام هذا
انا بضحكة .. تي هو ذراعي اليمين يا بنتي انا وايمن مانتفارقوش بكل الا عند النوم واحيانا نرقدو مع بعض حتى مشروعنا هذا كان فكرتنا نحن الاثنين
فريال بحب .. ربي يخليكم لبعض وفعلا انا من لما جيت للمدرسة الطلبة كلهم يسحابوكم خوت وانا لو علمي با ايمن وخوته منو  لانه كان جارنا لكنت سحبتك خوه
انا.. اهي زادا طلعت راك تنسي فريال
فريال .. كون هاني
وفعلا روحو وايمن رفع عيال سند وانا قعدت نظم في امور المدرسة ونستنى في موسى اللي فعلا ماطولش عليا
موسى .. السلام عليكم
انا .. وعليكم السلام
موسى .. ان شاءالله خير فريال قالتلي تبيني ضروري
انا .. شنو تحب قهوتك قبل
موسى .. معدلة
ودرت القهوة وضيفتها له وحكيت ليه كل حاجة على احساسي ناحية زادا وعلى رسائلي معاها وعلى اني نراسل فيها على زهرة على الفيس وقلت ليه انها على الفيس تعرفني لكن ماتعرفش اني نعرف انها من وعلى الفون هي ماتعرفنيش لاني شريت شفرة جديدة محد يعرفها بكل وحكيت ليه بالمختصر مضمون المرسلات بينا
موسى بهدوء.. ليش قررت تحكيلي
انا .. نكون معاك صريح انا ربي عطاني اربع خوات وثلاث بنات عمة تقول خواتي يعني سبعة غير بناتهن  وان شاءالله ربي يحفظ البنيات زي ماحفظ الامهات وعمره ماواحد تعدى عليهن وبمجرد مايتعرف عليهن حد يجي لباب طول لان ربونا امي وخالي وعمتي على انه اللي بنديروه في بنات الناس ربي يرده في خواتنا او بناتنا وفعلا ولله الحمد مشينا زي ماربونا ولان مشواري مع زادا مش عارف امتى تكون طريقه نور فمنحبش اندير قرون لحد فحبيت نخليك في الصورة بما انك قريب ليها كأني نخطب فيها منك نين هي توافق
موسى بتنهيدة .. بس انت عارف ان طريقك صعب وطويل
انا.. عارف وراضي نتحمل على سباها اي شئ
موسى .. ومش حتغار ان حيكون ليك شريك رغم انه متوفي و ماتقدرش تنكر انه حيكون شريك ليك
انا .. بحبي ليها حيخليني نتحمل كل شئ منها وهي حيجيها وقت يكون حبها ليا انا بس
موسى .. لهدرجة حبيتها
انا .. نكذب عليك كان نقولك في الاول حبيتها لا انا حبيت وفائها لعلاء الله يرحمه في الاول وبعدين حبيتها وحبيت اني نحول الحزن من على وجهها
موسى .. ربي يعاونك وانا حنكون معاك بلي تبيه
انا.. بس خايف من حاجة وحدة خايف من عمك محمد يرفض ارتباطي بيها
موسى .. مستحيل تصدق انه هو ومرت عمي كم عريس في عريس يجيبو فيه ليها رغم حزنهم على ولدهم لكن قدرو يتخطو الحزن ويدعو طول الوقت ان ربي يخلي زادا تطلع من الحزن حتى هيا
انا .. هكي طمنتني
موسى .. خلاص معناها حط زادا في عيونك
انا.. بس همتك معاي على الاقل تبدا فريال من جيهة وانت من جيهة يساعدني
موسى .. تمام متفقين
وطلع من عندي موسى وانا كملت حاجاتي وطلعت للحوش وانا متفائل واجد وبعد العشاء والهدرزة مع امي واسامة وايمن خشيت لدرانا انا وايمن
ايمن .. ها شنو بدير تو بعد ما موسى تما معاك
انا ............
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة