كأس العالم

الفصل الخامس عشر

#كأس_العالم
الفصل الخامس عشر
انا.. وليش مش انتي
زادا.. عشان انا وضعي مختلف
انا.. وانا راضي بيش مافيك
زادا .. تقبل حد يشاركك في مرتك وفي ذكرياتها
انا.. اسمعي كويس زادا لان كلامي معاش بنعاوده مرة ثانية انا اول حاجة حبيتها فيك اخلاصك لعلاء حتى بعد وفاته فمستحيل اني نرفض انك تذكريه او يعيش في ذكرياتك
زادا باستغراب .. ليش
انا.. يا زادا علاء ولد عمك وحتى لو كان مش زوجك قبلي وحتى لتو عايش راه ليه معاك ذكريات زيه زي خوه علي وزي خوه عيسى انا عارف انهم اصدقائك الوحيدين يعني اكيد بتكون ليك معاهم ذكريات زيه ومش بالساهل تنسيها انا بنتعامل مع ذكرياتك مع علاء بنفس تعاملي مع ذكرياتك مع خوته غير علاء ممكن شوي لانه حبك وحبيتيه الله يرحمه وعمري مانكره حبك ليه بس تراعي كرامتي ورجولتي وحبي ليك
زادا وباستغراب اكبر .. غريبة انك تقبل وحدة تحتفظ بذكرياتها مع راجل قبله
انا.. مش غريبة ممكن انا حالة نادرة او مافيش مني واجد لكن صدقيني عمري مانفكر اني نحول منك شئ انا حبيتك على شانه
زادا بنظرة احترام حسيت بيها .. مافهمتش
انا.. انا اعجبت بيك من اول ماشفتك ورغم قصر الوقت حسيت بروحي نحبك والسبب اللي خلاني نحبك ان علاء رغم وفاته خمس سنوات لكن مازالتي باقية على ذكراه رغم ان في ارامل واجد وعندهم حتى عيال لكن بمجرد ماتفك عدتها تتزوج او تدور من تتزوج مع احترامي للاغلبية ومش معناها اني ضدها لا بالعكس لان هذا حقها انها تعيش حياتها لكن انتي رغم انه مادخلش عليك وكان عقد قرآن بس لكن كرهتي ترتبطي بغيره وهذا اللي حببني فيك وشدني ليك اكثر اني نكون حبيب وزوج ليك مش ينسيك علاء لا بالعكس لكن نبيك تعيشي حياتك وانتي معاي وتحبيني زي ماحبيتيه
زادا .. بتصبر عليا
انا.. لاخر العمر
زادا .................
انا.. معاش عندي كلام نقوله نستئذن تو
زادا .. تفضل
وطلعت من عندها وانا مرتاح واجد لاني شفت في عيونها نظرة مهما نوصفها مانعرفش وقعدت كل يوم نبعث ليها رسالة انطمن فيها مني وانها معاي مستحيل تخاف واليوم اللي قبل فاتحتي انا وايمن 
ايمن .. تعرف انت غريب يا رفيقي
انا..ليش يا ايمن
ايمن .. لما نفكر ان لو انا مكانك مستحيل نرضى  هيا فريال حكتلي انها ايام الاعدادي دارت علاقة مع ولد ورغم انها علاقة مراهقة وانها مش طويلة حدها ثلاث شهور ولقت روحها اللي ادير فيه لعب عيال سيبت ومعاش عاودتها ومعاها حسيت بضيق كبير مش انت زادا تحبه وضاعت من بعده ومازالت تحبه
انا.. تعرف لما مشيت شفتها يوم مشيت خالي طلبوها رسمي شنو شفت
ايمن باهتمام.. شنو
انا.. شفت في عيونها نظرة احترام وحب
ايمن .. شنو وكيف وليش
انا بضحكة .. كنك انفجعت
ايمن .. كيف حب
انا.. تصدق قمعزت مع موسى وسئلته على علاقة زادا بعلاء بيش نعرف كيف نتعامل معاها ولما حكالي عارف شنو فهمت
ايمن بتنهيدة .. احمد احكي بسرعة متمرمدش كبدي وانا نبي الزبدة
انا.. ماهو بيش تأخذ الزبدة الصح  لازم تشوف الخض
ايمن .. به يا احمد هيا كمل 
انا.. فهمت ان زادا ما انعطتش فرصة انها تحب علاء او خيار بالعكس تعتبر كنوعا ما انها انجبرت على حبه
ايمن باهتمام .. كيف انجبرت
انا.. من لما انولدت زادا وهي خذت اهتمام الطفل وهو يلاعب فيها ويهتم بيها ولما الاهل شافو اهتمام العيل اللي عمره ستة سنوات ببنت عمه اللي كيف انولدت قعدو يقولو خلاص اهو عريس زادا وكبرت زادا وما اختلطتش باي شاب سوى ضنا عمها واخرى ضنا عمها خوت علاء بس لسبب انا ضنا عمهم عطية مش كويسين فمعندهاش خيارات قدامها غير انها تحب علاء اللي كان مايشوفش في الدنيا الا هي بس وهي ماشافتش غيره فطبيعيا حباته وتعلقت بيه
ايمن .. تحليل منطقي والله انت المفروض خشيت علم نفس مش تاريخ
انا .. المفروض ماتنساش اني نحب نقرا علم نفس واجد وكتب تخصه
ايمن .. مانسيتش وبه كيف شفت نظرة الحب
انا.. انا زادا مش مجبورة على حبي بالعكس الخيار في ايديها وحتى لما رفضت انها تتزوجني كانت خايفة من اني نخليها تنسى ذكرياتها مع علاء او انها تسحاب روحها كانها خانته لكن لما قلت ليها مستحيل نخليك تنسي ذكرياته او اني نمنعك من ذكره شفت نظرة احترام كبيرة في عيونها لكن صدقني زادا حتحبني واكثر من علاء اخرى
ايمن .. يعني حتخليها تنساه
انا بهزة راس .. لا مش حنخليها تنساه
ايمن .. كيف حتحبك وكيف مش حتخليها تنساه
انا.. اوف يا ايمن كنك معاش تفهم فيا زي قبل
ايمن .. يا احمد انا نفهمك من نظرة عينك لكن في موضوع زادا انت لغز بالنسبة ليا
انا بثقة.. زادا حتحبني و بجنون اخرى لكن علاء حيقعد ذكرى حلوة في حياتها كل ماتذكره لاني بسبب حبها لعلاء حبيتها فهمت تو
ايمن براحة .. اه فهمت وربي يعطيك ماتتمنى وزادا تحبك بسرعة ماتتعبش معاها
انا. بتنهيدة .. ان شاءالله يا ايمن ان شاءالله
ايمن .. بكرة بتمشي للفاتحة
انا .. اكيد بنمشو نحن الاثنين
ايمن .. انا انتحشم من باتي
انا.. يعني انا مانتحشمش من خالي يامعفن
خالي عمر .. غير تو الحشم بس زي خوتكم وبعدها تقمعزو حذا نسوانكم وبطونهن قدامهن  وادلعو فيهن قدامي وراح الحشم من عمر في الباي باي
انا وايمن ضحكنا لان بكلام خالي عمر خطر علينا سند والهبال اللي داره لما قال الدكتور لنرجس احتمال ولادة مبكرة بسبب التوآم في حملتها بيوسف وسيف قريب مات وضرب بالحشم عرض الحيط لكن الحق خالي عمر راجل متفتح واجد حتى لما سند يفطن على روحه قدام باته يضحك خالي ويقوله عادي يا ولدي وكان مادللت شريكتك ومرتك وام صغارك من بدلل
خالي عمر .. بكرة لازم تجو انتم زيجتكم كل شئ فيها غريب وجاء بطريقة اغرب فكملو زيجتكم هذي وتعالو احضرو عكس خوتكم
ايمن .. كيف غريبة
خالي .. يمشو الرجالة قبل الصبايا وانت بالذات عمتك تكلم ام فريال على الفون بيش تبلغها بالخطبة يعني في اغرب من هكي ترا قولي والله الاخر جانا في يوم وليلة ومانندروش شنو اللي صار وقال بكرة لازم تمشي تخطب لدرجة عمك عوض وسليمان استغربو كيف ماحكيتش لهم قبل بوقت غير الحمدلله اصحابي وعارفيني ما ندس شئ عليهم  ولما قلت ليهم جت خت فت عذروني وتقولولي وين الغريب ومعاها اخرى تجوني وبيخطب ايمن بعد فرح الشباب وانت اشبح امتى بتخطب وبملح البصر نخطب لاحمد قبل ايمن ومعاها فاتحتكم بتنقرا بكرا قبل فرح الشباب
انا.. فعلا كل حاجة سبحان الله كيف جت
خالي عمر .. والله مافي خطوة تخطوها الا بامر الله وربي ليه حكمة في كل شئ
انا وايمن .. والنعم  بالله 
خالي .. هيا ارقدو عشان بكرة تنوضو وجهوهكم رايقة
انا وايمن .. تصبح على خير
ورقدنا وكل واحد فينا باله مرتاح لان من رغبها بتكون شريكته وبالنسبة ليا ندعي ربي يعدي اليوم على خير بالنسبة للزادا لانه اكيد مش حيكون ساهل عليها وبعتت حتى رسالة لموسى انه بكرة مايسيبش زادا بروحها بكل عشان لو انهارت يكون حذاها ويهديها واستغرب من رسالتي وقالي ليش بتنهار فقلت ليه مش ساهل على بنت عاشت عمرها مقرون اسمها باسم راجل وتو بيقترن براجل غيره فاستغربت رد موسى الا كان بس بارك الله فيك وضحكت يشكر فيا على اهتمامي بمن تكون شريكتي وحبيبتي ورقدت بدون مانبعث ليها حاجة لاني عارفة تو في صراع مايعلم بيه الا ربي ودعيت ربي يهون عليها ورقدت
وجاء ثاني يوم ونضت انا وايمن لقينا حوشنا فاضي فعرفت انهم مجتمعين في حوشنا الثاني حوش خالي عمر وطبعا نجتمعو ديمة غادي معظم الوقت لان حوش خالي عمر كبير واجد صح حوشنا كبير بس حوشه اكبر منا
ايمن .. شكل عمتي مفضية الحوش تقول دخلتنا مش فاتحتنا بيش نرتاحو
انا.. عمتك وعارفها تذكر كيف خلت اسامة يبات في حوشكم عشان الصبح البنات كلهم بيكونو عندنا ورواد لما جاء بات هنا ونحن كلنا بتنا غادي
ايمن بضحكة .. سراج وسند اللي نحرمو من الدلال هذا
انا.. والله توأم طلعو في كل شئ  تزوج  سند  بخطبة بدون فاتحة وسراج اهو زيه
ايمن .. اي والله ربي يهنيه
انا.. قولي مافكرناش في هدايا الشباب والفرح مازال عليه اسبوعين بس
ايمن .. والله ماني عارف انا عابي عليك انت بو الافكار فقلت الحل اكيد عندك
انا.. في بالي فكرة مش عارف
ايمن .. قول ونشوفو
انا.. انت عارف عمر ولد عمي سليمان تو قاعد في طرابلس خدمته غادي 
ايمن .. ايه كنه
انا.. شنو رايك نقولوه يحجز ليهم غادي في مصيف يكون حلو يعرفه لمدة اسبوع ونحن نبعتو ليه الفلوس من هنا
ايمن .. فكرة حلوة خصوصا رندا وولاء عمرهن مامشن مغرب لكن جوري مش عارف
انا .. خلاص نكلمه وحتى نسئله احسن يمشو بسيارتهم او يمشو طيران
ايمن .. فوت الطيران لان عارف خوتك يحبو السفر بالبر احلى وانا نعطي سيارتي لاسامة وانت اعطي سيارتك لرواد لان سيارتهم مش بتاعت طريق طويلة زي سيارة سراج ويمشو رفقة
انا.. تمام بكل متفقين معناها تو نتصل بعمر وانسق معاه
ايمن .. تمام هي نمشو لحوشنا بنفطر جعان واجد انا
انا.. انا احرف منك هيا
اتصلت بعمر وعجبه الموضوع وقالي انتو خلصو قيمة اربعة ايام وهو يخلص قيمة الثلاثة ايام كهدية منه ليهم ونعتبرو اشتركنا نحن الثلاثة في الهدية هذي وقال لما يأكد الحجز يبلغنا بحيث يكون بعد اسبوع من فرح الشباب  وطلعنا لحوش وحكيت لايمن شنو قال عمر
ايمن .. اما عمر هذا طالع كيف سميته بالزبط
انا.. طبعا عندك شك لكل امرءاً من اسمه نصيب وعمر واخذ الحِن والمحبة والطيبة من خالي واجد
ايمن .. فعلا والله ربي يرزقه ببنية حلال تهنيه وتريح باله
انا.. آمين
ومشينا للحوش والجو فوق الريح فطرنا فطور ملوكي من اللي يحبه قلبك بالذات لما اللي واقفات عليه الغوالي كلهن امي وعمتي مريم اللي احيانا واجد نحس فيها كانها امي الثانية وقرب اذين العصر وجهزنا ارواحنا والشباب كلهم جاهزين ولبسنا زينا العربي اللي زايدنا حلاوة وهيبة وخذينا احلى سلفي نحن الشباب والبنات والاحفاد حتى سيف ويوسف عيال سند   وسفيان  ويحى وعمر و خالد وعبدالله  وعبدالرحمن عيال البنات وطلعنا سيارات ماشاءالله وجاء طبعا عمي سليمان وعمي عوض وياسين ومدرسين المدرسة معاي في الصبح ومدرستي العشية والحمدلله انقرت فاتحتي وفاتحة ايمن وطبعا انا الاول لاني اكبر من ايمن بثلاث شهور
وروحنا لحوشنا واستقبلنا زغاريد امي وعمتي والبنات وبعد المباركات فكرت نبعث رسالة لزادا لكن خفت قلت خليها لبكرة خير وايمن اتصل بفريال لكن انتبهت لايمن اللي كان مبتسم وسعيد وجه تغير جيت شوره طول
انا.. شنو في ايمن كنه وجهك تغير
ايمن بتوتر .. مافي شئ
انا بعصبية وقلبي حاسس بحاجة مش تمام وخايف اه خايف .. شنو في زادا فيها حاجة
ايمن .. زادا مش لاقينها
انا بصدمة .. كيف
ايمن .. قالت فريال انهم مجتمعين في حوش عمها علي وكانت احذاهم في وقالت شوي نخش لداري ولهيت شوي عليها مع البنات  نين كلمها موسى سئل على زادا فطنت انها من مدة خشت لدارها وطار موسى يجري ليها فتح الدار مالقهاش ودورو في كل مكان حتى مكان الحادث مالقوهاش
انا بعصبية .. كيف مالقوهاش الدنيا قريب اظلم
ايمن .. غير تعال هنا وين ماشي
انا.. بندور عليها
ايمن .. استنى جاي معاك
سراج .. استنو جاي معاكم
ايمن .. عارفنا وين ماشيين عشان جاي معانا
سراج .. اه حوش عمي علي جوري اتصلت بيا تو 
انا .. ايمن خوذ سراج واطلعو لحوش عمي علي بسيارتك بنطق في مكان قبل
ايمن .. ماتشغلنيش عليك
انا.. كون هاني وكان جد جديد رن عليا
ايمن .. تمام
طلعت واتصلت بموسى وقالي ماخلوش مكان مادورو فيه وانا قعدت نبرم في جيهة حوش عمها محمد ليش مش عارف قلبي يقولي انها مش بعيد من هنا
وقلت لموسى شفتو حوش عمك قالي شفناه لكن مافيشي حد لانهم كلهم عندنا
وانا مازالت نبرم جيهة الحوش وليا حوالي الساعة نبرم وبس بجيهة الحوش وقلبي مازال مصر يقولي انها مش بعيدة من هنا ليش مش عارف وانا نبرم لفت انتباهي ان في دور ثالث فيه ضي وموسى قالي مافيشي حد في الحوش اتصلت بموسى وسئلته
انا.. موسى حوش عمك روحو
موسى ............
انا.. امنا الدور الثالث فيه ضي لان الحوش من ساعة كان مظلم وتو من حاجة نص ساعة ضوا هذا ليش سئلت
موسى .............
انا بصدمة .. شنو تقول انت
موسى .................
انا.. به امنا تعال بسرعة معناها هي
موسى .............
انا.. لا قاعد مش متحرك من مكان الباب نستنى فيك
وسكرت من موسى ومازالت تحت تأثير الصدمة بعد ما موسى قالي ان الدور الثالث شقة علاء وانا مافيش حد خشلها من بعد وفاته حتى زادا من لما توفى علاء حتى بالكذب ماخشتش ليها رغم ان المفاتيح عندها وحاولنا واجد معاها انها تخش ليها وقلنا بالك تستوعب انه مات مابتش ومعاش ضغطنا عليها والحق وجعتني يعني اليوم اللي تمت فيه مرتي تسيب كل شئ وتجي لشقة كانت المفروض شقة عمرها وقعدت نستنى في موسى
زادا
من يوم اللي حكيت مع احمد لما جاب الرجالة وانا فيا احساس غريب احساس راحة مافهمتش سببه وخصوصا اني ماتوقعتش من احمد انه يكون متفهم لوضعي هذا وبالعكس قالي حبني لاني هكي ساعتها حسيت دقات قلبي تغيرو وكانهن دايرات انتفاظة مضامنين مع كلام احمد نحس في روحي بكلام احمد كأنه عزق عليا سحر ورغم انه ماحاولش يكلمني لكن يبعث في رسالة كل يوم ليا لكن امس مابعتش ليا رسالة واستنيت واجد لكن مابعث شئ خفت انه يكون مل مني وبسيبني وعند الكلمة هذي معاش قدرت انتحمل الشعور اللي حسيت بيه ناحية احمد وطلعت بيش نهرب من افكاري احذا صبايا عمامي وبنات عمي وخواتي وكلهم فرحانين بالذات فريال
العمة راضية .. تعالي زادا احذاي
جيت قمعزت احذاها وانا نحس في روحي كأني دايرة جريمة مش عارفة نرفع عيني في عينها كأني خاينة لولدها لحب عمري مافطنتش الا بعمتي ترفع في وجهي شورها
العمة راضية .. ارفعي راسك يا غالية وعمرك ما توطيه انتي ماتعرفيش قديش انا فرحانة انك اخيرا وافقتي تبدي حياة جديدة
زادا بدن دموعي ينزلن
العمة راضية .. عليش الدموع يابنتي في يوم زي هذا انتي عارفة قديش انك غالية عليا وحتى علاء اكيد تو مرتاح في قبره لانه تهنى عليك حبي يا حبيبتي وعيشي حياتك
زادا بصوت واطي .. نحس في روحي كان ضحكت او حبيت كاني خنت علاء
العمة راضية بتنهيدة .. لا يابنتي ردي بالك تفكري هكي ولو الميت يتكلم اكيد علاء كان نطق وقال انه اسعد واحد انه اطمن عليك انتي اقرب وحدة كنتي ليا وبعد ماتوفى علاء بعدتي عليا كأنك سبب موته لكن اهو تو ارجعي لحضني زي قبل وانا وعمك محمد والله فرحانين ليك واجد وحتى علاء اهو بروحك قلتي تحلمي بيه انه سعيد ومبتسم من فترة صح
زادا بدموع .. لكن يا امي معاش شفته معاش جاني في الحلم من يوم ماجو هل احمد
العمة راضية .. لانه اكيد اطمن عليك عيشي يابنتي والله احمد من عيلة كويسة ويستاهل اسعديه واسعدي روحك
زادا بهدوء .. ان شاءالله
وبعدها جيت قمعزت احذ فريال وتعالت الزغاريد عرفت الفاتحة انقرت وبعد ماباركن لنا البنات وعمتي راضية اللي خذتني في حضنها بفرحة واضحة اكثر حتى من بنتها فريال وشوي حسيت روحي مخنوقة فقلت لي فريال بنخش داري ومانندريش على روحي حاجة قالتلي امشي لشقتي اللي كانت المفروض بتجمعني انا وعلاء كاني بنودعه بالذات بعد ماتما اسمي مرات راجل اخرى خذيت مفاتيح الشقة اللي ماخشيتش ليها بكل حتى لما فرشها علاء وكملها مابيتش نخش ليها قلت ليه نين انت تكون رافعني في حضنك وانا بالڤيلو مانيش خاشتها وخذيت بشتي ووشاحي ومفاتيح الشقة  وطلعت بالشوي حتى بشتي ووشاحي لبستهن في الجنان وخذيت تاكسي وجيت لحوش عمي محمد لان شقتي كانت الدور الثالث وركبت ليها وانا قلبي مقبوض خشيت ليها واتكيت على اول كنبة قابلتني ومابتيش اندير اي حركة ومانندريش على روحي لقيت روحي راقدة او غفيت مش عارفة حتى اللي شفته مش متاكدة منه انه حلم او حقيقة وفتحت عيوني نشوف في شخص قدامي الصورة مش واضحة ولما ركزت عيوني انصدمت
زادا بصدمة .. علاء        
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة