وصلت البيت سلمت علي امي ودخلت غرفتي وتفكيري مشتت امي جات داخله قالت لي الليله مالك ما من عوايدك ساااكته 😑 قلت ليها مافي شي العصر جات مرت جيرانا شمشاره كده قالت لامي مالها بتك بتجي ماشي فيني وما بترد السلام 😏 امي كوركت لي شجن جيت طالعه سلمت عليها امي قالت لي مالك قبيل ما سلمتي علي خالتك نفيسه قلت ليها وين ده ومتين والله ما شوفتك قالت لي اجييي يا شجن مالك ما بتشوفيني نمله ولأ قمله 😏 سلمت عليك قبيل لم جايه من الجامعه قلت ليها والله يا خالتي بالي كان مشغول عشان كده ما لاحظت ليك ومشيت سلمت عليها في راسها قالت لي الشايل قلبك يتهني بيهو بقلبي قلت ليها ان شاء الله قلت ليها لا بس بكره عندي سمنار وبفكر فيهو قالت لي ربنا يوفقك امي قالت ليها ما تزعلي منها شجن دي اصلا درويشه قالت ليها والله ما زعلت منها بس قلت غريبه ما تسلم علي
تلفوني ضرب استاذنت منهم وجريت عاينت للمتصل خاب ظني 😑 فتحت الخط هدولتي قالت لي يهد راسك يا كلبه من قبيل منتظره تلفونك تحكي لي قلت ليها دقيقه لم افوق من الصدمه قالت لي قلتي لي تفوقي وصدمه يعني اعترف ليك قلت ليها يب 😌 قالت لي وااااي اخيرا وانتي قلتي ليهو شنو قلت ليها ما رديت عليهو قالت لي انتي مجنونه كيف ما رديت عليهو قلت ليها ياااخ اخوك فاجأني قالت لي ما مشكله اصلا عارف الرد بنتونس كده امي جات داخله قلت ليها هديل يلا لبكره امي قالت لي يا بت صحي انتي الليله مالك من جيتي ما طبيعيه قلت ليها والله ما في شي بس اديني دعوه حلو ربنا يسهل لي اموري قالت لي سجمي يا شجن لو واقعه في مشكله احكي 😱 قلت ليها لا والله بس محتاجه لدعوتك قالت لي ربنا ينور طريقك ويعدلها عليك محمل ما تمشي قلت ليها بس دي احلي دعوه 😍 المسا قاعده جنب ابوي في اثناء الونسه قلت ليهو ما عندك دعوه سمحه لي قال لي ربنا يفتحها عليك في الدارين قلت ليهو يا سلااام ياااخ امي قالت ليهو الليله ما عارفه ماله شغاله تشحد في الدعوات ساااي ابوي قال ليها خليها كده اخير من تشحد القروش 😂 قلت ليهو طيب ودخلت غرفتي واتذكرت الحصل لحدي ما نمت اصبحت تاني يوم مبسووووطه قاعده اشرب في الشاي واتبسم براااي امي قالت لي يابت بتتكشمي مالك سجمي جنيتي قلت ليها لااا اطمني بس مبسووطه قالت لي ما تبسطيني معاك قلت ليها بس ادعي لي عندي موضوع لو ظبط بيبسطك قالت لي ان شاء الله يديك الفي مرادك قلت ليها ان شااااء الله قالت لي لااا ده موضوع مهم شديد البتقولي ليهو ان شاء الله بأعلي صوت قلت ليها بالظبط ابوي جا قعد قلت ليهو بعد كده يلاااا ح اخلي ليكم الجو وماشه ابوي قال لي الله يعقلك يا بتي وطلعت وصلت الجامعه وشغاله اتبسم لاي زول دخلت الجامعه قلت ألقي حسام كالعاده في حوش الجامعه تحت بس المره دي خيب ظني ما لقيتو لقيت اصحابو واقفين ما اشتغلت بيهم جيت طالعه في المدرجات عمر ناداني اتلفت رجعت ليهم قالو لي شنو يعني شختي لينا كده عشان حسام ما معانا ولأ شنو 😒 قلت ليهو العفو ياااخ بس ما لاحظت ليكم قالو لي لااا صدقناك ☺ احرجوني ياااااخ وبعدين ديل عارفين من وين معقول حسام كلمهم قبل ما يعرف ردي شنو وكان نفسي اسألهم من حسام بس بعد كشفوني ما بقدر استأذن منهم وطلعت القاعه لقيت هديل حضنتني قالت لي اخييييرا هسه اقول ليك صديقتي ولأ مرت اخوي 😍 قلت ليها قولي لي التانيه لانو الاولي دي خلاص زهجته منها ومدتها انتهت وقعدنا نضحك قلت ليها اها راجلي الليله ما جا ولأ شنو قالت لي واااي والله الأ اوصل ليهو كلمة راجلي دي قلت ليها والله تكلمي اخسرك اها مالو ما جا قالت لي يا بت الليله من الصباح اتظبط وشغال يغني ساااي بس الحيوان ما حكى لي حاجه قلت ليها هوووووي لو سمحتي ما تقولي عليهو حيوان 😠 قالت لي سبحااان الله الكلمه دي الحفظني ليها منو مش انتي قلت ليها انا بقول عليهو كده بس انتي ما تقولي طيب وقت جا قاعد وين واصحابو كلهم تحت ولأ يكون خالط من وراي وانا ما جايبه خبر قالت لي يا حليلو اخوي اعترف ليك بحبو ما سلم من لسانك ما اعترف ليك برضو ما سلم من لسانك ومن هذا المنبر احب اهدي اغنيه في الحالتين انا ضااايع لأخي العزيز 😂 قلت ليها حيوانه قالت لي انا برضو قلت ليها مش اخت الحيوان تبقي شنو اكيد حيوانه عايزه تضربني قلت ليك بكلم ليك سومي نططت عيونا 😳 قالت لي منووو قلت ليها اي مالك سومي عندك اعتراض قالت لي بري وانا اقدر اعترض بنتكلم كده الدكتور جا اعتزر من المحاضره احلي خبر والله هديل فتحت الواتس وبقت تكورك شجن شجن تعالي شوفي ده قلت ليها يا بت مالك اهدي عاينت للتلفون قلت ليها عايزاني اشوف شنو فاتحه لي الحالات في الواتس اعمل بيها شنو قالت لي يا بت انتي غبيه شوفي الحاله دي قريتها مكتوب ( ما اصعب الانتظار حين تنتظر قرار مصيري يحدد بقية حياتك ) والاستوري خاتي اغنيه ( من ما رأيتك قلبي دقى ... شبه الرتينه النوره بقى ... الحفله دونك ما بتبقى ... انت الجمال والباقي فكه ... ياااا حلااااتك) عاينت للاسم لقيتو حسام
قلت ليها واااي لااااا 😍 قالت لي شجن انا غيرت رايي ما بديك اخوي الأ تفتشي لي حبيب ولأ اخطب اخوي لوحده عندها اخو نتبادل قلت ليها لو حسام بوافق ما عندي مشكله 😌 قالت لي جزمه عشان عارفه ما ح يوافق بنتكلم كده جات سمر داخله وشغاله تعاين وتحمر لينا هديل قالت لي حقو الواحد يمشي يصدمها بالخبر ده عشان تبرد شويه من اخوي قلت ليها خليها لو هي مره تاني النشوفها حايمه جنبو عشان احرقها بجاز الكلبه هديل قالت لي ايووووه مرت حسام تتحدث قلت ليها احم احم احم 😌 ما كضبت شلت التلفون وغيرت حالتي ماذا اطلب من ربي اذا اهداني شخصا ينير حياتي كـ القمر والاستوري بـ اغنية انصاف مدني ( حبيتو هوووي يا ناس ) ما تميت ساعه الرسايل بدت تتطاقش من اولاد وبنات اهلي البقول لي الجديد شديييد والبقول لي عجبنا ليك والله وعندي بنت عمتي عسسسل اسمها ريم اسرارنا دايما مع بعض اتصلت علي قالت لي استني لي يا جزمه بتحبي من وراي وما بتكلميني قلت ليها يا بت احب شنو دي نفسيات ساااي قالت لي بري يا ختي الله يكفينا شر النفسيات الحايمه والكدايس القايمه 😅 اتونسنا وقفلت الخط وردودي علي الرسايل كلها عباره عن انو غيرتها كده ساي بس عندي ولد خالتي ظريف قال لي البوره ما كعبه كعبه البوره العكبه قلت ليهو لا يا اخوي لسه صغيره وجاهله قال لي لو ما جاك عريس اتعلمي الشلب قلت ليهو طيب ما تجي اشلبك انت قال لي هووووي انا بديك الفكره بس امشي نفزيها بعيد مني قلت ليهو رمه قفلت منو لقيت رساله من رقم غريب فتحتها كاتب ممكن اعتبر حالتك دي موافقه رسلت ليهو اموشن القرد الخجلان 🙈 .....
