اها انا من الصباح استحمه واتحكحك علي حس الود السمح الجاي العصر دا و حبوبه تعاين لي ساي و قلت لي ثوبك دا اصلو ما بلسو ما تسئليني و لا تحمري لي ساي قالت لي اصلو بلا ثوب ما بتقعدي مع الولد دا و حرنت علي كدي قلت لي سمح لكن طلعت لي ثوب ظريييف من الدولاب وانا الثوب اصلو ما بجي فيني لكن اعمل شنو حكم حبوبه اها جاء العصر جهزت كراسي تحت اليمونه و عملت ترمسين شاي وقهوة و ختيت صنيه الكبابي ( بس التقول جاين يخطبوني) الباب دقه مشيت فتحت لي و حق الله و بق الله و اتفضل ولو قلت احكي ليكم عن الجلابيه حتتوهمو خلينا في موضوع،،،،، قام قال لي :
معليش ياخ حشغلا ليك لمن اخلص فهمي ( انا بيني وبين نفسي قلت لي تشغيلت الهنا والسرور اريتا تشغيلت عمري و سرحت في العرس لمن هميت) قلت لي عادي ياخ،،، قالي امس وقفنا و ين زكرتو
،،، عم ابراهيم قلينا ابوي في السجن حجزو علي عشان قصه شيكات و امي جات واقعه من سمعت الكلام دا و هي عندها الضغط جرينا بيها المستشفي و نسينا قصه ابوي نهائي و عم ابراهيم معنا و بقينا نبكي زي الحريم ما عارفين نعمل شنو وامي جاته جلطه و في العنايه ما عندنا شي غير الصبر قلت لي مرتضي و مجتبي انا بمشي مع عم ابراهيم اشوف ابوي قالو لي خير،،، كلمت عم ابراهيم في الاول رفض لكن انا ما خليتو لمن وافق ومشينا لي ابوي،،، لمن شفت ابوي 3 يوم دي زي 3 سنة اتغير عديل شكلو لا بياكل لا بنوم قلت لي يا ابوي الحاصل شنو انا كنت معاك في الشغل بتين الديون دي بقت قال لي دي ما ديون ناس دايرين مني قروش بضاعه قامو شالو الشيكات دخلوها وانا لسه ما عندي سيوله و القروش العندي الاخيره اخوي اشتريت لي العربيه عشان يشتغل بيها و البيت و سفرت محمد اخوي و عملت 100 الف حاجه و دينت فوق علي اساس البضاعة الجايه دي لمن تتباع بتحل اي شي اها البضاعة اتصادرت في الميناء والسبب و احد من فوق عندو خلافات معاي و انا خايف حكايه البضاعة دي يعملو منها قضيه تانيه،،،، حكي لي الكلام دا كلو وقال لي امشي لي اعمامك كلمم يجوني هنا انا ما داير ابيع الدكاكين عشان احل المشكله دي واطلع خالي لكن هم ممكن يساعدوني،، قلت لي خير من دربي دا بمشي ليهم،،، ودعت ابوي و طمنتو و ما قلت لي امي في المستشفي نهائي براهو ما ناقص،،، مشيت لي اعمامي و الصدمه كانت قالو لي ما عندنا شي عشان نساعدو بيهو بيوتنا و عربتنا دي البتعيشنا و ما بنقدر نبيعم،،، نهائي ما كترت معاهم الكلام قلت ليهم كتر خيركم،،، وقلت لي عم ابراهيم الكلام دا مايصل ابوي خلينا ساكتين،،، رجعنا المستشفي عشان امي لقيت طلعو من العنايه الجلطه خفيفه لكن لسه ما بتتكلم و لا اي شي ما حكيت لي اخواني الكلام بالتفصيل قلت هم ما كانو بعرفو شي عن شغل ابوي و ما حيفهمو حاجه،،، مشيت قعت بره في نجيله المستشفي و معاي عم ابراهيم الله يحفظو ما فاتنا لحظه اتقول هو عمنا المن دمنا،، قلت لي الحل شنو قالي نبيع الدكاكين قلت لي بتسد الدين قالي والله علي حسب قلت خلاص دي مهمتك تتكلم مع ابوي و تحالو تقنعو ان مافي حل غير كدا و اي شي بروح و برجع تاني المهم وجود ابوي معنا،،، اتفقنا انا وعم ابراهيم ان نمشي بكره لي ابوي نفهمو الحاصل،،،، رجعت اشوف امي لقيت فتحت لكن السان تقيل و ياحليلا حالته تحنن تسئل من ابوي،، قلت لي كويس و مشكله بسيطه و بتتحلا،،، اها سئلوني اخواني من الحاصل لكن ابوي كان محلفنين ما احكي ليهم شي،،، حتي اعمامي ما حكيت ليهم الحاصل كلو برغم من دا اتنادلو معنا،،، جاء بكره و تلاقينا انا وعم ابراهيم ومشينا لي ابوي و انا قاعد ساكت ساي عم ابراهيم هو كان بتكلم و وراء ابوي الموقف كلو شنو مافي حل غير نبيع ابوي رفض لكن تاني مالقي خيار غير كدا،،، وبدينا في اجراءات البيع لكن زي ما عارفين تاجر السوق لمن يلقوك محتاج برمو ليك حاجتك دي في الارض،،، اها بعنا ال 4 دكاكين و للللسه دايرين قروش اطرينا نبيع البيت لكن كانت المصيبه ان لازم امي واخواني يعرفو وانا اتجرست شديد ما قدرت اقوم بالمهمه دي بزات ان امي طلعنها البيت بس لسه تعبانه شوي ما بستحمل قدر دا انا ما قدرت امشي البيت نهائي قعت في الارض في الشارع و غسلت هدومي بادموعي ما قادر اعمل شي لي ابوي و ما قادر اواجه امي واخواني و شلت مسواليه كبيييره سر ابوي و الحاصل مع وابوي ليهو شهر في السجن اخواني بمشو يزورو و اهو قال ليهم كلام لكن ما بدخل الراس بس هم صدقو،،، خيلاني كانو واقفين معنا معنويا لان حالتم عادي موظفين و يادوب يسترو حالم لكن ما خلونا لحظه،،، لمن عم ابراهبم داير يكلم امي واخواني با بيع البيت مالقي غير خيلاني يمشو معا عشان يوصل الخبر الشوم دا لي امي،،، واريتو لو ما وصلو و اريتنا لو ما كنا رجال واريت الارض انشقا و تبلعني
المغرب اذن يا جنو انا امشي اصلي و بجيك بكره ان شاء الله الزمن فات شديد اعفي لي تاني،، قلت لي العفو ودا كلو يحكي وانا ابكي ما خليت دمعه واقشقش بالثوب لان مافي مناديل تمسح الوجع دا
مشي خالاني في حيره و في رهبه و قلبي مقبوض و قلت خسارة الحم والدم لو ما قفو معاك تسلخم من جلدك بلا ندم
حلاوة الدنيـــا في الطيبة وسمـــــــــاح الناس
وسماحه وسوحه في نخوه وجميل إحســــاس
ديار الغـــــــربة توريك في البشـــــــر أجنــاس
فيها الزين وفيها الشين وفيها اللا قعر لاراس
يتبع.....
