قصه منقوله
السلام عليكم بقولكم قصتي
مابي منكم تكذبوني ولا تصدقوني ابي بس أفضفض لانه احس بنفجر وتعبت
واللي بيقولي دعوه حلوه له بالمثل ان شاء..قبل ١٥ سنه بدت قصتي كان عند ابوي
انتداب للدمام ٤ ايام جيت انا واختي اللي اصغر مني وطلبناه نروح معه نغير جو كنّا تونا
خلصنا اختبارات وانا كنت بثاني جامعه ابوي الله يطول عمره وافق ورحت معه انا
واختي وامي مارضت تروح لانه جدتي تعبانه..
المهم اول يوم راح ابوي الدوام ورجع العصر وطلعنا ع الكورنيش كان الجو جميل والناس..
طالعه ومبسوطه تذكرون الكاميرا الرقميه؟،،كانت توها طالعه وقلت لأبوي بنروح انا
واختي نصور تحت ورا الحاجز كان فيه صخور ويقدرون الناس ينزلون لها اللي يبي يصيد
او يجلس تحت المهم رحنا بعيد شوي مكان مافيه ناس وشلت نقابي والطرحه واختي
تصورني و انا اصورها وكنّا نضحك ومبسوطين ولمحنا واحد واقف فوق يطالعنا ع طول انا واختي تغطينا...
ورجعنا عند ابوي وجلسنا عنده وكان ابوي يسولف مع هندي يبيع دهن عود ويسأله وكذا..
وانا واختي ندور الرجال لايكون لحقنا ولقيناه واقف بعيد وويطالعنا والله ياناس توني..
اشوفه زين طول وعرضت وسامه سبحان اللي خلقه كان الوقت ع المغرب شوي اختفى..
الرجال واذن المغرب وراح ابوي المسجد اللي ع طرف الكورنيش يصلي وانت واختي
صلينا مكانا وجلسنا ننتظر ابوي..دقايق الا ابوي وجاي معاه نفس الرجال اللي لحقنا ..
وراحوا جهة السياره ويسولفون وابوي يضحك واحنا على أعصابنا وبعدين جاء ابوي..
وهو راح وقعد يسولف يقول تعرفت على رجال كفو ويمدح فيه قلت يبه ما امداك تعرفه.
عشان تمدحه قال: اعرف عمه💔💔 صار عمه صديق ابوي ايام الجامعه هو جاء لابوي
وسولف معاه وعرفه بنفسه وابوي اشتبه بالاسم و ساله عن الرجال قال: ايه هذا عمي
اليوم الثاني كان عازم ابوي في بيتهم وراح لهم ابوي وكان يبينا معه..
بس احنا اعتذرنا قلنا مامعنا ملابس تصلح عزيمه قال نروح السوق وبعد رفضنا وابوي
طبعه مايغصبنا على شي المهم راح ابوي ورجع وصار يمدح فيهم اكثر وانا صراحه كان
عاجبني شكله ومن المدح حبيته ورجعنا الرياض وانا كل يوم أفكر فيه بعد اسبوعين
بالضبط جاء هو اهله الرياض وكلم ابوي ع اساس يسلم وحلف ابوي الا يزورونا وعزمهم
وجو عندنا امه وعمته وخواته ثنتين لاحظت امه وخواته مركزين علي..
يتبع >>
