Kun harus pa lang, ginakapoy na ako
Kapoy na ang akon bag-ang magpakuno-kuno sang yuhom
Ti-on na siguro para kakason ining nagakadlaw nga maskara
Nga nagaputos, nagatabon sa akon nagahiwaos nga nawong ---
Sa amat-amat nga pagmala sang akon mga luha.
Ginakapoy na ako nga kun sa id-id, ikaw ang dapat ginakapoy
Maghalin sa pamanagbanag asta sa kapahuwayan sang sidlak sa nakatundan,
Sa paminsaron ko, ikaw ang nagadalagan
Nangin kuba-kuba ikaw sining kasingkasing,
Nangin mapagros nga dugo nga nagapanalaytay sa akon kaunuran;
Bisan pilak indi makatubos sa yuhom nimo
Sa tagsa ka pagbadlak sinang pinasahi nga duag sa kadalumon
sang imo mga mata
Ikaw kag ikaw lang ang akon ginhigugma.
Kapoy na ako sagay tumbo-tumbo sa papag
Kada magtudok sa akon pang-inu-ino ang tanan mo nga ginapabatyag
Gintungtong mo sa akon ang korona,
Ginhakos mo ako padulong sa trono kay ako ang imo reyna
Ang pagdaplis sang imo mga tudlo sa akon butkon,
Ang imo pagtan-ay sang dako nga kalangkag kag kasadya
sa alibutod sang akon tagipusuon
'Tani, indi ka makapoy. Kuntani. . .
Apang daw sa ginkuyaban lang ang tanan.
Ginkapoy ka. Ambot --- apang ang nabatyagan ko, nanginpadlos ka
Ang kainit sang imo nga pang-abi-abi nabuslan sang malamig nga abaga
Maisog mo nga ginbuklas ang wagkos sang akon kamot sa imo lawas
Maisog mo nga ginpahipos, ginbuka --- indi lang sa duwa kundi sa pila ka minilyon --- ang akon tagipusuon
nga gasinggit sang pangalan mo.
Huo, ginpatungod ko ini sa imo nga imo halungan, amomahon,
kapyutan, palanggaon
Apang ngaa? Indi ko matandaan nga ginpasugtan ko ikaw nga ini ang wasayon.
Sa yadtong pagdaplis sang imo kamot sa akon butkon,
Amo na karon ang pagdanlog man sang luha nga kaina pa nagapamintana,
gapukwat-pukwat nga magahampang na sa akon guya,
magatika sa idalom sang maskara.
Ginakapoy na ako. Kapoy na sa pagwaslik kag pag-usik sang tinion
sa pagpilit nga mapainumbalik pa
ang nagkalabuka nga pudyot sang ispiho sang kahapon.
Kapoy na ako sa paglagas; kapoy na ako sa pagtindog sa doog
nga indi ko man ginaangkon
Kapoy na ako sa kada-tikatik sang orasan
Sa diin ka na karon matapos ang tanan?
Siguro malipayon ka na karon kay ako imo pinatumbayaan,
ginpilas asta maghimumugto ang akon dughan
Apang. . .
Ngaa ginakapoy ako, kay wala mo man ako ginsingganan
nga magdalagan?
Nga wala mo man ako ginsingganan nga palanggaon ka,
Kag ngaa ginasakitan ako karon kay tubtob san-o
indi man nangin kita?
-- xx --
My favorite poem ;)
I wrote this to join a competition in UP and bagged an award ;)
(Dami kong hugot dito wahaha ew)
This was also published on Busay --- the official publication of College of Arts and Sciences, UP Visayas.
Yey! Another Hiligaynon :)
BẠN ĐANG ĐỌC
Bring Back the Stanzas
Thơ CaUnmindful of the freezing wind That seeps through these Restless eyelids, Stomach that roars hunger; Throat that desires water, No. Listen to the soul beckoning, "I'm thirsty." Boldly. Passionately. You, too, should write like crazy. -- xx -- Tamba...