و دلال و داليا بقو يبكو مع بعض و مع امهم . .....يا جماعة ما تتشأمو بعد نعمل التزريع و نتاكد احتمال ما حاجة خطيرة .......بعدها رجعو البيت و ساقو معاهم ديما و ما جابو ليها سيرة حاجة ........و هي اساسا كانت مرهقة و تعبت من التفكير في الكلام القالتو ليها زينا صاحبتها طوالي مشو هي و خالد شقتهم و خالد ما صدق انو اتقفل عليهم باب الاتنين ......انتي حاولتي تعملي حاجة في البيبي ........خااالد ما وقتك و الله مصدعة عايزة انوم ......بس جاوبيني ......مستحيل اعمل حاجة زي دي من وراك اتطمن انا بالوقاحة دي .......خالد اتطمن بس برضو لسة ما للاخر لانو خايف من كلام الدكتور و ما قادر يتصرف اي تصرف ولا يقول اي كلام إلا بعد تظهر النتيجة النهائية ........ديما مجرد ما ختت راسها في المخدة نامت على طول بس خالد ما قدر ينوم .......الليل كلو بعاين لي ديما و هي نايمة ........بقى يفكر لو طلع عندها حاجة خطيرة لا سمح الله .......لالا ما بقدر اتخيل .......
حسنية الليل كلو تنقنق في عم الشاذلي حمتو النوم .......انت راجل ما بتخجل والله شفت اسي العملتو في بنت الناس حيجي في بتنا بالمرض الكعب .......انت ما عارف كما تدين تدان .......اها خلاص بقيتي مولانا فجاة و ليه ما تكوني انتي السبب بي سبب وسخك البتعمليهو من وراي ........حسنية اتصدمت و اتصلبت في مكانها و لسانا اتخرس .......ههههه قايلاني نايم على اضاني .......ما كلو منك .......انتي اساسا مراة قليلة ادب من عرفتك كلو مني شنو .......حسنية العبرة خنقتها و حست بالظلم .......طيب المقعدك معاي شنو وقت انا مراة فاجرة في نظرك .......البنات و بس دا المصبرني عليك ......حسنية بي غضب و هيجة قالت ليهو و الضمنك شنو انو ديل بناتك .......عم الشاذلي لاول مرة ينتبه للنقطة دي و حس بالصدمة و بقى يفكر مسافة .......حسنية نفضت السرير و شالت المفرش و طلعت خلتو ما مستوعب حاجة ........
دلال و داليا نامو مع بعض في غرفة دلال و هم كانو ببكو لما تعبو من البكا نامو في نفس الغرفة و ما قادرين يتخيلو انو يفقدو اختهم في يوم من الأيام ........داليا ختت كل خلافاتها مع ديما جانبا و بقت بس عايزة اختها تعيش حتى لو كعبة بس ما تموت بدري .......و طارق ما بقل حزنا من اخواتو و نفس الخوف على ديما و كمان بعاين للمخدة الجنبو كل شوية و حاسي انو فاقد حضن خنساء الكان ممكن تتطبطب عليهو و تشيل همو في وقت زي دا و حاسي وراها حاجة و ما فاهم الحاصل معاها شنو منتظر متين الواطة تصبح عشان يجري يشوفها ........كان اطول يوم في حياتهم ......
الصباح اول حاجة عملها طارق صلى الصبح على عجل و مشى بيت نسابتو قبل الواطة تصبح كويس .......فتح ليهو حسين الباب و رحب بيهو ......خنساء مما شافتو حست كانها شايفة راجل غريب عنها ما بتعرفو و دنقرت من الخجل .......خنساء ارح البسي عشان نرجع البيت ........سكتت و ما اتحركت من مكانها .......خنساء ارح اسرعي لانو في موضوع خطير حاصل مع ديما ربنا يجعلو خير .......موضوع شنو كدي قول نتيجة الفحوصات شنو .......قال ليها بي زعل و دنقر والله قالو شاكين في ورم في الرئة ......خنساء اتخلعت اعوذ بالله ربنا يحفظها ان شاء الله .. ....جات على طارق عشان تواسيهو مد ليها يديهو كانو بطالبها ّ.........خنساء ما قدرت تشوف طارق يديهو معلقات في الهواء و اترمت في في حضو و طارق بدا يبكي ......و خنساء برضو بكت لي بكا راجلها اول مراة تشوفو ببكي و لا دموعو تجري ......و هي بتبكي لي بكاهو و حسرات و عبرات كتيرة في قلبها ما عارفة تعمل شنو ......قعدتو في السرير التحت الشجرة و مشت جوة جابت الشاي و ابوها و امها جو سلمو و دخلو شربو الشاي جوة عشان يخلوهم يحلو مشاكلهم بي راحتهم .......خلاص يا خنساء ارح البسي عشان نمشي .......ختت الكباية و يدها بترجف انا اسفة يا طارق خليني هنا شوية .......طارق استغرب ليه يا خنساء في شنو انا زعلتك في حاجة ......لالا و الله بس ساي زهجت من البيت بقعد مع اهلي شوية و برجع .......خلاص يا ستي ما دام دي رغبتك ......انا مضطر امشي عشان نمشي المستشفى و نعمل اللازم .......خلاص بينا تلفون و طمني على الحاصل ......تمام .......
بعد كم يوم حصل الغير متوقع و المتوقع و طلعت النتيجة ايجابية للاسف و مؤكدة مخاوف الجميع .......و الدكتور قال ليهم لازم نعجل في العلاج قبل الورم ما ينتشر .......كانو لازم يكلمو ديما بالحاصل .......اساسا حست لما شافت امها و أخواتها و صحباتها ببكو .......في شنو يا جماعة انا عندي شنو حاموت ولا شنو .......و دلال و داليا بزيدو في البكا و خالد زاتو دموعو جرت بدون ما يشعر .......ديما لما عرفت الحاصل ما صدقت و ما استوعبت اي شي معقول هي كدا خلاص حياتها انتهت وحتموت ......قالت لي خالد خلاص ارتاح اساسا شئ يربطنا تاني مافي و الطفل و ما حيعيش و انا كمان حاريحك للاخر و ما حاعيش .......خالد مسكها من يدها حرام عليك ما تقولي كذا في امل تعيشي و ما مشكلة الطفل بنجيب غيرو .......غيرو مني انا ؟ لالا اكيد لا .......لالا يا ديما منك انتي اكيد و انا ما بفكر حاليا في غيرك ......لالا فكر و طلقني و ارتاح من الهم .......ديما اسكتي ما تتكلمي بالله .......ديما ختت يدها في راسها و بتبكي لمن صدعت .......ابوها جا قال ليها ما حتموتي حتعيشي و حتبقي كويسة و احسن من الاول انا بسفرك امريكا تتعالجي هناك بوديك اي مكان ما تشيلي هم .......في ممرض كان واقف بسمع فيهم قال ليهم يا جماعة مفروض تمشو طوالي لمستشفى ال(...) عشان تبدو إجراءات العلاج .......عم الشاذلي ما اشتغل بيهو نحن قلنا ليك نمشي اخر العالم عشان بتنا دي تتعالج .......طلبو من الدكتور يكتب ليهم تقرار متكامل عن حالتها و ابوها و اخوها بدو طوالي في إجراءات السفر و قررو انو امها و داليا و خالد يسافرو معاها و دلال و طارق يقعدو في البيت مع ابوهم .......
فعلا دا الحصل بعد كم يوم سافرو و عم الشاذلي دفع مبالغ طائلة عشان يعالج ديما بأي تمن .........ديما راودتها افكار كتير عن نهايتها و حتموت خلاص و تتلاشى ؟ معقول بالبساطة دي .........ليه كل الديانات بتقول في حياة بعد الموت ؟ عايزين يطمنو نفسهم و ما عايزين يتقبلوا حقيقة النهاية المحتومة الما منها رجعة .......اساسا كدا كدا حاموت بس ليييه انا اموت بدري كدا لسة ما شفت حياتي كويس و لا عشت كل شئ .......معقول تكون دي النهاية و بعد الموت حيكون في شنو .......طارق اتصل بي خنساء و قال ليها خلاص انا بجي اسوقك بعد كدا قالت ليهو لالا ......ليه لكن يا خنساء تاني حجتك شنو ما قنعتي من اهلك لسة .......لالا لسة خليني معاهم .......طيب يا ستي اقعدي شكلك كدا مليتي مني .......لالا والله ما مليت منك بس .......اها بس شنو الحاصل شنو ........قلت ليك ساي بس خليني شوية مع امي و ابوي .......طيب يا ستي خليتك بس انا مشتاق ليك انتي ما اشتقتي لي حبيبك ........خنساء سكتت مسافة ......طارق حس باستياء قال ليها واضح ما اشتقتي لي .......لالا والله بالعكس اشتقت ليك بس انا خايفة على ابوي و مراة حسين ما شغالة بي ناس امي و ابوي كتير و حسين مقويها علينا. .......اتحججت ليهو كتير رغم انو ما مقتنع و حس انو خنساء بتتهرب منو بس صبر عليها ........
يتبع....
