Belinda's Lover [R-18] [Completed]

[8] Belinda's Lover

CHAPTER EIGHT

"NASAAN ka na? Manonood ka sabi mo, 'di ba?" tanong sa kanya ni Kobe nang sagutin niya ang tawag nito.

Hindi naman naitago ni Billie ang ngiti niya habang naghihintay sila ni Tinie sa lobby para sa mga ka-meeting ng banda nila.

"Nandito pa 'ko sa station, hindi pa nagsisimula ang meeting namin."

Hindi nila pwedeng palampasin iyon ng mga kabanda niya dahil doon nakasalalay ang future ng career nila. May isang bigtime producer na interesadong i-produce ang musika nila abroad. Kung excited sila ng mga kabanda niya, e di lalong mas excited naman ang manager nilang si Tinie.

"Malapit nang magsimula ang laro namin. Gusto ko sana na nandito ka kapag nagsimula na kami para makahingi ako ng good luck kiss."

"Tumigil ka nga," namula ang pisnging pakli naman ni Billie. "Alam ko naman na kayang-kaya mo 'yan, e. Kayo pa ba ng kapatid ko?"

"I still want a kiss from my girl."

His girl daw, o. Halata ang pagiging possessive sa tono ni Kobe pero nakakatuwang kakaibang kilig naman ang hatid niyon sa kanya.

"Kapag nagkita na lang tayo. One hour lang naman ang meeting namin, e. Siguro makakaabot ako sa half-time. Okay na ba 'yon?" kagat-kagat ang ibabang labi sabi niya.

"Kapag nagkita tayo? Sure ka riyan, ha? Sisingilin talaga kita."

"Kung ipapangako mong mananalo kayo ngayong gabi."

"Mananalo kami. I'll see you later, Billie."

"I'll see you later."

Makahulugan ang naging ngiti ni Tinie sa kanya nang ibaba na niya ang kanyang cellphone.

"Kayo na? Break na kayo ni Aiden?"

"Hindi. Hindi. Binobola lang ako ni Kobe, ano ka ba?"

"Kaya pala ganyan na lang ang ngiti mo?" Sinundot pa siya nito sa tagiliran kaya napaigtad siya.

"Tinie, naman!" nanlaki ang mga matang saway niya.

Napabungisngis naman ang kaibigan niya.

NANG makarating si Billie sa coliseum para humabol sa kapatid at kay Kobe ay nakita niyang nagsisialisan na ang mga tao. Dumeretso siya sa dugout.

"Ate," si Ryon. "Ang aga mo. Sa isang araw pa ang next game namin."

She smiled guiltily.

"Pasensiya ka na talaga. 'Yong meeting kasi namin sa mga producer, e. Ang akala ko maaga kaming matatapos. Pero nanalo naman kayo, 'di ba?" Niyakap niya ang kapatid. "Congratulations! I'm really, really proud of you."

"Nagtatampo pa rin ako sa'yo," pabirong sabi naman ni Ryon nang marahang tapikin ang likod niya.

"Babawi na lang ako kapag napirmahan na namin 'yong record deal."

Mula sa pintuan ng dugout ay nakita niyang lumabas si Kobe. Napako naman ang mga mata nito sa kanya at matamis ang naging ngiti nito sa kanya.

"You made it."

"Na-late nga ako, e. 'Yong meeting kasi namin kanina."

"Alam kong importanteng meeting 'yon na hindi pwedeng palampasin. May next game pa naman, e. We're just happy na masasamahan mo pa rin kaming mag-celebrate."