Training To Love (Published under MPress)

Kabanata 13

Nagreply agad si Jayden!

Jayden:

Oh! Busy ka pala pag gabi. Hehe

Mahirap talagang di tumili! Lalo na pag umaapaw ng rainbow ang cellphone mo. Nag type agad ako ng reply.

"No!" Sabi ni Troy.

"Huh?"

Tinakpan niya ang cellphone ko.

"Sabi mo maniniwala ka na sakin, diba?"

Tumango ako.

"Mag reply ka after 5-10 minutes. Hindi ka pwedeng mag reply agad. That's another tactic."

"HUH?" I swear lalabas na yung eyeballs ko. "Talaga bang kasali yan, Troy?"

Umiling siya sa kawalan bago ako binalingan ulit, "Sa larong ito, Trisha, kailangan mo ng disiplina sa sarili. Alam kong nagkakandarapa ka kay Jayden. Alam kong atat kang makareply. Pero kung susundin mo ako, hinding-hindi ka na niya lulubayan ulit."

Tumango ako at sinubukang idisiplina nga ang sarili ko.

Pinaandar niya ang sasakyan niya at napansin ko agad na di papuntang bahay ang nilikuan namin.

"Saan tayo?" Tanong ko.

"Mag di-drive ako kung saan-saan hanggang sa matapos kayong mag text. Saka kita iuuwi."

Bakit parang naninikip ang dibdib ko sa sinabi niya? Bakit parang may nag li-leak doon? Hindi ko alam kung ano. Siguro dahil lang yun sa pag iisip ko na mahal ang gas ngayon... at kung gagawin niya ang sinasabi niya, mag-aaksaya lang siya.

"Talaga? Gusto mo bayaran ko ang gas mo?" Tanong ko.

Tumawa siya, "May rason kung bakit ako si Troy Ezekiel Salazar, Trisha." Sumulyap siya at kinilabutan ako sa ngiti niya.

Narealize kong magulo na pala ang buhok niya. At dahil magulo na ito, mas lalo siyang gumugwapo. Posible ba talaga yan? Ang alam ko, pumapangit ang mga tao pag magulo ang buhok nila. Pumapangit din sila pag galit pero bakit si Troy, hindi? He's dangerous.

"Replyan mo na. Sabihin mo hindi ka busy." Sabi niya nang nakitang natulala na ako sa mukha niya.

"O-Okay."

Ako:

Hindi naman ako busy. Haha

"Matagal akong nagrereply tapos sasabihin kong di ako busy, Troy? Bakit?" Tanong ko.

Ngumiti na naman siya, ngayon kinagat niya na ang labi niya.

DARN! Pwedeng itigil at maglakad na lang akong mag isa. Parang ayoko na yatang kasama si Troy lalo na pag ginagawa niya yan! Tinignan ko pa yung kamay niyang tamad na nakahawak sa manibela. Bakit parang lahat ng moves niya ay cool tignan? Bakit?