" ဘာမုန့်တွေ ၀ယ်ခဲ့တာလဲ "
လုဟယ့်ရန်က ရုတ်တရက် မေးသည်။သူ့ကိုယ်သူတောင် နားမလည်ခဲ့ပေ။ရွှီကျယ် တကယ်ပဲ စိတ်မကောင်းဖြစ်သွားတာလား ၊ အခြားတစ်ခုလား အတည်ပြုဖို့ရာ ရွှီကျယ့်ရဲ့လက်ရှိမျက်နှာကို လုဟယ့်ရန် ကြည့်ချင်ခဲ့သည်။
ရွှီကျယ်ဟာ ချက်ချင်း ခေါင်းမော့မလာလင့်ကစား လှုပ်ရှားမှုတွေ တုံ့ခနဲ ရပ်တန့်သွား၏။လက်ထဲမှာ ကိုင်ထားသည့် ကြွပ်ကြွပ်အိတ်ကြိုးကို တင်းကြပ်စွာ ဖျစ်ညှစ်လိုက်မိသည်။မေးခွန်းဖြေရန် အလွန်ခက်ခဲနေပါသည့်နှယ်။
သို့ပေတည့် ရွှီကျယ် ဖြေခဲ့ပါသည်။
" နို့ကြက်ဥပေါင်းပေါက်စီ "
လုဟယ့်ရန် ခပ်ယောင်ယောင်လေး မှင်တက်လျက် ထပ်မံ မေးမြန်းလိုက်သည်။
" နို့ကြက်ဥပေါင်းပေါက်စီ ? "
" အင်း "
အခန်းက ရုတ်ခြည်း တိတ်ဆိတ်ကျသွားသည်။လုဟယ့်ရန်က တီဗွီဖန်သားပြင်သို့ တစ်ဖန် အကြည့်ပြန်ပို့လိုက်၏။ခဏအကြာ မတ်တပ်ထရပ်ပြီး စားပွဲဆီ လျှောက်လာသည်။ယင်းနောက် လက်ကို ဆန့်လို့ ကြွပ်ကြွပ်အိတ်ကို ယူဖွင့်လိုက်သည်။အိတ်ထဲကမုန့်များက ပူနွေးနွေးလေးဖြစ်နေဆဲ။အနွေးဓါတ်က လက်ချောင်းထိပ်များကို လွှမ်းခြုံရစ်ထွေးလာလေသည်။အထဲတွင် နို့ကြက်ဥပေါင်းပေါက်စီတွေသာမက တခြားအသားပေါင်းတွေပါ ပါသည်။၎င်းတို့ကို အလွှာအထပ်ထပ်နှင့် သေချာ ထုပ်ပိုးထားသည့်အပြင် အပြင်ဘက်ကနေလည်း ကြွပ်ကြွပ်အိတ်သုံးလေးထပ်နှင့် ထုပ်ထားခြင်းကြောင့် ရေတစ်ပေါက်မျှ စိုခြင်းမရှိ။
လုဟယ့်ရန် ရွှီကျယ်ဆီ အကြည့်ပို့လိုက်သောအခါ ရွှီကျယ်က သူ့ကို ကြည့်နေနှင့်ခဲ့သည်။လျှပ်တစ်ပြက် အခိုက်အတန့်လေးဆိုသော်ငြား ရွှီကျယ့်မျက်၀န်းတွေက ဂရုတစိုက် အာရုံပြုနေခဲ့သည်။သူတို့နှစ်ဦး မျက်လုံးချင်းဆုံမိသွားချိန် ရွှီကျယ်ကအရင် အကြည့်လွှဲဖယ်လိုက်သည်။အာရုံပြောင်းဖုံးကွယ်သည့်သဘောဖြင့် သူ မေးလိုက်မိ၏။
YOU ARE READING
ယွိ့ယန်နန်ကျစ် {မြန်မာဘာသာပြန်}
Romanceမူရင်းဝတ္ထုအမည် - ယွိ့ယန်နန်ကျစ် မူရင်းစာရေးသူအမည် - မိုက့်ရှန်းကျီးနာ Alpha × Alpha လုဟယ့်ရန်(လေတပ်ဗိုလ်မှူး) × ရွှီကျယ်(စစ်ဆေးဆရာ၀န်) Both Gong and Shou are Alpha .
