اسكربتات ᥫ᭡

هالة أحمد♡.(١)

" الآخرة خير من الأولى .. 💛 "

" مَا وَدَّعَكَ رَبُّكَ وَمَا قَلَىٰ * وَلَلۡأٓخِرَةُ خَيۡرٞ لَّكَ مِنَ ٱلۡأُولَىٰ * وَلَسَوۡفَ يُعۡطِيكَ رَبُّكَ فَتَرۡضَىٰٓ "

- انتَ كويس يا يحيى؟

" هزيت راسي بـااه من غير ما ابصلها، قعدت جمبي وحضنتني وقالت:

= هو في مكان احسن، ربنا مش بيعملّنا حاجة وِحشة ابدًا يا يحيى

" بصتلها والدموع في عيوني، وقُلتلها:

- مِشي بسرعة يا ماريا، ماشبعتِش منه، ازاي مِشي بسرعة كدة من غير حتى ما نحس، والله ما مصدق لحد دلوقتي

" مسحت دموعها وقالت:

- معلش يا حبيبي، ربنا مش بيعملّنا غير الخير

" هزيت راسي وسِكت.

موت ابويا أثّر فيا اوي، كنت متعلّق بيه جدًا، وهو كمان كان متعلق بيا.

انا اصغر اخواتي، ابويا كان متجوز قبل أُمي وخلّف منها اخواتي الاربعة، ولما ماتت اتجوز أُمي، وخلّف ماريا وانا!
أُمي ماتت وهي بتولِدني، وابويا عاشلِنا الباقي من عمره، رغم ان هو وقتها كان كبير سِنًا، ابويا خلّفني وعُمره كان 55 سنة، وعشان احنا اصغر اخواتنا وأُمنّا ماتت ومالحقناش نشبع منها ابويا كان دايمًا حنَيّن علينا، كان بيعاملنا معاملة مختلفة عن باقي اخواتنا، ويمكن دا اللي ولِّد الغيرة، كنت بحِس انهم بيغيروا مننا ومن معاملة ابونا ليا انا واختي، رغم انهم كُبار عننا، يعني اصغر واحد في اخواتي من زوجة ابويا الاولى فرق بيني وبينه 20 سنة! ومع ذلك كنت بحِس ان دماغهم صغيرة، لكن ماريا كانت دايمًا تكدّب احساسي وانهم اخواتنا اكيد مش هيغيروا مننا، لحد ما في يوم سمعت حد من اخواتي كان بيعاتب ابويا انه بيحبّنا اكتر منهم، والدليل على كدة انه اتجوز بعد وفاة امهم، ولما امنا ماتت ماتجوزش وقعد ربّانا، ابويا فهّمه انه ماتجوزش عشان احنا كنا صغيرين ومحتاجين رعايته لينا، وكمان كان كِبر ومش عايز يتجوز، لكن لما امهم ماتت كانوا كبار في السن ومش صغيرين، ومقصّرش مع حد فيهم، لكن ماحدش فيهم كان عايز يفهم، واتأكد احساسي هنا.

على الرغم اننا كنا قاعدين في بيت واحد قبل ما اخواتي يتجوزوا، لكن كنت بحِس بغربة معاهم، مش حاسسهم اخواتي، حتى لما بيجولنا زيارات عشان ابويا، مش برتاح لنظراتهم ولا لكلامهم.

كبرنا انا واختي مع ابونا اللي عمره ما قصّر معانا، كنت دايمًا بخاف على ابويا؛ لانّي من ساعة ما وعِيت على الدنيا وهو كبير في السِن، كنت خايف يروح مني في لحظة، وعشان كدة كنت بحب اقضّي معاه اغلب وقتي، كنت بعتبره صاحبي مش ابويا، وهو عمره ما حسسني انه ابويا ولازم اخاف منه، لا احترمه من غير خوف، كنت بحكيله كل حاجة عني، حتى يارا حكيتله عنها ..