اسكربتات ᥫ᭡

تُقي بدر♡.

_ هسافر يعني هسافر.
_ ليه مالكيش كبير؟.
_ هفهمك، أنا حجزت التذكرة خلاص يرضيكِ تمنها يضيع عليا؟.
ملامحها أرتخت:
_ بكام؟.
_ حطيت فيها كُل فلوس الجمعية.
_ إيه! حرمان 3 سنين راح! أنتِ كنتِ أخدتى رأيي حتى؟ حسب يالله فيكِ.
_ بس درامة بقى، محسساني إنك كنتِ بتدفعهالي.
_ مافيش سفر برضو، الناس يقولوا عليا إيه وأنا سايبة بنتي في الغربه لوحدها!
_ ماما دول أسبوعين!
صرخت._ قولت لأ.
رديت بنبرة باكية:
_ طب هحطك في الشنطه طيب؟.
_ شششش، وبعدين أنتِ داخله على خطوبة، سفر إيه إللي بتفكري فيه؟
_ خطوبة مين إن شاء الله!
أبتسمت بسماجة._ خطوبتك.
_ وماحدش قالي ليه؟.
_ أنا قولتلك أهو، إبن صاحب بابا جاي يشرب معاكِ شاي بكرا.
جزيت على سناني وقربت منها:
_بزمتك شافني فين؟.
_ جاي عشان أخلاقك، اسم الله عليكِ.

يارب أي حاجة تحصل، أي معجزة تخلصني من الورطة دي والله لو ماكنت جرجرتها في الموضوع كنت هصحى بكرة أتفاجئ إنهم بيشربوا عليا شاي.
عايزة أطلع من العيلة دي، الروتين هيقتلني والله، عايزة مُغامرات عايزة أشوف أماكن جديدة عايزة أطلع من المنوفية
عايزة أعيط على الفلوس إللي هتضيع عليا دي.

روحتلها تاني:
_ ماما.
_ أبوكِ في الصالة برة، أقنعيه.
_ أنتِ عارفه إني عمري ماهعمل كدا.
رفعت حاجبها:
_ نفترض إني وافقت هتسافري من وراه؟
_ لأ، أنتِ هتعرفيه.
_ أنا ماليش دعوة بالموضوع دا، أنا باقيه على بيتي ومش عايزة أتطلق.

متخيل تعيش طول عمرك تحلم بزيارة لبلد معينة ويوم ما يتوفر معاك فلوسها تلاقي أهلك بيقولوا لاء؟.
طيب مش مهم الزيارة طيب وشخصيتي الرحالة؟ إللي مابتحبش تتهد في مكان واحد؛ ندفنها؟ .

_ مش صاحيه ومش هقابله ومش هتجوز ومش هاكل ومش عايزة أعيش أصلًا. 
_ مَولاتي.

مولاتي؟ أنا سمعت كلمة مولاتي.. فتحت نص عين بصيت للمكان حواليا.
مش أوضتي، مش سريري، مش بچامتي! إيه ريحة الفراولة دي فين ريحة زيت الطعمية إللي بصحى عليها كل يوم؟.

قُمت قعدت، بصيت للبنت إللي كانت بتصحيني، سألتها:
_ أنا مولاتك!    
ابتسمت_طبعًا.
_ معني كدا أنا أميرة.
_ إيه ياملك فيه إيه؟ 
كشرت_ إيه ملك دي مش بتقولي إني مولاتك.
شاورت لباب تقريبًا وراه حمام:
_ قومي أغسلي وشك، شكلك تعبانة ومش فاهمة بتعملي إيه.

سمعت كلامها ودخلت، غسلت وشي ووقفت قدام مراية الحوض أستوعب إللي بيحصل، بشرة صافية عمري ماكنت احلم بيها، شعري الهايش والقصير دلوقت طويل، بيچامتي قُماشتها تقريبًا حرير؛ المعجزة أتحققت؟ مُمكن.

خرجتلها_ أنا مَلك صح؟
_ فوقي بالله عليكِ إنهاردة مش طالب توهه.
_ ششش، اسمعيني.. أنتِ اسمك إيه؟
إتنهدت قبل ماترد_  رؤى.
_ طيب يارؤى.. خديني على قد عقلي يا ست إنتِ بتبصيلي بقرف ليه؟
_ أنا أقدر؟
_ ما أنتِ قادره أهو وناقصلك حبة وترجَعي عليا.
_ عايزة إيه ياملك.
_ أنا أميرة صح؟
أكدت كلامي بعينها فكملت:
_ وأنتِ؟ أختي؟
لوت بؤقها_ ياريت، أنا وصيفتك.
عليت صوتي_ خدامة يعني؟
_ إيه!
_ عمالة بتتنططي على إللي جابوني من الصبح ليه؟ وبعدين بتتكلمي معايا كدا ليه؟ فين إلاحترام فين الخضوع!
_ أنتِ غريبة، فيكِ إيه؟ ما أنتِ إللي طالبة مني أتعامل بالطريقة دي!
_ أنا!
_ أنا هنادي المَلِك.