يوم عادك تكره السبت وتحب الربوع

الجزء السادس

وقف وهو يلبس ثوبه ونطقت عايده:أمك اكيد تجيك
صقر اخذ شماغه يرتديه:تصرفي أنا مو موجود
عايده:ولايف وأختها بيجون وين بتروح صقر لا تجنني
صقر:بعزّي أبوها بروح المقبره
عايده:بتورط نفسك من يوم دخلت ولايف حياتك وانت تغامر ، بتفضح نفسك
مارد عليها صقر يتلثم بمشاغه ويثبته على عقاله ويخرج من الغرفه ونزل بسرعه يخرج من البيت وتوجه للدباب يترك خوذته ويركب بدونها ويرفع ثوبه ويركب ويشغله يخرج من البيت
ومشى دربه بالدباب لين توقف عند المسجد من بعيد يشوف الجثمان اللي مشوا به لداخل المسجد بسرعه وتقدم ينزل ويمشي بحذر ويدخل المسجد ويشوف الرجال وكثرتهم وتقدم يشوف نيّاف وبرّاك اللي واقفين بجانب عبدالله وتقدم يوقف بالصف الخلفي والتفت من دخل غازي المسجد وناظره بحده صقر يصد عنه مع الحشد
وكبّروا يصلّون عليها صلاة الميت وما ان انتهوا قاموا مباشره يخرجون بها للمقبره ومشى عبدالله مع برّاك ونيّاف يدخلون للمقبره وصقر مع الرجال يمشي معهم ويناظر غازي اللي يمشي على عكازه بينهم
وقف صقر يناظرهم عند القبر وضاقت به نفسه يناظرهم يقبرونها ، عقد حجاجه بضيق يذكر وفاة أبوه واللي عاشه واللي تكرر عليه الان
ناظر عبدالله اللي متلثم ويبكي بدون صوت وتساعدوا برّاك ونيّاف بالدفن وتقدم غازي يوقف بجانب عبدالله:عظّم الله أجرك يا أبو حميد
مارد عليه عبدالله يهز راسه ونطق غازي:معك غازي لو تذكرته
رفع عيونه برّاك على غازي:ماهو وقته
ناظره غازي يسكت ووقف برّاك بجانب عبدالله ووقف نيّاف ينفض يدينه من انتهى والتفت عبدالله من تقدموا يسلمون عليه الرجال ويدعون بالرحمه والصبر له ولذوي الميت
وتقدم صقر لهم ولف نيّاف وعرفه مباشره وارتبك وتقدم صقر يتخطى غازي اللي صاد وساكت وصافح عبدالله بدون كلمه ومشى من عندهم يدخل لداخل المقبره ولف نيّاف يراقبه ولف يشوف غازي اللي منشغل بعبدالله ويتكلم معه ويصبّره
غازي:حيّاك بيتي يا أبو حميد
برّاك:خله يرتاح مع بناته ، بناته يحتاجونه
غازي ناظر برّاك بحده لانه يسكتّه كل ما نطق بشي والتفت برّاك:حيّاك عمي أنا أوديك
مشى عبدالله يمسك ذراع برّاك بقوه ويخرج معه والتفت غازي على نيّاف يناظره بحده وناظره نيّاف بحذر ومشى غازي يخرج ولف نيّاف يشوف صقر اللي متوجه لقبر أبوه ، كان نهار السبت وجيّته كل سبت صارت عاده وهذا هو اليوم يعيش سبت اخر حزين
وقف نيّاف ينتظره ويشوف جلوسه عند القبر وحده ووقف صقر وناظر نيّاف من بعيد ومشى له ونطق نيّاف:وش قاعد تسوي وش جابك ؟ اللي يروح بيتك ما بيلقاك
صقر مارد يخرج من عنده وتأفف نيّاف يترك المقبره ويركب
ركب دبابه صقر وحرّك بسرعه من بين السيارات وتوجه لبيته يسبق وصولهم ودخل البيت بهدوء بدبابه ودخل الكراج وخرجت عايده بسرعه له ونطقت:ولايف وأختها داخل
مشى صقر من خلف البيت مع عايده ودخل من المطبخ والتفت يناظر الفرن اللي يشتغل دلالة ريحة الفطاير وشاف داخلها فطاير الزعتر وعقد حجاجه يذكر ولايف ومشى يدخل البيت خلسه مع عايده ويطلع للغرفه
'
لفت عليها صمود تمسح وجهها وتفوق من حزنها:ماودي ننام هنا
ولايف:بيتي
صمود:بيت سلوى و بيت ولدها
ناظرتها ولايف بحده:انتي باقي تحشمينها بعد اللي سوته ؟ وذا بيتي ماهو بيت ولدها بس
صمود:وينه هو طيب ؟ وش يسوي وحده ولايف
ولايف:ماعليه خلاف
صمود:شوفيه طيب
اخذت نفس ولايف ووقفت ومشت تطلع فوق وناظرت عايده اللي خارجه وتقدمت عايده:عظم الله أجرك ولايف
مشت من جانبها ودخلت الغرفه وناظرت صقر اللي خارج يجفف شعره ورفع عيونه من انتبه لها وناظرته ولايف:وين كنت ؟
صقر:أسوي واجبي
سكتت ولايف تناظره تقدم للتسريحه وهو يجفف شعره وناظرها من المرايه:أبوك على وصول مع غازي
ولايف:إنت كنت معه ؟
صقر:كنت بالمقبره
سكت يختصر كثير الكلام والتفت عليها:بيجونك الحين
ولايف:مابي احد يجيني
صقر:عزاء هذا وشو ماتبين أحد ؟
ولايف ناظرته تنفعل:ما أبي احد يعزيني ابي ارتاح مع أبوي وصمود بس
سكت صقر يناظرها ودخلت عايده:ولايف
لفت ولايف عليها وهي متكتفه ونطقت عايده:أبوك تحت معه غازي وأهل نيّاف وبرّاك وسلوى كلمتني هي على وصول
لفت ولايف تمسك راسها:لا حول ولا قوة الا بالله ، شيبون ليه يجون ؟
صقر لف على عايده يأشر على الباب ومشت تقفله ولف صقر عليها:ليه ما تبين ؟ عزاء وحق وواجب لأمك ثلاث ليالي
لفت ولايف وناظرته بحده:لأنكم انتم حرمتوني من أمي
عايده ناظرتها:ولايف هذا أمر الله سـ
لفت ولايف ترفع صوتها:انكتمي انتي واطلعي برا
سكتت عايده بخوف ومشت تخرج وتقدم صقر يناظر توترها وصدت بعيونها ولايف ونطق بهدوء:لا تخلين أبوك وحده
لفت ولايف تناظر عيونه بحده ومشت تتركه وتخرج
نزلت تحت تسمع الاصوات والضجيج ووقفت تناظر فواز ونيّاف اللي يحلفون على عبدالله
ونزل راسه بتعب عبدالله مافيه شدّه يجادل وكمّل فواز يمسك كفه:والله هذا واجب وحق وما حصل وتعارفنا لكن جيّتك من الغربه وموت مرتك واجب عليّ يا ابو حميد ، انك طيعني لا تردني
مسك دقن عبدالله يبوس كفه:انا فداء ذا الخشم
هز راسه عبدالله:ما تقصر ما تقصرون
لف فواز لنّياف:علّق الغنم وانا أبوك بالحوش
غازي:كذا والا كذا كنت باخذ منك غنم لأول أيام العزاء
فواز التفت لغازي:من سبق لبق مامنك قصور
ولايف:وش غنمه وش قصوره ؟
جلس عبدالله بتعب على الكنبه والتفت فواز:عظّم الله أجركم والله يرحم موتى المسلمين اجمعين وكلنا في هالطريق يابنتي
هزت راسها ولايف:امين ، ماكان له داعي جيّتكم
رفع عيونه غازي على ولايف ونطق فواز:حق وواجب ما نتركه وأم نيّاف الله يطول بعمرها سبقتك للمطبخ ، ودي تفتقدينها
تنهدت ولايف ولفت من دخلت سلوى وأميره وخلفها بناتها وتنهدت بتعب تصد وتقدمت سلوى:أحسن الله عزاكم ولايف
لفت ولايف تناظر سلوى بحده بعيونها وبلعت ريقها سلوى ومشت تدخل لداخل ولفت ولايف تناظر أميره اللي صوت كعبها يسبق خطواتها ورفعت عيونها تشوف شكلها اللي ما يناسب عزاء وتقدمت أميره:عظم الله أجركم
سكتت ولايف تناظر كحل عينها ورموشها ومشت أميره تتخطاها وتدخل وتقدمت أنفال تصافح ولايف:أحسن الله عزاكم
هزت راسها ولايف ومشت ولايف وتقدمت رجاوي تصافحها:عظّم الله أجركم
هزت راسها بدون رد ومشت رجاوي تدخل ولفت ولايف تناظر غازي اللي قاعد وفواز معهم وتقدمت لأبوها تناظره مرخي راسه وشماغه فوق راسه ورفعت كفها على ظهره:أبوي
ما رفع عينه عليها ينطق:لا تتركين أختك وعربانك ، ادخلي لهم
ناظرته تسمع نبرة الزعل منه وبلعت ريقها ونطق غازي:زعلان زعلان بيّن ويحق لك يا أبو حميد والله يوم عرفت ان ولايف تزوجت من وراك ولد أخوي اني ما رضيت أسكت وكأنها من بناتي حرقتني
رفعت عيونها ولايف بحده:انت جاي عشان تغث ابوي بهالوقت ؟ وش جابك ؟
لف فواز يناظر ولايف بصدمه من كلامها مع غازي بأسلوب ماشاف احد يعامل غازي فيه
عبدالله نطق:ولايف
ولايف وقفت بإعتدال تناظر غازي:والا جاي تسرق ورث يوم سمعت بطاري موت ؟ ماعندنا ورث وخذ عيالك وتوكل
رفع عيونه عبدالله بحده:ولايف
لفت ولايف على عبدالله تشوف غضبه ونطق غازي:محشوم يا أبو حميد محشوم
رفعت عيونها على غازي بحده ومشت تتركهم وناظرت عايده اللي تدفع صقر بكرسيّه متوجهه لهم وناظرها صقر ومشت تتجاهله ودخلت الصاله وناظرتهم جالسين وصمود بينهم
ونطقت نوف توقف:ما أمداني استناك جبت معي اغراض ، عظّم الله أجرك ولايف والله يرحمها ويغفر لها ويصبركم جميع
هزت راسها نوف وتقدمت ريم تصافحها:عظم الله أجركم
تنهدت ولايف ومشت تجلس بهدوء على الكنب ونطقت نوف:أبو نيّاف حرّص يجي معنا يوم عرف وجاب معه راسين من الغنم
ولايف هزت راسها:ماقصر
رفعت عيونها سلوى على ولايف وناظرتها ولايف بحده ونطقت نوف:ما شفت أختك من قبل
رفعت راسها صمود لنوف ونطقت نوف:أنا نوف عمّة صقر وهذي ريم بنتي
هزت راسها صمود بدون تتكلم ونطقت أميره:وهذا وقت تعارف يانوف الله يهديك البنات ميته أمهم
بلعت ريقها صمود تصد بعيونها عن أميره ورفعت عيونها ولايف على أميره:ولا وقت روج أحمر وكحل
ابتسمت نوف تناظر أميره ولفت سلوى على أميره وتقدمت أميره تناظر ولايف:هذا ردّ على وحده جايه تعزّيك ؟
ولايف:ماهو واجب منك انتي ورجّالك بالذات ماهو واجب
لفت أنفال على رجاوي بذهول ونطقت أميره:ما سوينا شي حتى بعزاء طلال كنت شايله كل شي تقولين اخوي ماهو اخو رجّالي
ولايف:تدورون درب تسرقونه ماهو ملحاً فيه
غطت فمها ريم بصدمه وابتسمت نوف تناظر ولايف ووقفت أميره:وقحه ولا تستاهلين عنوتي أنا وبناتي
لفت صمود تناظرها بذهول وناظرتها ولايف بدون رد ولفت أميره على بناتها ووقفوا معها ومشت تخرج وناظرتهم سلوى ولفت ولايف على سلوى:وانتي وش مقعدك ؟ ما انتي تبعهم اصلاً
سلوى:ولايف اعرف وضعك ونفسيتك بس لا تقلّين أدبك معي
ولايف لف على صمود:لها عين قدامك تجي وتعزّيك وهي مكذبه عليك
نزلت عيونها صمود بدون رد ورجعت ولايف تناظر سلوى:كذابه ونصابه وحده زيك ما ابيها تعزيني
رفعت حاجبينها نوف من الوضع ووقفت سلوى:بشوف صقر واروح وبعدّيها عشان وضعكم الصعب
ولايف:لا تعدينها خليها حرب بيني وبينك
سكتت سلوى تناظر ولايف ومشت تخرج وناظرت غازي اللي يسأل اميره بغضب:وش يعني تطردكم ؟
غمض عيونه عبدالله ورفع عيونه صقر يناظر أمه ونطقت سلوى:تعبانه نفسيتهم
غازي:سمعت يا ابو حميد بنتك ما تحشم لا رجّال ولا مَرَه
نيّاف وقف ونطق:معذورين تجون بيوم ثاني ان شاء الله
غازي:انت انطم محد كلمك
فواز رفع حاجبه:وش دخل نيّاف تجيه ؟
غازي:ولدك ماعرفت تربيه قعدت تربي في هالغنم وهالجحش ماربيته
نيّاف رفع عيونه بحده:من الجحش ؟
فواز:والله اني حاشم الرجال هذا اللي راجع من المقبره والا مالك حشيمه انت
غازي:لا تحشم لا تحشم
تنهدت أنفال بتعب من هواشهم ومشت تخرج من البيت ولحقتها رجاوي وخرج غازي خلفه أميره وسلوى وهو يهاوش
ركبت أنفال بتعب تحط راسها على الشباك وركبت رجاوي ورفعت عيونها أنفال من شافت غازي يتوجه للغنمتين اللي مربوطه بالشجره وفتح الحبل غازي يتركها تخرج من البيت وناظرته بذهول أنفال وشهقت رجاوي:شفيه ابوي
مشى غازي يركب بالسياره الاخرى ومعه سلوى وأميره وخرجوا من البيت
'
دخل برّاك واخذ نفس وناظرهم جالسين:وشبكم ؟ وين غازي ؟
نيّاف:خله يتوكل ياشيخ ما منه الا المشاكل
برّاك تقدم وناظر عبدالله وناظره ساكت:أنا داخل على الله ثم عليك ياعمي انك تتغدا معنا
نيّاف:اي غداء ابوي جايب معه راسين من الغنم ، انت خلك القابله تغديهم
التفت برّاك:وينها الغنم ؟ وديتها مصلخ ؟
فواز:وش مصلخه جبناها هنا نتعاون فيها انا ونيّاف
برّاك تلفت ورجع ناظرهم:هنا وين
نيّاف:انعميت ؟ بالحوش مربط طليين وشبك ؟
برّاك لف يناظر صقر بجنون ورجع ناظر نيّاف:والله اني ماشفت لا راس ولا راسين
فواز:أربّك ربطتهم ورا ؟
نيّاف وقف بجنون:اقول ربطتها في راس الدرجه ذي
مشى يخرج وجمد وجهه ما لقيها ومسك راسه:الغنم
ركض يخرج من البيت يدورهم وناظره برّاك يهز راسه بأسف وتقدم يجلس بجانب عبدالله وضرب كفوفه ببعضها فواز:ماعرف يربطها زين
رفع عيونه صقر على عبدالله اللي ساكت ماهو مع أحد وسكت برّاك من شاف حال عبدالله ورفع كفه على ظهره:قل لا اله الا الله ياعمي
بكى عبدالله مباشره بدون صوت يغطي وجهه بشماغه وانقبض قلب صقر من منظره ووقف فواز يتوجه له:اذكر الله يارجّال راحت للي ارحم منا كلنا ، انا فداء ذا الشيب يا ابو حميد
نطق عبدالله بين غصته:كانت طيبه والله انها كانت طيبه
تنهد برّاك يسكت ويصد عنهم وناظره صقر ونزل عيونه بوجع وحزن على وضعهم وجلس فواز بجانب عبدالله يصبّره وينصحه
ودخلت ولايف ولانت ملامحها من شافت عبدالله وهو مغطي وجهه بشماغه والتفت صقر عليها بإنتباه وبلعت غصتها تدخل:أبوي قوم معي
ماكانت تبيه يبكي قدام أحد ولا يكون بهالضعف والحاجه والتفت فواز:وأنا أبوك اتركيه يرتاح
ولايف:أبوي
مارد عبدالله يمسح بشماغه وجهه وتقدمت تمسك ذراعه تقومه وقام معها ومشت تخرج من عندهم وبكت وهي تمشي معه ومسحت دموعها بعشوائه تمشي معه ودخلت للغرفه ونطقت:مكان ما ترتاح
عبدالله:بيت ماهو بيتي ماني قاعد فيه
لفت عليه ولايف ومسحت دموعها:اي بيت ؟ المستاجر طلع عيوني ورفع علينا الايجار ولعب بعدّاد الكهرب عشان ياخذ منا اكثر ، اي بيت ؟ هذا بيتي وهو بيتك بيت بنتك
رفع عيونه عبدالله:اللي تزوجت بدون علمي ؟ عشان الريال ؟
تجمعت دموعها بعيونها تتكلم بغضب:الريال اللي بيعيشنا في بيت وبينومنا في سرر وبيعيشنا ناكل ونشرب هذا الريال ، الريال اللي جاب صمود لكم
ضربت الطاوله اللي قدامها تبكي بحرقه:وما جابني لكم
ناظرها عبدالله وبكت ولايف ولفت عليه تناظره:هذا الريال يا ابوي هذا الريال
عبدالله:الله ياخذني دامني أحوجتكم
تقدمت له تحضنه وهي تبكي:تبي تعيشني بدونك وبدون أمي ؟
بكى عبدالله وميلت راسها على كتفه وهي تبكي بحرقه وشوق له وشوق لأمها
'
حرّك القدر بتعب وثقل ولف يناظر صقر اللي قاعد ونظق:قاعد كأنك لبناني بهالشعر وهاللون
لف برّاك اللي يقطع اللحم وابتسم:عشانه ما يتكلم تطقطق عليه
فواز ناظرهم:اقول سدّها يا نيّاف والله ان صقر يسواكم ولبناني مدحه ،  ان انقالت لي لبناني ما اشتحنت
ضحك برّاك:انت الأب الروحي لصقر
لف فواز على صقر وابتسم وتقدم يمسك خشمه ويبوس كفه بعد ما مسك خشمه ولانت ملامح صقر للإبتسام ورفع عيونه فواز:هاه انجز يانيّاف انجز خل العرب يتعشون ويرقدون
نيّاف هز راسه وهو يطبخ مع برّاك ورفع عيونه برّاك وهو ياكل من اللحم اللي يقطعه وناظر البلكونه ووقوف صمود فيها
ناظرته من انتبه لها ومشت ترجع تدخل وناظرت ولايف اللي جالسه:أبوي نام متأكده ؟
ولايف:لا بس بيرتاح وحده
نوف:لا تخلينه وحده ماهو زين يقعد يفتكر خليه يطلع معهم ينشغل باله
دخلت ريم ومدت لامها:يمه كذا افرمها ؟
نوف ناظرت السلطه وهزت راسها:ايوا كملي
تقدمت صمود:بجي اساعدك
ريم:لا والله ما تجين انا خلصت ارتاحي
ابتسمت صمود بخفوت وجلست بجانب ولايف وناظرتهم نوف:هاه انا بقول ذا الكلام لكن لا تقولون تجامل والا تكذب علينا والله اني صادقه فيه
رفعت عيونها ولايف ونطقت نوف تكمل:راحت أمكم لكني بدالها ، ان احتجتم شي والا قصر عليكم شي والا فقدتم من يرعاكم أنا موجوده
صدت بعيونها ولايف ما تبي تسمع هذا الكلام أبد وتحس بنقصها وحاجتها وكملت ولايف:سمعت ياولايف ؟ ما بتوقفين وحدك من الحين أنا معك وجنبك قدام غازي والا قدام اي احد ما بخليك
لفت على صمود:وانتي ياصمود اللي تحتاجينه قوليه عندي مثل ريم لا يقصرك شي ، أمانه عليكم يابنات
صمود هزت راسها بتعب:ما تقصرين
ماردت ولايف وهي صاده بعيونها وساكته وتنحنح برّاك وعدلت حجابها صمود ودخل بصحن العشاء وابتسمت نوف:الله يسعدك يابرّاك
ابتسم برّاك بتعب يحطه بالارض ويرفع راسه وناظر نوف:بالعافيه
نوف ابتسمت:عقبال زواجك ياحبيبي
رفع حجاجه برّاك ولف على ولايف وصمود:نادوا ابوكم يتعشى
وقفت ولايف تتركهم وتدخل وناظر صمود:لا تستحين من شي هذا بيت صقر لا يقصركم شي انتي وولايف
ماردت عليه صمود تصد بعيونها ولفت نوف على برّاك تناظره وتنهد ومشى يخرج تاركهم ولف من نطقت ريم:خالي برّاك
لف وابتسم:هلا هلا ريم
تقدمت تسلم عليه وابتسمت:ماصرت اشوفك الا بسناب
ضحك برّاك:كبرتي والله احلويتي وش يعطونك بالديره ماشاء الله
ضحكت ريم:عندنا بنات حلوات بعد تبي اخطب لك على ذوقي ؟
برّاك:بشرد احسن لي
ضحكت ريم ومشى برّاك يخرج وناظر فواز اللي قعد على الارض وبجانبه نيّاف اللي يحط بصحن لصقر ووقف برّاك ينتظر عبدالله
خرجت ولايف وهي ماسكه ذراع عبدالله ونزلت مع الدرج للحوش ورفع عيونه صقر يناظرهم ومشى عبدالله بتعب:جاد الله عليك يا أبو نيّاف
فواز:واجب واجب
برّاك:جبنا بدال الاثنين اربع
ضحك عبدالله بخفوت وناظر نيّاف:راحت الاولى ؟
ولفت ولايف براحه تناظر ابتسامة عبدالله
نيّاف:اي والله مالقيتها والله اني ربطتها زين لكن
برّاك:حيّاك ياعمي حيّاك
جلس عبدالله ولفت ولايف تناظر صقر اللي يناظرها ولابس ثوبه الشتوي وشماغه على كتوفه ومشت تتركهم وتدخل وتقدمت نيّاف لصقر يجلس عنده ويأكله وناظره صقر وابتسم نيّاف:اجحدها بعدين
مارد صقر وهو ياكل من يد نيّاف ورفع عيونه عبدالله على صقر يناظره ونطق:ما ياكل وحده ؟
فواز:لا والله أدنى شي ما يسويه
سكت عبدالله يناظر صقر وانتبه على نظراته صقر يشعر بحزنه على بنته اللي مصيرها أصبح معه ونطق برّاك:قبل كان صقر ما يخلي شي بالارض ما يسويه ماشاء الله عليه
عبدالله لف عليه:ماهو كذا من يوم ولد ؟
فواز:لا لا قريب انتكس خمس سنين
برّاك:كان يدرس طب تخرج امتياز دكتور جرّاح
رفع حاجبينه عبدالله وهز راسه فواز ولف على صقر:بيقوم الذيب بيقوم ان شاء الله
لف عبدالله يناظر صقر وناظره صقر بهدوء وتنحنح نيّاف يناظر نظرات عبدالله لصقر
'
وقفت ولايف بهدوء متكتفه تناظرهم خارجين وتقدم برّاك لعبدالله وانحنى بيبوس راسه ووقف عبدالله:أنا بسلم على راسك
رفع عيونه صقر يناظرهم وانصدم برّاك:لا والله العين ما تعلا على الحاجب ياعمي
عبدالله:ماقصرت معنا وقفتك وقفة رجّال
ابتسم برّاك ولفت تناظرهم صمود اللي واقفه بجانب ولايف ونوف
وكمّل عبدالله:جعل من ربّاك بالجنه
هز راسه برّاك:اللهم امين ، ان احتجت شي كلمني ياعمي اعتبرني ولدك
هز راسه بتعب عبدالله ولف لفواز ونيّاف:ماقصرت أبو نيّاف نردها بزواج ولدك ان شاء الله
ابتسم فواز:الله يبلغنا بالافراح أجميعن واخر الأحزان بإذن الله
بلعت ريقها ولايف وهي صاده بعيونه ونطقت نوف:بنمشي ان احتجتم شي كلموني
هزت راسها صمود ومشوا يخرجون من البيت وكأن من قبض قلب ولايف من ضيقتها بعد مغادرة الجميع من البيت وجلس عبدالله يشعر بحزنه بعد وحدته ولفت صمود تناظرهم ومشت تتركهم
وبلعت ريقها ولايف وتقدمت:ادخل ريّح أبوي
هز راسه عبدالله ولف على صقر:لا تتركينه جويع ، ما أكل زين معهم
هزت راسها ولايف ووقف عبدالله وهو يناظر صقر:ارفقي فيه ماله حيله
ماردت ولايف ومشى عبدالله بهدوء يتركهم ولفت ولايف على صقر تناظره ونطقت بهدوء:تبي تطلع للغرفه ؟
هز راسه صقر ومشت ولايف تدفعه وتدخل المصعد ووقفت خلفه ونزلت راسها تحبس عبرتها وإختناقها وخرجت فيه تدفعه للغرفه ودخلت تحطه عند الباب وتتركه وناظرها صقر تمشي بتعب وتجرّ رجلينها والتفت يقفل الباب ويوقف على حيله ويمشي لها
تقدمت وجلست على الكنب وميلت راسها عليها تناظر البلكونه
وناظرها صقر وهو واقف يعرف ان سوء مشاعر الفقد هي بعد ما يتركون الناس المكان ويختلي بهم الحال بين رفوف الذكريات والوقوف على الأطلال
ناظرت البلكونه ولايف تذكر لحظه ما نستها مع أمها
" دخلت عليها المطبخ وناظرتها تعجن ومن انتبهت منى عليها فزّت وضحكت ولايف:بتحطين لي زعتر صح ؟ يمه تكفين والله ما ادانيه
ضحكت منى تكمل عجينتها وتقدمت ولايف:يمه ابي جبن والا بيض ، الا الزعتر
منى:تحبينه اذا تعودتي عليه تحبينه
ولايف:الحب من الله ماهو غصب
منى:تزوجت ابوك ما اعرفه ويوم تعودت عليه حبيته
ولايف:بس الزعتر مو زوجي
ضحكت منى وهي تعجن:عاونيني
غسلت يدها ولايف وتقدمت تكمل العجين ونطقت منى:ان شاء الله عيالك يجون يحبونه وانا اسوي لهم
ولايف:ما بتزوج بقعد معك
منى:اذا جانا واحد فيه الخير بزوجك ما بخليك
ولايف:اذا بتزوج بتزوج عشانك بس
ابتسمت منى وهي تحشي المعجنات وتقدمت ولايف تبوس خدها "
بكت بدون صوت ولايف وهي تناظر البلكونه من مكانها وتنهد صقر ومشى وجلس بجانبها وناظر البلكونه معها:ما كنت بمنعك عنها أبد
ماردت ولايف وهي تبكي بهدوء والتفت عليها صقر:والله العالم ماكنت بحرمك لكن ربي له حكمه
ميّل راسه صقر:في كل شي حكمه وأنا راح ابوي وانا مشتاق له
بلع ريقه يتذكر سوء ذكرياته ونزل راسه:راح وأنا بعيد ، وموتته ماهي هيّنه والله ماهي هيّنه
عقد حجاجه بألم:يقولون طاح من الجبل
لفت ولايف عليه وعقدت حجاجها وكمّل صقر يناظرها:اسألك بالله ليه رجّال كبير بيطيح من الجبل ؟
جلست ولايف ومسحت دموعها تناظره وكمّل صقر:شالوه انتشلوه بعد يومين من جوف الجبل ميّت
رفع كفه على جبينه من حسّ بغصته وإختناقه لأول مره يشرح لأحد اللي عاشه وناظر ولايف:كانت ذراعه اليمين عشاء للذيابه والكلاب
جمد وجه ولايف تسمعه وتناظره وبلع ريقه صقر يلتفت للبلكونه ويشد قبضة يده بقوه:كانوا ياكلون منه حثالة الحيوانات وأنا مسافر أدرس الله يلعن الدراسه
رفع راسه يختنق من ذكرياته ولف على ولايف:أبوي كان طيّب والله كان طيّب
تنهدت ولايف بتعب ورفعت كفها على ظهره وناظرها صقر:أعرف وش يعني تفقدين طيّب
بكت ولايف بدون صوت وهي تناظره ورفعت كتفها:سنتين ما شفتها
سكت صقر يناظرها تبكي وشهقت بتعب ولايف:صقر صقر
تقدم لها صقر يسمعها تناديه من ثقل الحزن وحجمه داخلها واخذها لحضنه ورفعت ذراعينها تحتضنه ولايف بضعف
وغمض عيونه صقر يسمع نحيب بكاها وونين صوتها واقترب منها أكثر وهو يحتضنها ، ماكان حضنهم عاطفي قدر ما يكون إحتياج ، اذا كان الألم محسوس من شخص آخر بيكون أكثر للإحتياج ، نفس الألم نفس الفقد نفس الوجع والنهايه اللي توجع اثنينهم
ميّلت راسها ولايف على كتفه وهي تبكي بشدّه تحتاج لمثل هذا الإحتواء بدون ما تكون بهذيك القوه والقسوه والقدره تبي تكون بهذا الضعف بهذي الطاقه الأدنى بهذا التعب وتوقف كل معاركها على يمينها وتحط براسها على كتف يسند راسها وهمّها ووجعها
كان هو يناظر الفراغ بهدوء ويعيد اعترافه علن وجهر بحادثة موت أبوه لأول مره لانه ما قدر يحكي لأحد من قبل او يشرح او يفضفض لكنه شعر بإنه لازم يتكلم لها وتعرف وش يحسّ ويشعر وش وجعه وسوء أيامه
ابتعدت ولايف عنه وهي ماسكه ذراعينه وناظرت عيونه وناظرها صقر بوجع ما سبق شافه منها وبدموع ووجه حزين ما رسمته من قبل لعيونه وبلع ريقه يناظرها تترك ذراعينه وتبتعد عنه واخذ نفس يصد عنها براسه ويقوم من جانبها يتركها ويدخل للحمام
وقفل الباب والتفت للمغسله ورفع راسه يناظر وجهه بالمرايه ينعاد عليه بشاعة السبت اللي عاشه وكيف جاه خبر بفقدان أبوه ورجع من سفرته يقطعها وبأول وصوله يعرف إنه جثه هامده بجبل ملعون يجهل كيف طاح في أسفله
دخل على المغسله إجباراً رغم رفض العاملين لسوء وضع طلال لكن دخل وشافه في أبشع حاله ، ميّت لكن مات على تعب وعلى ذله وضعف ، تجمعوا عليه ذيابه ماقدر يقوم على حيله تعفّنت يدينه من اليومين اللي قضاه بأسفل الجبل
غمض عيونه صقر يذكر اخر لحظه شاف فيها طلال قبل يسافر وجلوسه معه في البيت ينطق:هاه أبو صقر لا تقصر بالدعوات هي دوره بحضرها وارجع
سلوى:بتفيدك يعني ؟
صقر:أكيد والا ماكان تعنّيت
طلال:وين ماكان رزقك الحقه ما بيجيك بجنوب السعوديه
ابتسم صقر:صقر طلال يجيب اللي ما ينجاب
ضحك طلال وتقدم صقر يبوس راسه ويجلس بجانبه وهز راسه طلال:الصقر طير حرّ  ، وإنت صقر طلال
ابتسم صقر يسمعه وكمّل طلال:وإن رجعت بكلّم غازي نروح ناخذ بنته الصغيره
صقر:تكفى الا في هذي ما بمشي معك
سلوى:وأنا معه وش نبي نروح لغازي وأميره فكنا منهم
طلال:ليه وشفيه غازي ؟ والله انه يغليني وأنا أغليه هو عصبي وشينه أطباعه بس يحبني ويحبك
صقر:أنا ماشفت منه حب
طلال:إنت أعمى ماتشوف
لف صقر وابتسم:أنا صقر والصقر نظره ما يخيب
ضحك طلال من صك عليه صقر وضربه على راسه وابتسم صقر:توصي شي ؟
سكت طلال يناظره بهدوء ووقفت سلوى:انتبه على نفسك ولا تهمل أكلك
وقف صقر ومشى لسلوى يحضنها وابتسمت سلوى:استودعتك الله
باس راسها والتفت لطلال وفتح يدينه طلال وحضنه صقر يضحك:بشتاق لك
طلال ابتسم:ان شفت بن درويش رجّال عمتك سلّم عليه
عقد حجاجه صقر يبتعد عنه:وين اشوف خالي فواز ؟ انت بتشوفه
طلال:والله مدري اشوفه والا لا
صقر:ان كان الدرب عليك طويل اكلّم نيّاف ياخذك وتروح لهم الديره
طلال:أشوف أشوف
صقر لف لسلوى:يمه دعواتك
هزت راسها سلوى:الله يسهل عليك يارب
مشى صقر يخرج من البيت وخرج طلال يوقف عند الباب ونطق:صقر طلال
لف صقر بإنتباه:اسلم
تقدم طلال له ودخل يده بجيبه ومسك ذراعه صقر:لا والله ما تجيني
طلال غمز له:انك طيعني وخذها تحتاجها
تقدم صقر وباس راسه:لا والله ما تقصر
ابتسم طلال ومشى صقر وحط شنطته بالخلف والتفت يناظر طلال من بعيد ورفع كفه وابتسم له ، ورفع كفه طلال وركب صقر يخرج من البيت
رفع عيونه صقر على المرايه من جديد من تخالطت محاجر عيونه بدموعه وفتح المويه يغسل وجهه عن ذكرياته وأوجاعه ورفع راسه يمسح وجهه ويخرج من الحمام وناظر ولايف اللي منسدحه ونايمه وتقدم يناظرها نايمه بتعب وكأنها كانت في جهاد
'
فتحت عيونها بتعب وناظرت الغرفه والتفتت بعيونها تناظر صقر اللي نايم بجانبها وسكنت ملامحها تناظر غفوته وراحته في نومته وتذكرت اللي قاله وسمعته منه
صدت بعيونها تقوم من السرير وتمشي للحمام وتغسل وتخرج وتلم شعرها وتغير ملابسها وتخرج من الغرفه
نزلت وناظرت عبدالله جالس بالصاله ويناظر المطل من مكانه وتقدمت له بحنيّه لوجوده أمام عيونها وابتسمت:أبو ولايف
لف عبدالله عليها وتقدمت له تبوس راسه وجلست بجانبه تمسك كفه وتتأمله:ما نمت ؟ ما استرحت ؟
هز راسه عبدالله:حمدلله
ناظرته بحزن ولايف تتأمله ورفعت كفها على لحيته:محد يحفّها لك ، اليوم أقصرها
عبدالله:خليك مني افتقدي رجّالك مسكين
ولايف:ماعليه خلاف أبوي
عبدالله:قام ؟ من بياخذه لو قام
تنهدت ولايف ووقفت:عيّاده ، انا بجهز لك الفطور بنفسي تاكل اللي تحبه من يديني
ناظرها عبدالله وابتسمت له ولايف ومشت بتخرج ولفت:صمود ماقامت ؟
عبدالله:ماشفتها ولا جاتني
هزت راسها وخرجت يتجدد داخلها طاقه بوجود أهلها معها ودخلت المطبخ وناظرت عايده ولفت عايده:ولايف ! صباح الخير
ولايف:اتركي كل شي روحي لصقر
هزت راسها عايده تخرج وتقدمت ولايف تطلع العجين وتعجن عجين خبز وتسويه بيدينها على الصاج وتسوي البيض بالطماطم واللبنه والعسل وطبخت الفول بنفسها تطحنه وتكشّن له وتحطه بالصحون
وناظرت كل شي يجهز ورفعت عيونها من دخلت عايده بذهول:الريحه خياليه ماشاء الله
ابتسمت بهدوء ولايف وهزت راسها:ودي كل شي لهم
هزت راسها عايده ومسحت يدينها ولايف تخرج وناظرت صقر اللي جالس مع عبدالله اللي يفتقده بعيونه وتقدمت:سويت لك كل شي من يدي أبي أشبعك
مارد عبدالله وهو يتمعّن بصقر ولفت ولايف تناظر صقر اللي يناظره ونطقت:وش تطالع ؟
عبدالله هز راسه ولف لولايف:مزيون الولد
لانت ملامح صقر للإبتسام من تعليق عبدالله ولفت ولايف بضحكه تناظر صقر اللي رفع عيونه عليها ورجعت ناظرت عبدالله:مزيون بس وش يفيده الزين
جلست ولفت على صقر تكمّل:معاق
ناظرها صقر تستفزه وأخفى ضحكته داخله منها ورفعت عيونها ولايف على عبدالله:مو تحب الفول اللي اسويه ؟ سويته لك
عبدالله هز راسه ولف على صقر من جديد وتنهدت ولايف بتعب:ابوي انت ما اشتقت تتأملني انا ؟
عبدالله التفت عليها:ليه ما يتكلم ؟
ولايف ناظرت الفطور من حطته عايده:ما ودّه
نزل عيونه صقر للفطور من انتشرت ريحته الشهيّه بالمكان كان دايم فطوره معلبّات وخبز جاهز ماله طعم حتى لكن هالمره الفطور كان شهّي لدرجة وده ياكل بيديه وبنفسه
ناظر الخبز المقمّر ورفع عيونه على ولايف اللي ابتسمت تقطع الخبز لأبوها وتمدّ له ولفت على عايده:شوفي صمود معك
هزت راسها عايده ومشت تتركهم ونطق عبدالله:ما بتعطين هالضعيف ياكل ؟
اكلت ولايف:تجي عيّاده تعطيه ، باكل
عبدالله:ان ما عطيتيه والله لأعطيه
رفعت عيونها ولايف بصدمه:ابوي قلت باكل واعطيه
عبدالله:لا عطي هالضعيف لا يقعد يطالع فينا واحنا ناكل
تنهدت ولايف ولفت تناظر صقر اللي يناظرها وتقدمت تجلس بجانبه وهز راسه عبدالله براحه من قطعت الخبز تغمسه بالفول وتعطي صقر ياكل
ودخلت عايده:ماهي بغرفتها
عقدت حجاجها ولايف تلتفت وناظرت ابوها من جديد:بشوفها واجي
وقفت وناظرت عايده:عطي صقر يفطر
هزت راسها عايده تقعد وناظرها عبدالله وهمس:ولايف بنتي
رفعت عيونها عايده بإنتباه وكمّل عبدالله:تعتني في هالضعيف والا لا ؟
ابتسم بخفوت صقر يناظر طيبة عبدالله وإهتمامه وهزت راسها عايده تضحك:أكثر مني
هز راسه براحه عبدالله ورجع يفطر ولفت عايده على صقر تبتسم له
'
مشت ولايف تدور بالبيت وعقدت حجاجها وتقدمت تخرج مع البلكونه وناظرت صمود بالحوش واخذت نفس ومشت تنزل وتخرج من البيت وتقدمت لصمود اللي تمشي بالحوش:صمود
لفت صمود على ولايف وتنهدت تصدّ عنها وتقدمت لها ولايف:وش طلعك بهذا الوقت ؟ تعالي افطري
صمود:مالي نفس
عقدت حجاجها ولايف تبعد خصل شعرها عن وجهها:ليه ؟ مانمتي زين ؟
صمود:لا أنا ولا أبوي ، بننام زين ببيتنا
رفعت حاجبينها ولايف وتكتفت توقف:أي بيت ؟
صمود تنهدت ولفت على ولايف:أي بيت الا هذا البيت لانه مو بيتنا
ولايف هزت راسها:ماهو بيتكم ، بيتي أنا وانتي تعرفين ان ماعندنا بيت غير اللي كنا مستاجرينه والحين ماهو موجود بعد
عقدت حجاجها صمود تتقدم لها:وش بيصير يعني ؟ بنقعد هنا عند سلوى بعد اللي سوته فينا
ولايف:ليه مو مستوعبه انه بيتي ، سلوى مالها شغل فينا
صمود:اي بيت الله يخليك ولايف ، هذا بيت ولدها وبيتهم كلهم مالنا شي فيه ، لا تخلينا نقعد مع ناس هم السبب بكل شي صعب
ولايف:وش الصعب اللي عشتيه ؟ أنا بس اللي عشت الصعب
صمود تنهدت تصد بعيونها وكملت ولايف:حقك من سلوى اخذته بيديني هذي واللي بيوقف بوجهك من جديد باخذ حقك منه بعد ومحنا قاعدين عند احد هذا بيتي وحلالي
صمود:حلالك ؟ من من ؟ من زوجك المعاق اللي داخل كلمه ما يقدر يقولها يدافع عنك ما يقدر ، حتى حقك منه يعزّي أبوي في أمي ما صار
سكتت ولايف تذكر صقر اللي كان موجود مع أبوها ودافع عنها عند عامر وغازي وقال لها كل الكلام اللي تبي تسمعه
وكمَلت صمود:بتقعدين لين متى اصلاً ؟ خلاص اللي بغيناه منهم صار وشتبين تقعدين مع واحد معاق
ماردت ولايف وهي تناظر صمود وتقدمت صمود تمسك كتوفها:لا تظلمين نفسك بهالعيشه عشان ريال انتي تستاهلين تتزوجين الافضل وتعيشين الاحسن ولا هالمذله من سلوى وأهلها
ولايف سكتت تناظر صمود وسكتت صمود تتأمل ولايف ومشت ولايف تتركها:تعالي افطري
تنهدت صمود تشوفها تتجاهلها وتعطيها ظهرها وتدخل البيت ودخلت ولايف ومشت تدخل الصاله وجلست وهي هاديه وناظرها عبدالله:لقيتي اختك ؟
هزت راسها ولايف وهي ساكته ورفع عيونه صقر عليها تناظر الفطور وهاديه ودخلت صمود تلف حجابها:سلام عليكم
لفت عايده عليها ترد السلام وجلست صمود بجانب عبدالله تفطر معه ورفعت عيونها ولايف تناظرهم وهي هاديه وساكته وصدت بعيونها للشبابيك ولفت من وقفت عايده بتاخذ صقر ونطقت ولايف:اقعدي انا اخذه
ناظرتها ولايف ورفعت عيونها صمود عليهم وناظرت صقر اللي يناظر ولايف وتقدمت توقف خلف صقر وتاخذه وتدفعه للمصعد ودخلت فيه وسكتت تخرج معه من انفتح المصعد ودخلت الغرفه ونطق صقر:انا لازم اخرج
لفت عليه وعقدت حجاجها وقفلت الباب:وين ؟
وقف صقر ولف على الباب:عندي شغل
ولايف:اي شغل ؟
لف صقر عليها بإستغراب وتكتفت ولايف تنتظر جوابه وهز راسه صقر:تحقيق ذا ؟
ولايف:من بيطلعك من هنا بدون محد يشوفك ؟ مو أنا ؟ اي انا ماني عيّاده أنا ولايف بتقولي وين والا ما انت رايح
صقر:مابنتظرك تطلعيني
رفعت كفها على الباب ولايف وسكت صقر يناظرها ورفعت حاجبها تشوفه لا زال واقف
ودق الباب ورجع للخلف صقر من دخلت عايده وناظرت ولايف بخوف:الشرطه
عقدت حجاجها ولايف وتقدم صقر بصدمه:وش يبون ؟
عايده:ولايف
لفت ولايف على صقر ومشت تخرج ونطق صقر لعايده:خرجيني
مشت ولايف تنزل مع الدرج وناظرت عبدالله وصموذ اللي جالسين والواضح ماعندهم علم ومشت تخرج من البيت وناظرت الشرطي اللي عند الدرج ونزلت ووقفت عنده:أنا ولايف
خرجت عايده بصقر ووقفت عند الدرج تناظرهم وهز راسه العسكري:عليك شكوى تعدّي على موظف صحي اذا سمحتي تعالي معي
لانت ملامح ولايف للحدّه من عرفت ان ساره خلف الموضوع ولفت تناظر صقر اللي يناظرها واخذت نفس وناظرت عايده:أبوي وصمود لا يدرون
هزت راسها عايده ومشت تخرج ولايف مع العسكري ونطق صقر:كلمي نيّاف يجي بسرعه
هزت راسها عايده تدخل البيت وظل محله صقر يشوف خروجها مع العسكري ومسح على وجهه بغضب من ساره واللي تحاول تسويه
'
جالسه عند المكتب وساكته وتسمع العسكر اللي يشتغلون ويخرجون ويدخلون وهي محلها من ساعات واخذت نفس من تقدم العسكري يجلس على المكتب:ولايف الدكتوره اللي اشتكت عليك معها سجلات فيديو لك وانتي تضربينها بمكتبها
ولايف:بدون صوت ؟
هز راسه العسكري ولفت ولايف:أكيد
العسكري:وش سبب تعدّيك عليها ؟
ولايف:ما بتكلم لين يجيني المحامي
العسكري عقد حجاجه:عندك محامي ؟
ولايف:لا
العسكري:اجل من وين بيجي ؟
ماردت ولايف تصد عنه وتسكت ورفعت عيونها من شافت نيّاف اللي تقدم:سلام عليكم
تكتفت ولايف تشوف خلفه المحامي ودخلوا المكتب يجلسون ولف نيّاف على ولايف وتنهد بتعب واخذ جواله من جيبه اللي يدق ومشى يخرج تاركهم ورد:هلا
صقر:وش صار معك ؟ وصلت ؟
نيّاف:اي عندها بس المحامي بالطريق قال انها ما بتخرج منها الا بتنازل ما يمدي يدافع عنها ويخرّجها
غمض عيونه بغضب صقر وهز راسه:اذا يمديك طوّل الموضوع أنا بحله
هز راسه نيّاف:طيب
قفل جواله صقر ووقف ومشى للدولاب يغير ملابسه ويلبس جاكيته الاسود ويغطي شعره بالكاب ودخلت عايده وناظرته بصدمه:بتطلع ؟
صقر هز راسه:اي لازم
عايده:وش اقول لأهل ولايف ؟
صقر:قولي خرجت فيه موعد تصرفي عايده
تأففت عايده بقلق وتوتر ومشى صقر معها يخرج بحذر ويطلع من البيت من الخلف ويفتح الكراج ياخذ دبابه ويركب عليه يغطي راسه بخوذات ويلبسها ويشغل الدباب ويخرج من البيت
لفت عايده بقلق من صوت الدباب ودخلت وابتسمت:ولايف خرجت مع صقر عنده موعد واستعجلت قالت لي اعطيكم خبر
عقدت حجاجها صمود:غريبه ليه ماقالت لي
عايده:كانت ناسيه انا ذكرتها واستعجلوا قيل يفوتهم الموعد
عبدالله:اسأل الله ان يشفيه ويرد له صحته وعافيته
تنهدت عايده تاخذ جوالها وتناظره وتخرج من عنده بتوتر وربكه
'
حطت يدها تستند وتسمعهم يتكلمون ويتنقاشون مع المحامي اللي يتكلم بسياسه وأسلوبه بالقانون وهي ساهيه تماماً
التفت عليها نيّاف يناظرها وهمس لها:وشفيك ؟ ما بيصير شي لا تشيلين همّ
ولايف هزت راسها بالنفي:مو شايله همّ أفكر كيف أقتلها وأفتك
جمد وجه نيّاف:انكتمي تكفين لا تزيدين المصايب
ماردت عليه ولايف وهي تشعر بالغضب وكمّل نيّاف:الصقر قال بيحلّها
لفت عليه ولايف وعقدت حجاجها:كيف يحلّها ؟
رفع كتفه نيّاف بعدم علم وسكتت ولايف تناظره وصدت تشد على قبضة يدها ورفعت عيونها من دخلت ساره تدق الباب
واحتدت ملامح ولايف تراقب وقوفها ونطقت ساره:سلام عليكم
رفع راسه العسكري:وعليكم السلام
ساره نزلت عيونها على ولايف ورجعت ناظرت العسكري:جايه أسحب الشكوى
صدت بعيونها ولايف وتقدمت ساره:بس ابيها توقع تعهد ما تتهجم عليّ من جديد او على زملاء المهنه
لفت ولايف تناظرها بسخريه:زملاء المهنه ؟
العسكري:وش سبب سحب الشكوى ؟
ساره:ولاشي أتوقع هذا يكفيها تعرف سوء أفعالها وين يوديها
ابتسمت ولايف وهي تشعر بإستفزاز من ساره وصدت عنها تغلي من داخلها ونطق نيّاف:الحمدلله ان شاء الله انها انحلت
العسكري:ارتاحي دقايق وجاي
وقف العسكري يخرج ولفت ولايف على ساره ووقفت ووقف نيّاف برعب:ولايف يرحم والديك داخل على الله ثم عليك لا تصعبينها
ماردت ولايف عليه وهي تناظر ساره اللي جالسه وناظرها نيّاف:تكفين وأنا أخوك أنا في وجهك
هزت راسها ولايف وابتعدت عن نيّاف تناظر ساره ونطقت:تبين صقر يجي لين عندك ؟
ساره:لا تتكلمين عشان ما اتردد
ضحكت ولايف تناظر ساره وهزت راسها وصدت عنها ترجع تجلس واخذ نفس نيّاف بتعب يناظرهم ودخل العسكري معه الاوراق وقضى الوقت المحامي يدققها وتوقع عليها ولايف مع ساره ووقف نيّاف:يعطيك العافيه
هز راسه العسكري ومشى نيّاف مع المحامي ومشت معهم ولايف تخرج معهم وطلعت ورفعت عيونها تناظر اللي على الدباب لابس خوذته ينتظر عند باب مركز الشرطه وتأفف نيّاف من عرفه وناظر جنونه ووجوده
وناظرت سواد خوذته ولايف وصد صقر يحرّك دبابه بسرعه ويبتعد وناظرته ولايف الى ان غاب ولفت تناظر خروج ساره خلفهم ولف نيّاف عليها:كبّري عقلك تكفين
ماردت ولايف وهي تناظر ساره اللي متجاهلتها تمشي لسيارتها ولفت ولايف تمشي لسيارة نيّاف وتركب وركب نيّاف وحرك ولفت ولايف:وش قال لها ؟
نيّاف:والله مدري ما قال لي شي
صدت ولايف تراقب الطريق وتناظر غروب الشمس والوقت اللي انقضى وهي بمكان ما تبيه تدخله وبسبب شخص تعاديه وتكرهه
دخل نيّاف البيت وتقدم للكراج يخفي سيارته عن البلكونات والشبابيك ونزلت ولايف تناظر صقر اللي على عربيته مع عايده وقفلت الباب بقوه وناظرت صقر اللي ساكت ونطقت عايده:أبوك وأختك طلعوا
عقدت حجاجها ولايف:وين راحوا ؟
عايده:برّاك جاهم واخذهم بعد صلاة المغرب
سكتت ولايف بحيره ونطق نيّاف:صقر توصي شي ؟
لفت ولايف تناظر عيون صقر اللي تناظرها وهز راسه بالنفي صقر ومشت تتركهم ولايف وتدخل البيت وهز راسه نيّاف:استأذن
ركب سيارته نيّاف يخرج من البيت وقام من كرسيّه صقر ونطقت عايده:ماهو هنا ياصقر
مارد عليها ومشى يدخل البيت بهدوء ويطلع مع الدرج بخطوات هاديه وتقدم لغرفتهم ومشى يفتح الباب ولفت بعيونها ولايف وناظرته من دخل وصدت عنه تفصخ عبايتها وتقدم صقر يوقف ويناظرها وسكتت ولايف تسمع الهدوء بينهم رغم الحدث الشديد اللي صار قبل ساعات ورفعت عيونها تناظر البلكونه وتقدمت توقف عندها لدقايق طويله كانت تنتظره يسأل او يشرح او حتى يبدأ بالكلام لكن طال الهدوء بينهم
وظل صقر يناظر وقوفها وظهرها ويسمع الهدوء بينهم ونطقت وهي متجاهلته بالنظر:وش المقابل ؟
سكت صقر وهو محلّه ولفت تسمعه ساكت وناظرته وهزت راسها:سرّ ؟
صقر:ماعندي أسرار
صدت عنه تناظر البلكونه تسكت واعتدل بوقفته يمشي لها وناظرها:إنتي عندك أسرار
لفت تناظره واقف بجانبها يناظرها وناظرت عيونه:من نهار الربوع كل شي منك كان سرّ ، من فينا يخبّي ؟
صقر ناظرها:خبيت عليك اي بس كل شي تعرفينه الحين
صدت بعيونها ورفعت كتفها:وش أسراري اللي خبيتها ؟
صقر:ما قلتي انك ضربتيها
ولايف ابتسمت:شكت لك ؟ الكفين عورتها ؟
صد صقر يستغفر يهدي نفسه ونطقت ولايف:مو لازم تقول بس يكون بعلمك ساره هذي بدفنها بيديني
تنهد صقر بتعب ومشت تتركه ولايف ومسك ذراعها:لا تسوين مشاكل
لفت عليه ولايف بذهول:أنا أسوي مشاكل ؟ مو انت اللي جيت متقصد تقولي بموجة غضبي عنها عشان اروح لها واخذ حقك ؟ مشاكل ؟ الحين أنا أسوي مشاكل ؟ وعشان من ؟
ناظرت عيونه بغضب ترفع صوتها:جاوب عشان من كل هذا الغضب وكل هذي المشاكل ؟ ولايف تنشرى وتنباع ولايف توقف قدام الكلمه وتسمعها وتشويها وترد عليها بعشر ، ولايف تدخل الشرطه وتخرج وتسكت ما تقول ولا تشكي ولا تاخذ حقها ، ولايف توقف ورا قصة واحد يمثّل انه معاق وهي مجبوره توقف له بوجه المدفع
سكت صقر يناظرها ويسمع صوتها المرتفع وناظرته بحده ولايف وهزت راسها:والا يا أبو طلال ؟
رفعت كفها تضرب صدره بقوه:كذبت على أبوي عشانك وبعت نفسي عشانك والحين دخلت الشرطه عشانك
صقر ناظرها بذهول:عشاني أنا ؟ كل هذا عشاني أنا ؟ ماهو عشان اختك تهج لأهلك ولا عشان الريال اللي كنتي تظنين ان أمي دفعته
سكتت ولايف تناظره ورفع صوته صقر بغضب:لا تحمّليني كل شي انتي سببه ، ماجيتك طلبتك
ولايف رفعت صوتها:ماجيت تطلبني ؟ ماحبستني بين جدرانك يوم عرفت ؟ ماجيت تستعطفني بسالفة أبوك والحادث عشان أكمّل اللعبه
لانت ملامح صقر من طاري أبوه:أستعطفك ؟
هو لأول مره يتكلم عن أبوه جهر وشكى لها من وجعه والحين تظن فيه انه يستعطفها
ولايف هزت راسها تصرخ:تبي تجيني بلحظة ضعفي وحزني لامي تتشكى لي عن أبوك عشان أسامح زلاتك وغلطاتك
سكت صقر يناظرها بصدمه تلين ملامحه ما يتوقع اللي قالته
ناظرته ولايف بقهر:تلعبون عليّ كلكم تحسبوني لعبه وهيّنه بين اياديكم الكل يبي يفرط بولايف الكل ما يهمه ولايف ، ولايف حجر ولايف نار ولايف بروق ورعود ماعليه خوف ، دخلوه الشرطه ودخلوه المستشفيات ووقفوها بالمحاكم والعنوها بالكلام
صقر صرخ بوجهها:انتي فعلتي بنفسك ، انتي دقيتي الصدر وقلتي أنا اشيل صقر انتي ضربتي هالكتف وقلتي أنا الساهر على وجعك ياصقر وقلت لك همّي وشكيته وقلتي تم ببقى عندك ومعك
ولايف صرخت بعلو صوتها تتقدم له:هذاك يوم كنت معاق بعيوني وبقصتي وبروايتي ، لكن طلعت تلعب بي طول الوقت تنومني متى ما بغيت تهجّ وتصحيني متى ما بغيت تكمّل لعبتك
صقر ناظرها بحسره:ليه يوصل الكلام لهنا ؟
ضربت كفوفها بقوه ببعض:لان ما قفلنا شي ، كل شي صار ما قفلناه ولا اخذته منك
صقر تكلم بإنفعال:وش تبين اكثر ؟ واقف ورّاك أدافع وأسدّ كل ثغره عنك ، وش تبين ؟
ولايف صرخت:لا توقف وراي ، أوقف قدامي
صقر ناظر عيونها يسكت وناظرته ولايف بحده:تحسب ينضحك عليّ نفس البقره ساره ؟ أنا ولايف
لف صقر عليها يناظرها وتقدمت ولايف تناظر عيونه وناظر عيونها صقر وهو غضبان وهز راسه:حقك تزعلين وحقك تغضبين وحقك أبرر بس ماهو كذا
سكتت تناظره ما يبي يوجعها بالكلام نفس ما أوجعته ، شعر إنه تألم منها لأول مره لانه كشف حزنه لها
مشى يتركها ويخرج وصفق الباب بكل قوته وناظرته يغادر ولايف ولفت على البلكونه ورفعت كفها على عنقها من اختناقها ومن كركبة الوضع بينهم ومن تراكم الأمور على صدرها
غمضت عيونها بتعب تبي تنهار وتنهمر وتشيل زيف المشاعر اللي رسمتها أمامهم تبي تعترف انها خافت وهي بين العسكر ، خافت تاخذ من عمرها وأيامها وتخسر وتنغلب ويُغلب عليها ، وخافت يوم صمود واجهتها بنهاية الأمر هنا وانها غير مستفاده لو أستمرّت لكن تبي تاخذ حقها من لعبة سلوى ولعبة صقر ولعبة غازي وكل اللي ذاقته بسبب هالعائله
بلعت ريقها تسمع الصوت اللي بدأ يتدفق بالبيت ولفت بوجهها تستوعبه ، بيانو
ظلت دقايق ساكنه محلّها وقامت بهدوء تمشي وتفتح باب الغرفه بهدوء وخرجت تمشي بإتجاه الصوت ووقفت تناظر صقر اللي جالس على البيانو ويعزف وعاقد حجاجه وتكتفت تناظره وتسمعه
ضرب الأوتار بيدينه يعزف ويشعر بالحرب اللي داخله ما قدر أحد يلمسها وينتصر عليها ، كل ماله يغوص بالحرب هذي أكثر وكل مالها تصعب عليه ، هو يعرف انه خسران بإعاقته ويخاف يخسر بقوة حيله
وقف العزف وهو حاط يدينه على البيانو ، من زمان ما لمس هالبيانو والحين يشوفه تفريغ للي داخله
لف بعيونه عليها يناظرها واقفه وساكته وظل على حاله يتأمل وقوفها ونظراتها له ونطق:هددتها
تقدمت ولايف له ورفع عيونه صقر عليها:أخذت حقك وباخذه وما بتكونين بوجه المدفع ولا بستعطفك بسواليف مالها داعي تسمعينها منّي ، ما بتخسرين
سكتت ولايف تناظره ووقف صقر يتركها ويرجع للغرفه ووقفت ولايف محلها تعيد كلامه تلمس قسوة كلامها عن أبوه
'
ناظرت الطريق صمود وهي متكتفه وتسمع برّاك اللي يسولف مع عبدالله:هذا أحسن حيّ تسكن فيه ياعمي ، شفت الأولي كان بعيد عن كل شي هذا أفضل وفيه خدمات أكثر
هز راسه عبدالله:ما تسدّ
لف برّاك وابتسم:افا ياعمّي ان كانت الماده مشكله أنا حاضر
عبدالله رفع كفه على ذراع برّاك:لا تطيّح وجهي عندك أكثر جمايلك كثيره
برّاك:رقبتي سدّادّه وأنا حاضر
تقدم عبدالله والتفت يناظر صمود اللي بالخلف تناظر الطريق ولف للأمام:ردني عند ولايف والله يرزق العباد
برّاك:خل نشوف هالبيت ياعمّي
وقف برّاك والتفتت صمود تناظر البيت وتنهدت بتعب لانها تعرف ما ينقدر عليه
ونزل برّاك ومشى لعبدالله يساعده في النزول ومشت صمود معهم تدخل البيت
ونطق عبدالله:ماشاء الله
برّاك ابتسم يناظر البيت مع العامل اللي فتح لهم وتقدمت صمود لعبدالله:أبوي نتفرج ونتحسّر ليه ؟ قلت لك نرجع لبيتنا نحاول فيه يأجر من جديد
مارد عبدالله اللي يناظر البيت ولف برّاك عليهم يناظرهم ويسمعهم
ولف عبدالله لبرّاك:الله يرزقهم مالنا نصيب
سكت برّاك ورفع عيونه على صمود اللي تناظره ومشت تخرج مع عبدالله من البيت وخرج يتبعهم وركب السياره وحرّك
ونطق عبدالله:فيك الخير ماقصرت واعذرني دقيت عليك وأشغلتك بس ماعندي أحد
برّاك:تحت أمرك ياعمي بأي وقت
هز راسه عبدالله ودخل برّاك بيت صقر ووقف وفتحت الباب صمود تنزل ونزل برّاك والتفت عليها ونزل عبدالله يمشي ونطق برّاك:صمود
وقفت والتفتت عليه ومشى عبدالله يكمّل سيره بسبب عدم سمعه لبرّاك اللي نطق بهدوء
وتقدم برّاك ووقف قدام صمود:ليه تشدّين على أبوك ؟ خليه يلاقي اللي يبيه ويرتاح فيه
صمود:ليه مصرّ تدخل ؟ ليه كل ماقلت لأبوي شي تدخلت ؟ مانبي منكم شي نبي بيت يضفنا وبس
برّاك:ومالقيتم وش بتسوون ؟ بتقعدين بكبريائك هذا تغثين ابوك ؟ تراه شايب ما يتحمّل لا طلعات ولا دوارات
صمود:تحوم تحوم تبي ناخذ من جيبك ريال بس محنا ماخذين
تنهد برّاك يصد وكملت صمود:وباخذ أختي وأبوي ونخرج من هالبيت ما بنقعد تتفضلون علينا بشي
لف عليها برّاك يناظرها ومشت تتركه صمود وتدخل
قفلت الباب خلفها بغضب ودخلت وناظرت ولايف اللي بإنتظارها
وناظرتها ولايف:وين اخذتي ابوي ؟
صمود:ندور بيت
سكتت ولايف تناظرها وتقدمت صمود تدخل الصاله وناظرت صقر اللي على كرسيّه ولفت لولايف:ابوي دخل ؟
ولايف تقدمت لها وناظرتها بعدم فهم:ليه تكلميني بهالأسلوب ؟
صمود:بعزاء أمي وببيت ماهو بيتنا كيف تبيني أكلمك ؟
رفع عيونه صقر على ولايف وتقدمت ولايف واخذت نفس ولفت تنادي:عيّاده تعالي خذي صقر
صمود:ليه ؟ خايفه يتكلم ويقول بنات عبدالله يتهاوشون ؟ تطمني ماهو متكلم
لفت ولايف على صمود وكمّلت صمود بغضب:اختنقت من كل شي عشناه بسببهم ، اختنقت من مذلة سلوى لي ومن وجودك مع واحد معاق خدامه عنده عشان الريال واختنقت من أبوي اللي صار محتاج لوجود برّاك وغير برّاك
سكتت ولايف وبكت صمود بتعب:حالتنا ماهي حاله ولايف ، ماهي حاله
بلعت ريقها ولايف تناظر دموع صمود وجلست صمود ولفت تأشر على صقر:بوشو نفعك ؟ علميني ، عرفتي ان سلوى كذّابه وكملتي عشان تردّين له ورثه ، ورثه هو ماهو انتي
سكتت ولايف تناظرها وجلست صمود تتكلم بغضب:تحسبين لو قام على حيله بيقولك شكراً ما قصرتي بيغطّيك بالذهب ؟ بيعطيك هالبيت وهالسياره ويملي حياتك فلوس ؟ لو كان هالمعاق فيه شدّه كان طردك ماكان طالع فيك
ناظرهم صقر وهو ساكت ويتأمل سكون ملامح ولايف والضغط اللي تكتمه داخلها
وهزت راسها صمود تضرب كفوفها ببعضها:تضحكين على نفسك ، لقيتي هالبيت تنامين وتاكلين فيه وماعاد شفتي شي ثاني
وقفت صمود وتقدمت لولايف:صحصحي ولايف لا تذلّينا لهم أكثر ماعاد لك قدر وقيمه ، قاعده تحاربين عشان حلال ماهو لك ولا بتذوقين منه شي
ماردت ولايف وهي تناظرها وهزت راسها صمود:أنا ما بقعد أكثر مع أبوي هنا ، تبين تقعدين خدامه بدون معاش حتى اقعدي
سكتت ولايف تناظر غضب صمود وناظرتها بحده صمود:خلي هالمعاق يرعونه أهله انتي مو خدامه لهم
بلعت ريقها ولايف تتماسك من كل الضغط اللي تشعر به من دخولها لمركز الشرطه لغضبها مع صقر لفقدانها لأمها من كلام صمود لها ومن الحرب اللي قائمه بينها وبين غازي ومن خسارتها الى الان
رفع عيونه صقر على ولايف يشوفها ساكته يعرف انها تنجرح أكثر من أهلها ولو ان اللي واقف امامها ماهو صمود كان ردة فعلها غير ومختلفه
ناظرت سكوتها صمود وتكتفت:صرتي خرساء نفس زوجك ؟
صقر ناظر ولايف ونطق:ماني أخرس
جمد وجه صمود اللي تناظر ولايف ولفت ولايف بصدمه على صقر ولفت صمود تستوعب وناظرت صقر بذهول
ورمشت ولايف تناظره بذهول ووقف صقر من على الكرسي وفتحت فمها بصدمه صمود تناظره وجمد وجه ولايف تناظره
وناظرهم صقر يوزع نظراته بينهم ونطق من جديد يأكد:ولا معاق
طاحت مغشي عليها صمود ولفت ولايف تمسكها:صمود صمود
ناظرها صقر ولفت ولايف ترفع صوتها:عيّاده عيّاده
دخلت عايده وناظرت صمود بصدمه ولفت على صقر اللي واقف تناظره بذهول ونطقت ولايف:جيبي مويه بسرعه
لفت تضرب خدود صمود وتهزّها:صمود
لفت وناظرت صقر اللي واقف وناظرها صقر وهو ساكت ودخلت عايده بالمويه واخذتها ولايف ترش على وجه صمود ولفت لعايده:ساعديني نوديها الغرفه
مشت عايده تشيلها مع ولايف وخرجوا وناظرهم صقر وهو محله وصد يناظر الضباب اللي متشكل على الجبل أمامه
ودخلت ولايف بعد دقايق وناظرته والتفت على صقر وعقدت حجاجها ولايف بذهول من تصرفه ونطقت:ليه ؟
صقر:زادتها
ولايف ناظرته بعدم استيعاب:ما يهمّك ان أحد عرف ؟
صقر:ماهو أحد ، أختك
ولايف:وضامن صمود ما تتكلم ؟
صقر:اذا عرفت انك مو خدامه بهالبيت بتسكت هي كانت تحتاج تعرف انك متزوجه رجّال وهذي هي عرفت
ناظرته ولايف بذهول تسكت وناظر عيونها صقر ومشى يتركها ويخرج ، قالت له قبل دقايق انها تبي يوقف أمامها ماهو وراها والحين تخلّى عن تمثيليته عشانها
'
لفت عايده من دخلت ولايف وناظرت صمود:نايمه
تقدمت ولايف وناظرت صمود وهزت راسها:روحي نامي
هزت راسها عايده ومشت تخرج وتقدمت تجلس ولايف على الكنبه وتناظر صمود
حطت راسها على يدها تتأمل نومة صمود وتفكر وتعيد اللي حصل
كان كلام صمود قاسي وكبير عليها وعلى صقر ذاته بس ماتوقعت انه ممكن يجازف بكذبته ولا فهمت سبب اللي حصل ولا عرفت ، كان تركيزها كله على كلام صمود وما انتبهت لجلوسه معهم وظنت انه بيسكت ولا بيعتريه همّ نفس كلام اي أحدث
وقفت تترك صمود بعد وقت طويل من التفكير وخرجت من غرفتها وطلعت مع الدرج ودخلت الغرفه بهدوء والتفت صقر من سمع الباب وتقدمت ولايف وناظرها وصد من جديد
تقدمت تشوفه قاعد بالبلكونه برّا وممد رجوله على دربزان البلكونه ورافع يدينه خلف راسه
وقفت وناظرت الضباب تسمع صوت الكلاب والذيابه من الجبال ولفت عليه:مو خايف احد يشوفك قاعد برّا والا ماعاد تفرق معك ؟
مارد عليها صقر وناظرته ساكت وجلست على الكرسي اللي جانبه
ورفع عيونه صقر يناظر الضباب ويسمع صوت الكلاب وصراصير الليل
لفت عليه ولايف تناظره:ليه ؟
لف نظره عليها صقر وكمّلت ولايف:حاولت أعرف ليه هالمرّه ؟ نفس الكلام اللي قالته صمود سمعته كثير ليه تأثرت منه ؟
صقر:عشانك
سكتت ولايف تناظره وناظر عيونها صقر:عشان ما تقولين محد دافع عنّي وأبيك توقف قدامي وما تضطرين تسمعين كلام نفس هذا كل مره عشاني
ولايف ماردت وهي تناظره وجلس بإعتدال صقر يلتفت عليها يناظر نظراتها:ليه صعبت عليّ ؟
ولايف رفعت كتفها:أنا صعّبتها
صقر:محد وقف قدامهم الا انتي
ولايف:أجل ليه صعبت ؟
مارد صقر يناظرها واخذت نفس ولايف ووقفت وناظرته:معناته الطريق اللي تمشيه هالخمس سنين غلط
عوَى الذيب بعلو صوته وبالقرب من مسامعهم وانقبض قلبه صقر يلتفت على الجبل يهمس:الله يلعنك
سكتت ولايف تَعي سبب كراهيته ورعبه من صوت الذيب ونطقت:صقر
لف عليها يناظرها واقفه وتكتفت ولايف:جربت تكون عدو غازي ولا فاد جربت تكون صديقه ؟
عقد حجاجه صقر ينطق:يخسى
ولايف:ليه لا ؟ أنا مستعده ألعبها وانت تتفرج بس نجرب
صقر ناظرها بجنون:صاحيه انتي ؟ تحطين يدك بيد غازي ؟
ولايف جلست بجانبه وناظرته:اليدّ اللي ماتقدر تعاديها صافحها
صقر:أصافح هالذيب اللي يعوي ولا غازي ، أخو أبوي من لحمه ودمه سرق كل شي لي ويمكن يكون له يد في وفاته وتبيني اصافحه ؟
ولايف تنهدت بتعب:ماراح تستفيد أكثر وانت عدوّه لأنك بعيد ، بتزيد الخمس سنين عشر
صد صقر ما يبي يسمع وكمّلت ولايف:خلنا نقرّب منه ومن أميره وبناته ومن أمك
لف صقر ونطق بحده:ولا يمكن على جثتي أقترب منه وأدخل بيته ، جرحي منه عميق ما أقدر أتجاهله
وقف يتركها ويدخل الغرفه ولفت ولايف:تفترس صاحبك أسهل من عدوّك ، إنت صقر وتعرف
لف عليها صقر يناظرها وناظرته ولايف وتجاهلها يدخل الحمام ولفت ولايف وتنهدت تسمع أصوات الليل في بيت صقر ، صوت الوحشه والكلاب والذياب وسواد المكان بسبب الضباب ووقفت تدخل الغرفه على خروج صقر من الحمام وناظرها تخرج من الغرفه وتتركه
مشت تنزل وتدخل غرفة صمود وناظرتها لا زالت نايمه وتقدمت تنسدح على الكنبه عندها
'
خرج من البيت يمشي بين العشب والشجر يصبّح مع شروق الشمس ويفتح مكانه تحت ويشب الضوّ وياخذ دلة القهوه يمليها بن وهيل وزعفران وبدأ يغني بصوته وهو يحط الدله على الحطب تطبخ:الا ياحمد وش حيلة اللي فقد ماليه على طاري الذكرى هجوسي تسرّيني ، وليفٍ أبيع اللي ملكته عشان أشريه ، أنا أضيق لامن ضاق ورضاه يرضيني
دخل نيّاف وابتسم يسمع أبوه يدندن بصوته ونطق:عاش
التفت فواز يضحك:عشت ذي المره ما قومتك امك قمت انت
جلس نيّاف ينسدح على المركى ويناظر الشمس بالمكان:نمت زين والله ياهي نومه
فواز ناظر الدله اللي تفور وهز راسه:زين
لف فواز من دخلت ريم وابتسم:هلا بغزالة فواز
ابتسمت ريم تحط الفطور عنده:صبحك الله بالخير
فواز:صبحت بالنور ومسّيت بالنور ، أما أنا نوري إنتي ، إنتي إصبحي عليّ تنورين صبحي وليلي
بقق عيونه نيّاف:ياساتر ياساتر بتكتب لها قصيده
لفت ريم ترفع حجاجها تستفزه:تغار يالملقوف
ناظرها نيّاف بنص عين وجلست ريم بجانب فواز:أبوي خلني أروح مع نيّاف أبها أنزل للاسواق
نيّاف:مافيني حيل
لفت ريم عليه بغضب:كل يوم طاير عند صقر مافيك حيل توديني السوق
لفت تناظر فواز:أبوي
فواز:قمّ قمّ ودّ أختك
ابتسمت ريم تقوم تبوس راس فواز وتنهد نيّاف يقوم وناظره فواز:تعال ياجحش
ضحكت ريم وتقدم نيّاف وصبّ له فواز فنجان قهوه واخذه نيّاف يبتسم:سلمت
ابتسم فواز ولف لريم:خذي لك لبستين واكسعي
نيّاف:سمعت ؟
ريم:بشوف
فواز:هاه كان ، قلنا لبستين
ضحكت ريم تهز راسها وقامت تخرج من عندهم ودخل يده بجيبه فواز:خذ بطاقتي ولا تبطون
هز راسه نيّاف ياخذها ويحطها بجيبه ويشرب فنجانه ويحطه ويخرج
عقد حجاجه من الشمس ومشى للجمس يشغله ويقعد فيه وينتظر ريم
خرجت ريم تلبس شوزها وخرجت نوف تناظرها:وين ساريه ؟
ريم:بروح السوق نيّاف بيوديني
نوف:مرّي ولايف واختها تفقديهم
هزت راسها ريم ومشت تنزل وهي تعدل نقابها وركبت بجانب نيّاف وحرك خارج من الديره
وابتسمت ريم تناظر الجوّ وعقد حجاجه نيّاف يناظر السياره اللي مبنشره ووقف ولفت عليه ريم:وشفيك ؟
نيّاف:اقعدي
نزل يفتح بابه ويمشي للسياره وناظر اللي فاتح الكبَوت ونطق:سلام
رفع عيونه وابتسم له نيّاف:مالك ؟
ضحك مالك يقفل الكبّوت:زين لقيتني
سلّم على نيّاف ونطق نيّاف:عسى ماشر ؟
مالك:والله مدري ذي فجأه وقفت عليّ كنت رايح لابوك
نيّاف:تعال انا اوديك له
مالك لف يناظر ريم اللي بالجمس ورجع ناظره:لا والله ما أعطلك اهلك معك وانا برجع أبها ومشواري بعيد
نيّاف:والله اني رايح أبها امش يا رجّال
هز راسه مالك:دقايق اخذ اغراضي
هز راسه نيّاف ومشى وفتح باب ريم:انقزي ورا
ريم:وش تبي ؟
نيّاف:بناخذه معنا
لفت ريم بصدمه تناظر مالك اللي بسيارته ومشت تركب بالخلف ومشى نيّاف لمالك واخذ جوالاته مالك ومشى يركب بجانب نيّاف وركب نيّاف:يالله حيّه
ابتسم مالك ولف نيّاف:برجع لأبوي ان كانك بغيته
مالك:لا لا خلاص اكلمه بالجوال
نيّاف:سيارتك عندنا بالديره والله لأصلحها
مالك:يانيّاف لا ياخي أنا ارسل لها واحد من اصحابي يدبّرها
نيّاف:ابداً ، عيال عمي موجودين والجماعه ما بيقصرون
ضحك مالك ولف للطريق يناظره ورفعت عيونها ريم تناظره راكب قدامها وتقدمت بعيونها تناظر لبسه وساعة يده وابتسمت من خلف نقابها واقتربت من شمّت ريحة عطره وفخامتها ورجعت ظهرها للخلف وهي ضامه يدينها الثنتين
مسح دقنه مالك وهو يناظر الطريق والتفت يفتح شباكه ويناظر الديره:ماشاء الله على ديرتكم الواحد وده يعيش فيها بدال زحمة أبها
كشرت ريم وهز راسه نيّاف:والله ما ارتاح الا فيها ، أروح أبها والله ما أطوّل عنها بس ما أعرف أعيش الا في ديرتنا
ابتسم مالك:وين بغيت في أبها ؟
نيّاف:والله بغينا السوق تنقصنا أغراض
هز راسه مالك:في سوق زين في أبها اذا تبي أدلّيك
ابتسمت ريم بحماس ونطق نيّاف:ما يفرق هم أغراضهم بكل مكان
ناظرته ريم بحده وابتسم مالك:لا يبون الشي الزين
ابتسمت ريم تناظرهم من مكانها وهز راسه نيّاف:ما تزوجت انت ؟
مالك:لا والله للحين أشتغل مع أبوي بالمحل العصر والصبح أداوم بالبنك
نيّاف:تشتغل بالبنوك ؟
ضحك مالك:أعدّ فلوس الأغنياء لكن لست منهم
ضحك نيّاف:ان اقتربت من القروش هيّنه بتجيك
ابتسم مالك يلف للطريق:وانت ليه ما تزوجت ؟
نيّاف:مالقيت يا ابن الحلال أمي تبي من الديره وكلهم أعرفهم كنت العب معهم ونحنا صغار
ضحك مالك وكمّل نيّاف:ماني مستعجل مبسوط مريّح راسي
مالك:والله الزواج زين يانيّاف ان لقيت وحده زينه لا تتردد
ابتسمت ريم تناظره ولفت تناظر الطريق من شباكها تستند عليه
والتفت مالك يسكت ويناظر شباكه ونزل عيونه للمرايه يناظرها تركب وراه تستند على الشباك ورفع عيونه يصد للطريق
'
لفت صمود بصدمه على ولايف تناظر برودها:متى عرفتي ؟ وليه ما تعلميني ؟ ولايف ليه تسكتين ماتعلميني ليه ليه ؟
تنهدت ولايف بهدوء:ما ينفع أقول
صمود:جابرك تقعدين معه ؟ يستغلك بشي ؟ ولايف ترا نشفتيني
ولايف لفت على صمود:ليه تنشفين ؟ اعتبريه طاب وقام على حيله
صمود:دامه طيب ليه تقعدين عنده ؟ خلاص هو يدبر عمره
ولايف:صمود تراه مخبي على أهله كلهم محد يدري الا أنا وعيّاده ، بتسكتين وأنا بوقت ثاني أشرح لك بس امشي لأبوي
سكتت صمود تناظر ولايف بذهول ووقف ولايف تناظر صمود:امشي
مسكت راسها صمود ووقفت ومشت ولايف تخرج من الغرفه وتقدمت للصاله ودخلت تناظر صقر وعبدالله وعيّاده ورفع عيونه صقر ودخلت صمود وجمد وجهها تناظر صقر
وتنحنت ولايف تنطق:كيف حالك أبوي ؟
هز راسه عبدالله بدون يتكلم وهو ياكل ولفت ولايف على صمود:ادخلي افطري
مشت صمود تجلس ورفعت عيونها على صقر اللي يناظرها وعدلت عبايتها تصد عنه
وجلست ولايف وبدت تاكل ونطق عبدالله:وش مسويه بالمستاجر اللي كنا عنده ؟ حلف ما يردنا
ولايف اكلت بهدوء:ما سويت شي
عبدالله:ما أعرفك أنا
رفعت عيونها ولايف واخذت نفس بتعب:وش تعرف ؟
عبدالله:أطباعك ذي من علّمك عليها ؟ ماتردين على الناس الا بأخس كلمه وأعمام هالضعيف بالعزاء ما احترمتيهم
ولايف:ماهم أعمامه يخسون
عبدالله:ولايف
ولايف ناظرته بغضب:أبوي هذا غازي اكبر نصّاب سارق ورث صقر كله أي عمّ ؟ زين حشمته ودخلته البيت ، وزوجته جايه لي كأنها رايحه عرس ماكأنها تعزّيني
عبدالله:يمكن تبي تروح عرس وجات تسيّر عليك
رفعت حجاجها ولايف وتنهدت ترجع تاكل:ليت كل الناس طيبين مثلك
عبدالله ناظر صقر:وشدراك ان عمّه سرق حلاله ؟ نطق وقال لك ؟
رفعت عيونها ولايف على صقر:أخاف ينطق الحين علينا
ناظرها صقر يفهمها ولفت ولايف لعبدالله:أعرف ماني غشيمه
عبدالله:وعمّك عامـ
رفعت كفوفها ولايف:الا هالانسان لا تطريه من الصبح يستاهل ومليون مره يستاهل
ناظرها عبدالله بحده وهزت راسها ولايف:اي ما قالت لك صمود بغى يزوجنا لعيال الجماعه وياخذ المهر ، مسوي فيها الحين يتشكّى لك مني ؟ وترا عطيته عشر الاف من مهرّي عشان يزوجني وليته يستاهل ما يستاهل الا نص ريال
دق الجرس وقامت عيّاده من مكانها ورجعت تاكل ولايف ورفعت عيونها صمود بحذر تراقب صقر بعدم راحه
ودخلت عايده:نيّاف وريم
لفت ولايف وهزت راسها وقامت تنفض يدينها وهي تاكل ومشت تطلع الدرج وتدخل الغرفه
فتحت الدولاب تاخذ جاكيت وتلبسه طويل بطولها يسترها بسبب قماشه الثقيل وربطته من خصرها ومشت تخرج وتنزل وناظرت ريم ونيّاف:غريبه مسيّرين
ابتسمت ريم:أمي تسلم عليك بغت تجي معي بس أنا رحت السوق
ابتسمت ولايف لريم تهز راسها وناظرت نيّاف:اطلع
لف نيّاف بذهول عليها وناظرته ولايف:اطلع برّا بجيب صقر وأجيك
ناظرها نيّاف ومشت ولايف تدخل ومعها ريم وابتسمت ريم تتقدم لهم ولفت ولايف تاخذ صقر وتدفعه تخرج من عندهم وخرجت مع الباب ولف نيّاف وابتسم لصقر:أبو طلال
خرجت تقفل الباب خلفهم وتوقف بينهم وتكتفت:أقنعه
رفع راسه صقر عليها وعقد حجاجه نيّاف:بوشو ؟
ولايف:بنصاحب غازي وحريمه وبناته
نيّاف ناظرها بجنون وصد على صقر:هذي أنهبلت ؟
صقر:تسألني أنا ؟
ولايف:انتم اللي ما تفهمون وأغبياء وبتقعدون خمس سنين زياده بهالغباء
صقر همس:حشّمي حشّمي ولا ترفعين صوتك
ولايف:وش بتسوي أبو طلال ؟ بتقوم عليّ ؟
عض شفته نيّاف يصد عنهم وناظرها صقر بحده ولفت ولايف على نيّاف:لازم ندخل بيته وحياة بناته وزوجته نقترب منه نعرف ضعفه وقوته
نيّاف:وش نسوي نروح نسيّر عليه نقول وش حالك يا غازي بغينا نسولف معك عصريه
ولايف:استهبل معي اي استهبل عشان اطردك الحين مع هالباب
لف نيّاف على صقر:انت تزوجت وحده مو صاحيه
ولايف:اي مو صاحيه ، وهذي اللي مو صاحيه بتردّ حلاله ريال ريال
صقر:بيت غازي ماني داخله
ولايف تكتفت تناظر صقر ورفع عيونه صقر:تسمعين ؟ مستحيل أدخل بيت غازي ولا تتصرفين بدون علمي
رفعت عيونها ولايف تناظر الحوش وحكت جبينها تهز راسها
ولف نيّاف:وأنا مع صقر مستحيل أدخل بيته ذا الكلب يخسى وتخسين معه انتي بعد
ولايف:من اللي تخسى ؟
نيّاف:أنا
رفع عينه صقر يناظر نيّاف وهزت راسها ولايف تناظر نيّاف بحده ومشت تتركهم وتدخل وتقدم نيّاف لصقر:اسألك بالله ما تخاف منها ؟
صقر:انت رمّه
نيّاف:هاه اقعد بالحوش اجل محد بيدخلك
صقر ضحك:امش بالله
ناظره نيّاف وابتسم ومشى يدفعه يدخل لهم ولفت ولايف تناظرهم وصدت بعيونها على ريم:شريت هذي
مدّت يدها وضيقت عيونها ولايف:هذي ؟
ريم:اي سواره معروفه شفتها على بنات كثير بسناب وغاليه ماهي رخيصه
ابتسمت صمود:عليك بالعافيه
ولايف:بقول شي ريم بس لا تزعلين
نيّاف:استلمي ريم
ولايف:هذي خساره فيها الفلوس ان كان بتلبسين شي البسي ذهب يترسّ العين ، خذي لك سبع بناجر صفراء تبرق وترعد
عبدالله:الذهب غالي
ولايف:وتستاهل ريم ، الغالي للغالي
ابتسمت ريم:عندي ذهب أمي تشتريه دايم بس ما أحبه كأني كهله
ضحك نيّاف اللي ياكل ورفعت حجاجها ولايف:الذهب ماهو للكهيل الذهب للساطيه الشيخه
صمود:خلاص ولايف خلي البنت تلبس اللي يعجبها
لفت ولايف عنهم وناظرها صقر ونطق عبدالله لنيّاف:كيف حال أبوك ؟
نيّاف نطق وهو ياكل:الحمدلله يسأل عليك والله
عبدالله:ما يقصر ما يقصر
نيّاف:انت تحتاج شي ياعمي تبي شي ؟ والله ان تقول
عبدالله:سلامتك ما تقصر ولا يقصر عمّك برّاك
نيّاف:خالي خالي ماهو عمّي
عبدالله:فيكم الخير
لف نيّاف على ريم:هيّا مشينا
وقفت ريم وناظرته:بناخذ راعي المحل ؟
نيّاف:لا ، امشي
التفت عليهم:توصون شي ؟
عبدالله:سلامتك
مشى يخرج ورفع عيونه صقر على ولايف اللي ساكته وصاده بعيونها تفكر وعرف انها تخطط على شي من حالها ووضعها
-
( مبارك عليكم الشهر ⭐️ )