رسائل ✍️💙

ينفع اقرأ روايات رومانسية؟

_ صل على النبي ﷺ الأول،

قبل ما نجاوب على السؤال دا خلينا نسأل سؤال احنا ليه اصلا عايزين نقرأ روايات حب؟

الإجابة هي اننا بنحاول نُشبع " احتياج عاطفي جوانا " احتياج اننا نسمع كلام حلو نشوف اهتمام و كل دا تحت ظل الشريك الآخر اللي هيعملنا دا و يبادلنا المشاعر و لأن " تلبية الاحتياج دا بتكون بالزواج" فـ بنبقى عايزين حاجة زي ما بنقول 'تصبرنا' عشان مندخلش في علاقة محرمة مع حد أو عشان لسه ملقناش شخص مناسب

_ لكن الجدير بالذكر إن الروايات دي " بتزود الاحتياج مش بتقلله" و بالتالي بتدفعنا لمراحل تقودنا في النهاية للطريق اللي مرضناش نخوضه

_ الموضوع بيبدأ بالقراءة في قصص الحب ثم تخيل للقصص دي خاصة قبل النوم ثم تخيل شخصي ليك مع شخصية من خيالك بأحداث الرواية و دا يولد عزم جواك و طاقة تزود رغبتك و احتياجك لطرف تاني أكتر و أكتر و يبدأ غض بصرك يقل لأنك بقيت بتدور على شريك وسط الناس يكون أشبه ببطل/ة الرواية

_ و يبدأ مخك يهتم جدا بالموضوع دا و يكون خيالات و صور و أحداث و كل مدى الوضع هيزيد لأن مخك هيمل من تكرار المشاهد فيبدأ يصنع أحداث جديدة و نفضل في دوامة أحلام اليقظة اللي عمرها ما هتتحقق.

_ الموضوع لو زاد رغبتك في تكوين صداقات هتزيد و غض بصرك هيقل و تفكيرك مش هيبقا ناضج لأنك حصرته في رغبتك و شهوتك تجاه هذا الاحتياج

_ و دا هيأثر يشكل أو بأخر على اختيارك بشريك حياتك فيما بعد لأن سقف توقعاتك عالي و على أرض الواقع هتكتشفي ان بطل/ة الرواية كان شخص خيالي مش موجود لان محدش فينا مثالي

_ و غصب عنك هتتأثر لأنك بشر متقوليش انا بقرأ من باب التسلية و المتعة لانك كدا كدا هتتأثر و كدا كدا هيحصل معاك كله اللي بقوله لأنك بشر و ليك مشاعر و احتياجات مش ملاك

_ تفكيرك هينشغل و هيأثر على أدائك في شغلك و دراستك و حياتك بشكل عام و يضغط اهتماماتك و مشاعرك في دايرة الحب و البحث عن " بطل  روايتك" الخيالي

_ هتقلل من نضجك و تطوير ذاتك و دا هيزيد الأمة سوء و ضعف أكتر مما هي عليه و صدقني مفيش أسوأ من
" المخدرات اللذيذة" زي الروايات و الكورة و الأفلام

الحل : امسح اي رواية من النوع دا عندك و استغفر ربنا من اللي فات و اقرأ ما ينفعك و ينفع الأمة اقرأ في قصص الصحابة و اتعلم ازاي تكون راجل بجد و أب و قدوة لمن حولك... اقرأي قصص الصحابيات و الأنبياء و اعرفي ازاي تكوني مسلمة و زوجة و قدوة لعيالك اللي دينهم مسئوليتك انتي و جوزك

_ كفايا نعيش في الوهم لازم نفوق قبل ما نبقى طُعم زي كتير غيرنا ما اتسستموا على الضياع و جيل ورا جيل الأمة ضاعت زي ما انت شايف و بقا دا حالها... احرص على ما ينفعك لان وقتك مش ببلاش  و " نفسك إن لم تشغلها بالحق شغلتك بالباطل"

_ متنسونيش من دعواتكم

و السلام عليكم ورحمة الله وبركاته
👋♥️