كيف أتوبك يأجمل ذنوبي وأوقف عند حدي وأنت ذنبٍ لا غفره الله ولا لي عنه توبه

البارت الثامن

-
-
بعد مرور يومين
~
بيت عائلة سطام "ابو مُلهم"
كان البخور بكل مكان والأنوار بالحوش معلقه تدل على المناسبه وانه زواج والفرشه بكل مكان والطاولة المليانه جميع مالذّ وطاب والكل كاشخ والكل فرحان لأثير وهم الفرحة قاطعه مبسمهم قرروا يعيشون الأيام ويرضون بالمكتوب ولا يخربون فرحة اختهم بدوا يجهزون كل شي وخلصوا وراحوا يجهزون أثير اللي كانت خايفه لا تدري مين ثامر ولا تدري كيف بتكون حياتها معه ولا تعرف خيره من شره حطت يدها على قلبها وصار تدعي وتتعوذ من بليس
جتها وهَج: يلا أثير البسي فستانتس
أثير: تكفين وهَج خايفه
ابتسمت وتقدمت وحضنتها: طبيعي يقلبي انتي طبيعي بتدخلين حياة جديده مع شخص جديد ماتدرين ايش ينتظرتس وايش بيصير لتس وان شاءالله ماراح يصير الا كل شي وكل شي يسعدتس
اثير ابتسمت وردت لها الحضن : تكفون سامحوني بكل مره كنت فيها أنانية وزعلتكم آه ياليت مُلهم عندي اعتذر له
وهَج : حبيبتي مُلهم يحبنا كلنا ومُستحيل يكون زعلان حتى لو انه زعل عليتس شوي ترا بالنهاية يحبتس مثلنا يلا توكلي على الله والبسي فستانتس
اثير: طيب شرايتس بالميكب
وهَج ناظرتها بحب :والله عسل عسسسلل طالعه تجننيييننن"وفعلًا اثير كانت جميلة جدًا ملامحها حاده ولطيفه بنفس الوقت"
ابتسمت لها اثير: والله اخذه من جمالتس يبعد حيي انتي "وهَج كانت اجمل خواتها وفعلًا جميلة لابسه احمر ماسك على جسمها وتاركه شعرها على ظهرها بنعومه وميكب خفيف وبارز ملامحها"
طلعت وهَج وأثير صارت تلبس فستانها كأن أبيض ماسك للخصر ومن تحت نفشه خفيفه وكان فيه كريستال من فوق لبست وخلصت وصار تنادي بيسان تعدل لها الطرحه
وفعلًا جت بيسان وعدلت طرحتها وكان شعرها مكسر وعلى ظهرها ولابسه تاج صغير بس حلو على شعرها وفوق طرحتها الناعمه ومسكتها البيضاء خلصوا واجتمعوا كلهم عندها"ام مُلهم- وهَج- بيسان- ليان-عذّوب~عذّوب وليان خوات فهد~"
تعريف بسيط عن عائلة سلطان~اخو سطام~
ام فهد
اطيب قلب بالدنيا والكل يحبها واللي مايعرفها يحبها تحب فهد بشده اكثر من مازن فهد عندها الحب الاول
عمرها "43"
-
ابو فهد
انسان طيب جدًا مريض قلب بس انه طيب والكل يحبه وسمعته بيّن الكل منتشره بالطيب والكرم وصفاوة النفس وحب الناس يشتغل بمحله الثاني اللي ورثه من ابوه"47"
-
فهد
اكبر عيالهم واللي معتمدين عليه بشكل كُلي بكل شي بحياتهم طيب وحبوب وصديق الروح بالروح مع مُلهم يشتغل عسكري عمره "30"
-
لأستبيح القرأة بدون لايك
-
-
مازن
الولد الثاني لسلطان مازن انسان بيتوتي ولا يحب يطلع ابد ومن المسجد للبيت ومن البيت للمجسد الا اذا بيروح لعيال عمه حاول يشتغل مره ومرتين وثلاث لكن يفصل مو قادر يتحمل كثرة الناس حوله عمره"25"
-
عذّوب
اول فرحه لهم من البنات الكل يحبها من بنات عمانها وخوالها انسانه تحب تختلط بكل مكان وتحب تصادق كل احد والكل يعرفها ويحبها نفس تخصص أثير علم نفس وعمرها "23"
-
ليان
اصغر البنات قريبه جدًا جدًا لمازن وعلاقتهم تشبه علاقة مُلهم وبيسان جدًا واقرب بعد وتساعد مازن جدًا بكل وقت وكل شي عمرها 20
-
كلهم كانوا واقفين حولها وعيونهم تقرأ عليها كانت جميلة جدًا تقدمت عذّوب وحضنتها: اهخخ ياحظ ثامر ياحظه
وهَج: والله اختي بتتلّ قلبه تلّ جعلني فداها
أثير: حياتي انتي فداتس الكون ومابه
ام مُلهم تقدمت ودموعها متجمعه بمحاجرها: الله يوفقتس يابنتي وييسر لتس ويسخر لتس ثامر وتبقون مع بعض دايم ويوفق خطاويتس كلها
تقدمت وباست رأس امها: امين يبعد روحي ويخليتس لنا ويطول لنا بعمرتس يارب
ام مُلهم مسحت دموعها : يلا يابنات اكيد الضيوف وصلوا اطلعوا استقبلوا الناس
طلعوا من عندها واستقبلوا الضيوف "جيرانهم واقاربهم بس" وضيفّوهم وبدأ الزواج اللي الكل يخفي وراه جروح بس الكل مضطر ينبسط عشان اثير وثامر وبدأ الزواج وتوزيع الحلا المحفور عليها أسمائهم
دق الباب وركضت بيسان للباب وفتحته انصدمت من اللي شافته قدامها شافت وتين وامها واختها انصدمت وهي من زمان عنهم
بيسان بحماس : تفضلوا حياكم احلى من يجي بأحلى يوم
دخلوا وحضنت وتين وسلمت على وجد وأمهم
وتين: كأنه عندكم مُناسبة؟
بيسان: اي والله ملكة اثير
وتين : يروحيييي اثير ملكة يقلبي هي الله يوفقها
ام عزام: معليش جينا بوقت غلط اعذرونا
بيسان: شنوحتس ياخاله تفضلي تفضلي شاركونا فرحتنا
دخلوا وسلموا على الضيوف وسلموا على أهل مُلهم بحراره ودخلوا يشاركونهم الفرحة
-
بعد ماتعرفوا العائلتين على بعض بحكم انهم كانوا مايعرفون الا وتين
جلست وتين جنب وهَج وهي تتقهوى والتفت لوهَج:ابي اشوف اثير
قامت وهَج ومسكت يدها واخذت وجد معهم وطلعوا البنات عند اثير
دخلوا عندها وكلهم يشوفونها وعيونهم تسمي عليها تقدمت وتين وحضنتها : حبيبي الحلو مبروك يأحلى عروسه
اثير: الله يبارك فيتس حبيبتي عقبالتس ياعسل
سكتت وتين وانمحت ابتسامتها وهي تذكرت مُلهم: بوجودك يقلبي
وجد : مبروك اثير
اثير : الله يبارك فيتس بس مين معليش اعرف وتين بس 
ضحكوا البنات وتكلمت وتين: ذي اختي الصغيره وجد ماشفتيها بس شفتيني
اثير ابتسمت: يقلبي انتي وعقبالتس يحلوه
وجد ابتسمت بحرج: ادري ماتعرفيني بس بقول لك طالعه تجنني يابنت مره حلوه ماشاءالله
اثير: يحياتي انتي الحلوه طالعتتس، بنات هو برد ولا عشاني متوتره؟
ضحكت وهَج: لا برد برد بس تحملي وتروحين تغيرين
اثير: يووو وربي خايفه ماابي اروح معه
وتين: شدعوه قلبي ذي البداية "غمزت لها" ماشفتي شي
اثير صرخت بضحك: وتييييييننن ماني ناقصه والله لااهفتس طلعوها عنيييييي
ماتوا ضحك عليها البنات وضحكت وتين: اسفه اسفه بس والله وناسه يختي ذا يومك انبسطي فيه قد ماتقدرين يومك والليلة ذي بالذات مره بالعمر انبسطي فيها....
-
عند الرجال الله جالسين بالمجلس الكبير حق ابو مُلهم وعيال عمهم ومن ضمنهم مازن كانوا يقهوون الضيوف
مازن كان متوتر جدًا من وجود الناس وهو يقهوي بس تشجع كونهم اليوم يحتاجونهم بشده ولان ماعندهم رجال غير مازن وعيال عمه الباقين تشجع وصار يقهوي ويرحب بالضيوف وكأنه زواج اخته وانبسطوا العيال وهم يشوفونه شايل كل شي وبهيبة وبمرجلة الكل يتكلم فيها رغم كل شي فيه
بدأ الشيخ يتكلم والشهود عيال عمها وكان ثامر يمينه وعمها سلطان يساره وتكلم الشيخ: إن الحمد لله نحمده ونستعينه ونستغفره، ونعوذ بالله من شرور أنفسنا ومن سيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدًا عبدالله ورسوله،وبدأ يقرأ الآيات المعروفه لعقد القرآن
مسك يد سلطان وحطها بيد ثامر وكمل: قُل لهُ زوجتك أبنة أخي على سنة الله ورسوله
كرر سلطان ورا الشيخ: زوجتك أبنة اخي على سنه الله ورسوله
التفت لثامر: قُل له قبلت هذا الزواج وقبلت بأثير زوجتًا لي
كرر ثامر وراه: قبلت بهذا الزواج وقبلت بأثير زوجتًا لي
على بركة الله أعلنكم زوج وزوجة وبارك الله لكم وبارك عليكم وجمع بينكم بخير
والكل وقف يسلم على سلطان وعلى ثامر ويباركون له..
-
بعد ماانتهت الليلة الحلوه والمشاعر الجياشة والحُب والفرحة بينهم بعد زعل دام فترة طويلة
بعد وفاة ابو مُلهم أنتهت المشاعر الحلوه والحب وانتهت بالفندق عند أثير وثامر
خلصت الليلة وطلعت من بيتهم وامها واهل ثامر وراها تزفها له طلعت وهي منزله رأسها والخجل واضح عليها تقدمت بتركت وتقدم هو ومسك معها فستانها وركبها السيارة ورجع لعمته "أم مُلهم" تقدم وبأس رأسها وابتسمت له: الله يوفقكم ياوليدي وييسر لكم وانتبه لبنتي تراها أغلى بناتي
ابتسم ثامر: ابشري معليتس ياخاله
ام مُلهم مسكت يده: اسمع ياوليدي تراها زعوله شوي وبيني وبينك لسانها طويل تصبّر عليها
ضحك بقوه : معليتس ياخاله ابشري بتحملها
سمعت ضحكته وهي بالسيارة وابتسمت وبعدين صحت على نفسها: سخيف فاصي يتضحك
وراح سلم على امه: يلا تأمروني بشي؟
ام مُلهم وام ثامر: ابد سلامتك وانتبهوا لاانفسكم
طلع ثامر من عندهم وركب السيارة وسلم وردت السلام وسكت ومشى من قدام بيتهم وكانوا طول الطريق ساكتين والهدوء والصمت يعّم بينهم حب انه يقطع الصمت بينهم وقرب يده ومسك يدها وتخللّت أصابعه بيّن بأصابعها وشد عليها باللحظة ذي انكتمت انفاس اثير وزاد خوفها بشكل أكبر وهي بالبداية كانت متطمنه له بدت يدها ترجف وهو كل ماحس برجفتها شد على يدها اكثر كأنه يطمنها بوجوده ويطمنها بحياتها الجايه معه هو مايدري اي وحده من البنات اخذ لكن الأمانه تبقى أمانه حتى لو انها اكرهه بنت له حب يهدي من خوفها ومد يده لجواله وشغل اغنيته المُفضله واللي تذكره أيام دراسته بألمانيا شغلها وجلس يستشعر الشعور والحب وكل ماحس بالحب شد على يدها ...
-
حُبك جالي في وقته ياروحي
جالي في وقته في وقته تمام
جاني ملاني سعادة ماشفتش
زيّها كده ولا في الأحلام
-
أثير صارت تسمع الأغنية بتمعن وفهمت الحُب والودّ والأمان اللي راح يقدمه لها ثامر بعلاقتهم...
-
بعد دقايق وصلوا للفندق نزل ونزلها وساعدها بالفستان وتوجهوا للغرفة
دخلوا للغرفة ودخل قبلها ودخلها وسكر الباب وهي دخلت قبله ووقفت مكانها تقدم ووقف وراها ومسك يلها ولفها لُه انصدم باللحظة ذي لما شافها نفسها نفس البنت اللي تهاوش معها واللي جرحها واللي سمع صوتها تبكي بالسطح نفسها نفس البنت غمض عيونه وتنهد وهو ماسك أعصابه لانه فعلًا مايطيقها حط يده على فكها ورفع رأسها ناحته وشافت وجهه وملامحه ملامح نفس الشي اللي شافته عند باب بيتهم واللي صدمت فيه وطاحت ونفسه اللي صرخت بوجهه وتهاوشت معه رجعت نزلت رأسها وانفاسها زادت رجع ورفع رأسها
وبدأ يتكلم: الف مبروك والله يجعل حياتنا سعيدة ومتفاهمين ويكتب لنا الايام الأحلى والنصيب الحلو حتى لو ماهو اختيارنا الله يوفقتس معي ويوفقني معتس ويجعلني لتس مثل ماتحبين ويجعلتس لي مثل مااحب"وشد على هالكلمة" روحي غيري لبستس وتعالي نصلي ركعتين عشان نتوفق وفعلًا هذا اللي صار....
-
صباح الخير وصباح الأيام الحلوه والجديده صباح الخير على الحُب الجديد والودّ الموجود والسعي الظاهر للأحباب وللمُحبين....
الصباح اللي كان خير على الكل الا مُلهم كان اليوم حكمه يتنفذ ولا يدري وش ممكن يصير وايش الحكم اللي راح يحصل عليه كان خايف جدًا ويدعي ربه خايف من هاليوم اللي جاء خايف من كل شي رفع رأسه على صوت العسكري اللي ينادي اسمه: مُلهم سطام تفضل
مُلهم: وين!!
العسكري: للمحكمة
رجفت يد مُلهم كانت بايّنه وجدًا مشى مع العسكري وهو يدعي ربه ييسر له كل شي ويطلع منها مثل الشعر من العجين غمض عيونه وتنهد فتح عيونه وشاف وتين جايه كأنها تدري ان اليوم الحكم شافتهم اخذوا وركب سيارتها ولحقتهم ركب ومشوا للمحكمة وهو يتأمل الطريق ويسأل نفسه هل ذي اخر مره اشوف فيها هالطريق؟ ولا لا  كانت الأفكار تتضارب برأسه ولا هو عارف يوقف تفكير
.....
بعد نص ساعة وصلوا للمحكمة نزل وكان مو عارف يمشي هو قاعد يمشي لمصيره وايش ممكن ينحكم عليه وايش ممكن يطلع بالسالفه دخلوا ووقفوا بالمحكمة وكل واحد بمكانه وينتظرون الجلسة تبدأ
...
وبعد عشر دقايق دخل القاضي والمُحامين والمُدعي العام كان مُلهم صعب جدًا انه يوكل مُحامي عشان يطلعه من الموضوع بس سلمان وقف معه وجاب له مُحامي ولا كان يعرف ماعرف الا بوسط المحكمة بدت الجلسة والكل كان خايف وبالذات مُلهم رفع راسه على اللي دخلت وكانت وتين انصدم من وجودها بهالمكان وابوها انصدم اكثر من مُلهم بوجودها هنا بدت الجلسة والكل كان يقدم اللي عنده وانتهوا كلهم وجت كلمة المُدعي العام اللي هو يحكم عليهم بعد ماسمع المعلومات من الطرفين ومن جميع الأشخاص اللي بالقضية ومن المحاميين...
ابو عزام "المُدعي العام" بدأ بالكلام: السلام عليكم ورحمة الله وبركاته والصلاة والسلام على سيدنا محمد ومن خلال تعرفي للمعلومات الصادرة وتصريح المُتهمين وحدث المُحاميين ف يكون الحكم كـ الآتي
صالح محمد حكم ثلاث سنين وبالجلد بما لا يزيد على خمسين جلدة في كل مرة، وبغرامة لا تقل عن خمسة آلاف لأنه كان تاجر ومُتعاطي
عبدالله خلف حكم سجن سنتين وغرامة ثلاثة آلاف
.....
......
مُلهم سطام حكم عليه سجن 6 أشهر وغرامة 10 آلاف ولا يثبت عليه حكم أكثر لأنه كان مُتستر فقط وليس متعاطي او تاجر
مُلهم نزل رأسه ودمعت عينه انكسر ظهره بالحكم همس بتعب: الحمدلله تحملت اللي قبل ومو ناوي تتحمل هالست شهور الحمدلله الحمدلله
حكم القاضي ورفع القضية وتم الحكم وانتهت...
رجعوا للمركز والكل همه اكبر من الثاني والكل زعلان للي صار بس يبقى الدرس الأهم هي دنيا وفانيه ماراح ينفعنا لو نسوي شي مايرضي ربي لان بالنهاية حنا ماراح نرضى لا بالدنيا ولا بالآخرة ويكفي انه يتعب صحتنا ويهلكنا ويودينا بمتاهات كثيره وقال الله سبحانه وتعالى في كتابك الكريم{وَأَنْفِقُوا فِي سَبِيلِ اللَّهِ وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ} {البقرة:195}.
وكان الدرس لمُلهم مايصادق ناس ممكن توديك بداهيه واول ماتشوف عليهم الغلط ولا يتقبلون النصيحة ابعد عنهم لا تحاول تبقى عشان لا تطيح معهم في البلاء وتندم على كل ساعات حياتك التي خسرتها بجانبهم....
.....
طلعت وتين وركبت السيارة وتوجهت لبيت اهل مُلهم تبي تقول لهم كل شي صار بالمحكمة وتطمن قلوبهم بحك ان ماعندهم رجال وممكن ثامر انشغل مع اثير ولا جاء للمحكمة ولا تعرف اذا جاء او لا لانها ماتعرفه بس تبي هي تطمنهم دق جوالها وشافته كان ابوها ردت وفتحت السبيكر ونزلته: ايوه بابا!
ابو عزام بعصبيه: انتي وش كنتي تسوين بالمحكمة !!!!!
واين: بابا جيت عشان مُلهم خواته قالوا لي اشوف واطمنهم
ابو عزام: وانتي وش دخلللككك!!!
وتين بتوتر: بابا تعرف انت ماعندهم رجال بالبيت مُلهم مسجون وابوهم متوفي مين يكون جنبهم مثلًا! ولا تنسى ترا مُلهم هو اللي ساعدني لما ضعت فالبر ولما رماني ماهر بيوم ملكتنا هو اللي كان جنبي وهو اللي رجعني لك
سكت ابو عزام بصدمة معقوله مُلهم هو اللي سوا كل ذا!! كان يجهل الشخص اللي يساعد وتين بس اليوم عرف وكان مُلهم سكر الحوال بصدمة وهو يفكر كيف مُلهم ساعده وهو مافكر يساعده ولا حتى يحط له مُحامي وهو يعرف بحالتهم الماديه......
وتين توجهت لبيت اهل مُلهم ونزلت ودقت الباب وكان مفتوح دخلت بهدوء وشافتهم جالسين بالصالة على التلفزيون وام مُلهم بينهم ووهَج اللي منسدحه على رجل امها ولا احد انتبه لها تنحنح : السلام عليكم
التفتوا كلهم لها وقاموا يسلمون عليها وجلست عندهم وصاروا يسولفون وتفكر كيف تقول لهم: وهَج ترا غرت منك لما دخلت وشفتك منسدحه على رجل خالتي ايش ذا ابي اصير بنتكم
ضحكت ام مُلهم: انتي بنت وزيتس زي اثير ووهَج وبيسان
وتين : لا معليش باخذ مكان اثير مو هي تزوجت خلاص بصير انا بنتك
ام مُلهم فتحت يديها : تعالي تعالي
وتين تقدمت وارتمت بحضنها وضحكت: يووو ياحلو حنانك وياحلو ريحتك صدق صدق خلاص بصير مكان اثير
تقدمت وهَج وسحبتها: عطيناتس وجهه بعد امي ذي
ضحكت ام مُلهم: لا تتهاوشون كلكم بنات وكل وحده ولها غلاها
ابتسموا وصارت تتقهوى معهم: خاله انا جايه اقول لكم موضوع عن مُلهم
فزّت ام مُلهم وبيسان : يمه ولدي وش صاير تكفين ياوتين
وتين: اهدي ياخاله كل شي تمام تم الحكم اليوم ومُاهم انحكم عليه" بلعت ريقها بتوتر وكملت" انحكم عليه 6 شهور وغرامة 10 آلاف لانه كان متستر
ام مُلهم الدمعه بعينها بس تماسكت: الحمدلله سكت شهور ولا سنين الحمدلله
حمدت ربها وتين ان ردت فعلهم ماكانت قويه لانها ماتعرف تتصرف مع المواقف ذي وجلست تتقهوى معهم وترتمي بين احضان ام مُلهم عشان تقهر البنات ويتهاوشون بكل مره

رأيكم بالبارت الحلو ياحلوين 🤎🤎🤎🤎
لاتنسون النجمة وتفاعلكم عشان نكمل🫶🏻
وتعالوا انستا وشاركوني تشبيهاتكم rwiiai1
او شاركوني على هاشتاق #كيف_أتوبك_يأجمل_ذنوبي