غموض جارنا

بارت 27

جنت واگف بلزاوية اراقبهم صح جنت ما مستوعب الي يصير بس بسبب خوفهم عرفت شي مو زين صاير لاختي فاطمة

صرت مثل امي ابجي بقوة وهستيرية احمد من شافني اتقرب مني حضني وگال كلماتة الي ما انساهن بحياتي گال يابة اسمر لا تخاف كلشي ماكو وهسة فاطمة راح ترجع هي تحبنا وما راح تعوفنة

اتمنيت كلامة يتحقق ويصير مثل ما يگول بس يمكن جان ذاك اليوم اخر يوم اشوف فاطمة بحياتي

راسا رفعت راسي باتجاهة وگتلة بصدمة شنو اسمك اسمر شلون هيج

جانن عيونة حمر وامبين بالگوة جاي يلزم نفسة علمود لايبجي هز راسة وگال: بعدين افهمج

رجع كمل وگال

_بنفس اليوم الاختفت بي فاطمة جانا العصر رجال امبين اكبر من ابوية بكم سنة راسا بس دخل للبيت امي وايوية انخطف لونهم وصارو يتراجفون

اتقرب من ابوية لازمة من ياخة قميصة وگال بصوت مليان عصبية وغضب: شوفففففف ولك فهد ورب من خلق السموات والارض اذا فاطمة ما رجعتتتتتت اليوم اخليك انت وميليسيا تتمنون الموت بذاك الوكتتتت وما تلگونة وانت يمكن بعدك ما تعرف منوووو حماددد

بذاك اليوم اول مرة اعرف امي اسمها ميليسيا جان اسم امبين مو عراقي هه

احمد من شاف ذاك الرجال شلون لازم ابوية كلش تعصب واتقرب منة صار يدفعة بقوة علمود يوخر من ابوية بس صدمنا ابوية من دفع احمد وگالة بعصبية: لا تتدخل

عاف الرجال ابوية بس بقى يهدد لما طلع

مرت الايام وجنت كل ما ارجع من المدرسة اگعد كدام الباب انتظر فاطمة شوكت تجي بس جانت تخيب امالي من جان احمد من يرجع من المدرسة يباوعلي بقهر ويدخلني للبيت

فاطمة من ذاك اليوم ما شفناهة ابد وامي بعد ما اختفت فاطمة صارت مدمنة مخدرات وابوية حالتة كل مالها تصير اسوء

بقى هالحال لما صار عمري 13سنة واحمد 16 وبيوم رجعت من المدرسة جنت كلش فرحان لان استلمت النتيجة وطلعت ناجح جنت اسعد واحد بذيج اللحظة جنت بس اريد شوكت اصل للبيت علمود افرح اخوية احمد بنتيجتي لان محد جان هامني غيرة

وصلت للبيت وشفتة واگف ويا جيرانة آميد جانو اصدقاء الروح بالروح ما يتفارگون ولا يوم عالرغم آميد اكبر من احمد باربع سنوات

بس وصلت يمهم وشوفتهم نتيجتي طارو من الفرح صارو يشيلون بية ويرگصون ما يعرفون شلون يعبرون عن فرحتهم وآميد وعدني راح يجيبلي دولمة لان يعرفني كلش احبها وبالسنة مرة اكلها لان امي جانت ابد ما تطبخ فجان احمد دائما لو يسويلنا بتيتة حمس لو تكلاه جنة هيج عايشين

سلمنا على آميد ودخلنا جوة بس انصدمنا من شفنا امي وابوية يتعاركون جان بابا لازم امي من ايدها وهو يگول بعصبية: هذا الطفل تنزلينا لو باليوم الراح يجي راح ادفنج انتي وياه سوية