نسل القبائل "تتمة"

الفصل 106

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 213:

كلامها تحط عليه بحال العافية حرقاتو من لداخل وخلتو رماد ،ماهضر ما قال حرف ولا رد على كلامها جر امه وخرج بدون ما يلتف جيهتها ..

خرج وهو سامع كلام لي هانو اشد اهانة وقاصو فرجولتو وفكرامتو وخلاه ما يقدر يهز راسو ولا يشوف فعنين امه لي سمعات لكلام لي هرسها كثر ماهرس ولدها  ،شداتو من يدو كترعد وقالت بصوت مخنوق..

لالة مونية: أخر مرة تجيبني لهاد لبلاصة..

مبارك مزير و وجهو حمر : عمري غادي نرجع اميمتي غير كوني هانية ..

لالة مونية  : واعدني عمر اسم شمس تنطقو ..

مبارك نزلات ليه دمعة حارة على خدو  : لسان لي مزال ينطق اسمها نقطعو ونعطيه للكلاب ياكلوه ...

دخلها لسيارة وسد لباب وخوتاتو جلسو لور كيمسحو دموعها ومهبطين راسهم مقادرين يقولو والو وهو جلس فبلاصتو وشد طريق فصمت وملامحو حاملين البرود واللا مبالات...

فالفيلا لداخل بقا جعغر كيشوف فبنتو بنضرات ديال لموت ركبو فيها الخوف وخلاوها ترعد ، بغات تطلع لبيتها تهرب وهي تشدها عفراء لي كانت وراها  ، زيرات عليها فيديها وكتهضر مزيرة على سنانها ..

عفراء: صاااافي سااليتي قلتي لي عندك تفشيييتي دابا  ، عجبك راسك الالة شمس ورتاحيتي ...

شمس تضرات فدراها وقالت بألم : ماما ضريتيني...

عفراء سخطات : ضريتك ؟؟؟!..وااااش عارفة راسك فشمن موقف حطيتينا فيه ..

شمس كتبكي:  نتوما لي بغيتوني نحطكم فهاد الموقف انا من لول قلت ما بغيتش ..

عبدالرحمن توجه ليها ساخط : عندك عقل ولا مكتكساابييهش وااش نتي هي شمس ختيي لي كنعرف..

جعفر جلس ونطق بألم : شمس أجي ...

بعدات من خوها خايفاه يضربها وجلسات حدا باها حادرة راسها وجعفر بقا ساكت حادر راسو ومشبك يدو لوسط وحجبانو مهزوزين وتحل صمت غريب لمدة قصيرة وصوت جعفر لي تسمع بوحدو ..

جعفر: قولي ليا اشمس انا فاش اديتك ؟؟..

شمس تصدمات وردات بتلعتم : بابا شنو كتقول نتا عمرك أديتيني ...

جعفر حرك راسو بفهم  ومزال كيشوف فالأرض ما هزش عينو فيها نهائيا وكيهضر بهدوء..

- شنو درت ليك اشمس حتى طعنتيني فضهري !!!..

شمس جمد ليها دم فعروقها هزات يديها تشد يدين باباها وهو يبعدهم ببرود  ..

جعفر : جاوبي اشمس علاش طعنتيني فضهري ؟؟ ..