نسل القبائل "تتمة"

الفصل 98

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 199:

سمعو لهضرة برا وهو يطير عليها بزربة باسها في فمها وخرج كيضحك سلم على عائلتها وشاف فالأم ديالو شوفة فشكل كتوضح عدم رضاه فهادشي لي واقع  وهبط نيشن عند رجال بلا ما يهضر قدام عائلة مراتو ...

دخلات عفراء مبتاسمة لبنتها وجلسو كاملين معاها فالبيت كيضحكو وينشطو ويعاونوها فلبس تا قدات حالتها وطلقات سوالف ولبسات قفطان بيض فيه وريدات بلغوز بارد ودارت فودنها حلقات لويزة ذهبيين وبراسلي رقيق فيديها كتبغي داكشي قليل وخفيف تا من لمكياج كدير غير قلم كحل وعكر لونو وردي خفيف مكيبانش مع لون شفتين ديالها ..

وخا ضياء قال ليها ديري لي بغيتي لكن الأصول وتقاليد ليها دور وتقاليدنا باينة  ..نزلات هي وعائلتها  بالصلاة على نبي لي كتزيد فالفخامة ديال اعراسنا ومنسباتنا وكلشي وقف وهي دخلات محادرة راسها ما هزاه مخلياه بين وبين ما بينات تواضع لمفرط ولا تكبر الزايد ، وفكل تصرفاتها دايرة الوسطية والإعتدال ما عندهاش مع الكثرة وما كتقبلس بالنقص  ، هازة قفطانها باليد ليمنة وليد اليسرة شادة فمامها ومحافضة على ابتسامة جميلة وعينيها كيبريو ودخلات وسط العائلة لي بقاو مبهوضين فيها وغير كيشوفو فيها ما متيقينش هادي هي لي تزوج بيها ضياء لمسخوط ديال تريكة سباعي كيف كيسميوه هما ...

جلسات وسطهم دايرة رجل فوق رجل وضهراها مستاقم ويديها مجموعين لوسط ولي هضر معاها كترد عليه بصوت رقيق وعاطية كل واحد صوابو والإبتسامة مخطاتش ملامحها اما عائلتها كلهم دايرين نفس لحاجة عندهم كلشي بالعقل وبينو اصولهم وتربيتهم فتعامل لي تعاملو بيه معاهم ..

نطقات وحدة من عيالات خو ضياء مغطية فمها بيديها وكتهمس لضرتها لي حداها ...

-  شفتي شحال متكبرة ونافخة وتا عائلتها مساهلينش خصوصا ديك مها غير كتشوف وساكتة باينة دات وجابت فزمان وعارفة كل واحد وشنو تحت راسو ..

ردات عليها ضرتها  : بالعكس انا جاوني متولين مافيهمش كثرة الهضرة ولا ضحك فوق لقياس عندهم كلشي موزون تبارك الله ..

نطقات وحدة كانت بيناتهم : سرحي عنيك فالكادويات لي جابو  شوفي دوك جوح بواطات فيهم جوح سوارت ديال طونوبيل واحد مكتوب فيه عبدالواحد ولأخر مكتوب فيه عبدالرحمن باين كادو من خوتها  وشوفي داك ساروت لي فوق منهم وفبواطة مدهبة بوحدها سمعت هاديك فيلا فطنجة على لبحر كادو من مها وباها ،   سيدة شابعة فدارهم وباينة بنت لفشوش محال تكون مرا ديال دار اتلعب على  ضياء لعشرة  ..

ردات عليها لمرا لولة :  تا يكون ضياء ساهل ليها كتصحابي غير اجي ولعبي عليه هداك راه باه لي ربا شلا ولاد وبنات جا تال ليه وتحدات ليه لمعرفة ومابقا عرف منين يشدو  وخوتو كبر منو وضحك عليهم بقات غير هادي بنت لبارح تلعب عليه والله تا يخرج منها زيت لبلدية ويطحن ليها عضامها لمتقداتش مع طريق ..