ချောက်ချားဖွယ်ရာဘော့စ်ကြီးကို ၃၆၃ရက် ပွတ်သီးပွတ်သပ် လုပ်ပြီးနောက်...

Part 49

သူဝယ်ထားသော မှော်မျက်လုံးက အလွန်တိကျစွာ ထောက်လှမ်းနိုင်သည်ဆိုသော်လည်း ထိုအထဲတွင် ဘာရှိနေသည်ကို တိတိကျကျ မတွေ့နိုင်ခဲ့ပေ။

သိုသော်လည်း အစီစဉ်က အပြောင်းအလဲကို လိုက်မမှီနိုင်ခဲ့ပေ။

ကျန်းကျိရင်မှာ ထိုအဖွဲ့နှင့် မည်သို့ ရင်ဆိုင်ရမည်ကို သေချာ အစီအစဉ်မချရသေးခင်တွင် စခန်းအမှတ်ခုနှစ်သို့ သတင်းတို့က ဆိုက်ဆိုက်မြိုက်မြိုက် ရောက်လာခဲ့သည်။

'စခန်းအမှတ်သုံးတွင် ထူးဆန်းသော ပျောက်ဆုံးမှုများ ဆက်တိုက်ဖြစ်လာသည်။'

စခန်းအမှတ်သုံးမှ အဖွဲ့သားများ တာဝန်ထမ်းဆောင်နေကြချိန်တွင် အဖွဲ့သေးတစ်ဖွဲ့မှ လူလေးယောက် ပျောက်သွားခဲ့သည်။ ထို့နောက် စခန်းအမှတ်သုံးက တပ်ဖွဲ့ကြီးတစ်ဖွဲ့လွှတ်ပေး၍ ထိုလူလေးယောက်ကို ရှာခိုင်းချိန်တွင် သူတို့သည် မည်သည့် သဲလွန်စမှ မတွေ့ခဲ့ရပေ။ ထို့အပြင် ပြန်လာချိန်တွင် လူသုံးယောက် ထပ်ပျောက်သွားခဲ့သည်။

ထိုနောက်ပိုင်းတွင် စခန်းအမှတ်သုံးမှ အနည်းဆုံး ဆယ်ဖွဲ့စာလောက်ရှိမည့် လူများ စုစည်း၍ ရှာဖွေကြသော်လည်း ထိုထဲမှ လူတစ်ချို့က အကြောင်းအရင်းမသိရစွာ ပျောက်ဆုံးသွားခဲ့ပြန်သည်။ တစ်ခြားအဖွဲ့သားများက သူတို့လူ နောက်မှလိုက်လာသည်ကို မြင်သော်လည်း နောက်တစ်စက္ကန့် ပြန်ကြည့်လိုက်လျှင် မရှိတော့ပေ။

ဤသို့ ဤသို့ဖြင့် တဖြည်းဖြည်း စခန်းအမှတ်သုံးတွင် ပျောက်ဆုံးသွားသူ တစ်ဆယ့်တစ်ယောက် ရှိလာခဲ့သည်။

စခန်းအမှတ်သုံး ဒီအတိုင်း ထိုင်မနေနိုင်တော့ပေ။ သူတို့သည် အစောပိုင်းက စခန်းအမှတ် ခုနှစ်မှ ပြောခဲ့သော အဆင့်မြင့်အဆင့် သန္ဓေပြောင်းများ၏ ကျူးကျော်မှုကို သတိရသွားကြကာ စခန်းအမှတ် ခုနှစ်ကို ဤအကြောင်းပြောပြပြီး အကူအညီတောင်းရန် ဆုံးဖြတ်လိုက်ကြသည်။

"ဒီ ပျောက်ဆုံးမှုတွေ ဖြစ်လာအောင် ကျူးလွန်တဲ့ တရားခံက ဒီနားတစ်ဝိုက်မှာပဲ ပုန်းနေမယ်လို့ ကျွန်တော်တို့ ခန့်မှန်းထားတယ်"