وريثة القصر

الفصل السابع

عهد : نص يوم خصم ما هى ناقصه  كمان

صفاء : يلا منه لله ، فوقى كده و كلها ربعايه و ناخد بريك و تحكيلى كل حاجه فاهمه

وبعد ربع ساعه فى و قت البريك

صفاء : انتى بتستعبطى يا عهد ، واحد انقذك من حرامى ، و شوفتيه مرة هنا ، و بتفكرى فيه ، هو ايه ياختى الموڤ اون السريع ده

عهد : انا قوتلك انا بفكر فيه ياختى ، انا بقولك مشدوده ليه

صفاء : اه مشدود ، طب بصى يا بنت عم سعيد ، ومتزعليش من اللى هقوله ، فراغ عاصم اللى حصل جواكى ده هو سبب اللغبطه دى كلها ، اه طبعا حقى تعيشى و تستمتعى بحياتك و الدنيا عمرها ما هتقف على حد معين ، لكن خدى بالك ، اللى انتى فيه ده اخرته كسره قلب فاهمه

عهد : انا نفسي افهم ايه لزمته الكلام ده ، انا برغى معاكى بكلمتين اوام عملتى حوار عليهم

صفاء و هى تشرب الشاى : بلا حوار ، بلا بتاع ، اشربى الشاى خلينا نخلص

________________________________________

فى منزل عامر المرشدى

حيث احضر جميع الالعاب المختلفه و كان يشارك الاطفال الالعاب بكل حب و حنيه و فى لحظات تمنى ان يرجع به الزمن ليصبح بعمر عدى و ايلين

عدى : عامر ، شوفت البيت اللى عملته ايلين بالمكعبات

عامر : ده ايه الشطارة دى ، برافو يا ايلى

ايلين بفرحه : ماما كانت بتلعب معايا بالمكعبات هى و زيزو

عامر : ماما وحشتك يا ايلين صح

ايلين : اه اووى ، هى اتاخرت عليا ، " واخذت تقوم بالعد على اصابعها " يوم ويوم ويوم كتير اوووى

عامر بضحك :  معلش هى قربت تخلص شغل و تيجى

ايلين : بس ماما على طول بتكون معايا فى البيت ، مش بتروح الشغل ، زيزو هو بس اللى بيروح

عامر لنفسه : مش بتروح الشغل ، امال رحيل قالتى عكس كده ليه
" ثم وجه حديثه الى ايلين " ، يعنى ماما مقالتيش ليكى انها مسافره خالص يا ايلين

ايلين :  لا

عامر : غريبه دى ، طب ماما اسمها ايه يا حبيتى

ايلين : اسمها مرام

بدى على عامر ملامح الاستغراب ، ثم سئل عامر : مرام ، طب مين زيزو ده يا ايلين ، ده بابا

ايلين و هى تحرك راسها بالنفى: لا ، ثم اكملت بعبوس و دموع ، ايلى مش عندها بابا ، ممكن اقولك انت بابا

عامر و هو ياخذ ايلين فى احضانه: طب خلاص يا ايلى متعطيش ، انا اسف " ثم اكمل ضاحكا " انا اطول يكون عندى بنوته قمر كده ، و قام بزغزه كلا من عدى و ايلين