South Boys #5: Crazy Stranger

Chapter 3

HOW ARE YOU, BABY?

Bakasyon. Pinakaayaw kong panahon. Mas gusto ko ka kasi na palaging busy. Gusto ko na palaging nag-aaral. Hindi lang dahil sa naaaliw ako na makakuha ng matataas na scores dahil doon ko nararamdaman ang aking importansiya, kundi dahil may iba pang dahilan.

Ang reward ko sa sarili, si Asher James Prudente.

Ang sarap lang magising na alam mong may crush ka sa school. Iyong hindi ka niya kilala, hindi siya aware sa 'yo, pero ikaw ay secretly fan-girling sa tabi. Iyon ang mga thrill na bumubuhay sa katawang lupa ko.

Ang kaso, bakason ngayon. Walang choice kundi mag-stay sa bahay. Okay lang naman din. Natutulungan ko si Mama sa mga gawain. Pinapalakas ko na lang din ang aking loob, na minsan ay kailangan ding malayo tayo sa mga taong bet natin. Para ma-miss natin sila. Sabi nga, 'distance makes the heart grow fonder'.

Parang ang mama at papa ko. Long distance relationship dahil OFW si Papa. Madalas sa phone calls at video calls lang nagkakausap ang dalawa. Just like today.

[ How's my unica hija? Habang nagdadalaga ay lalo ka yatang gumaganda, ah! Dapat na ba akong umuwi riyan para mabantayan kita? ] It was Papa Gil. Kausap ko ito pa-video call sa phone ni Mama.

"Ikaw, Pa? Anong nangyari sa 'yo? Bakit nagkaganyan ang itsura mo?!" Nilakihan ko ang aking mga mata na nakatitig sa screen ng phone sabay ngisi. "Bakit lalo ka naman yatang gumuwapo?!"

Napahagalpak naman ng tawa si Papa. [ Naku, may gusto na naman ng padalang chocolates! ]

Napahagikhik ako. Siyang labas ni Mama mula sa banyo. Naligo kasi ito. "O nagbobolahan na naman kayong mag-ama riyan."

Ibinigay ko na ang phone kay Mama. Nag-usap na silang dalawa. Nagkumustahan. Bago ako bumalik sa itaas ay narinig ko pa ang nababahalang tanong ni Papa kay Mama, kung tutuloy ba raw kami sa pagpunta sa reunion ng mga Valmorida.

"Oo naman, mahal. Hindi puwedeng hindi kami pupunta ni Lai doon sa reunion. Aba, magtatampo naman ang pamilya mo, at baka may masabi pa sa atin."

Pangatlo sa magkakapatid si Papa. Tita Rica was the oldest, Tito Geroy was the second, and Tita Tootsie was the youngest. May mga kanya-kanyang pamilya na. Madalas magsama-sama kapag death anniversary ng ama ng mga ito. Bale, iyon ang pinaka-reunion nilang pamilya.

Naghanda na ako sa pag-alis namin ni Mama. Shorts na maiksi na kulay orange ang suot ko at puting loose shirt na may print ng mukha ni Doraemon sa harapan. My flat sandals were also orange in color. Ang bag ko naman ay backpack na itim. Naroon ang mga gamit namin ni Mama.

Pagkarating sa private resort kung saan gaganapin ang reunion ay hindi pa agad kami pumasok ni Mama sa loob. Pareho kaming nag-inhale at exhale muna. Inihanda ang mga sarili na tila sasabak sa gera.

"Lai, patience, ha?" Mama reminded me. At hawak-kamay na kaming pumasok sa loob.