عشق في مملكة فاريس

الجزء الثاني عشر

#عشق_في_مملكة_فاريس
#بقلم Sarah sarrita
"بين اسوارها عشقتك يا ذات العيون السود"

الجزء الثاني عشر

لوجين تيتألم من شنو وقع ليه، و من قمة الحقد لي وصلو ليها الناس فقط حيت بقى مع دوك جوج لخرين.. 

مبقى عندو حتى فين يعيش.. عينيه دمعو عمرو تخيل الناس لي تربى بينهم يحقدو عليه لهاد الدرجة غير حيت شارك.. ياك حتى هما شاركو؟ شنو الفرق؟ علاش متقبلوهش؟ واش حيت معندوش اسرة؟ واش حيت مقطوع من شجرة؟ شنو ذنبو الا عائلتو تخلاو عليه؟ و الا عائلتو ماتت و هو رضيع؟

قلبو ضرو بزااف، ناض غير بزز و خرج من تماك قلبو مكسور متاجه للحديقة.. الحديقة نفسها لي قابل فيها الأميرة..

قبل شروق الشمس الناس تجمعو فالمسرح و حتى من المتسابقين من بينهم جاك لي كان فرحان.. سامويل لي هو بدورو كان فرحان و معتاقد بلي الخطة ديالو غادي تنجح.. و يوجين لي كان محطم داخليا و خارجيا الكدمات باينين على وجهو.. طلعو للمنصة و فنفس الوقت، جا الملك و الأميرة فيكتوريا مغطية وجهها مرة خرا و تتقلب على يوجين بعينيها حتى بان ليها و وجههو فيه كدمات.. بقا فيها و معجباتهاش حالتو و راسها مشوش عليه! شنو سبب الكدمات لي فوجهو؟؟

بداو التحضيرات باش مع شروق الشمس يخرج جاك من المسرح فاتجاه الغابة المظلمة و تبدا المغامرة ديالو و خاصو يرجع و يكون فالمسرح قبل غروب الشمس و معاه وردة الثلج..

الملك هداه فرس جديد الشيء لي خلا سامويل محاملش راسو و معارفش حتى شنو يدير باش يمنعو من النجاح فالمهمة ديالو.. الفرحة تحولات لقرحة و ابتسامتو لتغوبيشة تيبين على عدم الرضى بشنو واقع..

اما جاك استعد مزيان و كان واجد و جاهز باش يمشي للغابة المظلمة.. و غير تضربو الطبول تعلن على بداية المغامرة لجاك.. و هو يمتطي حصان لي عطاه الملك متاجه للغابة المظلمة..

الكل تيتسنى فالمسرح شنوغيوقع و شنو مصير جاك واش غادي يرجع ولا لا.. خصوصا ان الغابة المظلمة تترهب الكل.. أما فيكتوريا فعينيها و عقلها و قلبها مع غير يوجين لي كان جالس فالأرض و تيتسنى يسالي هادشي لي أصلا محاملوش.. حيت كن مواعدش فيكتوريا مكانش غادي يجي من أصلو.. و جلس فبلاصة بعيدة عليهم باش حتى الا كانت حبيبتو فيكتوريا مع الجاريات ديال الأميرة متشوفوش هاكاك و تخلع..

بعد ساعة من الطريق
أخيرا وصل جاك لأبواب الغابة المظلمة، و هو يشوف فيها لدقايق عاد ضرب حصانو لي بدا تيجري داخل للغابة لي كانت نيت مظلمة بحكم انو الأشجار كثيفة فيها و طويلة بزااف مداخلين فبعض فالضوء ديال الشمس تيدخل غير عبر نقط افتراق اوراق او اغصان الأشجار.. بقا غادي مدة طويلة تيجري بسرعة و هو عارف بلي وردة الثلج كاينة فواحد الأرض فالتلة داخل الغابة..

داز الوقت
وقف قدام النهر باش يخلي الحصان يشرب و هو ياكل من داكشي لي جابو معاه.. و هو تيرتاح ظهرات واحد المرأة عجوز دايزة من حداه و قربات منو.. شكلها كان غريب..

الشارفة: ولدي! عطيني ناكل شوية معاك!!

جاك حبس الماكلة و عطاها و هي تاكل و تتهضر معاه..

الشارفة: شنو جابك لهنا؟
جاك تيهضر بعفوية: واحد المغامرة الا نجحت فيها غادي نتزوج الأميرة
الشارفة بتاسمات: شنو هي هاد المغامرة لي جابتك لهاد الغابة؟
جاك بلع ريقو: تنقلب على وردة الثلج..

#يتبع