عشق في مملكة فاريس

الجزء الخامس

   #عشق_في_مملكة_فاريس
#بقلم  Sarah sarrita
"بين اسوارها عشقتك يا ذات العيون السود"

الجزء الخامس

نفس الجمل تيقولهم و هو تيطبل خلا الجميع ممتيقينش شنو تيسمعو بوذنيهم ولا شنو عادشي تيقول فيه هاد البراح.. كيفاش؟ وعلاش؟ و بزااف ديال الأسئلة باغين يعرفو جوابها..

الصديق 2 بجدية: شنو بان ليك نطلق؟ تقبل بيا زعما؟
يوجين بتاسم: علاش مال مراتك؟
الصديق 3 باستهزاء: الصراحة عندو الحق!! و لكن واش فنظرك الأميرة غادي تخلي ولد الوزير و تختارك نت؟ ههههههه
الصديق 1: أنا تصدمت.. و لكن كلشي ممكن!

يوجين بقى مقصر معاهم النهار كامل و اغلب حديثهم غير على الأميرة فيكتوريا.. ماشي غير هما بل فالمملكة فاريس كلها..

وصل ليل،
يوجين جاه الجوع من الزريعة ديال الصباح مكلا والو.. بقا تيتمشى فأزقة مدينة روزان فين ساكن و فين كاين حتى قصر الملك ارسلان بحيت هاد المدينة تتعتابر عاصمة للمملكة و هي فين ساكنين معظم سكان المملكة و ماشي غير هادشي بل تتعتابر هي المدينة الوحيدة لي كاينة حيت التجمعات السكنية لخرين قلال بزااف و تيتعتابرو قرى..

يوجين بقى تيتسارى وسط المدينة حتى خرج منها.. حتى وصل لواحد الحديقة و بقا جالس و تيشوف..

فنفس الوقت، الأميرة فيكتوريا خرجات من القصر.. تاجهات لحديقة القصر و بقات تتمشى ساهية و تتفكر فهاد الزواج لي ولابد منو.. كيفاش غادي تأقلم مع شريك حياتها خصوصا أن باها بزز باش وافق تجمع الرجال المملكة كلهم باش تختار منهم واحد ..

فيكتوريا ملقات راسها غير برااات القصر و تتمشى حتى بعدات على المدينة و وصلات لواحد الحديقة فيها الورود من جميع الأنواع الفواكه و الخضر.. الطبيعة خلابة تتفرح كل من شافها.. بقات غادة فرحانة و قلبها تيترعد.. غير تتسقي عويناتها من هادشي لي تتشوف..

أما يوجين، غير شاف الفواكه لي تما خدا منهم و بدا تياكل تيسقي فجوعو.. حتى فاجآتو الأميرة بسؤالها..

فيكتوريا: شكون نت؟ و شنو تدير هنا؟

لوجين دار عندها بالعرض البطيء و هي غير شافتو سهات فيه و حتى هو نفس الحاجة حتى طاحت ليه قطعة الفاكهة فالأرض.. بلع الضغمة حتى وحلات ليه و بدا تيكحب، بالجهد و قربات منو مخلوعة و هي تضربو فضهرو و داتو لحدا واحد الخصة و شرب الما عاد ارتاح نسبيا و بتاسم ليها..

يوجين: شكرا!
فيكتوريا مبتاسمة: العفو! ياك بعدا دابا شوية؟
يوجين: اه! مزيان.. غير عجبني المنظر ديال الفاكهة و قلت نذوق
فيكتوريا: بصحتك..

لوجين مباغيش يبين ليها بلي كان حيعان داكشي علاش بدا تياكل من الفاكهة بدون ميسقسي ولا ياخد شوار حد..

مد يدو باش يصافحها: أنا يوجين..
فيكتوريا صافحاتو: فيكتوريا..
يوجين: ساكنة غير هنا؟ ولا فمدينة روزان؟
فيكتوريا مبغاتش تقول ليه بلي هي أميرة: آه! نقدرو نقولو هاكا..
يوجين مبتاسم: و علاش عمرني شفتك؟
فيكتوريا: حيت انا وحدة من خدم القصر.. و تسميت على اسم الأميرة.. حيت جميع البنات لي تزادو فنفس العام تسماو على اسمها..

#يتبع