وأنا الهبايب ماتحرك غترتي وعقالي

الهبايب ~١٧~

العمه نوره كانت ماسكه الصحن معها وتاكل وثم نطقت : انتصار يمه قومي شوفي اختك محتاجه شي
قامت انتصار ونطقت سلمى : اي وحده من خواتي ؟
العمه نوره: الجوهره جت عندنا
ضحكت سلمى : وين الي تقول بجلس عند زوجي ؟
العمه نوره: انا جبتها غصب قلت اول اسبوع عندنا وثم بكيفها
لف الكل نظره على الباب من دخل عبدالعزيز ببتسامه ونطق : اياد طلال عندي لكم هديه كلكم قوموا لحد يجلس
الكل فز من مكانه وادهم سحب العمه نوره ب العربيه ل الشارع
شهق اياد وهو يشوف سيارتين اخر موديل قدام الباب ونطق عبدالعزيز: قليله بحقكم
ركض طلال وهو يحضن عبدالعزيز وبادله عبدالعزيز الحضن ونطق طلال بدموع: الله يسعدكككك ي شيخخخ
اما اياد ركب السياره وهو يشوف تفاصليها ونزل وهو يطق تحيه لعبدالعزيز : يسعدك ربي
ادهم بغيره : وانا؟؟؟
عبدالعزيز ببتسامه : خلص دوره الدفاع المدني وابشر والله بالي يسرك
ادهم : اذ تبيني اروح الحين الدوره عادي ماعندي مشكله
ضحك عبدالعزيز ولف نظره على الباب من طلعت الجوهره وهي تركض : ابييي اسوقق
مسكت راسها العمه نوره: يويلي ويلاه ي بنت توك نفاس
ضحك عبدالعزيز : تستاهل ام عز الصغير اركبي اركبي سياره طلال دقايق بس دقايق
ركضت الجوهره وركب جنبها عبدالعزيز ومسكت راسها العمه نوره: يويلي ويلاه ما اغبى من ام عز الا ابو راكان
ضحكت الجادل الي كانت تتفرج عليهم وطل عبدالعزيز من الشباك: جادل تعالي اركبي
مسكت يدها العمه نوره: لا لااا مابي افقد حفيدي
ضحكت الجادل ونطقت : خليني اروح ي خالتي
العمه نوره بحده : اقول اقعدييي
عبدالعزيز نزل من سيارته ومسك يد الجادل الثانيه ؛ يمه تراه ولدي نفس ماهو حفيدك
العمه نوره شدت على يد الجادل : اقول والله ماتركب
ضحكت الجادل وهي تناظر عبدالعزيز: خلاص كل شي الا خاطر خالتي مارح اركب بس اعطيني وعد اسوق ثاني مره
عبدالعزيز بضحكه : خلي خالتك تعطيك وعد
ومشى من عندهم وركب مع الجوهره الي تغطت وبدت تسوق والعيال يصفقون لها من عند الباب
مشى اياد لسيارته والعيال ركبوا وراه ومشت سلمى وهي تصورهم من داخل السياره
~~ الساعه ١م ~~
تقدمت امام الباب وهي تناظر بـ عبدالعزيز بمكتبه ولاهي على الكمبيوتر والاوراق تملى طاوله المكتب نطقت بهدوء : عزوز
عبدالعزيز وهو يناظر الكمبيوتر: هلا؟
الجادل : فاضي؟
عبدالعزيز قفل الكمبيوتر ورفع نظره لهِ : افضى لك سمي ؟
تقدمت له الجادل وقفت قبال مكتبه تماما ونطقت : بروح الطايف
توسعت عيون عبدالعزيز بذهول من الطاري ونطق : وش جاب طاري الطايف؟
الجادل نزلت راسها بحزن: دامك فهمتني طالبتك لاتردني والله ي عزوز الشوق ل الام يوجع
تنهد عبدالعزيز بقله حيله ونطق : ابشري جهزي الشناط وباكر الفجر ماشين
الجادل فزت بفرحه : الله يسعدك ويديمك لي عمر
ابتسم عبدالعزيز من فرحتها : امين
الجادل : طيب وخطبه اياد؟
عبدالعزيز: امي بتروح تخطب له ولتركي وموضوع الزواج بعدين
هزت راسها الجادل بـ الايجاب ومشت تجهز الشناط وهي تحس بشعور غريب كيف بتحط عيونها بعيون امها بعد السنين ذي كلها كيف شعور العمه موضي وهي تشوف ولد الجادل اصلا كيف بيكون شعورها بعد ماتعرف ان بنتها تزوجت وهي بعيدها عنها كل المشاعر كانت تتضارب مع بعضها البعض بنفس الوقت مابين خوف وفرح وشوق وحماس ولهفه
جلست قدام الشباك وهي تتنظر شفق الفجر على احر من الجمر
فزت من سمعت مسجد الحي بدا يكبر << الله واكبر >>
وقامت تقوم عبدالعزيز: عزوزززز قم اذننن يلا مشينا
عبدالعزيز جلس على الفراش وهو يفرك عيونه : وين نمشي؟
الجادل حطت يدينها على خصرها : مو انت تقول بنمشي الطايففف؟؟؟؟
عبدالعزيز مسك راسه : ايهه قلت لك بس تونا
الجادل مشت وهي تولع الانوار : لا مو تونا قم صل والبس الا طالع النور
ضحك عبدالعزيز على حماسها ونطق : سمي الحين اقوم
قام عبدالعزيز وبدا يغسل ويصلي والجادل تصحي راكان والكل من جهه مشغول بـ حوسته لين ماطلع عبدالعزيز من باب الشقه وهو ماسك الشناط / يلا جادل انتظركم تحت
طلعت الجادل وهي لابسه العبايه وماسكه يد راكان : يلا مشينا
طلعوا سوا على شروق الشمس وحوش العم ابراهيم خايل من الاشخاص مافيه غير صوت الشناط وصوت خطواتهم
ركبوا السياره مع عبدالعزيز وبدت الجادل تحكي شعور اللحظه ل عبدالعزيز الي كان يسمع لها ومتوتر من توترها
~~ العصر ~~
العمه نوره وقفت عند باب الشارع بعربيتها ومعها انتصار وهم لابسين عبايتهم وكاشخين نطقت العمه نوره بصوت عالي: ايادددددد تركيييي
نزل تركي وخلفه اياد يركب الكبك حق الثوب وتركي يلبس جزاماته
نطقت العمه نوره: وينهو نويصر ؟؟؟
ناصر طلع من الحوش الخلفي ل الشقق وهو يعدل شماغه : يلا يمه بس ترا عبدالعزيز ماهو موجود
عقدت حواجبها العمه نوره بستغراب : وين راح ؟
ناصر : والله مدري اتصل عليه ؟
العمه نوره هزت راسها بـ النفي: لا لا شكله مع زوجته خلهم ينبسطون يلا انتم جاهزين ؟
الكل هز راسه بـ الايجاب ونطقت العمه نوره: اجل مشينا
وفعلا ركبوا كلهم سياره اياد متوجهين لبيت خلود لاجل تركي ومن ثم بيت فاتن
نطقت العمه نوره من وقفوا قدام باب بيت ابو خلود : يلا وترا ابوها رجال مايسمع طولوا اصواتكم
ناصر : سمي
نزلوا وبدت الخطبه عند الرجال والحريم جلسوا سوالف مع خلود
وماهي الا دقايق وهم راكبين السياره
ناصر : ابو خلود موافق بس مدري عنها يقول انها رافضه ثلاث رجاجيل
العمه نوره: اي حتى لمن سوالفنا مع خلود تقول ان راعيه ابوها اهم بس والله مايضيق خاطرك ي تروكي بنحاول بهاً
تركي تنهد بقله حيله: الله يكتب الي به الخير
اياد :يلا دوري
ضحكت العمه نوره على حماسه ونطقت : الله يتمم لك
~~ الطايف ~~
وقف عبدالعزيز بسيارته قدام باب الخال محمد ولف عليه الجادل بتوتر:عزيز انزل معي
نزلو سوا وبدا عبدالعزيز يطق الباب بيساره والجادل شاده على يده اليمين انفتح الباب وكان يقابلهم رجال طويل ونطق بصوت ضخم :هلا؟
عبدالعزيز بستغراب : مو هذا بيت محمد؟
الرجال : رحمه الله عليه متوفي من سنتين
الجادل عقدت حواجبها بستغراب وصرخت : وششش ؟؟؟ وين بناته الجازي ويننن؟؟؟
الرجال : انا زوج الجازي
دفته الجادل ودخلت ل البيت وهي تنادي العمه موضي
طلعت لها الجازي وهي تناظر بها : جادل ؟؟؟
الجادل توجهت لها وهي تحضنها بقوه وبدت تبكي بحضنها والجازي بادلتها الحضن بخفه وابعدت الجادل وهي تناظر بها : وين امي ؟ قسم بالله اني مشتاقه لها
الجازي عضت شفتها بخوف : امك ماهي هنا
الجادل عقدت حواجبها بستغراب :وينهي فيه ؟
بدريه طلعت بخوف وهي تناظر الجادل : ادخلي تقهوي وتسمعين العلم كله
الجادل بخوف : امييي ويننن؟؟؟؟؟
الجازي : امك ببيت لوحدها مع خدامه
ناظرت فيهم الجادل : نعم ؟ تاركين امي وحالتها الصعبه لوحدها؟
الجازي تنهدت بقله حيله: حنا عندنا حياه وامك راعيتها صعبه تكون مع خدامتها اهون لها
ناظرت فيهم الجادل نظرات خذلان : الكلام ذا يطلع منك ي الجازي ؟ وانا الي كنت اشوفك اختي اخر شي اسمع منك الكلام ذا ؟ ماقصرتي يجي منك اكثر
الجازي قربت لها وهي تحاول تمسك كفوفها : جادل تكفين اسمعيني
الجادل ابعدت عنها بصراخ : ابعديييي مابييي اسمععع منك شييي
الجازي : امك ب بيت شاكر القديم
ضحكت الجادل بوسط دموعها : ماشاءالله شارين لها بيت عمال قديم خوش ي جازي
طلعت من قدامها لسياره عبدالعزيز وهي تذرف دموع ركب عبدالعزيز السياره بخوف من شكل الجادل ونطق: علامك ؟؟
الجادل بدموع : امي ماهي موجوده!
فز عبدالعزيز بخوف : كيف ماهي موجوده ؟ جادل اهدي وتكلمي معي
الجادل رفعت نظرها له : امش سيدا وثم لف يسار تلاقي بيت طين وقديم امي هناك
توسعت عيون عبدالعزيز من وصف البيت : كيف امك ب بيت قديم ؟ ماكانت ببيت خالك ؟
الجادل : كانت فيه لمن خالي كان عايش
تنهد عبدالعزيز بضيق وهو يمسح وجه بكفوفه ومشى على وصف الجادل وفعلا لقى البيت ونفس وصف الجادل ولكنه مرتب من ناحيه الطين ومن الخارج مليان زرع واشجار
نزلت الجادل وهي ماسكه راكان وعبدالعزيز خلفها طقت الباب وفتحت لها الخدامه : اهلا مدام ؟
الجادل : هذا بيت ماما موضي ؟
الخدامه هزت راسها بـ الايجاب : مين انتي !
الجادل ابتسمت بوسط دموعها : كلمي ماما موضي قولي الجادل برا
هزت راسها الخدامه ودخلت وقفلت الباب خلفها تقدم عبدالعزيز وهو يشوف يد الجادل الي ترجف بخوف وماسكه يد راكان
فتحت الباب الخدامه : ادخل
دخلت الجادل وهي تفلت يد راكان وركضت ل امها الي بـ الغرفه مستلقيه على السرير الطبي طاحت الجادل على صدر امها وهي تشهق من البكاء وتشد يدها على كتف العمه موضي
العمه موضي بدت تمسح على شعر الجادل وهي تردد: بسم بالله عليك ي يمه
الجادل بدموع وهي لاتزال عـ صدرها : اشتقت لك يمه
العمه موضي: ارفعي راسك ي جادل ارفعي
رفعت راسها الجادل وصدت نظرها عنها لاجل تمسح دموعها وثم رجعت تناظر بها : يمه مانتي متضايقه ؟
العمه موضي بستغراب : بخصوص ايش؟
الجادل بعصبيه : بخصوص الي ما يتسمون رموك هنا ومهملينك الله يـ
العمه موضي مدت يدها على فم الجادل : اسكتي ي يمه لاتدعين هم مامهم ملزومين فيني ولا ملزومين يشوفون حالتي يكفي خالك الله يرحمه ماقصر معي تعبته معي لين اخر عمره
تنهدت الجادل بضيق ونطقت :يمه تكفين لاتبررين فعلتهم مهمها صار انتي عمتهم
العمه موضي شدت يدها على يد الجادل : ي يمه لاتضايقين نفسك وتعوذي من بليس
نزلت راسها الجادل بحزن وتنهدت بقله حيله: يعني انتي راضيه ؟بحالتك ذي ؟
العمه موضي: اي راضيه الحمدلله معي خدامتي
ونزلت راسها العمه موضي على بطن الجادل الي واضح من تحت العبايه ونطقت : جادل
رفعت عيونها الجادل لها : سمي ؟
العمه موضي مدت يدها وهي تمسح على بطن الجادل : حفيدي جاي ؟
ضحكت الجادل بوسط حزنها : مو بس واحد حفيدك الكبير برا مع ابوه
توسعت عيون العمه موضي بذهول وضحكت بوسط دموعها: ناديهم ناديهم
هزت راسها الجادل ببتسامه وطلعت تنادي عبدالعزيز الي كان يناظر البيت بوحشه وغرابه نطقت الجادل : تعالوا
مشى راكان وهي ترفعه الجادل بحضنها وعبدالعزيز مشى خلفهم دخلت الجادل ببتسامه ل العمه موضي الي بدت ترحب بهم ببتسامه:يهلا والله بحفيدي وقره عيوني
مشت الجادل وهي تحط راكان بحضن العمه موضي ونطق عبدالعزيز:سلام عليكم
رفعت نظرها العمه موضي وهي تعرف ملامحه زين ولكن شكله متغير من ناحيه الدقن وطوله: وعليكم السلام ولد ابراهيم ؟
ابتسم عبدالعزيز: اي ولد ابراهيم الثالث عبدالعزيز
ابتسمت العمه موضي : ي هلا فيك شلونك ي عيني شلون امك ؟
عبدالعزيز ببتسامه : الحمدالله بخير طول الله بعمرك
العمه موضي لفت نظرها على الجلسه الارضيه : حياكم اجلسوا الخدامه تسوي القهوه
مشى عبدالعزيز وهو يجلس والجادل جلست على يسار فراش العمه موضي وهي تمسح على يدينها : الله يمه الحناء مين مسويها لك؟
العمه موضي ببتسامه: خدامتي تعرف تسوي كل شي
ولفت الجادل على راكان : راكان حب راس جدتك
قرب راكان بخجل وهو يبوس راسها ونطقت العمه موضي: وهه يزين البوسه ي ناس بسم الله عليك ي امي انت
تنهد عبدالعزيز براحه من شاف ابتسامه الجادل وصوت ضحكتها مع العمه موضي لاول مره يشوف الجادل مبسوطه ومرتاحه لذي الدرجه لاول مره يشوف نظرات الراحه والحب بعيون الجادل لشخص عكس نظراتها مع الخال فرحان الي تكون كلها خوف وعدم راحه
~~ عنيزه ~~
جلس منصور امام العمه نوره الي واقفه بنص الحوشه وتناظر ل السماء والنجوم والقمر خلف الغيوم
منصور : سلام عليكم
العمه نوره لفت عليه : وعليكم السلام يهلا
منصور بهدوء :شلونتس ي الغاليه
العمه نوره: الحمدالله بخير ي يمه انت شلونك شلون شغلك ؟
ابتسم منصور : شغلي ماشيه اموره مكتب صغير استزرق منه
ومسح على شنبه بخفه ونطق : الا عبدالعزيز كيف شغله ؟
العمه نوره بحماس : اييي عزوز ماشاءالله عليه الله لايضره فاتح له شركه ل العقارات والموظفين يمينه ويساره وهو المدير
منصور توسعت عيونه بذهول : وشش؟
العمه نوره لفت عليه : اذكر ربك
منصور : وش اسم الشركه ؟
العمه نوره: عز ل العقارات تلاقيه ب وسط القصي
طلع ناصر ومعه بناته لين وليان وهم يركضون ل العمه نوره
فتحت ذراعها العمه نوره ببتسامه : يهلاااا
رفعتهم بحضنها ونطق ناصر ببتسامه : يمه تراهم كبار لاتحطينهم بحضنك
العمه نوره: احطهم بقلبي بعد مالك شغل كل شي الا حفيداتي
ابتسم ناصر: الله يرحم ايام عصاء ابوي بس
ضحكت العمه نوره: الله يرحمه ي رب المهم اخوك وينهو بوه ؟
ناصر : عبدالعزيز ؟
العمه نوره: بوه غيره ؟
ناصربكذب :مسافر هو وزوجته يغيرون جو
قام منصور من عندهم : تصبحون على خير
الكل : تلاقي خير
ومشى ناصر وهو يجلس مع امه ومعه بناته ومن ثم نزل تركي من سطح البيت ونطق : سلام عليكم
الكل : وعليكم السلام
ناصر ناظر فيه : وينك فيه العاشق المجروح
العمه نوره لناصر بحده : اسكت انت
ولفت على تركي : علامك ي يمه متضايق ؟
تركي جلس قدامهم وهو يحك راسه : ماني متضايق
العمه نوره مدت له يده وهي تمسح على شعره : الله ييسر امورك ي عين امك انت تهون ان شاء الله ماعليك
ولفت على ناصر : بتنزل الرياض ؟
هز راسه ناصر بـ الايجاب : اي بروح الرياض بعد زواج انتصار اخر سنه آن شاء الله وثم اتوظف هنا دكتور
ابتسمت العمه نوره: الله يوفقكم ي عيني انتم ويقر عيوني بشوفتكم وشوفة احفادي ب اعلى المراتب واعلى المناصب
الكل : امينن
ادهم طلع من المطبخ ومعه صحن سندويش ضحك بخفه : كلمي وقولي عيال احفادك
ضحكت العمه نوره: اذ ربي كتب لي عمر امين ليه لا
ضحك ادهم بخفه وجلس قبالها جنب تركي وناصر : الله يطول بعمرك ي غاليه وتشوفين احفاد احفادك
ضحكت العمه نوره بعلو صوتها :لا اعوذ بالله
ادهم بدا ياكل وهو يسولف مع العمه نوره: ليه اعوذ بالله؟
العمه نوره: لان ي امي انت الرسول صل الله عليه وسلم تعوذ من كبر العمر
ادهم : وليه ؟
العمه نوره: لان الشخص كل ماكبر رجع بزر يعني ارجع تصرفاته نفس الاطفال ويفقد عقله علشان كذا دايم تعوذوا من كبر العمر
الكل : اعوذ بالله من كبر العمر
لين : اعوذ بالله من كبر العمر
ضحكت العمه نوره وهي تمسك خدودها : شاطره بنيتي
ادهم بضحكه : اي شاطره ؟ يشيخه انتي توك ماوصلتي بنص العمر
العمه نوره ناظرت فيه : لا لا شاطره بنتي لازم تتعلم الامور الدينيه من وهي صغيره
ليان: انا مارح اقول اعوذ بالله
ضحكت العمه نوره: وليه مارح تقولين ؟
ليان : علشان ابي اصور عجوز ويصير عمري مليوننن
ضحك الكل من كلام ليان والعمه نوره الي بدت تتكلم معهم ب الدين
ان اصبت فهو من فضل الله وان اخطأت فهو من الشيطان ✨🤎