وأنا الهبايب ماتحرك غترتي وعقالي

الهبايب ~١٣~

ضحك تركي بنص جموده : روق ي رجال وافتح الموضوع مع
عزوز لان بيني وبينك انا ما افهم بسوالف الزواج واصلا البنات يسمعون كلمه عزوز اكثر من كلامي
عقاب تنهد بخوف من عبدالعزيز لان شكله وشخصيته تبين انه شديد وعصبي ونطق : متى يجي عزوز ؟
تركي ناظر ساعه البيت : ب الطريق جاي
دخل طلال وهو يناظر فيهم: سلام عليكم
الكل : وعليكم السلام
ودخلوا بعده التوام وجلسوا كلهم ويسوالفون مع بعض لين مادخل عبدالعزيز بعد المغرب : سلام عليكم
وقف عقاب وهو يسلم عليه وحاس بتوتر بشكل مو طبيعي اما عبدالعزيز جلس يتقهوى معهم مد له الفنجال تركي ونطق : عقاب جاي يكلمك بموضوع
اخذ الفنجال عبدالعزيز ولف على عقاب وهو يشرب فنجاله : عسى خير؟
عقاب : يشرفني انسابكم
ناظر فيه عبدالعزيز وهو يشرب القهوه ونزل الفنجال وكان الوضع صمت لثواني وثم نطق : وين جماعتك وربعك ؟
حك جبينه عقاب : جاي اليوم لحالي اخذ الموفقه منكم وان شاء الله المره الجايه ان تيسر الوضع يجون جماعتي
عبدالعزيز بثبوت وهدوء: تعال مع جماعتك ونتكلم آن شاء الله بذا الموضوع
هز راسه عقاب ب الايجاب وجلس يتقهوى وهو يحس بحراره بجسمه من جمود عبدالعزيز ولاكانه شخص عمره ١٩ سنه جلس يسال نفسه:وش الشخصيه الي عنده ذي ؟ وكيف يتحمل ويتكلم بذي الامور وهو توه مادخل العشرين وكيف شايل مسؤوليه خواته واخوانه والكل معتمد عليه وهو بذا العمر وبذا الشكل الصغير
رفع نظره وهو يناظر ب عبدالعزيز الي كان فعلا طويل ولكن جسمه نحيف وشنبه خفيف وبدون دقن ولكن افعال منصور واخوانه الباقين ومسؤوليتهم مايتحملها اكبر شنب
~~ قسم الحريم ~~
جلسوا البنات مع العمه نوره قدام التلفزيون وهم يشوفون الاخبار قدامهم وشاشه سوداء وبيضاء
العمه نوره: الحين الرجال الي يتكلم ذا يشوفنا؟
ضحكت سلمى : وين يشوفك ي الغاليه هذا ب الرياض مصور المقابله وحنا بعنيزه
العمه نوره وهي تتقهوى : والله مدري عنكم انتم وجيلكم عسى الله يرحم جيل الطيبين وبياض الوجه كل همنا نجيب الماء من القليب والقلوب على بعضها
ضحكت هيا وهي تقرب لوجه امها : يمه كيف عرفتي ابوي ؟
نزلت راسها العمه نوره وهي تتذكر : انا بدويه اول واعيش ب البر وابوكم حضري وعايش ب بيوت طين المهم يجي ذاك اليوم ويجي ابوكم مع جدكم عسى الله يرحمهم وطلبوا مننا تمر خاص المهم ارسلني ابوي ل النخل اجمع منه وانا اروح الا الاقي ابوكم هناك وهو يعجب فيني
ضحكوا البنات كلهم بنفس الوقت ونطقت هيا : الله على جيل الطيبين
مدت يدها العمه نوره وهي تقرص خدود هيا : حب نظيف مو مثل حب الجيل ذا
دخلوا العيال دفعه وحده بعد ماطلع عقاب ماعاد منصور ماكان معهم
نطق عبدالعزيز وهو يناظر الشاشه: ها انتصار انقهرت ولا لا؟
ضحكت انتصار : لا مانزلت خلها تنزل اني لا اقهرها والبس البناجر الي تعمي عيونها من قوه اللمعه
ضحك طلال على وضع انتصار الي تشرح بحماس : خلي بنت الخال تجي تلعن جدفها نفس ما لعنت ترفه
جلسوا العيال ولفوا نظرهم على العمه نوره الي نطقت : شنوحكم على العروس ؟ تعوذوا من ابليس وخلوها بحالها
انتصار : لا والله تخسي اخليها بحالها اجل تجي لنا وحنا نطبخ وتتفاخر ب البناجر وتقول اخليكم تطبخون بنبره سخريه؟ لا والله تعقب اخليها
ناظرت فيها العمه نوره: يوههه الله يسترنا بس
اياد فز من مكانه : ليه الله يسترنا ؟ تستاهل
ولف على انتصار: اقهريه وارفعي ظغطها وخوذي بنت الخال فزعه معكم
الجوهره : اوههه عاد الجادل نفسيتها ماش ذي الفتره تنتظر الزله على اي احد علشان تلعن جدفه
مسكت راسها العمه نوره: يويليييي ويلاه خلاص اصصص النميمه ماهي بزينه تاكلون لحم الناس غيروا السيره
~~ الرياض ~~
جلسوا متعب وناصر ب الصاله وهم يفكرون ب اكله ورن جرس الشقه وقف ناصر ونطق : مينننن
ماكان فيه اي رد تقدم ل الباب وفتحه الا بنت امام نظر عيونه متنقبه ومعها صحن اكل : سلام
ناصر بستغراب ؛ وعليكم السلام
البنت : انا بنت الحرمه الي ساعدتك ذيك المره شقتنا ذي الي قدامكم
ناصر هز راسه با الايجاب: اي اي عرفتك اهلين ؟
البنت مدت له الاكل : امي مسويه لك قرصان تقول اكيد انك مشتاق تاكل من يد ام
ابتسم ناصر بخفه وهو ياخذ منها الصحن : يعطيكم العافيه وكثر الله خيركم
ابتسمت البنت بخفه وناظر ناصر بعيونه الي منهم عرف انها ابتسمت ومشت من امام نظر عيونه ل الشقه ودخل هو لمتعب ببتسامه : متعبببببب
فز متعب من صراخه : وشفيكك؟؟
ناصر بفرحه جلس قدامه : شوف جارتنا عجوز جابت قرصان
متعب قرب وهو يفتح الصحن ببتسامه : ي لبيههه وجهي وجه خير عليك ولا قبل وش كنت تاكل بالله؟
ضحك ناصر بخفه : كنت اكل سلطه ليل ونهار
ضحك متعب وبدا ياكل هو وناصر اكل الحرمه وكانوا مستمتعين حيل ب لذه الاكل
~~ من بكرا العصر ~~
اجتمعوا العيال والبنات وزوجه منصور والعمه نوره ومريم مع الخال فرحان على قهوه العصر ببيت العم ابراهيم ومثل جلستهم المعتاده الخال فرحان بوسط الجلسه وجنبه العمه نوره وعلى يمينه البنات وعلى يساره العيال دخلت عليهم هيا وهي ماسكه صحن الجح والبطيخ وحطته بوسط الجلسه وبدوا ياكلون ويسمعون سوالف الخال فرحان
طلال : والله ي خال حياتك قبل مليانه سوالف
العمه نوره بضحكه :اييي خالك قبل سوالفه يجنن العقال بهم
ضحك الخال فرحان و وقف : أستأذنكم ثواني لدوره المياه
ومشى ل دوره المياه وبقت بشاير تناظر ب الجادل الي جالسه قدامها وتسولف مع الجوهره ونطقت بشاير: انتي ي بنت
لفوا عليها الكل من بنات وعيال ونطقت الجادل : انا ؟
بشاير ناظرت فيها بطرف عين : بوه غيرك غريب هنا؟
الجادل ناظرت فيها بستغراب من الاسلوب: اول شي اسمي الجادل مو انتي ي بنت وثاني شي ماني غريبه بوسط بيت خالتي
بشاير بسخريه :وليه تجين بيت خالتك وهو كله عيال ولا ماتعرفين الحياء
سكت عبدالعزيز وهو يناظر ب الوضع قدامه واياد وادهم وطلال كانوا منتظرين ذي اللحظه على احر من الجمر والبنات نفس الشي
الجادل وهي تناظر بعيون بشاير الي لابسه نقاب : والله ما اشوف عرق الحياء الي تتكلمين عنه جاتس وانتي جالسه بوسط الرجاجيل ورجلتس ماهو موجود معنا ؟
بشاير تعدلت بجلستها : والله هذولا اخوان رجلي مافيها شين
الجادل مسكت راسها بضحكه : ي الله اخوان رجلك ؟ يطول السالفه وي بعدها
رفعت راسها وهي تناظر بها : ي ملي ذولا اخواني وربيت وكبرت معهم وجالسه هنا بوجود ابوي وخالتي اما انتي ؟ عسى الله ينظر ب امرك يشيخه
انقهرت بشاير ونطقت وهي راصه على اسنانها : انتي ليه تدورين حرش ؟ تراني بس ناديتك ونيتي طيبه بس واضح الطيب ماله مكان بهازمان
ضحك اياد بهمس ونطق ل ادهم : نيتي طيبه تسسسس
صد ادهم وهو يحاول يخفي ضحكته وطلال نفس الشي من سمع اياد
الجادل شهقت وهي تناظر بها : كل النبرات ذي وضحكات السخريه ونيتك طيبه ؟ ظلمناك ي شيخه حقك علينا
العمه نوره من شافت ان الوضع زاد : خلاص بس بشاير انتي والجادل
ولفت على بشاير وكلمت : اسمعي زين ترا الجادل نفس بناتي ولا ارضى احد يدوس لها على طرف وانتي زوجه ولدي و وحده مننا وفينا ولكن كل شي الا بناتي ولا اقدر ادافع عنك ولا عنها ولكن اسلوبك واضح وضوح الشمس ي بشاير
قامت بشاير بقهر : واضح اني ثقيله عليكم اروح شقتي اهون لك سلام
ومشت بشاير وهي تضرب رجولها ب الارض بقهر من الكلام ولكن وقفت وهي تناظر الشاشه الي بوسط الشاشه ولفت على انتصار بضحكه : مبروك الشاشه
ناظرت فيها انتصار وهمست : ي رب صبرك عليها
وكملت بشاير: قديمه ي ملي الشاشه ذي انا شاشتي بها الوان ماهي اسود وابيض
قامت انتصار وهي تناظرلها : القديم احلى من الي جاي بفلوس سرقه وفلوس ماهي له
لفت العمه نوره : بنت انتصار خلاص اهدي
انتصار بعدم اهتمام: وانا ماقلت الا الصحيح
قربت بشاير ل انتصار وضربت كتفها : هم رجال ويتفهمون سوا انتي شدخلك بينهم
وقف عبدالعزيز بعصبيه : يرحم اثنين جابوك اصعدي شقتك وفكينا من شرك دام النفس طيبه عليك
ناظرت فيهم بشاير ومشت من عندهم لشقتها
~~ بالليل ع الساعه ١٢~~
جلسوا البنات بوسط السطح ب الليله الدافيه بهواها وقمرها الساطح بوسط السماء والنجوم واكواب الشاهي الي بايديهم ولعبه الكيرم امامهم واصوات حماسهم وضحكهم يعم المكان نص يعلب والنص الثاني يشجع ونص جوهرتنا وبطلتنا الجادل غراقين بوسط بحر الحب والمشاعر الي كانوا جالسين على الارض وبعدين عن البنات وفرشتهم
الجوهره ضربت فخذها : غبيه انتي ليه تقفلين الشباك بوجهه؟؟؟
الجادل : شسوي توترت بعد اخوك غبي جاي بكل قو عينه لشباكي ؟
الجوهره : يحبتس ي مجنونه
الجادل ناظرت بها : لا والله يحبني ؟ يحبني وجاي عند شباكي وهو يعرف طبع ابوي ؟
الجوهره: شفتي جايتس ولاهمه اذ خالي بيذبحه او لا والله انك غبيه ضيعتني فرصه ماتتكر
الجادل ناظرت فيها : ي رب صبرك اخر مره اشكي لتس
الجوهره : وانا شسويت ماقلت الا الصدق المهم جبتي شريط خالد عبدالرحمن ؟
ضحكت الجادل : اي معي
الجوهره : قومي قومي حطي في المسجل نشوف الاهدات
قامت الجادل مع الجوهره وهم داخلين غرفه البنات وقفت الجادل وهي تناظر باب غرفه العيال الي كان مفتوح نصه بس قربت له بفضول وهي تشوف الفوضى الي تعم المكان وريحه عطور الرجال القويه وريحه العود والثياب المرميه بوسط الغرفه وفرشهم الحوسه
صدت عنها من طلعت الجوهره ومعها المسجل
الجوهره: تعالي نلعب مع البنات ونشغل
هزت راسها الجادل ب الايجاب ومشت معها وجلست تشرب شاهي وتلعب كيرم مع سلمى وهيا وانتصار اما الجوهره جلست عند المسجل وهي تجرب كل شريط وكل ثانيه تغير ل اغنيه جديده
تغطت الجادل من سمعت صوت العيال صاعدين لغرفتهم ولمن لفت ماشافت غير عبدالعزيز وتركي داخلين الغرفه
سكتت وهي تناظر باب الغرفه ولكن خرب كل شي من جتهم بشاير بضحكه: سلام عليكم
الكل بنفس ثقيله : وعليكم السلام
بشاير وقفت قدام جلستهم : شدعوه ي ملي ماتقولون نعزم حرمه اخونا؟
الجادل ناظرت بها: مايحتاج نعزم هاك جيتي بدون عزيمه
ناظرت بها بشاير وحطت يدها على خصرها وهي تاكل علك : انتي اسكتي ي عديمه الحياء
شهقت الجادل وصرخت : انا عديمه حياء؟؟؟؟؟
وقفت الجادل وقفوا البنات معها ونطقت الجادل : منهي عديمه الحياء؟
بشاير بعدم اهتمام: اي ماقلت شي غل
ماكملت كلامها من سحبت شعرها الجادل بقوه وهي تصرخ عليها وتردد : انا عديمه حياء ي عديمه اخلاق ي عديمه تربيههه؟؟؟
بشاير وهي تحت ايادي الجادل :شعريييييي
ضحك عبدالعزيز من عند النافذ وهو يشوف الوضوع بعد مانام تركي ونطق : ‏عوبا ومزيونه وللخاطر دوى
‏وإن روقت كتلة مشاعر مع حنان
‏وإليا زعلت صارت ملعونة ثوى
‏إبليس منها يشتكيّ زود الجنان
صد نظره وهو يمسح وجهه بكفوفه : استغفر الله العظيم المفروض تتوب وتوقف تتامل من الشبابيك البنت طردتك وقفلت الشباك بوجهك وانت صامل تتامل وتتغزل بها
سكر شباكه واستلقى بفراشه وهو يناظر ب سقف الغرفه المظلم ويحاول يتخطى شكل الجادل بين البنات ونبره صوتها ونظراتها ولكن ماقدر نطق بهمس : حبي لك هو اعظم ذنوبي وخطاياي ودام حبي لك هو اعظم ذنوبي وخطاياي ما اقول ل النفس عن الحب توبي
لف على جانبه الايمن وهو يحاول النوم ويوقف تناقض مشاعره وحبه
~~ عند البنات ~~
صعدت سميه ومعها العمه نوره وهم يفرقونهم عن بعض
العمه نوره وهي ماسكه بشاير ؛ وجعه ان شاء الله بزارين انتم؟
سميه وهي ماسكه الجادل : ي رب صبرك ي الله
الجادل سكتت بدون رد وهي تناظر بشاير بحده وعصبيه اما بشاير كانت تبكي وشعرها خرب ونطقت وسط دموعها : الا قولي وحوششش شوفي وش سوت فينييي ي خالتي
العمه نوره مسكت راسها بتعب : ي الله امشي امشي معي
سحبت بشاير لتحت والجادل وقفت تعدل شعرها ومشت تشغل المسجل وجلست طبيعي كان ماصار شي جتها انتصار هي تضحك : على قوله ادهم حي عينك ي بنت الخال
الجادل : قسم بالله مستفزه يعني اول لقى لي معها المفروض تتصنع الطيبه وثم تسوي الي تبي
سلمى جلست قدام الجادل : يشيخه لاتهتمين مريضه
الجوهره جلست عند المسجل وهي ميته ضحك : تكفين جادل تعالي كل يوم سوي اجواء
الجادل بغمزه : ابشري حاضرين لحلوين
ضحك الكل على غمزه الجادل وكملوا ليلتهم كان ماصار شي
ولكن سكت الكل من صعد الخال فرحان السطح وهو يشوف جلستهم نطق : ماشاءالله تبارك الله وش الزين ذا كله ؟
ابتسمت الجادل وهي تشوف ابوها مروق : حياك يبه
مشى الخال فرحان ببتسامه وجلس جنب الجوهره ونطق : يهلا ب بنتي
ابتسمت الجوهره بخفه : هلابك خالي
الخال فرحان مد يده ل شعر الجوهره : ماوده يطول ؟
ضحكت الجوهره بخفه : وين ي خالي يطول خله كذا لايق علي
الخال فرحان ببتسامه : اي لايق عليتس الا شلونك وش اخبارك لي فتره منشغل عنك
الجوهره : بخير ي خال دامك بخير
مد يده الخال فرحان وهو يطلع خمس ميه ريال ومدهم ل الجوهره وغمز بهمس؛ لحد يدري
ضحكت الجوهره وهمست: يعطيك العافيه
تعدل الخال فرحان ونطق : يلا بلعب انا ضد الجوهره
الجوهره بضحكه : ماظنتي بتفوز
الخال فرحان جلس قباله : نشوف
وبدوا تحدي وكانوا يلعبون ويضحكون سوا تحت نظر الجادل وهي تتاملهم بصمت وتتامل ضحكه ابوها وفرحه وطبعه الي يتغير مع الجوهره عكس لمن يكون معها تنهدت بضيق وصدت عنهم
~~ من بكرا المغرب ~~
وقف عبدالعزيز قدام مكتب مقفل ورفع نظره ببتسامه ل الواحه المكتوبه وكان مكتوب << مكتب الراجي ل الاعقارات >>
تنهد براحه وهو يفتح باب اول مكتب عقاري له بوسط القصيم بعد ماتعلم شغل العقارات واموره زانت دخل المكتب وهو يشوف طاولته بوسط المكان والكرسي وجنبه درج وشكل المكتب مرتب ب اللون البني والابيض حس براحه انه قدر يوصل ل المرحله ويكون نفسه وهو ب العمر ذا
قرب ل الخزانه وفتحها ب المفتاح وهو يشوف الفلوس الي حولين ال ٦الف وهذولاي الي جمعهم بيوم واحد مد يده وهو ياخذ الف ونطق بهمس : نرد الحق ل اصحابه وباكر ان شاء الله نجمع دبل منهم
قفل الخزانه وطلع من المكتب متوجه ل عنيزه وهو بكامل حماسه يبشر امه ب خبر المكتب
~~ الرياض ~~
ولكن المره هذي ماهي ب شقه بطلنا المره هذي بشقه العجوز وبناتها
نجلاء مشت ل امها الي واقفه بوسط المطبخ : يمه فيه اكل اوديه ل ولد الجيران ؟
لفت نظرها العمه خيريه : شعندتس انتي ؟ صايره تطرينه واجد بعد المرقوق ؟
نزلت راسها نجلاء بخجل ونطقت : والله حليو الولد وبعد من القصيم منا وفينا
تقدمت لها العمه خيريه :اي ماقلت شين ونعم فيه بس اثقلي وانا امك ترمين نفسك على رجال ماتدرين هو يبيك او لا؟
نجلاء : ماعليتس يبيني بس اعطيني صحن اوديه له؟
قرصه كتفها العمه خيريه :اقول توكلي عن وجهي ماني ناقصتك
نجلاء بتافف: خليني اشوف نصيبي
فزت بخوف من نظر العمه خيريه الحاده ومشت ل الصاله الي كان فيها خواتها الثلاث ندى وسماهر وسجى
نجلاء نطقت وهي تناظر فيهم : فيه احد طق الباب؟
ندى الي كانت مشغوله ب الاوراق قدامها : لا
سماهر وهي تناظر بها : وراتس بلا شعندتس؟
فزت نجلاء ل الباب من طق ونطقت سجى : خوذي طرحتككككك
ما اهتمت نجلاء وفتحت الباب وهي بكامل جمالها واقفه قدام ناصر الي ماسك الصحن شهقت من شافته و وقفت ورا الباب ونطقت بكذب:معليش مادريت انه انت
تجمد ناصر بدون رد وهو يتذكر شكل البنت طويله الهيئه وطويله الشعر وحسن الشكل والملامح صحى على نفسه من شاف العمه خيريه متقدمه له ومغطيه وجها : يهلا با ولدي
ابتسم ناصر بخفه : هلابك خالتي هذا صحنكم وتسلم يديك على المرقوق
العمه خيريه: الله يسلمك من كل شر ي ولدي
مشى ناصر من عندهم لشقته وهو يتعوذ من بليس ويستغفر ربه ويحاول يشيل باله من البنت
~~ عنيزة ~~
دخل عبدالعزيز البيت وشاف الكل مجتمع ونطق ببتسامه: يمه ابشرك فتحت مكتب خاص لي
ابتسمت العمه نوره بفرحه : مبروك وانا امك عسى الله يكتب لك الخير ويرزقك
طلال بفرحه : يعني رسميا اخوي صار تاجر عقارات
عبدالعزيز رفع نفسه بغرور : ايه نعم
ادهم تقدم له وهو يقبل راسه : حي عينكككك
اياد تقدم ونفس الشي يقبل راسه : عسى الله يعزك ي العز ولا يعز عليك
تركي بضحكه : لاتنسى اخوانك
فزت هيا : وخواتك
عبدالعزيز بضحكه : عاد هيونهههه محد ينساك ماعليك وحتى انت تركي لاتشيلون هم ماني ناسي احد
منصور وهو يناظر فيه :بنهج معك القصيم باكر
هز راسه عبدالعزيز ب الايجاب وهو يناظر فيه ولف نظره من طق الباب وكان مشعل : يهلا والله
مشعل بنفس الابتسامه : هلابك تخاوي المزرعه ؟
عبدالعزيز: ليه لا مشينا
وفعلا طلع عبدالعزيز مع مشعل ل المزرعه وهم مبسوطين على خبر المكتب
مشعل ببتسامه : يعني الحين عندي عذر اروح ل القصيم
عبدالعزيز مسك راسه: يوههه بتصير بثر كل ليله عندي
مشعل ناظر فيه : افااااا ي ولد العم المفروض تقول حياك
عبدالعزيز بضحكه : خلاص حياك الله
مشعل بغمزه : تبينا نمر الخبله تبشرها ؟
عبدالعزيز بستغراب : منهي الخبله ؟
مشعل : الخبله الي تحبك
عبدالعزيز صد ل نافذه السياره : لا لا خلنا نمشي ل المزرعه بس
ولكن ماهي الا دقايق ولف نظره على الشباك الي وقفوا امامه تماما ونزل مشعل تاركه لوحده ب السياره وهو يركض ل السوق آما عبدالعزيز همس وهو يشوف مشعل يركض : بزر
وقفت الجادل قدام الشباك وهي مغطيه وجها ب طرحه شفافه ومابين منها الا عيونها ولكن انصدمت من شاف عبدالعزيز قدامها يناظر ب الشباك و لوحده ب السياره واقفين بنفس اماكنهم يناظرون بعيون بعض بدون اي حركه ولا اي كلام لثواني ودقايق طويله نظرات كلها كلام ومشاعر وحب وتناقض محد منهم فاهم مشاعره ومشاعر الاخر كل واحد يتمنى لو بيده يكسر الحواجز الي قدامهم ويقرب ل الثاني كسر النظرات عبدالعزيز من نطق وهو ب السياره : غريبه ماقفلتي الشباك بوجهي ؟
نزلت راسها الجادل بدون رد وهي ترمي شريط من الشباك وتقفل الشباك بدون رد نزل عبدالعزيز بفضول يشوف الشريط وكان متوقع انه شريط خالد عبدالرحمن الي اعطاها هديه وفعلا طلع شريط ل خالد عبدالرحمن ولكن ب اغنيه مختلفه ورجع ل السياره وهو يحط الشريط على مسجل السياره وبدا يسمع : خذني بقايا جروح .. ارجوك داويني
لا تروح الروح
كفى عذابي منك .. ليه تشقيني
لا تروح الروح ...
ما فوق جرحي جرح .. وجروحي تاويني
وصبري فقدته بجرح
الموت له حروه .. خوفي يمسيني
لا تروح الروح ...
يا خل يا مرتاح .. ليتك تواسيني
لا تنوي المرواح
وكان الجادل تشكي له من جروح اصابتها وخوف ماليها ان عبدالعزيز يتركها او تفقد حبه نفس مافقدت حب ابوها وكان ودها تشكي له ماتعيشه من مشاعر والالم وتحتاجه قربه ولكن عبدالعزيز وقف عند
<يا خل يا مرتاح .. ليتك تواسيني> ونطق بينه وبين نفسه بتنهيده ضيق : من فينا مرتاح ؟
مسح كفوفه بوجه وكانه عرف مشاعر وخوف الجادل بعد ذا الشريط لف نظره من ركب مشعل ونطق بضحكه : شريط جديد
عبدالعزيز ناظر فيه وصد يناظر شباك الجادل المفتوح نصه والجادل تناظر فيه رغم ان عيونها ماهي واضحه كثير
ومشى مشعل ل المزرعه وهو مشعل المسجل على اغاني خالد عبدالرحمن
~~ من بكرا العصر ~~
جلست العمه نوره عند تليفون البيت وهي تكلم ناصر
ناصر ببتسامه : والله اني مشتاق لتس ي الغاليه
العمه نوره: وحتى انا ي امي انت ولكن ان شاء الله ترجع ومعك الشهاده الي ترفع الراس
ابتسم ناصر : امين ي ميمتي
ولف وهو يناظر متعب الي يهمس : اسمهم السلطان السلطان
ونطق ل امه : يمه تعرفين عائله السلطان ؟
العمه نوره جلست تتذكر وثم نطقت : اييييي اعرفهم
فز ناصر بفرحه: وش وضعهم ؟
العمه نوره: والله اني اذكرهم زمانننننن بس انهم حضر وساكنين الحين ب الرياض علشان دراسه بنتهم و ولدهم الا وش عندك تسال عنهم ؟
ناصر حك راسه : جيراني وقلت دامهم من عنيزه بسالك عنهم
هزت راسها العمه نوره ب الايجاب وهي تكمل سوالف مع ناصر ولاهي شاكه ب اي شي
~~ شقه منصور ~~
بشاير وهي تقهوي منصور ؛ بتنزل القصيم ؟
منصور اخذ الفنجال منها : لا عزوز ماهو نازل اليوم طالع المزرعه مع عيال عمي
كشرت بشاير ونطقت: وانت ليه تنتظره ؟ ليكون بتشتغل معه؟
منصور ناظر فيها : ابيه يعلمني الشغل وغير كذا هو عنده مكتب نصير شراكه انا وهو ونمشي امورنا
بشاير صرخت : نعممممم؟؟؟؟ عزوز ذا خبيث بيشغلك صبي عنده وبيهنك نفس ما اهانك ذاك اليوم بسبب كم قرش قم هز كتوفك وجمع لنا فلوس من عرق جبينك
تنهد منصور : طيب بروح واشوف وش بيصير لي
اخذت شماغه المعلق ورمته بحضنه اخذه منصور بقله حيله وطلع من الشقه متوجه ل القصيم وكانه رايح بدون فكر بدون مهنه رايح وكل همه بشاير وانها ترضى عليه ماكان يفكر ب الاموال ولايفكر بكيف رح يبدا الشغل كله همه بشاير وخاطرها
~~ مزرعه الراجي ~~
دخلوا عيال الراجي كلهم لقسم العم ابراهيم ورتبوا جلستهم لقهوه العصريه وقدامهم موقد النار وبوسطه دلال القهوه والشاهي وانواع التمر وصحون حب الفصفص ويباركون لعبدالعزيز بمناسبه محله وجلستهم كانت راقيه على الاخر مابين السوالف والضحك والذكريات وبوسطهم مجيد وبحضنه حمد وجنبه عبدالعزيز مرتكي على المركاه ورابط شماغه بشكلٍ عمامه
بدا يصفق رائد:
يا سهيل قبل الصبح شفناك بالعين والناس فيك اليوم قامت اطارا
تباشروا يا سهيل فيك الملايين في طلعتك بين النجوم السهارى
ودخلوا العيال معه ب المود وبدوا تصفيق وهم يرددون :
احنا على شوفتك بالحيل شفقين وقلوبنا مثل الأراضي دهارا
روتيني في كل عام والحين لو انها تنقص طوال العمار
اقفيت عنا يا سموما الكليبين من كثرة الاعلاف صرنا طفارى
لجل الشناح نحمل الدين بالدين والضيف نذبح من جزيل الفقارا
وان حل راتبنا بسبعة وعشرين كنا لحمه في يدين الفقارا
تجار لكن بالمخابي فقيرين وكم من فقير عاش عيشه تجارا
والله ما والله يعز البخيلين كم من غني ورثه للقصارة
نشيل ما شالت ظهور البعارين وعزومنا بالملزمه ما تجارا
ويا الله بنون يا مغيث المساكين ما حددته الأرصدة بالمسار
ينزل طخه ويفرح المستغيثين كنا جبالا في بعضها توارى
اليا رتكز برقه سطح يجهر العين يودع سواد الليل مثل النهار
ضحك عبدالعزيز من انتهوا : عاشوووو
رائد ببتسامه : تعيش
مجيد نطق : والله ناقص ناصر وتكمل الطلعه
مشعل : اي والله ي ان له فقدههه
رائد : اسمعوا عندي موضوع مهم الكل لازم يسمع له
لف الكل عليه وبدا رائد يتنحنح: يشرفني اني اعزم عيال عمي واخواني لزواجي
شهق تركي : ي غدارررررر كنا رح نتزوج سوا
رائد ناظر فيه : يرجال انا اتزوج واجيب بنت وانت توك ماخلصت دراستك
تركي ناظر فيه : ماعليه ي رائد ي خاين
مسك راسه طلال: تركي انت ليه تحسسني انك زوجته الاولى ورح يتزوج عليك وشو خاين ؟
ضحك الكل على طلال ونطق تركي بضحكه : والله يقهر كان وعد اننا نتزوج بنفس اليوم
لف مشعل ببتسامه وغمزه على عبدالعزيز:عقبال عزوز
الكل بنفس الوقت : اميننننن
ماعاد طلال الي فز : على كيفكم ؟ عزوز مارح يتزوج
تركي بضحكه : شف شف وهو توه يضحك علي
طلال قام من مكانه وهو يحط يحشر نفسه بين مجيد وعبدالعزيز وحط يده على عنق عبدالعزيز: والله مب شغلي مارح يتزوج ويتركني
ضحك عبدالعزيز وهو يمسك يد طلال الي على عنقه : الي تامر فيه خلاص مارح اتزوج بجلس اعزب طول عمري عشانك
ابتسم طلال : ايههه رضيت
ضحك الكل على طلال وجلسته
~~ من بكرا العشاء ~~
بيت العم ابراهيم الي كان مليان بريحه البخور والهيل والقهوه بقسم الرجال خصوصنا
العمه نوره وهي تمد صحن التمر ل عبدالعزيز: منهو الي بيجي
عبدالعزيز وهو ياخذ الصحن : بعدين يمه بتعرفين خلينا نخلص امورنا معه ونشوف عنه وعن جماعته وان شاء الله خير
هزت راسها العمه نوره بـالايجاب: زين ي يمه
ومشى عبدالعزيز لقسم الرجال ونطق لـلعيال: كل شي جاهز ؟
تركي وهو يرتب اماكن القهوه : جاهزين ماعليك
وقفوا العيال كلهم قدام الباب وهم يناظرون بـ السيارات الي وافقت قدام الباب وكانت كلها اخر موديل ونزلوا منها الرجال ب البشوت وريحه العود معهم وكانهم شيوخ نطق عقاب من وسطهم بـ: هذا انا جيت مع جماعتي ي عزوز
نطق واحد من الشيوخ الموجودين وكان شايب اسمه جمال : انا الشيخ جمال من شيوخ حايل جاي متعني لاجل ولد اخوي عقاب
ابتسم عبدالعزيز: حياكم الله بـ المجلس
دخلوا جماعه عقاب لـمجلس وبعدهم عيال ابراهيم وجاهلين نظرات البنات من السطح ألي مذهولين من كميه الرجال والسيارات وفخامتهم
نطق الشيخ جمال : يشرفني انا شيخ العائله وكبيرهم اني اطلب يد بنتكم الجوهره لـولدنا عقاب على سنه الله و رسوله والي تطلبونه حنا جاهزين و موافقين
نطق عبدالعزيز بـجديه : والله ونعم فيكم وبولدكم عقاب ولكن انا خواتي ما افرط فيهم ولازم رايهم عندي بنسال الجوهره ونرد لكم خبر
نطق الشيخ جمال : الله يكتب الي فيه الخير
~~ شقه منصور ~~
جت بشاير لـمنصور المستلقي ب مجلس بيته ويناظر التلفزيون وقفت جنب الشاشه وهي تحط يدها على خصرها ونطقت: ماشاءالله جالس هنا وتارك الشيوخ مع البزر عزوز ؟
ناظر فيها منصور بعدم فهم : منهم الشيوخ ؟
بشاير : مدري جاين شيوخ وعيال نعمه وعزوز مستقبلهم والابتسامه شاقه وجه قمم شف وش عندهم
منصور بعدم اهتمام: شدخلني بهم
بشاير بخبث: وش وش دخلني ؟ منصور صاحي انت ؟ عزوز بدا يسيطر على عقول اخوانك وخواتك والكل صار يمشي على كلمته ومايقولون له غير سم وابشر وانت طاقينك بـ الجدران ماكانك الكبير باكر عمتي نوره تسجل كل شي له وانت خلك
سكت منصور لثواني يناظر بها وصحى على نفسه من كلامها ونزل لقسم الرجال وكله فضول يعرف منهم الشيوخ و وش علاقتهم بـعبد العزيز كان يظن انهم بيشتركون معه ب العقارات ويغتني عبدالعزيز
دخل منصور المجلس وهو يشوف الرجال يتقهوون ويسولفون مع بعض نطق بـثبات: سلام عليكم
الكل : وعليكم السلام
وقفوا وبدوا يسلمون عليه الرجال وثم نطق الشيخ جمال : انت منصور صحيح ؟
منصور ناظر فيه : اي نعم اخوهم الكبير
الشيخ جمال: الحمدالله على سلامتك
ناظر فيه منصور وعرف انه يقصد طلوعه من السجن : الله يسلمك
جلس منصور وهو يحاول يفهم الوضع ولكن بدون فايده كانت كل سوالفهم تعارف على بعض وعن حلال جماعه عقاب
~~ بعد دقايق ~~
جالسين البنات مع العمه نوره ويتكلمون عن الرجال وخيرهم
الجوهره : والله ي يمه تبارك الرحمن سياراتهم والبشوت بشت واحد منهم يحقق احلامي كلها
العمه نوره: ماشاء الله عليهم الله يزيدهم ويرزقنا
دخلوا العيال وهم يفكون الشمغ والغتر بتعب ونطق ادهم: يوههه تعبت من الرسميات
اياد جلس جنب امه: سوالف الاغنياء ممله
ضحكت العمه نوره: باكر تصير منهم وانا امك
نطق تركي بضحكه : لا الجوهره بتصير منهم.
الجوهره بدون فهم : اكيد باكر اصير غنيه والخدم والحشم حولي
عبدالعزيز جلس قدامها : يعني موافقه ؟
الجوهره ناظرت فيها : موافقه على وش ؟
عبدالعزيز: على عقاب الرجال جاين يطلبون يدتس
الجوهره بدت تلعب بشعرها : يعني كل البشوت جاين لي؟
انتصار وهي تضرب فخذها : من قدكككك؟؟؟؟
ناظر فيهم منصور وهو واقف : وانا ليه اخر من يعلم
عبدالعزيز رفع راسه يناظره: توقعنا مارح تهتم
ناظر فيهم منصور بدون رد وصعد لـشقته وتاركهم مبسوطين وفرحنين بـجوهره اما الجوهره دخلت بجو الغرور من تعزيز خواتها واخوانها ولكن ماهي داريه انه نفسه عقاب الي انقذها بوسط البر ولادهى انها ماتعرف بشخصيته وانه مطوع وشخصيتها وشخصيته ماتجتمع حتى بـاحلام الجوهره
~~ من بكرا العصر ~~
دخل عبدالعزيز و وراه مشعل ل مكتبه ونطق مشعل : ماشاء الله تبارك الرحمن الله لايضرك
ابتسم عبدالعزيز وهو يجلس على كرسي مكتبه وحط رجل على رجل ويعدل عمامته نطق بغرور : كيف ؟
ضحك مشعل وهو يطلع الكاميره : لايقه عليك شخصيه التاجر
بدا يصوره كم صوره وهو مبسوط لعبدالعزيز
عبدالعزيز: تعال خلنا نطلع نشوف الاراضي
هز راسه مشعل ب الايجاب وطلع معه وهو مبسوط ب الاجواء ومكاتب العقارات الي حوالينهم والارضي والمخططات