وأنا الهبايب ماتحرك غترتي وعقالي

الهبايب ~١٠~

~~ مزرعه الراجي ~~
توجهه طلال ل قسم العم راجي بعد مانتهى من جمع المحاصيل وانتهى من قسم العم ابراهيم بشكل عام
دخل مجلس العم راجي وهو يشوف راجي لحاله جالس يتقهوى والعمال يشتغلون بمزرعته برا
طلال ببتسامه : سلام ي عم
العم راجي رفع راسه له وهو يبادله الابتسامه : يهلا والله ب ولد اخوي يهلا والله ب المختفي هو واخوانه ولا يسالون عن عمهم
انحنى لمستواه طلال وهو يقبل راس ونطق : والله ي عم انكم على البال دوم بس من طلع منصور وبيتنا مقلوب فوق تحت
العم راجي بستغراب : وش عنده منصور وش مسوي ؟
جلس طلال جنبه ونطق بضيق : والله ي عم محد سلم من يدينه ماغير يتطاول على امي وخواتي وعلى عزوز خصوصنا عزوز ماهو سالم منه ومن افعاله
نزل راسه العم راجي بضيق : وليه ماتجون تتكلمون معي ؟ ماني عمكم ؟ المفروض اول مايصير شي تجون لي تدلون بيتي ومحلي ومزرعتي
طلال بضيق: والله ي عم اني من زمان ودي اتكلم معك بس عزوز رافض يقول حنا نحل كل شي بيننا
رفع راسه العم راجي : ماعليك وانا ابوك لايضيق لك خلق انا اشوف منصور و وضعه وعزوز يبي له قرصه اذن
سكت طلال وحس براحه من تكلم مع العم راجي لانه كبير ويعرف يتفاهم بذي المواضيع
~~ بيت العم ابراهيم ~~
رجع عبدالعزيز من القصيم والوقت كان قريب ل المغرب ولاهو داري عن اي شي صار ب البيت بغيابه ولكن استغراب وشك ب الوضع من شاف كل اخوانه وخواته مجتمعين بغرفه العمه نوره
مشى وهو يكلم تركي : شنوحكم ؟
تركي نزل راسه بضيق وبدون اي رد دخل عبدالعزيز وهو يشوف امه المستلقيه على الفراش وقدامها الجوهره وهيا تبكي على يمين الفراش و واضح عليهم الحزن
عبدالعزيز بصوت عالي : وش صايرررر؟؟؟
الجوهره : وش صاير يعني ؟ منصور الكلب ضرب امي وهيا
ضرب يدينه عبدالعزيز ب الجدار بعصبيه : وينهو بوههه الحيننن؟؟
الجوهره : طلع من البيت عساه مايرد
عبدالعزيز مشى من عندهم متوجه ل باب الشارع والعصبيه تطلع من عيونه وهو يتوعد بمنصور
انفتح الباب ودخل منصور وهو يناظر فيه ببرود
عبدالعزيز بعصبيه : انت متى بتفكنا من شرك ؟ خلاص قلنا لك نبي نعطيك نص الورث وش تبي بعد زيادههه؟؟؟؟
ناظر فيه منصور ببرود وهو يطلع زقاه من جيبه ويدخن بدون اي رد
مد يدينه عبدالعزيز ل ياقته ثوب منصور : تكلممم معيييي
ابعدوا كلهم عن الباب من سمعوا صوت العم راجي وهو يصرخ : بسسسس
دخل العم راجي و وراه طلال وكمل كلامه العم راجي: وش قاعد يصير هنا؟ رجال وش طولكم والشنب دارس وجيهكم تتهاوشون قدام خواتكم؟
حك راسه عبدالعزيز بقهر وبدون اي رد ومنصور كان يدخن ويراقب الاوضاع ببرود
وكمل كلامه العم راجي : بس والله انا ما اشره على عزوز وعصبيته انا اشره عليك انت ي البعير طول وعرض وشنب ودقن بس بدون عقل بهيمه
منصور وهو يلهث الدخان من فمه: عمي لو سمحت لاتغلط علي
رفع عصاه العم راجي وهو يطيح دخان منصور على الارض ونطق بعصبيه : الا اغلط ولا اشوفك شي اجل انت ي البعير تتطاول على وصيه الرسول ؟ وش مسوين لك الضعيفات خواتك وامك ولا صح انت بس تقدر تتطاول عليهم لانهم ضعيفات وتستعرض ب طولك وقوتك عليهم ؟ماتقدر تتطاول على الرجاجيل ولا تتجرى اصلا انا اوقفك عند حدك هنا تسمع او لا ؟
سكت منصور وناظر فيه بعصبيه لثواني ونزل راسه
ولف العم راجي على عبدالعزيز وكمل : فيه شي متخبي عني ي استاذ عزوز؟
عبدالعزيز نزل راسه : لا ي عم
العم راجي ناظر ب البنات والعيال الي طلعوا كلهم والعمه نوره الي واقفه عند النافذه ومغطيه وجها ونطق بحده : كلكم موجودين هنا والكل يسمع الكلام ان تطاول منصور ثاني مره على واحد فيكم بنت او ولد كبير او صغير تدلون بيتي ومكاني ومعكم رقم تليفون البيت مفهوم ؟
الكل هز راسه با الايجاب
طلع منصور بعصبيه من البيت ودخل العم راجي بعد ما اصروا عليه العيال يتقهوى معهم
~~ من بكرا العصر ~~
اجتمعوا عيال وبنات ابراهيم والعمه نوره ب الحوش وعبدالعزيز كان واقف امامهم ومعه كيس بني وموجود فيه فلوس ورث ابوهم كامل مكمل وبوجود العمه منيره والعم راجي
عبدالعزيز كان واقف قدام جلستهم ونطق من شاف الكل موجود : اول شي عمامي بسالكم لو ابوي ماخذ منكم فلوس ولا ردهم او تطلبونه بشين ؟
العم راجي: انا من ناحيتي ما اطلبه شي عسى الله يحله
العمه منيره : لا ابد ما اطلبه شين الله يرحمه مسدد كل شي اول ب اول
تنهد عبدالعزيز براحه : زين
ولف على اخوانه وخواته وامه : ابوي كاتب قسمه ب المزرعه والبيت والمحل ب اسم امي وباقي الفلوس موجودين معي كل واحد بياخد حقه كامل
الكل هز راسه با الايجاب ما عاد منصور كان صاد عنهم وعبدالعزيز ما اهتم له وبدا يوزع عليهم واعطهم حقهم ونص البنات
عبدالعزيز بعد ما انتهى : والباقي ذا ورثي و ورث مريم بنهج لها بكرا واعطيها حقها
هيا وانتصار وسلمى وجوهره مدوا الفلوس ل امهم
انتصار :يمه خليهم عندتس لاننا مانحتاجهم الحين
الجوهره ناظرت منصور بكره : تراها امانه عند امي
ناظرت بها منصور وقام من مكانه طالع برا البيت بدون اي كلمه
تنهده العمه نوره بضيق وقامت من مكانها لغرفتها ولحقتها العمه منيره
العمه موضي: راجي خبرني ب الي صار امس
جلست العمه نوره ب الفراش وتنهده بضيق :ي منيره مدري شسوي ب الولد ذا كسر ظهري وظهر ابوه مطيح سمعه الراجي ب القاع
جلست امامها العمه منيره وهي تطبطب على كتفها : والله ضاق خلقي من وضعه وحالته ولكن شنسوي ؟ الله يهديه ويفتح على بصيرته وينور على قلبه
نزلت راسها العمه نوره: امين
{ عند العم راجي }
العم راجي : والله ي عزوز شكل امك ضايق خلقها شرايك باكر مع شقه النور نطلع المزرعه ونجلس بها لين عيد الاضحى يعني اسبوع
حك راسه عبدالعزيز: والله عمي انا باكر الصباح بروح القصيم وبرجع المغرب واجيكم المزرعه
العم راجي: وش عندك ب القصيم ؟
عبدالعزيز: بديت ب العقارات
العم راجي: ودراستك ؟
عبدالعزيز: خلصت ثانويه واخذت الشهاده والصراحه السوق الحين كله على العقارات
العم راجي: الله يوفقك ويفتح لك باب الرزق اجل خلاص حنا ننهج المزرعه وانت تعال المغرب
عبدالعزيز: ان شاء الله
~~ من بكرا المغرب ~~
دخل عبدالعزيز المزرعه و معه مريم ومرزوق وقفوا بضحكه وهم يشوفون عيال الراجي ب الحوش ومجيد بوسطهم وهم حولهم يدورون ويردون ورا مجيد
مجيد بضحكه: ‏اشواق لاتزعلون اشواق من يزعل اشواق يزعلني
العيال وهم يصفقون ويضحكون بصوت واحد : ‏اشواق لاتزعلون اشواق من يزعل اشواق يزعلني
مشت مريم ل باب الحريم بضحكه من لمحت زول اشواق ومعها حمد والبنات
ودخل عبدالعزيز يدور مع العيال ويصفق و وقف مرزوق يناظر بهم بضحكه ويصفق لهم
مريم بهمس من وقفت جنب اشواق : مانتي بهينه موقف العيال كلهم لاجلتس
ضحكت اشواق بخفه : طبعا حبيبتي انا ام حمودي مستعد يوقف الكون كله على رجل بس مو لاجلي لاجل حمد
مريم ضحكت بخفه ودخلت تسلم على الحريم واشواق قفلت الباب الي بينهم وبين الرجال ومشت تجلس مع الحريم
انحنت مريم وهي تسلم على امها :شلونتس يمه ؟
العمه نوره: بخير الحمدالله
مريم بستغراب : وين هيا ماشوف زولها؟
العمه منيره بضحكه : يعني هيا و امجاد اجتمعوا متوقعه انتس بتشوفينهم؟
ضحكت مريم بخفه : يلا ماعليه خليهم ينبسطون
العمه منيره : الا صح ي جوهره كم صار عمرتس؟
الجوهره ببتسامه : توي دخلت ثمان طعش
العمه منيره : ماشاءالله كبرتيييي مو ناقصك الا العرس
ضحكت انتصار بخفه ولفت عليها العمه منيره : حتى انتي مو ناقصك الا العرس
انتصار بخوف : توني داخله ثلاث طعش
ضحكت العمه نوره: خلاص ي منيره لا تخوفينهم
ضحكت العمه منيره بخفه : خلاص امزح معكن
~~ عند الرجال ~~
جلسوا العيال كلهم حولين العم راجي الي ناداهم وطلع قدامهم دفتر مليان صور
رائد : ول ي عم ذولاي صور من
العم راجي بضحكه : ذولاي صوركم يوم انكم صغار
مد صوره لمشعل وعبدالعزيز: شوفوا ذولا انتم من صغركم جنب بعض
رفع يده مشعل على كتف عبدالعزيز: رفيقي
ضحك عبدالعزيز وهو يشوف الصوره
العم راجي : عاد ذي صوره مجيد ومنصور
اخذها مجيد وهو يشوفهم مصورين ب بيت العم ابراهيم
ضحك العم راجي بخفه وهو يشوف صوره ؛ يوههه عاد ذي صوره المرحوم وهو يضرب عياله ب المزرعه
ناصر بضحكه : يوهه عاد العصاء ذا الجندي المجهول ل ابوي
العم راجي مسك صوره بيده : وذي صوره اهل الطايف
توسعت عيون عبدالعزيز بفرحه ولكن كشر من كمل كلامه العم راجي: صورتي مع ابراهيم وفرحان مع قرود الطايف
طلال بستغراب : عمي ابوي وخالي فرحان شلون قبلوا الصور مو الكاميرات حرام على قولتكم ؟
ضحك العم راجي بخفه :بيني وبينكم ؟ بغوا يكسرون الكاميره على راسي مره لاني صورت الجادل بنت فرحان وقلب الدنيا فوق تحت وجلس شهرين ما يكلمنا لين مارحنا له واعتذرنا منه وابراهيم مايقدر يقول شي لاني الكبير
مشعل : والله طلعت منت بهين ي يبه اجل ليه رافض علينا ندخل الكاميره البيت ؟
العم راجي: ماني رافض بس عمكم الله يرحمه كان رافض وانا ماكنت ابي اشتري لكم شي وعمكم رافضه على عياله
ناصر ناظر ب عبدالعزيز : طيب ورنا الصوره عمي بنشوف هي تستاهل المشاكل او لا
بدا العم راجي يدورها بين الصور وبين الألبومات وبصعوبه لقها ابتسم : هذي هي
اخذها ناصر من يد العم راجي وهو يشوف عبدالعزيز كان لابس ثوب ابيض وحاط غترته على كتفه وعند كتفه اليمين الجادل وكتفه اليسار الجوهره وهو رافع يدينه على كتوفهم
ضحك ناصر وهو يمدها ل عبدالعزيز: شف شكلك
مسكها عبدالعزيز ببتسامه وهو يتامل ابتسامه الجادل وكفه الي لامس كفتها وشعرها الطويل والي كان نصه على كف عبدالعزيز ونظراتهم وابتسامتهم ل الكاميره
~~ بيت العم ابراهيم ~~
دخل منصور غرفه امه وهو يشوف الخزانه الي بها صكوك الاراضي ل المزرعه وفلوس البنات وذهب امه والبنات وبدا يدور المفتاح لاجل يفتحها ويدور حول الغرفه ويرمي المخدات والفرش على الارض على امل انه يلاقيه ب السرير ولف على دولاب الملابس فتحه وهو يرمي كل ملابس امه على الارض ويدور بين اغراضها على التسريحه وبين العطور ولكن مافيه اي اثر مسك راسه من الفوضى الي سببها وصرخ : ياربيييييي وينهو بوهههه المفتاححح
رمى العطور والدخون على الارض وبدا يفتح الدروج بشكل مجنون ويدور بينهم بس بدون اي فايده
تنهد بضيق وجلس على الفراش وطلع زقارته يدخن ويرمي بقايا الدخن على فراش امه وهو يناظر ب الخزانه الي قدام عيونه وهو يلهث الدخان الي بفمه بغضب و وده لو يفجر الخزانه الي قدام عيونه ويطلع كل شي بها
رمى الدخان على الفراش وطلع ل الحي ولف نظره من شاف رجال معه اثاث واغراض ل البيت الي جنبهم والواضح انه جارهم الجديد
الرجال لمنصور : ي ولد انت تعال
منصور ناظر فيه ببرود : انا ؟
الرجال بضحكه : بوه غيرك هنا؟ تعال وانا خالك ابيك تدخل الاثاث ذا ل البيت انا ما اقدر ظهري يوجعني
تنهد منصور بقله حيله ومشى يساعده ب الاثاث
الرجال : ماشاء الله من ولده انت؟
منصور ناظر فيه بعد ما نزل الكنب : انا ولد الراجي
الرجال. : ماشاءالله شفت محل التمور الي ب السوق لكم صح؟
منصور هز راسه با الايجاب و ووقف قدام الرجال
الرجال مد يده يسلم عليه : انا خالد ابو مها
ناظر فيه منصور لثواني وثم صافحه : تشرفنا
العم خالد ببتسامه : الشرف لي
مشى منصور وكمل باقي الاغراض
~~ ليله العيد~~
مزرعه الراجي
وقف طلال قدام الباب الي بينهم وبين الحريم وبدا يطق : مريممممم ويننن ثوبييي ؟؟؟ بسرعه نبي نلحق على الصلاه
تركي جاء : وش صار؟ ردت مريم ؟
جوهم اياد وادهم وهم لابسين ومخلصين ويشوفون وضع العيال طلال وتركي الي واقفين ب سروال وفنيله قدام باب الحريم وناصر نايم ب الصلاه وعبدالعزيز لاهي مع مشعل ب ملابسهم ومرزوق واقف يناظر طلال وتركي ينتظر ثوبه من مريم ومجيد كان يرتب شماغ حمد ورائد يتخبر جنبهم
ادهم بستغراب : لحد الحين ماجهزتوا ؟
تركي : مريم مافتحت الباب لنا وثيابنا عندها
ضحك اياد بسخريه ؛ الله يعز سلمى ولايعز عليها غسيل وكوي مستعجل
العم راجي دخل عليهم ونطق بصوت عالي من شاف وضعهم : يلاااااا خلونا نلحق على الصلاههههه
فز ناصر من نومته وهو يحك خده ويناظر بهم
مجيد مسك يد حمد ومشى ل العم راجي: انا وحفيدك جاهزين
رائد مشى لهم : وانا بعد جاهز
اياد وادهم كانو جنب بعض عند الباب
اياد : وحنا شوفه عينك جاهزين
لف العم راجي على مشعل وعبدالعزيز: وانتم وش وضعكم ؟
مشعل : مدري يبه ضيعنا ثيابنا مدري اي واحد حقي
العم راجي مسك راسه بتعب : يارب صبرني عادي كلكم نفس الطول والمقاس البسوا اي شي و امشو
عبدالعزيز اخذ الثوب : خلاص انا باخذ ذا
مشعل: اجل انا الثاني
التفت الكل على صوت الفرج صوت مريم فتحت الباب
طلال: اخيرنااااا ي مريم اخيرنا
مدت مريم لهم ثوب : هذا ثوب مرزوق
اخذه طلال ومده ل مرزوق
ناصر: افاااا انا اخوتس الكبير المفروض اني الاول
مريم مدت الثوب الثاني : لاتكثر هرج هذا ثوبك
مده له طلال ؛ امسك ي دكتور الرياض وش ذي الحركات كبك وقلم ماعرفتك
ابتسم ناصر وهو ياخذ الثوب :شعرفك انت
العم راجي: ترا بس تلبسونهم ل الصلاه ولارجعنا نغير لاجل الاضحيه والدم بيكون حوسه
لبسوا العيال ثيابهم وتبخروا وطلعوا ورا العم راجي ل المسجد
~~ عند الحريم ~~
العمه منيره جلست بصدر المجلس وجنبها العمه نوره واشواق تقهويهم وسلمى وانتصار يرتبون المجلس ويحطون التوزيعات والتمور
العمه نوره: ي سلمى حطي من حصاد تركي الي حصده اليوم
سلمى مدت لها صحن التمر : اي يمه هذا هو شوفي
العمه نوره ناظرت بوه بثواني : زين حطيه مع التمر وزي ماقلت لكم اول شي التمر يتوزع ومن ثم القهوه تنصب فاهمين ؟
سلمى هزت راسها با الإيجاب: سمي يمه
دخلت مريم وهي تمسح راسها بتعب : يويلي الحمدالله خلصت ثياب العيال مابغيت
ضحكت العمه منيره بخفه : الله يكتب اجرك ي امي انتي
ابتسمت مريم بخفه : اللهم امين ي عمتي الا وين الجوهره!
دخلت الجوهره ومعها امجاد وهيا ولابسين براقع وعبايات روس ورافعين العبايه وباين فستان الجوهره الي كان احمر وهيا ابيض وامجاد موف والبراقع مايلبسونهم الا ب العيد وب الايام العاديه غطوه كامله على العيون
العمه نوره مسكت راسها : على وين انتي وياها؟
الجوهره رفعت يدها على خدها وبانت بناجر الذهب الي بيدها: نبي نروح نصلي العيد
العمه منيره ببتسامه :روحي ي عيني وانتبهي ل البنات
العمه نوره ناظرت فيها : بس
العمه منيره : خليهم خليهم حلاه العيد ب صلاه الجماعه ومقابل الحريم ب المسجد
سكتت العمه نوره وهي تناظر ب العمه منيره
العمه منيره ببتسامه : روقي ي بنت الحلال ي اشواقققق يمه صبي ل خالتس
دخلت ام مجيد ومعها البخور ونطقت ببتسامه : كل وانتم بخير
ابتسم الكل لها ول الطاقه الايجابه الي تجيبها ام مجيد معها
الكل : وانتي بخير
العمه منيره ببتسامه : تعالي تعالي تقهوي معنا عاد قهوه اشواق لايعلى عليها
نزلت البخور ام مجيد ونطقت وهي تناظر اشواق ببتسامه : عاد دام فيها قهوه اشواق مقدر افرط بها
ضحكت اشواق بخفه وهي تمد لها الفنجال : سمي
وجلسوا يسولفون مع بعض وهم ينتظرون الصلاه تخلص ويجتمعون كل اهل الحي بمجلس العمه منيره
~~ عند الجوهره والبنات ~~
طلعوا من المزرعه وقابلوا العيال قدامهم
عبدالعزيز ناظر ب الجوهره : اوفففف انتي اختي؟
جوهره مدت يديها وهي تبين بناجر الذهب وصوت البناجر طالع: شرايك ؟
عبدالعزيز ببتسامه : حي عينك ي شيخه الراجي
ولف على هيا : هيونهههه
مد يديها على خدودها وهو يقرصهم بضحكه: ي حلوكككك
هيا مسكت خدها بالم: يعني ماتقدر تتغزل فيني بدون لاتقرص ؟
ضحك عبدالعزيز بخفه : حقك علي
ولف على امجاد ونطق : اوخس ان
ماكمل كلامه من تنحنح العم راجي وعرف عبدالعزيز انه بنت العمه منيره نزل راسه وهو يحك شعره بخجل
ضحكوا العيال على شكل عبدالعزيز وهو منزل راسه
العم راجي : يلا
وطلعوا العيال ورا العم راجي والبنات وراهم يتلفتون على المزارع الي جنبهم واصوات الطراطيع وركض البزران حولينهم ولعبهم ب وسط الحي وفرش الجيران ب التراب الي حولين المزارع
~~ بعد الصلاه ~~
طلعت الجوهره ومعها البنات من المسجد و وقفوا ينتظرون الرجال يطلعون لاجل يمشون سوا لفت الجوهره وهيا من سمعوا صوت الرجال الي مقرب لهم ويدندن على : ماهقيت ان البراقع يفتنني
وبدا يغمز لهم ويضحك بشكل مستفز
امجاد وهيا تمسكوا بعبايه الجوهره بخوف والدموع تجمعت على عيونهم الجوهره ناظرت فيهم من فوق لتحت وهي توسع عيونها وصرخت : ي علك ل الرصاص المتلاحق طسس
الرجال بضحكه : شدعوه ي غزال ؟ ليه العصبيه كلها؟
وعض شفاته وغمز من كمل كلامه : بعطيك هديه العيد
الجوهره بعصبيه : انت تعرف حنا بنات من ي السلوقي ؟ والله لاخلي رجالنا رجال الراجي يسحبونك مع اذنك ل السجن ي قليل الحيا
الرجال بضحكه : والله ماهقيت ان بنات الراجي بذا الزين كله
صرخت الجوهره بعلو صوتها ل رجال الحي : ساعدونييييي
ضحكت من شافت الرجال يركض بخوف متوجه ل المزراع وبدت تحرك الهوايه اليدويه الي بيدها وهمست: صدز من قال المراجل كايده الله يخلف عليك بس
ولفت على البنات الي وراه ظهرها : شنوحكم خايفين ؟
امجاد بخوف ودموع : يخوف الرجال
ضحكت الجوهره بخفه : يشيخه الرجاجيل الي مثل كذا نفسهم نفس الصراصير برجلك تتخلصين منهم
جاهم العم راجي: يلا ي بنات
وماهي الا ثواني وهم داخلين على مزرعه الراجي وحوش المزرعه والمجلس امتلى ب الضيوف واصوات البزران وريحه البخور والهيل اما ب النسبه لقسم الرجال غيروا ملابسهم واجتمعوا العيال حول الذبايح وبدت التذكيه اما ب النسبه ل العم راجي كان يستقبل الضيوف ب مجلسه
~~ الطايف ~~
رفعت نظرها الجادل على المرايه الي قدامها وهي تشوف شكلها بين شعرها المصفف نصه على اليمين والنص الثاني على ورا وعيونها المكحله وفستانها الاحمر وطرحتها الشفافه الي تزينها اللمعه ابتسمت بخفه لشكلها ولفت تدور العطر ولكن مافيه شي ب الغرفه مشت ل شنطه السفر وهي تدور فيها بين ملابسها واغراضها
ابتسمت لاشعوريا من انتشرت ريحه العود عليها عود الغتره الي بشنطتها وكان من العود الثقيل حست بمشاعر غريبه ومختلطه ماتعرف وش الي دفعها بكل مافيها من مشاعر وحب ل عبدالعزيز ولحبه ماتعرف كيف تجرئت بذيك الليله و وقفت قدام نظره ونثرت له كل شعوره ماتقدر تنكر او تخفي اعجابها بشخصه عبدالعزيز ومن حست بحب عبدالعزيز لها كان الدنيا ابتسمت لها من شافت شخص يحبها غير امها ماتقدر تخفي انها تشوف عبدالعزيز المنقذ والملجى لها بعد الله من كل المشاكل الي بحياتها لاول مره تحس بحب وحنان رجال ابوها الي خلاها تحب وترمي نفسها على اي شخص يقول لها ^^احبك^^او يعطيها نص اهتمام رغم ان عبدالعزيز اول رجال يعطيها كل ذا الاهتمام والحب والمشاعر بعد فقدان امها
اخذت العطر وقفلت الشنطه وراها
دخلت عليها سميه : يلا جادل ابوتس تحت ينتظرنا
هزت راسها با الايجاب ولبست عبايه الراس ونزلت مع سميه
نزلت وهي تقابل ابوها ببتسامه خفيفه مشت وهي تقبل راسه : كل عام وانت بخير يبه
الخال فرحان: هلا هلا وانتي بخير
سميه ؛ ي ابو ضاري وين بنعيد ؟
الخال فرحان: اليوم العيد عند اهلك بننهج لهم وكل اهل الحي عندهم هناك وحنا نبي نروح ونبسط حالنا
هزت راسها با الايجاب سميه وطلعوا ورا الخال فرحان
ابتسمت الجادل وهي تشوف الحياه الي ب الحي مابين الورد المنثور والعاب الصغار والتطبيل الي على المطبلات والرجال الي واقفين بوسط الحي ومعهم المباخر ابتسمت بخفه وهي تشوف الاجواء ودخلت لبيت اهل سميه ابتسمت من لمحت زول الجازي من بين الحضور كلهم مشت لهم بفرحه وهي تسلم عليها وتجلس معها
الجازي : ترا بدريه وفاتن موجودين
الجادل : وامل ؟ ماجت
الجازي هزت راسها: ابوي مسكها ل الخرفان وحنا انحشنا
ضحكت الجادل بخفه ولفت على بدريه وفاتن خوات الجازي وهم يسلمون عليها
بدريه : اشتقنا لك يبنت الخال
ابتسمت الجادل: حتنا والله اشتقت لكم شلون امي ؟
فاتن : امك بعيوننا لاتخافين
تنهدت الجادل بضيق وجلست معهم تتسمع سواليفهم
~~ من بكرا العصر ~~
داخلين عيال وبنات ابراهيم ل البيت بعد تعب الطريق وتعب الاستراحه وعلى طول جلسوا في الحوش من تعب الطريق وكل واحد يتالم برجله من جهه وهم يتذكرون تفاصيل العيد لين مانطقت العمه نوره وهي تناظر غرفتها: من فتح غرفتي ؟
طلال بستغراب : محد نهج لها كلنا جالسين هنا
الجوهره : يمكن انتي نسيتي الباب مفتوح
مشت العمه نوره ل الغرفه وشهقت اول ماشافت المنظر وريحه الدخان الي مرمي على الفراش والحوسه الي طايحه ب الارض صرخت بعلو صوتها : ي عيالللل
فز الكل على صوتها ومشوا ل الغرفه بخوف من الصرخه
وقف الكل بذهول من المنظر وهم يناظرون بعض لين مانطق ناصر بعصبيه : اكيد منصورهههه
منصور نطق من وراهم وبصوت ضخم : اي منصوره والي بيفتح فمه ل عمي والله مايشوف خير
ولف على امه وكمل بصراخ: وين مفتاح الخزانهههه؟؟؟؟
الجوهره بعصبيه :خيررررر؟؟؟ وش تبي بحقي وحق خواتي ؟؟؟
دفعها منصور بكل قوه على ارض الحوش ولف على امه تهاوش معها اما الجوهره حست بقهر من ضربها ركضت ل الصاله وهي تمسح دموعها اخذت تليفون البيت وهي ادخل الرقم
هيا ركضت وراها بخوف : بنت لاتتصلين على عمي والله منصور مارح يتربه على يد عمي
الجوهره رصت قبضه يدها بقهر : إذ ماعقل على كلام عمي الحكومه تعقله وتعقل اشكاله
رفعت السماعه ونطقت : شرطة عنيزه !
عضت شفايفها هيا بخوف من افعال الجوهره
~~ عند عبدالعزيز ~~
عبدالعزيز: مشعل وقف عن بيتنا بنزل اتروش وثم اجيك قسم بالله ي ريحه الخرفان لازقه فيني
مشعل : ي الله ي عزوز ليه ماتروشت معنا ب المزرعه ؟
عبدالعزيز بضحكه : صاحي انت؟ ماء المزرعه خلص من كثركم الله لايضركم
وقف مشعل عند باب بيت العم ابراهيم: يلا استعجل انتظرك هنا
نزل عبدالعزيز ودخل البيت وهو يسمع الصراخ وصياح العمه نوره ركض ل غرفه العمه نوره وهو عارف سبب الصراخ مين ونفس ماتوقع منصور يصارخ على امه ويجبرها تطلع له المفتاح
وقف عبدالعزيز بين منصور وامه وهو يدف منصور بكل قسوه: خلاص استرجلللل
منصور مسك ياقه عبدالعزيز بكل قسوه : ابعددد عن وجهي انت تراني مب ناقصك ولا ترا بتشوف شي مايعجبك
عبدالعزيز بعصبيه : لا ورني وش عندكككك؟؟
منصور بحده : عزوززززز
تنهد عبدالعزيز بقله حيله وطلع ظرف من جيبه : خذ ذولا فلوس زياده على ورثك لاتقرب ل امي واهلي بعطيك كل ما استلمت فلوس من الارضي
ضحك منصور وهو ياخذ الظرف ومد يده على رقبه عبدالعزيز ويطبطب عليها : اشتغل اكثر واعطني خلني اعيششش خل يطلع منك فايده ي الورع
العمه نوره كانت تناظر كل الموقف بعيون حزينه بعيون مليانه دموع ورحمه ل عبدالعزيز
سكت الكل من سمعوا صوت الشرطه حولين البيت والباب بدا يطق بشكل غريب
مشى ناصر وفتح الباب بخوف وقابل مشعل ومعه الشرطه
ناصر : شسالفه ؟
مشعل : انا الي المفروض اسالكم شسالفه الشرطه تسال ذا بيت ابراهيم الراجي
العسكري نطق بحده : وين منصور الراجي
تجمدوا الكل بمكانهم من تقدم منصور وهو يتكلم: انا منصور خير ؟
العسكري : عندنا اوامر ب القبض عليك بتهمته التعنيف
لف منصور ل الجوهره بحده : انتييي؟؟؟؟؟
الجوهره بجراءة: جزاكككك
كلبشوا يدينه الشرطه تحت نظرات اهل العم ابراهيم الي كانو ساكتين ولا هز بهم شعره الموقف وكانهم محترقين مابين نار منصور ومابين سجنه وكلام الناس الي بيصير كله عن منصور وسواته حتى العمه نوره كانت تطالع كل شي من نافذه غرفتها وهي تحترق مابين شخصيه منصور الي بسببها تعبت نفسيه العمه نوره ولا ان ولدها اول فرحتها بكرها الكلابشات مقيده بيده ومن سجن لسجن ومن قضيه لقضيه ماتدري هي تلوم الجوهره ولاتلوم منصور لاول مره تتخلى عن شعور الامومه والمعاتب والصياح كان تشوف ان منصور ماله الا الحكومه تتفاهم معه
~~ الساعه ١م ~~
طلع عبدالعزيز غرفه العيال و وقف على حدود السطح وهو يتامل القمر الساطع بوسط السماء والنجوم حوله وضجيج مشاعره والنيران الي تشب بضلوعه ومتوسطه قلبه وباله الي شارد بعالم ثاني عالم بعيد عن الواقع واتعابه بعيد عن مشاكل اهله ومشاكل منصور بعيد عن سمعه اهله الي بتكون بين الناس بسبب منصور عالمه الخاص عالمه هو والجادل الي ماتغيب عن فكره وخياله كل ليله يسال نفسه <<انا صاحي با الي اسويه؟>>عارف علاقته هو والجادل حرام ويحاول يجاهد يبعد عن دروبها ولكن كل ماينوي التوبه ترميه المقدير والمشاعر على هواء ودروب الجادل بنفس الوقت كان كاره حيللل ل الخال فرحان وافعاله مع البنات بشكل عام خواته او الجادل يكره لمن يسمع كلامه وان البنات عار والي زاد النار بضلوعه من عرف عن سالفه ام الجادل وليه الخال فرحان تركها يحاول مايعطف عليها لاجل مايطيح بهواها اكثر من باب الرحمه والشفقه رغم ان الجادل حب طفولته ولكن مايدري وش الي يرفض حب الجادل يحس وكان فيه حاجز بينهم وبين الحب الي يحاول يبنيه
مسح كفوفه بوجهه بضيق ورجع ل واقعه واقع أهله المؤلم لاول مره بحياته يحس انه مسؤوله لذي الدرجه حاس نفسه بعد وفاه ابوه كبر سنيننننن قدام مو سنه ولا سنتين لا سنين السنين الي خلته يعيش دور الاب والاخ والسند والعزوه ل اخوانه وخواته هذا وهو بدايه شبابه حياته كذا كيف بيكون مصيره بعد سنين ؟ كيف بيكون مصيره بعد ماتخلى عن دراسته ومستقبله لاجل حياه اخوانه وخواته وراحتهم
لاول مره يذرف دموع وهو يمسح على قلبه وكان فعلا محتاج ابوه معه وجنبه لاول مره يسمع شهقات صياحه وكان سود الليالي استقوت عليه وهو صبور
~~ الطايف ~~
بنفس الفكر الشارد والدموع الي تذرف عند بطلتنا وكانهم بنفس حجم الالم والمعانات وبشاعه الشعور شعور مشاكل الاهل وسوالفهم الي مستحيل تخلص ولكن الفرق بينهم عبدالعزيز عنده عزوه وسند بهادنيا بس با النسبه ل الجادل الي كانت وحيده وتصارع المشاكل والالم لوحدها الشخص الي كانت تشوفه ظهر وسند لها هو اول شخص كسر ظهرها ابوها الي كسر ظهرها وهو يناديها ب <العار> ابوها الي كسر ظهرها وهو مكرها بنفسها وبشكلها الانثوي وبصوتها الهادي وبشعرها الطويل والحرير وبملابس النساء الي تغطي جسدها
تتمنى لو انها ولدت وهو يناديها << بكري >>ويحب شكلها الرجالي وبصوت ضخم وبشعر قصير وب ثياب بيضاء
ماتعرف وين المفر من قيد ابوها ماتعرف وين المفر من شعور الاسيره الحره لوهله من الزمان ادركت نفسها وادركت الحياه والكون الي تعيش فيه ولاحست ب الادراك ذا الا بعد ما ابتعدت عن امها الي كانت كل طريق مظلم تمشي فيه الجادل امها تنور لها مصابيح وشموع فيه والحين تسلك دروب طويلهه مظلمه لوحدها بدون نور ام ولا نور اب ولا نور اخوه و سند

ان اصبت فهو من فضل الله وان اخطأت فهو من الشيطان ✨🤎