ရှေးဖြစ်ဟော ဆရာသခင် (MM Translation)

အပိုင်း (၆.၁) ကံမကောင်းတဲ့ ကျန်းဝေ

သူတို့သည် ဗေဒင်ဟောခ၏ ဈေးနှုန်းကို ကြားပြီး‌နောက်တွင် ရုတ်တရက် ရှေ့သို့ မလှမ်းချင်ကြတော့‌ပေ။ သူတို့ရဲ့အမြင်အရတော့ ဒီလိုအရာမျိုးသည် ငွေကြေးအနည်းငယ်သာလျှင် ကုန်ကျသည်။ ယွမ် ၁၀၀၀ က အရမ်းများလွန်း၏။

သို့သော်လည်း သူတို့သည် ထွက်ခွာရန်လည် ဝန်လေးခဲ့ကြသည်။ နောက်ဆုံးတော့ ဒီမိန်းမငယ်လေးက တကယ့် ဆရာသခင် တစ်‌ယောက်ဖြစ်သည်ဟု အန်တီဝမ်က ပြောလိုက်သည်။ သူတို့အားလုံးသည် ထိုအရာက အမှန်ဟုတ် မဟုတ်ဆိုတာ သိချင်နေကြသည်။

လင်းချင်းယင်သည် စိတ်မရှည်‌တော့ပေ။ သူ(မ)သည် ပတ်ဝန်းကျင်ကို လှည့်လည်ကြည့်ပြီးနောက် အနီးနားတွင် ထိုင်နေသော လူငယ်အား ‌ပြောလိုက်သည်။

"မင်းရဲ့ ကံကြမ္မာကို ပြောပြစေချင်သလား"

ရုတ်တရက် ကြည်လင်ပြတ်သားသော အသံတစ်ခုသည် သူ၏ပိတ်မိနေသောကမ္ဘာကို ချိုးဖြတ်လိုက်၏။ လူငယ်သည် သူ၏အတွေးထဲတွင် နစ်မြှုပ်နေခဲ့သည်။

အသံ၏ ဦးတည်ရာဆီသို့ လှမ်းကြည့်လိုက်ရာ သူ့ပတ်ဝန်းကျင်တွင် လူများစွာရှိနေသည်ကို တွေ့လိုက်ရသည်။ ဦးလေးနှင့် အဒေါ်များ အုပ်စုတစ်စုက သူ့ကို စိတ်အားထက်သန်စွာ စိုက်ကြည့်နေသည်ကို မြင်လိုက်ရသည့်အခါ လူငယ်လေးသည် နောက်သို့ ခြေလှမ်းသုံးလှမ်းဆုတ်ကာ ထိတ်လန့်တကြား ဖြစ်သွားခဲ့သည်။

"ဒါက လူအိုကြီးကျန်းရဲ့မြေးမဟုတ်လား"

အဒေါ်တစ်ယောက်သည် သူ့ဘေးနားကလူကို တိုးတိုးလေးပြောလိုက်သည်။ သို့သော် ထိုလူသည် သူ(မ)၏ပါးစပ်ကို အုပ်လိုက်ကာ လင်းချင်ယင်ဆီသို့ ခေါင်းညိတ်ပြခဲ့သည်။ သူ(မ)၏ အဓိပ္ပါယ်မှာ ထင်ရှားလှသည်။ အချက်အလက်များကို မပေါက်ကြား‌စေဖို့ ပြောနေခြင်းဖြစ်၏။

လူငယ်လေး၏ ရှက်ရွံ့သောအသွင်အပြင်နှင့် ထွက်ပြေးချင်လုနီးပါးဖြစ်နေပုံကို မြင်ရ၍ ဖက်တီးဝမ် သည် လင်းချင်းယင်ကို ကူညီရန် အမြန်လှမ်းလာခဲ့သည်။