العيب في بَنِي آدم | مُحاولة سيطرة |

"بداية" ٥

= ولا يا عُمران هو جاب لبسه منين ولا أركن أنتَ دلوقتي أنا هسألُه ... يابو الآداميم عاوز أستفسر عن حاجة .
- قول يا عوف
= لامؤاخذة أنهي شيطان أبن أبالسه إللي بيعملّك لبسك وربنا ده ولا سامو هجرس .
_ يا أحول سامو هجرس بتاع فساتين حريمي .
= متدخلّنيش في تفاصيل أعُمران .. هو ده بس إللي بسمع أسمُه كتير بيعمل لبس .

- هبقى أجيبلك يا عوف إللي أنتَ عاوزُه
= يا حلاوة يجدعان على أخر الزمن هلبس لبس متعفرت .
_ إلَهي يلبسك جِن ما تعرف تخرجُه ولا بالطبل البلدي يا عوف يابن إحسان .
= طب ما تخليها جِنة ينوبك ثواب .
_ جِنة .. أسمها جِنة بقولك إيه يا عوف أخفى من وشي أحنا لسه بنقول يا صُبح .
= ياعم ماشي أنتَ على طول كده مش طايقلي كلمة ، بقولّك إيه يا آدم يخويا ما تاخُدني في سِكتك بدل ما أطلُب أوبر وأنا الصراحة الأيام دي عاوز أحوش عشان أخرُج في العيد .

_ سيبك منه يا آدم وروح أنتَ على شُغلك ، أنتَ أهو بقالك شهر وأظن الدُنيا تمام وعارف تتعامل .
- اه يا عُمران الدُنيا تمام هات إللي بعدُه بقى
= مفقوس أوي .
_ بُص يا آدم أنتَ عمّال تماطل عشان واخِدها لعبة لكن أنا لا .
- ليست لعبة يا أبن آدم إنما الأمر يأخُذ وقتٍ .. دائمًا تستعجلون وتنسوا شئ أسمهُ الصبر

= شوف أهو قلبلك على فيلم الرسالة ، ما تهدى ياعم عُمران فعلًا مش كُل حاجة قَفش كده ولا هتيجي بسرعة ده حُب وده مش عيل خام وعاوز تعلّمه الصياعة ده شيطان يعني مخلوق من نار فبلاش بقى تزعله بدل ما يقلّب تنين ويبوخ في وشنا .

_ ماشي يا عوف .. ماشي يا آدم ، إللي أنتوا شايفينُه أنا هسكُت عشان عارف إن الإتفاق سواء برضاك أو لا لازم يتم .
- وأنتَ متنساش إن في قُربان سواء برضاك أو لا لازم يتقدّم
_ وأنا معترضتش يا آدم .. أنتَ إللي لغاية دلوقتي مقولتليش هو هيكون إيه .
- لمّا يجي وقتُه ، يلا يا عوف عشان أوصلّك في طريقي عشان ألحق قبل الشركة أوصي على الأُضحية
= أُضحية إيه يا آدم مش أنتَ شيطان يابني .

- عوف عشان ننهي الكلام في الموضوع ده .. دلوقتي أنا زيي زيك أنسى خالص إني أهيس طول ما الأتفاق شغال و محدش خَل بيه ، وطلاما أنا أخترت أكون مُسلم يبقى لازم أنفذ شعائر وتعاليم الدين الإسلامي ولو تلاحظ من وقت ما ظهرت وأنا مسيبتش فَرض و كمان بصوم أهو ال ٩ أيام من ذي الحجة ، فأنسى بقى وأتعامل معايا كإني بشري زيك مش أنتَ قولت أنا مخلوق من نار .. أنسى بقى وأتعامل إني زيك مخلوق من طين تمام

= بركاتك يا شيخ آدم .
- طب يلا عشان أنتَ مأخرني
= أتفضل يباشا كفاية إنك هتوصلني باللاند كروزر حجك ، سلام أعُمران هبقى أجيب البصل وأنا جاي .
- يلا يا أهبل

****************

- تمام هو الكيلو بكام يا ريس
- البقري ١٤٠ والجاموسي ١٢٥ يباشا .
- خلّينا في البقري .. ده يعملّه كام
- ده يباشا ٤٥٠ كيلو يعني يخُشله في سبعيناية .
- تمام هاخده
- حلال عليك يباشا وهبعت معاك العربية والرجالة لحد البيت تؤمر بحاجة تاني .
- تُشكر يا ريس وأهو العنوان
- تمام .